3 ອົງການຈັດຕັ້ງ

ເຂົ້າສູ່ລະບົບ

ຄົ້ນຫາ

Social Media

ຈົດໝາຍຂ່າວ

Publication1

ສະຖິຕິເຂົ້າຊົມ

047808
Today
Yesterday
This Week
Last Week
This Month
Last Month
All days
4
108
695
46067
2197
3043
47808

Your IP: 54.209.202.123
2019-01-19 01:13

 ກອງປະຊຸມຜູ້ບໍລິຫານການສຶກສາຊັ້ນສູງທົ່ວປະເທດ ປະຈໍາສົກຮຽນ 2016-2017 ຄັ້ງວັນທີ 01-03 ມີນາ 2018 ທີ່ ມະຫາວິທະຍາໄລ ຈໍາປາສັກ, ແຂວງ ຈໍາປາສັກ

1

ກອງປະຊຸມຜູ້ບໍລິຫານການສຶກສາຊັ້ນສູງທົ່ວປະເທດ ໄດ້ດໍາເນີນແຕ່ວັນທີ 01-03 ມີນາ 2018  ທີ່ ມະຫາວິທະຍາໄລ ຈໍາປາສັກ, ແຂວງ ຈໍາປາສັກ ໂດຍການໃຫ້ກຽດຢ່າງສູງເປັນປະທານ ຂອງ ທ່ານ ນ. ແສງເດືອນ ຫຼ້າຈັນທະບູນ ກໍາມະການສູນກາງ, ລັດຖະມົນຕີກະຊວງສຶກສາທິການ ແລະ ກິລາ.

ເຂົ້າຮ່ວມກອງປະຊຸມໃນຄັ້ງນີ້ ລວມມີ ທ່ານ ຮອງລັດຖະມົນຕີກະຊວງສຶກສາທິການ ແລະ ກິລາ ຜູ້ຊີ້ນໍາວຽກງານ    ການສຶກສາຊັ້ນສູງ, ຜູ້ບໍລິຫານການສຶກສາຊັ້ນສູງ ເຊິ່ງປະກອບມີ ຄະນະນໍາຈາກມະຫາວິທະຍາໄລແຫ່ງຊາດ, ມະຫາວິທະຍາໄລ ຈໍາປາສັກ, ມະຫາວິທະຍາໄລ ສຸພານຸວົງ, ມະຫາວິທະຍາໄລ ສະຫວັນນະເຂດ, ມະຫາວິທະຍາໄລ ວິທະຍາສາດ ສຸຂະພາບ, ສະຖາບັນການເມືອງ-ການປົກຄອງແຫ່ງຊາດ, ວິທະຍາຄານປ້ອງກັນຊາດໄກສອນ ພົມວິຫານ, ວິທະຍາຄານປ້ອງກັນຄວາມສະຫງົບ,   ກົມຕ່າງໆ ອ້ອມຂ້າງກະຊວງສຶກສາທິການ ແລະ ກິລາ, ສະຖາບັນການສຶກສາຊັ້ນສູງທັງພາກລັດ ແລະ ເອກະຊົນ, ກະຊວງຕ່າງໆ ທີ່ກ່ຽວຂ້ອງ ແລະ ອົງການຈັດຕັ້ງສາກົນ ຈໍານວນທັງໝົດ 153 ທ່ານ, ຍິງ 16 ທ່ານ.

3

ກອງປະຊຸມ ໄດ້ຮັບຟັງການສະເໜີບັນດາເອກະສານສໍາຄັນຕ່າງໆ ຄື:

1.        (ຮ່າງ) ບົດສະຫຼຸບການຈັດຕັ້ງປະຕິບັດວຽກງານການສຶກສາຊັ້ນສູງ ປະຈໍາສົກຮຽນ 2016-2017 ແລະ     (ຮ່າງ) ແຜນພັດທະນາການສຶກສາຊັ້ນສູງ ປະຈໍາສົກຮຽນ 2017-2018.

