ເມືອງສຳພັນ ປະກາດຈົບຊັ້ນ ມ.ຕົ້ນບຳລຸງ ເປັນອັນດັບ 7 ແຂວງຜົ້ງສາລີ

 ເມືອງສຳພັນ ແຂວງຜົ້ງສາລີ ປະກາດຈົບຊັ້ນມັດທະຍົມຕອນຕົ້ນບຳລຸງສຳລັບປະຊາຊົນທົ່ວເມືອງ ເປັນອັນດັບທີ 7 ຂອງແຂວງ (ເປັນເມືອງສຸດທ້າຍ) ແລະ ເປັນອັນດັບທີ 143 ຂອງປະເທດ ຢ່າງເປັນທາງການ ພາຍຫຼັງໄດ້ມີການຈັດຕັ້ງປະຕິບັດການຮຽນການສອນບຳລຸງໃຫ້ກຸ່ມເປົ້າໝາຍສຳເລັດ.

ພິທີປະກາດດັ່ງກ່າວ, ໄດ້ມີຂຶ້ນເມື່ອວັນທີ 13 ກຸມພາ ຜ່ານມາ ທີ່ສະໂມສອນໃຫຍ່ ແຂວງຜົ້ງສາລີ, ໂດຍເປັນກຽດເຂົ້າຮ່ວມຕັດແຖບຜ້າຂອງທ່ານ ຮສ.ປອ ພຸດ ສິມມາລາວົງ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ທອງສີ ເສົາສຸລີພົມ ຮອງເຈົ້າແຂວງຜົ້ງສາລີ ຜູ້ຊີ້ນຳວຽກງານຂົງເຂດວັດທະນະທຳສັງ-ຄົມຂັ້ນແຂວງ, ທ່ານ ສົມຈີດ ຫັບລະກອນ ເຈົ້າເມືອງສຳພັນ, ທ່ານ ພອນໄຊ ອ່ອນສາ ຫົວໜ້າພະແນກສຶກສາທິການ ແລະ ກິລາແຂວງ, ມີຜູ້ຕາງໜ້າຈາກກົມການສຶກສານອກໂຮງຮຽນ, ຮອງເຈົ້າເມືອງ, ຫົວໜ້າຫ້ອງການສຶກສາທິການ ແລະ ກິລາ ຈາກ 7 ເມືອງ, ບັນດາ ກຳມະການປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ ຕະຫຼອດຮອດຜູ້ບໍລິຫານການສຶກສາ, ຄູອາຈານພາຍໃນເມືອງເຂົ້າຮ່ວມເປັນສັກຂີພິຍານ.

      ໃນພິທີ, ທ່ານ ແອ ຍິນທະນົງ ຫົວໜ້າຫ້ອງການສຶກສາທິການ ແລະ ກິລາເມືອງ ໄດ້ລາຍງານການຈັດຕັ້ງປະຕິບັດການຮຽນການສອນບຳລຸງຍົກລະດັບການສຶກສາຈົບຊັ້ນມັດທະຍົມຕອນຕົ້ນແລະ ທິດທາງແຜນການຂອງວຽກງານການສຶກສານອກໂຮງຮຽນ, ຊຶ່ງທົ່ວເມືອງສໍາພັນມີ 10 ກຸ່ມບ້ານພັດທະນາ, ມີ 63 ບ້ານ, ມີ 4.366 ຫຼັງຄາ, ມີ 5.289 ຄອບຄົວ. ວຽກງານການສຶກສານອກໂຮງຮຽນ ພາຍຫຼັງປະກາດຈົບຊັ້ນປະຖົມບຳລຸງປີ 2013 ເປັນຕົ້ນມາ ຊຶ່ງເປັນເມືອງທີ 7 ຂອງແຂວງ, ໄດ້ສ້າງເງືອນໄຂໃຫ້ແກ່ການສືບຕໍ່ບຳລຸງຍົກລະດັບຊັ້ນມັດທະຍົມຕອນຕົ້ນ ໂດຍໄດ້ເລີ່ມຈັດຕັ້ງການຮຽນການສອນມາແຕ່ສົກຮຽນ 2013-2014 ແລະ ຮອດສົກຮຽນ 2018-2019 ການບຳລຸງຍົກລະດັບຊັ້ນມັດທະຍົມຕອນຕົ້ນສຳລັບປະຊາຊົນ ເຫັນວ່າມີຫຼາຍດ້ານທີ່ພົ້ນເດັ່ນ ໂດຍສະເພາະ ລະດັບຄວາມຮູ້ຄວາມເຂົ້າໃຈ, ຄວາມຕື່ນຕົວ, ຄວາມເປັນເຈົ້າການ ແລະ ອື່ນໆ ລວມມີກຸ່ມເປົ້າໝາຍເຂົ້າຮຽນທັງໝົດ 7.689 ຄົນ, ຍິງ 3.708 ຄົນ. ໃນນັ້ນ, ຈົບສາມັນ 5.694 ຄົນ, ຍິງ 2.799 ຄົນ, ຈົບບຳລຸງ 1.939 ຄົນ, ຍິງ 870 ຄົນ ສະເລ່ຍບັນລຸໄດ້ 97,19%, ແລະ ຍັງເຫຼືອກຸ່ມເປົ້າໝາຍ 56 ຄົນ, ຍິງ 39 ຄົນ ທີ່ຍັງບໍ່ຈົບ ຍ້ອນປະລະການຮຽນຕາມສະພາບແວດລ້ອມອື່ນໆ ເຊັ່ນ: ການສ້າງຄອບຄົວ, ການຍົກຍ້າຍໄປຕ່າງເມືອງ, ຕ່າງແຂວງ, ການໄປຊອກວຽກເຮັດງານທຳຢູ່ບ່ອນອື່ນ ແລະ ບັນຫາດ້ານສຸຂະພາບຈຳນວນໜຶ່ງ.

ນອກຈາກນີ້, ຕາງໜ້າອົງການປົກຄອງບ້ານ, ຄູສອນບຳລຸງ ແລະ ນັກຮຽນບຳລຸງ ໄດ້ປະກອບຄຳເຫັນກ່ຽວກັບການຮຽນການສອນບໍາລຸງຍົກລະດັບການສຶກສານອກໂຮງຮຽນ ແລະ ຜ່ານຂໍ້ຕົກລົງຂອງທ່ານລັດຖະມັນຕີ ກະຊວງສຶກສາທິການ ແລະ ກິລາ ສະບັບເລກທີ 165/ສສກ ວ່າດ້ວຍການປະກາດເມືອງສໍາພັນ ແຂວງຜົ້ງສາລີ ເປັນເມືອງຈົບຊັ້ນມັດທະຍົມຕອນຕົ້ນບຳລຸງ, ພ້ອມທັງມອບໃບຢັ້ງຢືນຈົບຊັ້ນມັດທະຍົມຕອນຕົ້ນບຳລຸງໃຫ້ເມືອງສຳພັນ ຢ່າງເປັນທາງການ.

ໃນໂອກາດນີ້, ທ່ານ ຮສ.ປອ ພຸດ ສິມມາລາວົງ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ໄຊຊະນະ ທີ່ທາງອົງການປົກຄອງເມືອງ ກໍຄືຜູ້ບໍລີຫານການສຶກສາເມືອງຍາດມາໄດ້ຕະຫຼອດໄລຍະທີ່ຜ່ານມາ, ພ້ອມທັງເນັ້ນໝັກ ແລະ ຮຽກຮ້ອງໃຫ້ເອົາໃຈໃສ່ໃນການເຊື່ອມຊຶມແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ແຜນພັດທະນາເສດຖະກິດ-ສັງຄົມໃນແຕ່ລະໄລຍະ ໂດຍສະເພາະແມ່ນມະຕິກອງປະຊຸມໃຫຍ່ຂອງພັກ, ແຂວງ ແລະ ເມືອງໃຫ້ຖັນແຖວຄູອາຈານ ແລະ ນ້ອງນັກຮຽນ ຕະຫຼອດຮອດປະຊາຊົນບັນດາເຜົ່າ ໄດ້ຮັບຮູ້ ແລະ ເຂົ້າໃຈເປັນເອກະພາບຢ່າງທົ່ວເຖິງ, ສືບຕໍ່ຈັດຕັ້ງປະຕິບັດແຜນຍຸດທະສາດການປະຕິຮູບລະບົບການສຶກສາແຫ່ງຊາດຢ່າງມີຫຼັກການ ແລະ ໃຫ້ໄປຕາມ 3 ຫຼັກສະນະ ທັງຮັບປະກັນໃຫ້ໄປຕາມ 5 ຫຼັກມູນຂອງການສຶກສາ ແລະ ເອົາໃຈໃສ່ຍົກລະດັບຄຸນນພາບການສຶກສາໃຫ້ມີບາດກ້າວ, ຫັນປ່ຽນຢ່າງເປັນຮູບປະທຳຫຼາຍຂຶ້ນ, ສືບຕໍ່ກໍ່ສ້າງແຜນຂະຫຍາຍການຮຽນການສອນ ໂດຍສຸມໃສ່ກຸ່ມເປົ້າໝາຍຊັ້ນມັດທະຍົມຕົ້ນຕອນບຳລຸງຢູ່ໃນບາງບ້ານທີ່ຍັງຕົກຄ້າງໃຫ້ສຳເລັດຕາມຄາດໝາຍທີ່ວາງໄວ້, ສືບຕໍ່ເອົາໃຈໃສ່ປັບປຸງກົງຈັກການຈັດຕັ້ງ ກໍຄືລະບົບກົນໄກການຄຸ້ມຄອງການສຶກສາໃນທົ່ວຂັ້ນທັງພາກລັດ ແລະ ເອກະຊົນໃຫ້ມີຄວາມໝັກແໜ້ນ ແລະ ເຂັ້ມແຂງ, ເອົາໃຈໃສ່ການແບ່ງຂັ້ນຄຸ້ມຄອງຕາມຂະແໜງການສາຍຕັ້ງສາຍຂວາງໃຫ້ລະອຽດຈະແຈ້ງ ເພື່ອມອບຄວາມຮັບຜິດຊອບໃຫ້ແຕ່ລະຂັ້ນຊີ້ນຳ ແລະ ຈັດຕັ້ງປະຕິບັດຕາມພາລະບົດບາດຂອບເຂດສິດ ແລະ ໜ້າທີ່ດ້ວຍຄວາມຮັບຜິດຊອບສູງ, ຈົ່ງພ້ອມກັນສືບຕໍ່ການແຂ່ງຂັ້ນເປີດບັ້ນການຮຽນການສອນບຳລຸງຊັ້ນມັດທະຍົມຕອນປາຍໃຫ້ສຳເລັດຕາມຄາດໝາຍຂອງເມືອງ ໃນຊຸດປີ 2025 – 2030.

ຕອນທ້າຍພິທີ, ຄະນະປະທານຍັງໄດ້ພ້ອມກັນຕັດແຖບຜ້າ, ເປີດປ້າຍ ແລະ ລັ້ນຄ້ອງ 9 ບາດ ເພື່ອປະກາດເມືອງສຳພັນຈົບຊັ້ນມັດທະຍົມຕົ້ນຕອນບຳລຸງສຳລັບປະຊາຊົນທົ່ວເມືອງຢ່າງເປັນທາງການ.

ໂດຍ: ແສງຄຳ ສາລີວັນ

ຜູ້ບໍລິຫານການສຶກສາ-ກິລາ ທົ່ວແຂວງໄຊຍະບູລີ ຕີລາຄາຄືນວຽກງານ ພ້ອມແກ້ໄຂການປະລະການຮຽນ

 ຜູ້ບໍລິຫານການສຶກສາ ແລະ ກິລາ ທົ່ວແຂວງໄຊຍະບູລີ ໄດ້ຈັດກອງປະຊຸມ ປະຈຳປີ 2019 ແລະ ການແກ້ໄຂບັນຫາການປະລະການຮຽນ ໃນວັນທີ 12 ກຸມພາ 2020 ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ ໂດຍການເປັນປະທານຂອງທ່ານ ນາງ ບຸນພັກ ອິນທະປັນຍາ ຄະນະປະຈໍາພັກແຂວງ ຮອງເຈົ້າແຂວງ ຜູ້ຊີ້ນໍາຂົງເຂດວັດທະນະທໍາ-ສັງຄົມ, ມີບັນດາເຈົ້າເມືອງ-ຮອງເຈົ້າເມືອງ, ປະທານຄະນະກໍາມາທິການສຶກສາສົງແຂວງ, ຫົວໜ້າ-ຮອງຫົວໜ້າພະແນກການອ້ອມຂ້າງແຂວງ, ປະທານກໍາມະບານແຂວງ, ປະທານສະຫະພັນແມ່ຍິງແຂວງ ແລະ ເລຂາຄະນະບໍລິຫານງານຊາວໜຸ່ມແຂວງ, ຫ້ອງການສຶກສາທິການ ແລະ ກິລາເມືອງ, ຜູ້ອຳ​ນວຍ​ການໂຮງຮຽນອ້ອມຂ້າງ, ຫົວໜ້າ-ຮອງຫົວໜ້າຂະແໜງ-ສູນ ແລະ ວິຊາການທີ່​ກ່ຽວຂ້ອງເຂົ້າຮ່ວມ 66 ທ່ານ.

ໃນກອງປະຊຸມຄັ້ງນີ້, ໄດ້ຮັບຟັງການເຜີຍແຜ່ຜົນສໍາເລັດກອງປະຊຸມຜູ້ບໍລິຫານການສຶກສາ ແລະ ກິລາທົ່ວປະເທດ ປະຈໍາປີ 2019 ຂອງກະຊວງສຶກສາທິການ ແລະ ກິລາ, ຮັບຟັງບົດສະຫຼຸບການຈັດຕັ້ງປະຕິບັດແຜນງານຈຸດສຸມປີ 2019, ແຜນງານຈຸດສຸມປະຈໍາປີ 2020, ບົດລາຍງານສະພາບການປະລະການຮຽນສາຍມາມັນໄລຍະຜ່ານມາ. ຫຼັງຈາກນັ້ນ, ຜູ້ແທນກອງປະຊຸມຍັງໄດ້ປະກອບຄໍາຄິດ-ຄໍາເຫັນ ກ່ຽວກັບມາດຕະການແກ້ໄຂບັນຫາການປະລະການຮຽນ ແລະ ຮັບຟັງລາຍງານກ່ຽວກັບການກະກຽມຄວາມພ້ອມເຂົ້າຮ່ວມງານມະຫາກໍາກິລາແຫ່ງຊາດ ຄັັ້ງທີ XI ທີ່ແຂວງຊຽງຂວາງ, ພ້ອມທັງ​ໄດ້ສຸມໃສ່ບັນຫາ, ສາເຫດຂອງການປະລະການຮຽນຂອງນັກຮຽນສາມັນຢູ່ບັນດາເມືອງ ແລະ ຊອກວິທີແກ້ໄຂ.

 ກອງປະຊຸມໄດ້ເປັນເອກະພາບກັນຮັບຮອງເອົາບັນຫາສໍາຄັນ ຄື: ຮັບຮອງເນື້ອໃນເບື້ອຕົ້ນຂອງບົດສະຫຼຸບປີ 2019, ແຜນຈຸດສຸມປີ 2020 ແລະ ມອບໃຫ້ຄະນະຮັບຜິດຊອບກອງປະຊຸມສືບຕໍ່ປັບປຸງບາງເນື້ອໃນຕາມການສະເໜີຂອງຜູ້ແທນກອງປະຊຸມ; ຮັບຮອງບົດລາຍງານສະພາບການປະລະການຮຽນ ແລະ ມາດຕະການແກ້ໄຂບັນຫາດັ່ງກ່າວໃນໄລຍະຜ່ານ; ຜູ້ແທນກອງປະຊຸມມີຄວາມເອກະພາບກໍານົດມາດຕະການແກ້ໄຂບັນຫາການປະລະການຮຽນໃນຕໍ່ໜ້າ ໂດຍສະເພາະແມ່ນ ສືບຕໍ່ປະຕິບັດຄຳສັ່ງຂອງເຈົ້າແຂວງເລກທີ 018/ຈຂ.ຊຍ ລົງວັນທີ 07 ກຸມພາ 2018 ວ່າດ້ວຍການເພີ່ມທະວີແກ້ໄຂການປະລະການຮຽນຂອງນັກຮຽນ ແລະ ຊຸກຍູ້ການປະຕິບັດຂໍ້ແຂ່ງຂັນຂອງຂະແໜງການສຶກສາ ແລະ ກິລາ,ເອົາໃຈໃສ່ໂຄສະນາເຜີຍແຜ່ນະໂຍບາຍການສຶກສາ ແລະ ກິລາ ເປັນຕົ້ນ ກົດໝາຍການສຶກສາ ໂດຍສະເພາະແມ່ນການສຶກສາຊັ້ນປະຖົມ ແລະ ມັດທະຍົມຕົ້ນພາກບັງຄັບ, 3 ລັກສະນະ, 5 ຫຼັກມູນການສຶກສາ, 3 ຂໍ້ແຂ່ງຂັນຂະແໜງການສຶກສາ ແລະ ກິລາ, ເຜີຍແຜນນິຕິກໍາທີ່ພົວພັນເຖິງວຽກງານການສຶກສາຮັບປະກັນໃຫ້ຜູ້ປົກຄອງນັກຮຽນເຂົ້າໃຈຕໍ່ບົດບາດຄວາມສໍາຄັນຂອງວຽກງານການສຶກສາຕໍ່ກັບການດໍາລົງຊີວິດ, ການພັດທະນາຊຸມຊົນ ແລະ ປະເທດຊາດ, ຊຸກຍູ້ຊຸມຊົນ ແລະ ທຸກພາກສ່ວນເສດຖະກິດ-ສັງຄົມຕ້ອງເອົາໃຈໃສ່ປັບປຸງພື້ນຖານໂຄງລ່າງການສຶກສາ ເພື່ອຮອງຮັບນັກຮຽນໃຫ້ພຽງພໍ ແລະ ປັບປຸງສະພາບແວດລ້ອມໂຮງຮຽນໃຫ້ສະອາດສວຍງາມ ເພື່ອດຶງດູດນັກຮຽນມາຮຽນເພິ່ມຂຶ້ນ, ສໍາລັບຂະແໜງການສຶກສາ ແລະ ກິລາທຸກຂັ້ນ ຕ້ອງກວດກາຄືນການປະຕິບັດໜ້າທີ່ຂອງຄູສອນທຸກຊັ້ນ-ທຸກຂັ້ນ ໂດຍສະເພາະແມ່ນ ສິດໜ້າທີ່ຕາມ 7 ໜ້າວຽກຂອງຜູ້ອໍານວຍການໂຮງຮຽນ ແລະ ມີມາດຕະການເໝາະສົມຕໍ່ກັບຜູ້ທີ່ຖືເບົາໃນການປະຕິບັດໜ້າທີ່, ຄະນະພັກ, ອໍານາດການປົກຄອງທຸກຂັ້ນ, ພະແນກສຶກສາທິການ ແລະ ກິລາແຂວງ, ຫ້ອງການສຶກສາທິການ ແລະ ກິລາ ຕ້ອງອໍານວຍຄວາມສະດວກໃຫ້ຄະນະກໍາມາທິການສຶກສາສົງແຂວງ, ອົງການພຸດທະສາດສະໜາສໍາພັນປະຈໍາເມືອງ ລົງສິດສອນສິລະທໍາ ແລະ ສະໜອງວັດຖຸປັດໃຈແກ່ບັນດາໂຮງຮຽນ ໂດຍສຸມໃສ່ໂຮງຮຽນທີ່ມີຄວາມຫຍຸ້ງຍາກ ແລະ ນັກຮຽນຜູ້ທຸກຈົນ.

ອົງການຈັດຕັ້ງມະຫາຊົນ ໂດຍສະເພາະແມ່ນຊາວໜຸ່ມ, ແມ່ຍິງ ແລະ ກໍາມະບານ ມີມາດຕະການຊຸກຍູ້ໃຫ້ອົງການຈັດຕັ້ງມະຫາຊົນຂັ້ນທ້ອງຖິ່ນ ເພື່ອມີສ່ວນຮ່ວມໃນການສະກັດກັ້ນການປະລະການຮຽນ ແລະ ແກ້ໄຂປະກົດການຫຍໍ້ທໍ້ຕ່າງໆ; ສະເໜີໃຫ້ພະແນກການກ່ຽວຂ້ອງມີສ່ວນຮ່ວມໃນການແກ້ໄຂບັນຫາທີ່ຂົງເຂດການສຶກສາແກ້ໄຂບໍ່ໄດ້ ເປັນຕົ້ນ ຄຸ້ມຄອງການອອກໃບທະບຽນສ້າງຄອບຄົວໃຫ້ແກ່ນັກຮຽນ, ຄຸ້ມຄອງການເຄື່ອນຍ້າຍແຮງງານ ແລະ ສົມທົບຜູ້ປະກອບການບໍ່ອານຸຍາດໃຫ້ນັກຮຽນໄປອອກແຮງງານຮັບຈ້າງໃນສະຖານທີ່ຕ່າງໆ ໃນໄລຍະທີ່ພວມເປີດສົກຮຽນ.

ກອງປະຊຸມເຫັນດີເປັນຢ່າງສູງນໍາເອົາເນື້ອໃນຈິດໃຈການໂອ້ລົມທິດຊີ້ນໍາຂອງທ່ານ ນາງ ບຸນພັກ ອິນທະປັນຍາ ກໍາມະການປະຈໍາພັກແຂວງ ຮອງເຈົ້າແຂວງ ໄປຈັດຕັ້ງຜັນຂະຫຍາຍຕິດພັນກັບແຜນຈຸດສຸມປີ 2020 ແລະ ບັນດາມາດຕະການແກ້ໄຂບັນຫາການປະລະການຮຽນໃຫ້ໄດ້ຮັບຜົນດີ; ເພື່ອຮັບປະກັນການຈັດຕັ້ງປະຕິບັດ, ກອງປະຊຸມຮຽກຮ້ອງໃຫ້ຜູ້ບໍລິຫານການສຶກສາ ແລະ ກິລາທຸກຂັ້ນ, ອໍານາດການປົກຄອງເມືອງ ແລະ ພາກສ່ວນກ່ຽວຂ້ອງ ຈົ່ງພ້ອມກັນນໍາເອົາເນື້ອໃນຈິດໃຈຂອງບົດບັນທຶກກອງປະຊຸມນີ້ໄປຈັດຕັ້ງຜັນຂະຫຍາຍໃຫ້ເປັນຮູບປະທໍາ​.

ໂດຍ: ນາລີ ​ແພງ​ວິ​ໄລ

ຄະນະວິທະຍາສາດປ່າໄມ້ ມຊ - ບໍລິສັດ ບົວລະພາ ຮ່ວມມື 5 ປີ ພັດທະນາບຸກຄະລາກອນ

ຄະນະວິທະຍາສາດປ່າໄມ້ ມະຫາວິທະຍາໄລແຫ່ງຊາດ (ມຊ) ຮ່ວມມືກັບ ບໍລິສັດ ບົວລະພາ ກະສິກຳ – ປ່າໄມ້ ຈຳກັດ ໃນການສົ່ງເສີມການພັດທະນາດ້ານວິຊາການໃຫ້ແກ່ບຸກຄະລາກອນ ໃນໄລຍະ 5 ປີ ແນໃສ່ກໍ່ສ້າງນັກສຶກສາຂອງຄະນະວິທະຍາສາດປ່າໄມ້ໃຫ້ມີຄວາມຮູ້, ຄວາມສາມາດໃນການປະກອບອາຊີບ ກໍຄື ມີວຽກເຮັດງານທຳທີ່ໝັ້ນຄົງ.

ພິທີເຊັນສັນຍາບົດບັນທຶກຄວາມເຂົ້າໃຈດັ່ງກ່າວ, ໄດ້ມີຂຶ້ນໃນວັນທີ 14 ກຸມພາ ຜ່ານມາ ທີ່ຫ້ອງປະຊຸມຄະນະວິທະຍາສາດປ່າໄມ້ ມະຫາວິທະຍາໄລແຫ່ງຊາດ, ໂດຍຕາງໜ້າລົງນາມລະຫວ່າງ ທ່ານ ນາງ ລັດສະໝີ ບຸບຜາ ຄະນະບໍດີ ຄະນະວິທະຍາສາດປ່າໄມ້ ແລະ ທ່ານ ນາງ ສຸໄພວັນ ທ່ຽງຈັນໄຊ ຮອງອຳນວຍການ ບໍລິສັດ ບົວລະພາ ກະສິກຳ – ປ່າໄມ້ ຈຳກັດ, ມີ ທ່ານ ປອ ຮຸ່ງເພັດ ຈັນທະວົງ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ Jean – Bernard ເອກອັກຄະລັດຖະທູດອົດສະຕຣາລີ ປະຈຳ ສປປ ລາວ ພ້ອມດ້ວຍພາກສ່ວນທີ່ກ່ຽວຂ້ອງທັງພາຍໃນ ແລະ ຕ່າງປະເທດເຂົ້າຮ່ວມເປັນສັກຂີພິຍານ.

ໂອກາດນີ້, ທ່ານ ນາງ ສຸໄພວັນ ທ່ຽງຈັນໄຊ ກ່າວວ່າ: ການເຊັນສັນຍາຄັ້ງນີ້ ຈະສ້າງຜົນປະໂຫຍດໃຫ້ທັງສອງຝ່າຍ ເປັນຕົ້ນແມ່ນທາງ ບໍລິສັດ ບົວລະພາ ກະສິກຳ – ປ່າໄມ້ ຈະໄດ້ສ້າງບຸກຄະລາກອນໄປຮັບໃຊ້ໃນທຸລະກິດ ກໍຄືນັກສຶກສາທີ່ຮຽນຈົບຈາກຄະນະວິທະຍາສາດປ່າໄມ້ ຈະໄດ້ໄປເຮັດວຽກຢູ່ບໍລິສັດ ບົວລະພາ ກະສິກຳ – ປ່າໄມ້ ຈຳກັດ ໂດຍສະເພາະຢູ່ໃນໂຮງງານໄມ້ອັດທີ່ກຳລັງກໍ່ສ້າງໃນປັດຈຸບັນ ຊຶ່ງຈະສຳເລັດໃນປີ 2021 ແລະ ທາງຄະນະວິທະຍາສາດປ່າໄມ້ ຍັງຈະໄດ້ຮັບທຶນກໍ່ສ້າງບຸກຄະລາກອນພາຍໃນຄະນະໃຫ້ມີຄວາມຮູ້, ຄວາມສາມາດໃນການປະກອບສ່ວນສົ່ງເສີມບຸກຄະລາກອນໃນອາຊີບວຽກງານເມື່ອຮຽນຈົບ. ທັງນີ້, ກໍຖືເປັນການກະຕຸກຊຸກຍູ້ໃຫ້ຄະນະດັ່ງກ່າວ ໃນການສ້າງບຸກຄະລາກອນກ້າວສູ່ຜົນສຳເລັດຢ່າງຍືນຍົງ ສາມາດປະກອບສ່ວນໃນການສ້າງສາພັດທະນາເສດຖະກິດ-ສັງຄົມຂອງຊາດອີກດ້ວຍ.

ທ່ານຮອງອຳນວຍການ ບໍລິສັດ ບົວລະພາ ກະສິກຳ – ປ່າໄມ້ ຈຳກັດ ກ່າວຕື່ມອີກວ່າ: ໃນໄລຍະຜ່ານມາ ບໍລິສັດ ບົວລະພາ ໄດ້ຮ່ວມມືກັບຄະນະປ່າໄມ້ມາຫຼາຍປີແລ້ວ ເປັນຕົ້ນແມ່ນໄດ້ຮັບນັກສຶກສາລົງຝຶກງານຢູ່ໃນສວນກ້າເບ້ຍໄມ້, ໂຮງງານປຸງແຕ່ງໄມ້. ສຳລັບໂຄງການຮ່ວມມືຄັ້ງນີ້ ມີໄລຍະເວລາຈັດຕັ້ງປະຕິບັດ 5 ປີ  ຊຶ່ງບໍລິສັດ ບົວລະພາ ມີຄວາມຍິນດີທີ່ຈະນຳໃຊ້ໂອກາດນີ້ ເພື່ອເຮັດໜ້າທີ່ໃຫ້ດີທີ່ສຸດໃນການສະໜັບສະໜູນຄະນະວິທະຍາສາດປ່າໄມ້ ບໍ່ພຽງແຕ່ໄລຍະເລີ່ມຕົ້ນຂອງອຸດສາຫະກຳອັນໃໝ່ ເທົ່ານັ້ນ ແຕ່ຍັງຈະສືບຕໍ່ໃຫ້ການສະໜັບສະໜູນຄະນະວິທະຍາສາດປ່າໄມ້ ພາຍຫຼັງທີ່ໂຮງງານໄມ້ອັດໄດ້ສືບຕໍ່ພັດທະນາຢ່າງເຕັມຮູບແບບໃນອະນາຄົດ.

ກົມກິລາລະດັບສູງ ສສກ ຝຶກການລົງທະບຽນ ໄອທີ ໃຫ້ 6 ພາກສ່ວນ ກຽມຮ່ວມ ຊຽງຂວາງ ເກມ

ກົມກິລາລະດັບສູງ ກະຊວງສຶກສາທິການ ແລະ ກິລາ (ສສກ) ຈັດຝຶກອົບຮົບແນະນຳການລົງທະບຽບ ໄອທີ ຫຼື IT ໃຫ້ແກ່ 6 ພາກສ່ວນ ກ່ອນເຂົ້າຮ່ວມງານມະຫະກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເມື່ອອາທິດ ຜ່ານມາ ທີ່ຫ້ອງປະຊຸມກົມກິລາລະດັບສູງ ກະຊວງສຶກສາທິການ ແລະ ກິລາ (ເຂດສະໜາມກິລາເຈົ້າອານຸວົງ), ໂດຍພາຍໃຕ້ການເປັນປະທານຂອງ ທ່ານ ສິງຄຳ ນາລິນ ຮອງຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ, ມີ ທ່ານ ປອ ສອນເພັດ ຈັນດານຸວົງ ຫົວໜ້າພະແນກຄຸ້ມຄອງຂໍ້ມູນ ກົມກິລາລະດັບສູງ ກະຊວງສຶກສາທິການ ແລະ ກິລາ ທັງເປັນວິທະຍາກອນ ພ້ອມດ້ວຍທີມງານຂອງພະແນກ, ມີສຳມະນາກອນທີ່ມາຈາກ 6 ພາກສ່ວນ ຄື: ກະຊວງປ້ອງກັນຄວາມສະຫງົບ, ກະຊວງປ້ອງກັນປະເທດ, ກະຊວງພະລັງງານ ແລະ ບໍ່ແຮ່, ກະຊວງສາທາລະນະສຸກ, ກະຊວງວິທະຍາສາດ ແລະ ເຕັກໂນໂລຊີ ແລະ ສູນກາງສະຫະພັນກຳມະບານລາວ 14 ທ່ານ, ຍິງ 2 ທ່ານເຂົ້າຮ່ວມ.

     ໂອກາດນີ້, ທ່ານ ສິງຄຳ ນາລິນ ໄດ້ກ່າວຕ້ອນຮັບບັນດາສຳມະນາກອນທີ່ມາຈາກ 6 ພາກສ່ວນຢ່າງອົບອຸ່ນ ແລະ ຫວັງວ່າ ການອົບຮົບດັ່ງກ່າວ ຈະເຮັດໃຫ້ບັນດາທ່ານເຂົ້າໃຈໄດ້ດີ ໃນການລົງທະບຽບຕ່າງໆ ເພື່ອເຂົ້າຮ່ວມງານມະຫະກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ ເປັນເຈົ້າພາບ ລະຫວ່າງວັນທີ 22 ມີນາ ຫາ 1 ເມສາ 2020. ສຳລັບການຝຶກອົບຮົບແນະນຳການລົງທະບຽນລະບົບ ໄອທີ ໃນຄັ້ງນີ້ ແມ່ນດຳເນີນເປັນເວລາ 1 ວັນ ໂດຍສຳມະນາກອນທີ່ເຂົ້າຮ່ວມ ແມ່ນໄດ້ຮຽນຮູ້ການລົງທະບຽບຕ່າງໆ ທັງການອອກບັດ, ແຈ້ງຈຳນວນກິລາເຂົ້າຮ່ວມ ແບບອອນລາຍ. ຊຶ່ງລະບົບນີ້ ແມ່ນສ້າງຂຶ້ນເພື່ອຮອງຮັບການລົງທະບຽນລາຍການແຂ່ງຂັນ, ລາຍຊື່ຜູ້ເຂົ້າຮ່ວມງານມະຫະກໍາກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງ. ນອກຈາກນ້ັນໃນລະບົບດັ່ງກ່າວ ຍັງເປັນລະບົບທີ່ສ້າງຂຶ້ນເພື່ອລາຍງານຜົນການແຂ່ງຂັນ, ຕາຕະລາງແຂ່ງຂັນຂອງກິລາປະເພດຕ່າງໆ, ສະຖານທີ່ແຂ່ງຂັນ ແລະ ອື່ນໆ ເພື່ອອຳນວຍຄວາມສະດວກໃຫ້ແກ່ງານມະຫະກຳກິລາແຫ່ງຊາດ ຄັ້ງທີ XI ເປັນຄັ້ງທຳອິດ.

ອຳໄພວັນ

ຄະນະສຶກສາສາດ ມຊ ສົ່ງນັກສຶກສາລົງຝຶກຫັດ 21 ຂະບວນ ໃນ 4 ແຂວງ ສົກນີ້

ຄະນະສຶກສາສາດ ມະຫາວິທະຍາໄລແຫ່ງຊາດ (ມຊ) ໄດ້ຈັດສົ່ງນັກສຶກສາປີສຸດທ້າຍ (ປີ 4) ຈໍານວນ 21 ຂະບວນ ລົງຝຶກຫັດວິຊາຊີບໃນບັນດາໂຮງຮຽນມັດທະຍົມສົມບູນ ໃນນະຄອນຫຼວງວຽງຈັນ, ແຂວງວຽງຈັນ, ແຂວງບໍລິຄຳໄຊ, ແຂວງໄຊຍະບູລີ, ວິທະຍາໄລຄູດົງຄຳຊ້າງ ແລະ ສູນພັດທະນາການສຶກສານອກໂຮງຮຽນ ກົມການສຶກສານອກໂຮງຮຽນ ກະຊວງສຶກສາທິການ ແລະ ກິລາ.

ພິທີຈັດສົ່ງຂະບວນນັກສຶກສາດັ່ງກ່າວ, ໄດ້ຈັດຂຶ້ນໃນອາທິດຜ່ານມາ ທີ່ຄະນະສຶກສາສາດ ມຊ ໂດຍເປັນກຽດນໍາພາຂະບວນຂອງທ່ານ ແສງສຸລິສັກ ຊື່ນຊົມ ຮອງຫົວໜ້າພະແນກບໍລິຫານວິຊາການ ຄະນະສຶກສາສາດ ມະຫາວິທະຍາໄລແຫ່ງຊາດ, ພ້ອມດ້ວຍນັກສຶກສາປີສຸດທ້າຍ ຈໍານວນ 348 ຄົນ ຮ່ວມເດີນທາງລົງຝຶກຫັດຢ່າງເປັນຂະບວນຟົດຟື້ນ.

     ການລົງຝຶກຫັດໃນຄັ້ງນີ້, ມີນັກສຶກສາທັງໝົດ 348 ຄົນ ຍິງ 191 ຄົນ ທີ່ກໍາລັງສຶກສາຢູ່ໃນ 12 ສາຂາຂອງຄະນະສຶກສາສາດ ມະຫາວິທະຍາໄລແຫ່ງຊາດ ທີ່ລົງຝຶກຫັດວິຊາຊີບໃນບັນດາໂຮງຮຽນມັດທະຍົມສົມບູນໃນ 4 ແຂວງ, 1 ວິທະຍາໄລ ແລະ 1 ສູນ ຄື: ນະຄອນຫຼວງວຽງຈັນ, ແຂວງວຽງຈັນ, ແຂວງບໍລິຄຳໄຊ, ແຂວງໄຊຍະບູລີ, ວິທະຍາໄລຄູດົງຄຳຊ້າງ (ສະເພາະສາຂາຄູຈິດຕະວິທະຍາ) ແລະ ສູນພັດທະນາການສຶກສານອກໂຮງຮຽນ ກົມການສຶກສານອກໂຮງຮຽນ ກະຊວງສຶກສາທິການ ແລະ ກິລາ (ສາຂາບໍລິຫານການສຶກສາ ແລະ ສາຂາຄູຈິດຕະວິທະຍາ).

ສໍາລັບການລົງຝຶກຫັດຂອງນັກສຶກສາປີສຸດທ້າຍ ເປັນການປະຕິບັດຕາມແຜນການຮຽນການສອນຂອງຄະນະສຶກສາສາດ ແລະ ເພື່ອເປັນການຝຶກທັກສະໃນວຽກງານທຸກໆດ້ານເພື່ອກຽມຄວາມພ້ອມໃນການອອກຮັບໃຊ້ສັງຄົມໃຫ້ມີປະສິດທິພາບເວົ້າລວມ ເວົ້າສະເພາະກໍເພື່ອໃຫ້ນັກສຶກສາໄດ້ຝຶກຝົນຄວາມຮູ້ຄວາມສາມາດໃນການສິດສອນຕົວຈິງໃຫ້ມີຄວາມຊຳນິຊຳນານໃນວຽກງານວິຊາສະເພາະຂອງຕົນ ເປັນຕົ້ນແມ່ນ ການແຕ່ງບົດສອນ, ການສິດສອນ, ການເປັນຄູປະຈຳຫ້ອງ, ການວ່າງແຜນວຽກງານຕ່າງໆ ແລະ ລົງປະຕິບັດວຽກງານພົວພັນສັງຄົມ-ຊ່ວຍເຫຼືອຊຸມຊົນຕົວຈິງ.

ນອກຈາກນັ້ນ, ຍັງມີວຽກງານນອກຫຼັກສູດ ເປັນຕົ້ນແມ່ນ ການຈັດກິດຈະກຳການສະແດງສິລະປະ-ວັນນະຄະດີ, ກິດຈະກຳການແຂ່ງຂັນກິລາ, ຖາມ-ຕອບວິທະຍາສາດ ເປັນຕົ້ນ. ສຳລັບການລົງຝຶກຫັດໃນຄັ້ງນີ້ ແມ່ນຈະໃຊ້ເວລາທັງໝົດ 100 ວັນ (3 ເດືອນ) ຈຶ່ງຈະສໍາເລັດ.

(ບຸນທະວີ)

ມສ ວຽງຈັນ ປາບແຊ໋ມເກົ່າ ສກມ ຫາດຊາຍຟອງ 2-0 ເຊັດ ຄວ້າແຊ໋ມບານສົ່ງຍິງ ງານກິລານັກຮຽນທົ່ວນະຄອນຫຼວງວຽງຈັນ 2020

 ທັບນັກກິລາບານ​ສົ່ງ​ຍິງໂຮງຮຽນມັດທະຍົມສຶກສາສົມບູນວຽງຈັນ ຫຼື ມສ ວຽງຈັນ ໂຊຟອມເກັ່ງໄລ່ປາບແຊ໋ມເກົ່າ ຫ້ອງການສຶກສາທິການ ແລະ ກິລາເມືອງ (ສກມ) ຫາດຊາຍຟອງ ໄປແບບໝົດສະພາບ 2-0 ເຊັດ ​ໃນຮອບຊີງຊະນະເລີດ ຄວ້າແຊ໋ມໄປຄອງໄດ້ສຳເລັດ ໃນການ​ແຂ່ງຂັນ​ກິລານັກຮຽນມັດທະຍົມສຶກສາ ທົ່ວນະຄອນຫຼວງວຽງຈັນ ປະຈຳປີ 2020. ຂະນະທີ່ປະເພດທີມຊາຍ ແຊ໋ມຕົກເປັນຂອງ ຫ້ອງການ​ສຶກສາ​ທິການ ​ແລະ ກິລາເມືອງ​ໄຊ​ເຊດ​ຖາ.

      ການແຂ່ງຂັນກິລາບານ​ສົ່ງທີມຍິງ-ທີມຊາຍ ໃນງານກິລາຄັ້ງນີ້ ໄດ້ມີຂຶ້ນເມື່ອວັນທີ 11-13 ກຸມພາ ຜ່ານມາ ທີ່ສະໜາມກິລາໃນ​ຮົ່ມໂຮງຮຽນມັດທະຍົມສຶກສາສົມ​ບູນ​ວຽງ​ຈັນ ນະຄອນຫຼວງວຽງຈັນ, ໂດຍໃຫ້ກຽດຮ່ວມຊົມ ແລະ ມອບລາງວັນຂອງ ທ່ານ ສົມ​ພອນ ສອນ​ດາ​ລາ ຮອງ​ຫົວ​ໜ້າ​ພະ​ແນກ​ສຶກ​ສາ​ທິ​ການ ແລະ ກິ​ລາ ນະ​ຄອນຫຼວງວຽງ​ຈັນ, ທ່ານ ