ໃນພິທີພາຍຫຼັງທ່ານບຸນແທນທິແກ້ວເຈົ້າແຂວງໄຊຍະບູລີໄດ້ໃຫ້ກຽດເປີດຫົວບົດສອບເສັງແລ້ວທ່ານຍັງໄດ້ເນັ້ນໜັກໃຫ້ນັກ ສອບເສັງທຸກໆຄົນຈົ່ງພະຍາຍາມຄົ້ນຄິດ,ຕຶກຕອງເພື່ອຊອກຫາຄຳຕອບມາຕອບຄຳຖາມໃຫ້ໄດ້ແລະ ອວຍພອນໃຫ້ທຸກຄົນຈົ່ງປະສົບຜົນສໍາເລັດໃນການສອບເສັງຈົບຊັ້ນມ 4 ປີນີ້ໃຫ້ໄປຕໍ່ມັດທະຍົມຕອນປາຍ ໃຫ້ໄດ້ຄະແນນທີ່ສູງ ແລະ ໄດ້ສົມບູນໝົດທຸກຄົນ.

ທ່ານຈັນທະວີວັນນະພາຜົນກໍາມະການພັກເມືອງຫົວໜ້າຫ້ອງການສຶກສາທິການແລະກິລາເມືອງໄຊຍະບູລີໄດ້ໃຫ້ຮູ້ຕື່ມວ່າ: ໂດຍປະຕິບັດຕາມແຜນການຮຽນ-ການສອນ ແລະການສອບສອບເສັງຈົບຊັ້ນມ 4 ທີ່ກະຊວງສຶກສາທິການ ແລະກິລາ ກໍ່ຄືພະແນກສຶກສາທິການແລະ ກິລາແຂວງ ວາງອອກ ເຊິ່ງເມືອງໄຊຍະບູລີ ໄດ້ຈັດຕັ້ງການສອບເສັງຈົບຊັ້ນ ມ4 ໃນທົ່ວເມືອງ ປີນິ້ ມີນ້ອງນັກຮຽນເຂົ້າຮ່ວມສອບເສັງທັງໝົດ 1088ກ່ວານ້ອງ, ຍິງ 540 ກ່ວານ້ອງ, ປະກອບມີ 5 ສູນສອບເສັງຄື: ສູນສອບເສັງ ມ ສ ໄຊຍະບູລີ, ສູນສອບເສັງມສ ເອກະພາບ, ສູນສອບເສັງ ມສ ນາຕາກ, ສູນສອບເສັງ ມສ ພັດທະນາ ແລະສູນສອບເສັງ ມສ ສົງໄຊຍະບູລີ, ມີຫ້ອງສອບເສັງທັງໝົດ 55ຫ້ອງ, ເສັງ 6ວິຊາຄື:ວິຊາພາສາລາວ-ວັນນະຄະດີ, ວິຊາສຶກສາພົນລະເມືອງ, ວິຊາວິທະຍາສາດທໍາມະຊາດ, ວິຊາວິທະຍາສາດສັງຄົມ, ວິຊາຄະນິດສາດ ແລະ ວິຊາພາສາອັງກິດ, ສຳລັບສູນສອບເສັງ ມສ ເອກະພາບ ມີນັກຮຽນເຂົ້າຮ່ວມສອບເສັງທັງໝົດ 355ນ້ອງ, ຍິງ 188ນ້ອງ ທີ່ມາຈາກ 5 ໂຮງຮຽນຄື: ໂຮງຮຽນ ມສ ເອກະພາບ, ມສ ນາຍາວ, ມສ ຊົນເຜົ່າ, ມສ ຜາຊ້າງ ແລະ ມຕ ຫ້ວຍຂົວຫຼວງ ການສອບເສັງຈົບຊັ້ນ ມ4 ຈະດໍາເນີນໄປເປັນເວລາ 3 ວັນຈຶ່ງສໍາເລັດ.

ໂດຍ: ນາລີ ແພງວິໄລ

020 9999 4226