2.       ນິຕິກໍາກ່ຽວກັບການສຶກສາຊັ້ນສູງ ທີ່ໄດ້ຮັບການຮັບຮອງ ແລະ (ຮ່າງ) ນິຕິກໍາທີ່ພວມປັບປຸງ ເພື່ອເປັນບ່ອນອີງໃນການພັດທະນາວຽກງານການສຶກສາຊັ້ນສູງໃນຕໍ່ໜ້າ ຄື:

(1)      ຂໍ້ຕົກລົງວ່າດ້ວຍການອະນຸມັດການສ້າງຕັ້ງສະຖາບັນການສຶກສາຊັ້ນສູງ

(2)    (ຮ່າງ) ຂໍ້ຕົກລົງວ່າດ້ວຍການທຽບປະກາສະນີຍະບັດ

(3)    (ຮ່າງ) ດໍາລັດວ່າດ້ວຍຕໍາແໜ່ງວິຊາການຄູຢູ່ສະຖາບັນການສຶກສາຊັ້ນສູງ (ສະບັບປັບປຸງ)

3.       ບົດສະຫຼຸບຫຍໍ້ກ່ຽວກັບການຈັດຕັ້ງປະຕິບັດການສອບເສັງ ປະຈໍາສົກຮຽນ 2016-2017 ແລະ ແຜນຈັດຕັ້ງການສອບເສັງ ປະຈໍາສົກຮຽນ 2017-2018

4.       ບົດລາຍງານຫຍໍ້ກ່ຽວກັບການຈັດຕັ້ງກອງປະຊຸມຄັ້ງປະຖົມມະເລີກຂອງສະພາການສຶກສາຊັ້ນສູງແຫ່ງຊາດ ແລະ ແຜນຈັດຕັ້ງປະຕິບັດວຽກງານປະຈໍາປີ 2018

5.       ບົດລາຍງານການຈັດຕັ້ງປະຕິບັດວຽກງານໄລຍະທໍາອິດຂອງໂຄງການສ້າງຄວາມເຂັ້ມແຂງໃຫ້ແກ່ວຽກງານ  ການສຶກສາຊັ້ນສູງ ໄລຍະສອງ (SSHEP).

ກອງປະຊຸມ ໄດ້ຮັບຟັງທິດຊີ້ນໍາຂອງທ່ານປະທານກອງປະຊຸມ ເຊິ່ງມີເນື້ອໃນດັ່ງນີ້:

2

1.     ຜູ້​ບໍລິຫານ​ການ​ສຶກສາ​ຕ້ອງເອົາ​ໃຈ​ໃສ່​ກໍາ​ແໜ້ນ​ແຜນ​ພັດທະນາ​ການ​ສຶກສາ ຄັ້ງ​ທີ VIII , ​           ແຜນ​ພັດທະນາ​ຊັບພະຍາກອນ​ມະນຸດ ​ແລະ ​ແຜນ​ພັດທະນາ​ການ​ສຶກສາ​ຊັ້ນ​ສູງ ​ເພື່ອ​ເລັ່ງ​ໃສ່​ປັບປຸງ​ດ້ານ​ຄຸນ​ນະພາ​ບ​ໃຫ້​ສອດຄ່ອງ ​ແລະ ​ເທົ່າ​ທຽມ​ກັບ​ພາກ​ພື້ນ ​ແລະ ສາກົນ.

2.    ຜັນ​ຂະຫຍາຍ​ຜົນ​ສໍາ​ເລັດ​ຂອງ​ກອງ​ປະຊຸມ​ໃຫຍ່​ ຄັ້ງ​ທີ X ຂອງ​ພັກປະຊາຊົນ​ປະຕິວັດ​ລາວ ​ເວົ້າລວມ, ​ເວົ້າ​ສະ​ເພາະ ​ແມ່ນ​ສືບ​ຕໍ່​ປະຕິ​ຮູບການ​ສຶກສາ​ຊັ້ນ​ສູງ​ເພື່ອ​ໃຫ້​ມີ​ການ​ປ່ຽນ​ແປງ​ໄປ​ສູ່​ຄຸນ​ນະພາ​ບອັນ​ໃໝ່ (Education Transformation) ​ເພື່ອ​ໃຫ້​ສອດຄ່ອງ​ກັບ​ແຜນ​ພັດທະນາ​ເສດຖະກິດ-ສັງຄົມ, ສະພາບ​ຈຸດ​ພິ​ເສດ​ຂອງ​ທ້ອງ​ຖິ່ນ, ຕອບ​ສະໜອງ​ຄວາມ​ຕ້ອງການ​ຂອງ​ຕະຫຼາດ​ແຮງ​ງານ ​ເພື່ອ​ຍົກ​ລະດັບ​ທາງ​ດ້ານ​ຄຸນ​ນະພາ​ບ​ໃຫ້​ສູງ​ຂຶ້ນ.

3.    ສ້າງ ​ແລະ ປັບປຸງ​ນິຕິ​ກໍາ ​ເພື່ອ​ຜັນ​ຂະຫຍາຍ​ກົດ​ໝາຍ​ວ່າ​ດ້ວຍການ​ສຶກສາ, ດໍາລັດ​ວ່າ​ດ້ວຍ​ການ​ສຶກສາ​ຊັ້ນ​ສູງ ​​ເພື່ອ​ເປັນ​ບ່ອນ​ອີງ​ໃນ​ການຈັດ​ຕັ້ງ​ປະຕິບັດ​ວຽກງານ​ການ​ສຶກສາ​ຊັ້ນ​ສູງ ​ເວົ້າ​ລວມ, ​ເວົ້າ​ສະ​ເພາະ ​ເພື່ອ​ຄຸ້ມ​ຄອງ​ສະ​ຖາ​ບັນ​ການ​ສຶກສາ​ຊັ້ນ​ສູງ​ໃຫ້​ມີ​ຄຸນ​ນະພາ​ບ.

4.    ຖອດ​ຖອນ​ບົດຮຽນ​ກ່ຽວ​ກັບ​ພຶດຕິ​ກໍາ​ໃນ​ການຈັດ​ຕັ້ງ​ປະຕິບັດ​ວຽກ​ງານ​ການ​ສຶກສາ​ຊັ້ນ​ສູງ                 ​(ການປະຕິບັດ​ແຜນ​ງານ ​ແລະ ການວາງ​ແຜນ​) ເພື່ອ​ປັບປຸງ​ໃຫ້​ມີ​ຄຸນ​ນະພາ​ບ.

5.    ​ເກັບ​ກໍາຂໍ້​ມູນ, ສໍາ​ຫຼວດຄວາມ​ເປັນຈິງ​ດ້ານ​ການ​ພັດທະນາ​ຊັບພະຍາກອນ​ມະນຸດ ​ໂດຍ​ເລັ່ງ​ໃສ່​ການ​ພັດທະນາ​ຫຼັກສູດ ​ແລະ ການ​ຄົ້ນຄວ້າ​ວິທະຍາສາດ​ໃຫ້​ຫຼາຍ​ຂຶ້ນ ​ເນັ້ນ​ໃສ່​ຮັບປະກັນ​ດ້ານ​ຄຸນ​ນະພາ​ບ.

6.    ສໍາລັບ​ການ​ສຶກສາ​ພາກ​ເອກະ​ຊົນ​ໃຫ້​ເອົາ​ໃຈ​ໃສ່​ສ້າງ​ຄູ-ອາຈານ ຮັບ​ໃຊ້​ສະ​ຖາ​ບັນຂອງ​ຕົນ​ເອງ                ​ເພື່ອ​ຮັບປະກັນ​ຄວາມ​ຍືນ​ຍົງ, ​ແຕ່​ໄລຍະ​ທີ່​ຍັງ​ບໍ່​ທັນ​ມີ​ຄວາມ​ພ້ອມ​ນີ້ ​ໃຫ້​ມີ​ການ​ຊ່ວຍ​ເຫຼືອ​ຈາກ​ພາກ​ລັດ​ໃນ​ຮູບ​ແບບທາງ​ການ ລະຫວ່າງ ມະຫາວິທະຍາ​ໄລ​ກັບ​ສະ​ຖາ​ບັນ​ການ​ສຶກສາ​ຊັ້ນ​ສູງ ​ເພື່ອ​ຮັບປະກັນ​ດ້ານ​ຜົນງານ​ໃຫ້​ແກ່​ຄູ-ອາຈານ.

7.    ​ກົມ​ການ​ສຶກສາ​ຊັ້ນ​ສູງ, ກົມ​ກວດກາ, ສູນປະ​ກັນ​ຄຸນ​ນະພາ​ບການ​ສຶກສາ ​ແລະ ສະ​ຖາ​ບັນ​ການ​ສຶກສາ​ຊັ້ນ​ສູງ ຕ້ອງເອົາ​ໃຈ​ໃສ່​ກວດກາ​ການ​ປອມ​ແປງ​ຄະແນນ ແລະ ປະກາສະນີຍະບັດ, ການ​ສອນ​ບໍ່​ຖືກ​ຕາມ​ຫຼັກສູດຂອງ​ພະນັກງານ ​ແລະ ຄູ-ອາຈານ​ໃນ​ສັງກັດ​ຂອງ​ຕົນ​ເອງ.

8.    ວິທະຍາ​ໄລ​ທັງ​ພາກ​ລັດ ​ແລະ ​ເອກະ​ຊົນ ຕ້ອງ​ເອົາ​ໃຈ​ໃສ່​ປັບປຸງ​ຄຸນ​ນະພາ​ບ ​ໃຫ້ກ້າວໄປສູ່ການ​ຈັດ​ລໍາດັບ (Ranking) ​ເພື່ອ​ກຽມ​ຄວາມ​ພ້ອມໃນການ​ຍົກ​ລະດັບ​ເປັນ​ສະ​ຖາ​ບັນ​ການ​ສຶກສາ​ຊັ້ນ​ສູງ.

9.    ສຸມ​ໃສ່​ພັດທະນາ​ດ້ານ​ຄຸນ​ນະພາ​ບຂອງ​ບັນດາ​ສະ​ຖາ​ບັນ​ການ​ສຶກສາ​ຊັ້ນ​ສູງ​ທີ່​ມີ​ແລ້ວ ​ເພື່ອ​ໃຫ້​ສອດຄ່ອງ ​ແລະ ​ເທົ່າ​ທຽມ​ກັບ​ພາກ​ພື້ນ ​ແລະ ສາກົນ.

10.  ໃຫ້​​ເອົາ​ໃຈ​ໃສ່ຄົ້ນຄວ້າຄໍາ​ຖາມ​ເຈາະ​ຈີ້ມ ຕາມຫົວ​ຂໍ້​ທີ່​ໄດ້​ກໍານົດ​ໃນ​ວາລະ​ກອງ​ປະຊຸມ.

4

ນອກຈາກນີ້, ກອງປະຊຸມ ຍັງໄດ້ມີການລະດົມແນວຄວາມຄິດກ່ຽວກັບ:

1.     ການກະກຽມປັບປຸງຫຼັກສູດ ເພື່ອສາມາດສ້າງຊັບພະຍາກອນມະນຸດອອກໃຫ້ໄດ້ 3 ສ (ສາມາດເຮັດວຽກໄດ້ເລີຍ, ສາມາດເປັນຜູ້ປະກອບກິດຈະການໄດ້ ແລະ ສາມາດເຊື່ອມໂຍງກັບພາກພື້ນ ແລະ ສາກົນໄດ້)

2.    ການສ້າງຄວາມເຂັ້ມແຂງທາງດ້ານການເງິນໃຫ້ແກ່ສະຖາບັນການສຶກສາຊັ້ນສູງ

ຜ່ານການຄົ້ນຄວ້າ, ພິຈາລະນາ ແລະ ປະກອບຄໍາຄິດເຫັນ ຕໍ່ບັນດາເອກະສານດັ່ງກ່າວຂ້າງເທິງ, ກອງປະຊຸມເຫັນດີຮັບຮອງເປັນມະຕິດັ່ງນີ້:

1.     ເຫັນດີເປັນເອກະພາບ ແລະ ຮັບເອົາຈິດໃຈຄໍາເຫັນຊີ້ນໍາຂອງ ທ່ານ ນ. ແສງເດືອນ ຫຼ້າຈັນທະບູນ ກໍາມະການສູນກາງ, ລັດຖະມົນຕີກະຊວງສຶກສາທິການ ແລະ ກິລາ ເພື່ອຜັນຂະຫຍາຍເຂົ້າໃນການຈັດຕັ້ງປະຕິບັດວຽກງານຕົວຈິງ.

2.    ເຫັນດີເປັນເອກະພາບໂດຍພື້ນຖານຕໍ່ (ຮ່າງ) ບົດສະຫຼຸບການຈັດຕັ້ງປະຕິບັດວຽກງານການສຶກສາຊັ້ນສູງ ປະຈໍາສົກຮຽນ 2016-2017 ແລະ (ຮ່າງ) ແຜນພັດທະນາການສຶກສາຊັ້ນສູງ ປະຈໍາສົກຮຽນ 2017-2018 ແລະ ມອບໃຫ້ກົມການສຶກສາຊັ້ນສູງສືບຕໍ່ປັບປຸງຮ່າງເອກະສານດັ່ງກ່າວ ຕາມການປະກອບຄໍາເຫັນຂອງຜູ້ແທນກອງປະຊຸມ     ຕາມຄວາມເໝາະສົມ.

3.    ເຫັນດີເປັນເອກະພາບໂດຍພື້ນຖານຕໍ່ (ຮ່າງ) ຂໍ້ຕົກລົງວ່າດ້ວຍການທຽບປະກາສະນີຍະບັດ ແລະ (ຮ່າງ) ດໍາລັດ    ວ່າດ້ວຍຕໍາແໜ່ງວິຊາການຄູຢູ່ສະຖາບັນການສຶກສາຊັ້ນສູງ (ສະບັບປັບປຸງ), ທິດທາງແຜນການຈັດຕັ້ງການສອບເສັງ ປະຈໍາສົກຮຽນ 2018-2019. ມອບໃຫ້ກົມການສຶກສາຊັ້ນສູງສືບຕໍ່ປັບປຸງຕາມການສະເໜີຂອງກອງປະຊຸມ ແລ້ວສະເໜີຄະນະນໍາກະຊວງສຶກສາທິການ ແລະ ກິລາ ພິຈາລະນາອະນຸມັດຕາມຂັ້ນຕອນຕໍ່ໄປ.

4.    ການສະໜອງທຶນການສຶກສາເຫັນດີຕາມຫຼັກການຮັບນັກສຶກສາ 80% ​ທີ່ສອບເສັງໄດ້ຕ້ອງຈ່າຍ​ຄ່າ​ຮຽນ, ສ່ວນນັກສຶກສາ 20% ແມ່ນທຶນສົ່ງເສີມການສຶກສາຂອງລັດຖະບານຕໍ່ຜູ້ທີ່ຮຽນເກັ່ງ, ຜູ້ດ້ອຍໂອກາດ, ເພດຍິງ, ຊົນເຜົ່າຈາກເຂດຫ່າງໄກສອກຫຼີກ. ສໍາລັບເປົ້າໝາຍ ແລະ ອັດຕາສ່ວນ ຈະໄດ້ສະເໜີຕໍ່ຄະນະນໍາກະຊວງສຶກສາທິການ ແລະ ກິລາ ຄົ້ນຄ້ວາ ແລະ ພິຈາລະນາອອກນະໂຍບາຍລະອຽດ.

5.    ເຫັນດີປັບປຸງຫຼັກສູດໃຫ້ໄປຕາມທິດຫຼຸດຜ່ອນພາກທິດສະດີ ເພີ້ມພາກປະຕິບັດຕົວຈິງໃຫ້ເໝາະສົມ,     ຄົ້ນຄວ້າເພີ້ມບາງວິຊາຮຽນທີ່ມີຄວາມຈໍາເປັນ, ສາມາດຖ່າຍໂອນໜ່ວຍກິດເຊິ່ງກັນແລະກັນໄດ້ ໂດຍລິເລີ້ມຢູ່ພາຍໃນ 4 ມະຫາວິທະຍາໄລກ່ອນ ເມື່ອມີຄວາມພ້ອມຈຶ່ງຂະຫຍາຍອອກສູ່ສະຖາບັນການສຶກສາຊັ້ນສູງແຫ່ງອື່ນ ທັງພາຍໃນ ແລະ ຕ່າງປະເທດ. ມອບໃຫ້ແຕ່ລະມະຫາວິທະຍາໄລແຕ່ງຕັ້ງຄະນະຮັບຜິດຊອບປັບປຸງຫຼັກສູດຂອງຕົນເອງ.

6.    ເຫັນດີໃຫ້ແຕ່ລະມະຫາວິທະຍາໄລ ແລະ ສະຖາບັນການສຶກສາຊັ້ນສູງ ຄົ້ນຄວ້າກວດກາຄືນຄວາມພ້ອມ, ທ່າແຮງ, ບັນດານິຕິກໍາ ແລະ ລະບຽບການຕ່າງໆຂອງສະຖາບັນຕົນເອງ ແລະ ພາກສ່ວນທີ່ກ່ຽວຂ້ອງ     ເພື່ອເປັນຂໍ້ມູນໃນການຄົ້ນຄວ້າພິຈາລະນາໃນກອງປະຊຸມຄັ້ງຕໍ່ໄປ.

7.    ກອງປະຊຸມຜູ້ບໍລິຫານການສຶກສາຊັ້ນສູງທົ່ວປະເທດຄັ້ງຕໍ່ໄປເຫັນດີໃຫ້ຈັດຕັ້ງທີ່ມະຫາວິທະຍາໄລແຫ່ງຊາດ, ນະຄອນຫຼວງວຽງຈັນ.