ເມືອງຊຳເໜືອ ກຽມປະກາດ ຈົບຊັ້ນມັດທະຍົມຕອນຕົ້ນ

ເມືອງຊຳເໜືອ ແຂວງຫົວພັນ ມີຄວາມພ້ອມ ເກືອບ 100% ແລ້ວທີ່ຈະຈັດພິທີ ປະກາດຈົບຊັ້ນມັດທະຍົມຕອນຕົ້ນບຳລຸງ ທົ່ວເມືອງ ໃນທ້າຍເດືອນ ມີນາ 2019 ນີ້ເຊິ່ງເປັນເມືອງທີ 10 ຂອງ ແຂວງຫົວພັນ.ໃນຕອນບ່າຍວັນທີ 11 ມີນາ 2019 ນີ້ ທ່ານ ນິນທອງ ທອງລາວອນ ຮັກສາການ ຫົວໜ້າຫ້ອງການສຶກສາທິການ ແລະ ກິລາ ເມືອງຊຳເໜືອທັງເປັນຄະນະຮັບຜິດຊອບຈັດງານໃນຄັ້ງນີ້ ໄດ້ໃຫ້ສຳພາດກັບທີມງານຂ່າວສານ ພະແນກສຶກສາທິການ ແລະ ກິລາ ແຂວງຫົວພັນ ໃຫ້ຮູ້ວ່າ: ການຈັດຕັ້ງປະຕິບັດ ການຮຽນ-ການສອນ ການສຶກສານອກໂຮງຮຽນ ຂອງ ເມືອງຊຳ   ເໜືອ ໄດ້ເລີ່ມຈັດຕັ້ງປະຕິບັດນັບແຕ່ສົກຮຽນ 2012- 2013 ຈົນມາເຖິງ ສົກຮຽນ 2017-2018 ເມືອງຊຳເໜືອ ໄດ້ສຳເລັດ ການຮຽນ-ການສອນ ຈຳນວນ 109 ບ້ານ ໃນຂອບເຂດທົ່ວເມືອງ ໂດຍມີຜູ້ຮຽນທັງໝົດ 491 ຄົນ, ຍິງ 225 ຄົນ, ປະເມີນຜ່ານ 480 ຄົນ ເທົ່າກັບ 97,75%, ຍັງ 11 ຄົນບໍ່ຜ່ານ ເທົ່າກັບ 2,24% ຍ້ອນການຮຽນບໍ່ປົກກະຕິ ແລະ ຂາດການເຂົ້າຮ່ວມປະເມີນ ເຊິ່ງຈະໄດ້ສືບຕໍ່ບຳລຸງຄືນໃນສົກຕໍ່ໄປ, ມາຮອດປະຈຸບັນນີ້ ເມືອງຊຳເໜືອ ໄດ້ມີຄວາມພ້ອມທຸກດ້ານແລ້ວໂດຍສະເລ່ຍປະມານ 95% ເປັນຕົ້ນແມ່ນ: ດ້ານພິທີການ, ດ້ານເນື້ອໃນບົດສະຫຼຸບລາຍງານ, ດ້ານງົບປະມານ, ດ້ານສິລະປະການສະແດງ ແລະ ດ້ານກ້ອນກຳລັງແຕ່ລະກຸ່ມບ້ານທົ່ວເມືອງ ພິເສດ: ການສະແດງໃນມື້ຊຸມນຸມ ຄະນະຮັບຜິດຊອບ ໄດ້ໃຊ້ນັກສະແດງຈຳນວນ 500 ນ້ອງເຊິ່ງບໍ່ເຄີຍມີມາກ່ອນເພື່ອສະແດງໃສ່ມື້ເປີດພິທີໃຫຍ່ຍິ່ງໃຫຍ່ ແລະ ສວຍງາມ, ປະຈຸບັນນີ້ກໍ່ໄດ້ມີການຝຶກຊ້ອມປົກກະຕິ ແລະ ໄດ້ສ້າງຂະບວນການແຂ່ງຂັນກິລາ ຊີງຂັນທ່ານເຈົ້າເມືອງຊຳເໜືອ ປະເພດ ກິລາເປຕັງຍິງ-ຊາຍ ໂດຍມີ 60 ທີມເຂົ້າຮ່ວມໃນນັ້ນມີທີມຍິງ 21 ທີມເຂົ້າຮ່ວມແຂ່ງຂັນ ເພື່ອຕ້ອນຮັບວັນດັ່ງກ່າວໃຫ້ມີຂະບວນການ ແລະ ບັນຍາກາດຄືກຄື້ນມ່ວນຊື່ນ, ໂອກາດດຽວກັນ ທ່ານ ນິນທອງ ທອງລາວອນ ຮັກສາການ ຫົວໜ້າຫ້ອງການສຶກສາທິການ ແລະ ກິລາ ເມືອງຊຳເໜືອ ຍັງໄດ້ຮຽກຮ້ອງໃຫ້ການນຳທຸກຂັ້ນ ຕະຫຼອດຮອດ ພໍ່-ແມ່ ປະຊາຊົນບັນດາເຜົ່າ ຈົ່ງພ້ອມກັນຮ່ວມເປັນເຈົ້າພາບທີ່ດີ, ພ້ອມກັນເຂົ້າຮ່ວມງານທັນຕາມກຳນົດເວລາທີ່ວາງຢ່າງເຂັ້ມງວດ ທັງນີ້ກໍ່ເພື່ອເຮັດໃຫ້ພິທີ ປະກາດ ເມືອງຊຳເໜືອ ເປັນເມືອງ ຈົບຊັ້ນມັດທະຍົມຕອນຕົ້ນບຳລຸງ ທົ່ວເມືອງໃນຄັ້ງນີ້ຈົບລົງສົມບູນແບບ ແລະ ໄດ້ຕາມລະດັບຄາດໝາຍທີ່ວາງໄວ້

You May Also Like

Leave a Reply

Your email address will not be published. Required fields are marked *