ພະແນກ ສກຂ ຫົວພັນ ຈັດກິດຈະກຳແຂ່ງຂັນກິລາມິດຕະພາບ ສ້າງຂະບວນການຕ້ອນຮັບວັນໄຂສົກຮຽນໃໝ່ 2018-2019 ຢ່າງຄຶກຄື້ນ

ເພື່ອເປັນສ້າງຂະບວນການຕ້ອນຮັບວັນໄຂສົກຮຽນໃໝ່ ສົກຮຽນ 2018-2019 ທີ່ຈະມາເຖິງນີ້ ພະແນກສຶກສາທິການ ແລະ ກິລາແຂວງຫົວພັນ ( ສກຂ ) ໄດ້ຈັດກິດຈະກຳແຂ່ງຂັນກິລາບານເຕະ ຊາຍ-ຍິງ ມິດຕະພາບ ຂຶ້ນຢູ່ທີ່ເດີ່ນບານເຕະຫຍ້າທຽມ ຈະເລີນຊຳ ໃນຕອນແລງວັນທີ 31 ສິງຫາ 2018 ຜ່ານມາ ໂດຍເປັນກຽດການເຂົ້າຮ່ວມຂອງ ທ່ານ ມົນທອງ ລຽນຕິຄຸນ ຫົວໜ້າພະແນກ ສກຂ ຫົວພັນ ພ້ອມດ້ວຍຄະນະມີຫົວໜ້າຫ້ອງການສຶກສາທິການ ແລະ ກິລາເມືອງຊຳເໜືອ ( ສກມ )ຄະນະອຳນວຍການໂຮງຮຽນພະນັກງານຄູອາຈານ ຈາກໂຮງຮຽນອ້ອມຂ້າງແຂວງເຂົ້າຮ່ວມຢ່າງເປັນຂະບວນການຄຶກຄື້ນມ່ວນຊື່ນການແຂ່ງຂັນກິລາມິດຕະພາບໃນຄັ້ງນີ້ແມ່ນໄດ້ແຂ່ງຂັນກິລາປະເພດ ບານເຕະຍິງ-ຊາຍ ໂດຍແມ່ນ: ທີມ ພະແນກ ສກຂ ພົບກັບ ທີມ ໂຮງຮຽນອ້ອມຂ້າງແຂວງ ຜ່ານການແຂ່ງຂັນຕົວຈິງສາມາດສະຫຼຸບຜົນໄດ້ຄື: ທີມບານເຕະຊາຍ ແມ່ນທີມ ໂຮງຮຽນອ້ອມຂ້າງແຂວງ ຊະນະ 7-5 ປະຕູ ແລະ ທີມຍິງ ແມ່ນທີມ ພະແນກ ສກຂ ຊະນະ 4-1 ປະຕູ
ຈຸດປະສົງຂອງການຈັດງານໃນຄັ້ງນີ້ແມ່ນເພື່ອເປັນການສ້າງຂະບວນການຂໍ່ານັບຮັບຕ້ອນວັນໄຂສົກ ຮຽນໃໝ່ ສົກຮຽນ 2018-2019 ທີ່ຈະເປີດຂຶ້ນຢ່າງເປັນທາງການໃນຕອນເຊົ້າວັນທີ ກັນຍາ 2019 ນີ້ ໂດຍເປັນເອກະພາບໃນທົ່ວປະເທດ ໃຫ້ເຕັມໄປດ້ວຍຄວາມໝາຍຄວາມສຳຄັນຢ່າງເລິກເຊິ່ງ ແລະ ເຕັມໄປດ້ວຍບັນຍາກາດຄຶກຄື້ນມ່ວນຊື່ນຄືກັບສົກຮຽນຜ່ານມາ ທັງນີ້ກໍ່ເພື່ອເປັນການກະຕຸກຊຸກຍູ້ໃຫ້ແກ່ຄະນະພັດທະນາການສຶກສາຂັ້ນແຂວງຂັ້ນເມືອງ ແລະ ຂັ້ນບ້ານ ພ້ອມດ້ວຍນ້ອງຫຼານນັກຮຽນແຕ່ລະຊັ້ນຮຽນ ໃນທົ່ວແຂວງຫົວພັນ ໃຫ້ກຽມຈິດກຽມໃຈກຽມຄວາມພ້ອມທຸກດ້ານ ເພື່ອກ້າວເຂົ້າສູ່ວັນໄຂສົກຮຽນ ໃໝ່ ສົກຮຽນ 2018-2019 ທີ່ຈະມາເຖິງນີ້ ອີກອັນໜຶ່ງກໍ່ເພື່ອເຮັດໃຫ້ການຈັດຕັ້ງປະຕິບັດວຽກງານ ການຮຽນ-ການສອນ ໃຫ້ໄດ້ຮັບໝາກຜົນ ແລະ ບັນລຸເປົ້າໝາຍ ທີ່ຂັ້ນເທິງວາງອອກ

You May Also Like

Leave a Reply

Your email address will not be published. Required fields are marked *