ຍິນດີຕ້ອນຮັບສູ່ເວັບໄຊ ພະແນກສຶກສາທິການ ແລະ ກິລາ ແຂວງອັດຕະປື. 5 ຫຼັກມູນການສຶກສາ: ປັນຍາສຶກສາ, ຄຸນສົມບັດສຶກສາ, ແຮງງານສຶກສາ, ພະລະສຶກສາ ແລະ ສິລະປະສຶກສາ. 3 ລັກສະນະ: ລັກສະນະຊາດ, ລັກສະນະວິທະຍາສາດ ແລະ ທັນສະໄໝ, ລັກສະນະມະຫາຊົນ

ຮອງລັດຖະມົນຕີ ສສກ ເຄື່ອນໄຫວຢ້ຽມຢາມ-ຊຸກຍູ້ວຽກງານການສຶກສາ ແລະ ກິລາ ຢູ່ແຂວງອັດຕະປື

photo95ຮອງລັດຖະມົນຕີ ສສກ ເຄື່ອນໄຫວຢ້ຽມຢາມ-ຊຸກຍູ້ວຽກງານການສຶກສາ ແລະ ກິລາ ຢູ່ແຂວງອັດຕະປື. ຮອງລັດຖະມົນຕີ ກະຊວງສຶກສາທິການ ແລະ ກິລາ (ສສກ) ເນັ້ນໃຫ້ຄະນະພັກ-ຄະນະຜູ້ບໍລິຫານການສຶກສາ ແລະ ກິລາແຂວງອັດຕະປື ທຸກຂັ້ນ ເພີ່ມທະວີດ້ານວຽກງານ ດ້ານການເມືອງ ນຳພາແນວຄິດໃຫ້ເລິກເຊີ່ງ ເຖິງຖອງ ແລະ ກວ້າງຂວາງຫລາຍຂື້ນກວ່າເກົ່າ, ພ້ອມນຳໃຊ້ບັນດານິຕິກຳ, ມະຕິຄຳສັ່ງ, ກົດໝາຍ ແລະ ລະບຽບການຕ່າງໆ ເຂົ້າໃນພຶດຕິກຳຕົວຈິງ

 

 

photo96ໃນການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ຂອງແຂວງ ໃຫ້ຫລາຍຂື້ນ ເພື່ອໃຫ້ຕົວເລກ ໃນ 15 ຄາດໝາຍຫລັກ ທີ່ນອນໃນແຜນ ພັດທະນາ ວຽກງານສຶກສາ ແລະ ກິລາ ຂອງແຂວງ ບັນລຸໄດ້ຕາມຄາດໝາຍທີ່ວາງໄວ້ ຢ່າງມີປະສິດທິພາບ ແລະ ປະສິດທິຜົນສູງ ຕາມ 3 ລັກສະນະ ແລະ 5 ຫລັກມູນການສຶກສາ ທີ່ກຊວງສຶກສາທິການ ແລະ ກິລາ ໄດ້ວາງອອກ.ໃນທ້າຍ ອາທິດທີ່ຜ່ານມານີ້ ( 19 ກຸມພາ 2020) ທ່ານ ນາງ ຂັນທະລີ ສີຣີພົງພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ ພ້ອມພະນັກງານຕິດຕາມ ໄດ້ເຄື່ອນໄຫວຢ້ຽມຢາມ ພົບປະ ໂອ້ລົມ ບັນດາພະນັກງານຫລັກແຫລ່ງ ຂະແໜງການສຶກສາ ແລະ ກິລາ ຢູ່ແຂວງອັດຕະປື ເພື່ອຊຸກຍູ້ວຽກງານການສຶກສາ ແລະ ກິລາ ໃຫ້ມີຄວາມເຂັ້ມແຂງຂື້ນຫລາຍກວ່າເກົ່າ, ພິທີຮັບຟັງການໂອລົມດັ່ງກ່າວ ໄດ້ຈັດຂື້ນທີ່ຫ້ອງປະຊຸມພະແນກສຶກສາທິການ ແລະກິລາແຂວງ ໂດຍການເຂົ້າຮ່ວມຂອງ ທ່ານ ຄຳພູນ ແກ້ວມາລາ ຫົວໜ້າພະແນກສຶກສາທິການ ແລະ ກິລາແຂວງ ພ້ອມຄະນະ ຜູ້ບໍລິຫານການສຶກສາ ແລະ ກິລາທຸກຂັ້ນຈາກທຸກພາກສ່ວນທີ່ຂື້ນກັບພະແນກສຶກສາທິການ ແລະ ກິລາ ແຂວງ ພ້ອມດ້ວຍວິຊາການເຂົ້າຮ່ວມ. ໃນພິທີ ທ່ານ ຄຳພູນ ແກ້ວມາລາ ຫົວໜ້າພະແນກສຶກສາທິການ ແລະ ກິລາແຂວງ ໄດ້ລາຍງານ ຜົນການຈັດຕັ້ງປະຕິບັດແຜນພັດທະນາການສຶກສາ ແລະ ກິລາຂອງແຂວງອັດຕະປື ໃຫ້ຮູ້ວ່າ: ໃນໄລຍະ ສົກຮຽນ 2018-2019 ແລະ ໄລຍະ ພາກຮຽນທີ 1 ສົກຮຽນ 2019-2020 ນີ້ ແຂວງອັດຕະປື ສາມາດຍາດໄດ້ຜົນສຳເລັດທີ່ພົ້ນເດັ່ນ ແລະ ບັນຫາຄົງຄ້າງທີ່ຈະຕ້ອງສືບຕໍ່ຈັດຕັ້ງປະຕິບັດຕໍ່ໄປອີກ ເປັນຕົ້ນ ການຈັດຕັ້ງ 15 ຄາດໝາຍຫລັກ ທີ່ກຳນົດໃນແຜນ ຂອງຂະແໜງການສຶກສາ-ກິລາຂອງແຂວງ ມີ 1 ຄາດໝາຍທີ່ບັນລຸໄດ້ລື່ນແຜນ, 6 ຄາດໝາຍ ໃກ້ຈະບັນລຸ, ແລະ 8 ຄາດໝາຍທີ່ຈະຕ້ອງໄດ້ສູ້ຊົນຕື່ມ. ໃນໂອກາດນີ້ ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ ໄດ້ ເນັ້ນໃຫ້ຄະນະພັກ-ຄະນະຜູ້ບໍລິຫານການສຶກສາ ແລະ ກິລາ ທຸກຂັ້ນ ແລະ ທຸກພາກສ່ວນພາຍໃນແຂວງ ໃຫ້ເພີ່ມທະວີ ດ້ານຄຸນທາດການເມືອງ ນຳພາແນວຄິດ ໃຫ້ເລິກເຊີ່ງ ເຖີງຖອງ ແລະ ກວ້າງຂວາງຫລາຍຂື້ນກ່ວາເກົ່າ ໃນຖັນແຖວພະນັກງານຂະແໜງການສຶກສາ ແລະ ຄູ່ຮ່ວມພັດທະນາ ໃນແຕ່ລະຂັ້ນໃຫ້ມີສິນທຳປະຕິວັດ ຢ່າງສູງສົ່ງ, ພ້ອມກໍາແໜ້ນເຊື່ອມຊຶມ ຜັນຂະຫຍາຍ ແລະ ນຳໃຊ້ ບັນດານິຕິກຳ, ມະຕິຄຳສັ່ງ, ກົດໝາຍ ແລະ ລະບຽບການຕ່າງໆ ເຂົ້າໃນພຶດຕິກຳຕົວຈິງ ໃນການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ຂອງແຂວງ ໃຫ້ຫລາຍຂື້ນ, ພ້ອມມີການຕິດຕາມກວດກາ ປະເມີນຜົນ ຢ່າງຕໍ່ເນື່ອງ ຄຽງຄູ່ກັບການຊຸກຍູ້ສົ່ງເສີມ ດ້ານວິຊາການ ແລະ ມີການຈັດຕັ້ງປະຕິບັດ ຂະບວນການ 3 ຂໍ້ແຂ່ງຂັນຂອງຂະແໜງການສຶກສາ ຕິດພັນກັບນ້ຳໃຈຮັກຊາດໃຫ້ກວ້າງ ພ້ອມປະຕິບັດນະໂຍບາຍຕໍ່ຜູ້ມີຜົນງານ ຕາມລະບຽບຫລັກການຢ່າງສົມກຽດ.

 

 

ບົດຂ່າວໂດຍ: ພົມວິຫານ ໄຊຊະນະ
ລົງເວັບໂດຍ: ນິດນີລັນ ສຸວັນນະໄລ