ການ​ແຂ່ງຂັນ​ກິລາ​ປະ​ເພດ​ບານ​ສົ່ງ​ຍິງ - ຊາຍ ຊິງ​ຂັນ​ທ່ານ ​ເຈົ້າ​ແຂວງ ​ໄຊ​ຍະ​ບູລີ ​ປະຈຳ​ປີ 2018 ​ໄດ້​ເລີ່​ມຕົ້ນ​ການ​ແຂ່ງຂັນ​ມາ​ແຕ່​ວັນ​ທີ 27 ກໍລະ​ກົດ 2018 ຫາ​ວັນ​ທີ 14 ສິງຫາ 2018 ການ​ແຂ່ງຂັນ​ປະກອບ​ມີ​ທັງ​ໝົດ 12 ທີ​ມ​ໃນ​ນັ້ນ​ທີ​ມບານ​ສົ່ງ​ຊາຍ 8 ທີ​ມຄື: ທີ​ມກອງ​ບັນຊາ​ການ ປກສ ​ແຂວງ, ກອງ​ບັນຊາ​ການ​ທະຫານ​ແຂວງ, ກອງ​ພົນທະຫານ​ຮາບ​ທີ2, ພະ​ແນ​ກກະສິກຳ ​ແລະ ປ່າ​ໄມ້​ແຂວງ, ທີ​ມຟີ​ດ໋ອມ, ສາ​ມະ​ຄີ​ໄຊ, ບ່າວ​ເມືອງ​ຊ້າງ ​ແລະ ທີ​ມທອງ​ໃບ​ການ​ໄຟຟ້າ; ປະ​ເພດ​ບານ​ສົ່ງ​ຍິງ​ມີ 4 ທີ​ມຄື: ທີ​ມພະ​ແນ​ກສຶກສາ​ທິການ ​ແລະ ກິລາ​ແຂວງ, ກອງ​ບັນຊາ​ການ ປກສ ​ແຂວງ, ກອງ​ບັນຊາ​ການ​ທະຫານ​ແຂວງ ​ແລະ ທີ​ມພະ​ແນ​ກກະສິກຳ ​ແລະ ປ່າ​ໄມ້​ແຂວງ​. ​ໃນ​ການ​ແຂ່ງຂັນ​ຄັ້ງ​ນີ້​ນັກ​ກິລາ​ແຕ່​ລະ​ພາກສ່ວນ​ແມ່ນ​ໄດ້​ເອົາ​ໃຈ​ໃສ່​ປະຕິບັດ​ລະບຽບ, ກະຕິ​ກາ ການ​ແຂ່ງຂັນ​ທີ່​ກຳນົດ​ໄວ້​ຢ່າງ​ເຂັ້ມ​ງວດ. ຮູ້​ໄດ້​, ຮູ້​ເສຍ, ຮູ້​ໃຫ້​ອາ​ໄພ​ເຊີ່ງ​ກັນ ​ແລະ ກັນ ທັງ​ເຫັນ​ໄດ້​ຄວາມ​ສາມັກຄີ​ເປັນ​ເອກະ​ພາບ, ​ເຫັນ​ໄດ້​ຄວາມ​ຜູກ​ແໜ້ນ​ຄວາມ​ສາມັກຄີ​ໄມຕີ​ຈິດ​ມິດຕະພາບ​ເປັນ​ສີ່​ງສຳຄັນ, ທັງ​ເປັນ​ການ​ພັດທະນາ​ຄວາມ​ຮູ້, ຄວາມ​ສາມາດ,ພັດທະນາທັກສະແລະຖອດຖອນບົດຮຽນທາງດ້ານເຕັກນິກແບບແຜນວິທີການຫຼີ້ນຂອງແຕ່ລະທີມ,ອີກຢ່າງໜື່ງກໍ່ເປັນການ

ເລືອກຕົວນັກກິລາເພື່ອເປັນຕົວແທນໃຫ້ແຂວງໄຊຍະບູລີ ເຂົ້າຮ່ວມງານມະຫາກຳກິລາແຫ່ງຊາດຄັ້ງທີ IX ທີ່​ແຂວງ​ຊຽງ​ຂວາງ​ເປັນ​ເຈົ້າພາບ ​ເຊີ່ງ​ຈະ​ໄດ້​ຈັດ​ຂຶ້ນ​​ໃນ​ກາງ​ເດືອນ​ພະຈິກ ປີ 2018 ນີ້. ຜ່ານ​ການ​ແຂ່ງຂັນ​ສາມາດ​ສະຫຼຸບ​ໄດ້​ດັ່ງ​ນີ້: ປະ​ເພດ​ບານ​ສົ່ງ​ຍິງ ທີ1 ​ໄດ້​ແກ່​ທີ​ມ ກອງ​ບັນຊາ​ການ​ທະ​ຫານ​ແຂວງ, ທີ 2 ​ໄດ້​ແກ່​ທີ​ມ ປກສ ​ແຂວງ, ທີ 3 ​ໄດ້​ແກ່​ທີ​ມພະ​ແນ​ກສຶກສາ​ທິການ ​ແລ​ະ ກິລາ​ແຂວງ ທີ 4 ​ໄດ້​ແກ່​ທີ​ມພະ​ແນ​ກກະສິກຳ ​ແລະ ປ່າ​ໄມ້​ແຂວງ; ປະ​ເພດ​ບານ​ສົ່ງ​ຊາຍ ທີ1 ​ໄດ້​ແກ່​ທີ​ມ ກອງ​ບັນຊາ​ການ​ທະຫານ​ແຂວງ, ທີ 2 ​ໄດ້​ແກ່​ທີ​ມ ປກສ ​ແຂວງ, ທີ 3 ​ໄດ້​ແກ່ທີ​ມພະ​ແນ​ກກກະສິກຳ ​ແລະ ປ່າ​ໄມ້​ແຂວງ, ທີ 4 ​ໄດ້​ແກ່​ທີ​ມຟີ​ດ໋ອມ. ລາງວັນທີ1 ​ແມ່ນ​ໄດ້ຮັບ​ຂັນ 1 ໜ່ວຍ ພ້ອມ​ດ້ວຍ​ເງິນສົດ 1,000,000 ກີບ, ທີ 2​ໄດ້​ຮັບ​ເງິນສົດ 800,000 ກີບ, ທີ 3 ​ໄດ້​ຮັບ​ເງິນສົດ 500,000 ກີບ, ທີ 3 ​ໄດ້​ຮັບ​ເງິນສົດ 300,000 ກີບ ​ໃຫ້​ກຽດ​ມອບ​ລາງວັນ​​ໂດຍ​ແມ່ນ​ທ່ານ ​ແພງ​ຊ້ອຍ ​ແພງ​ເມືອງ ຫົວໜ້າ​ພະ​ແນ​ກ​ໂຍທາ​ທິການ ​ແລະ ຂົນ​ສົ່ງ​ແຂວງ​ໄຊ​ຍະ​ບູລີ ປະທານ​ສະຫະພັນ​ບານ​ສົ່ງ​ແຂວງ.

                                                                                    ​ໂດຍ: ນາງ ບົວລະພາ ​ໄຊ​ຍະ​ຫາ

                                                                                    020 9626 7890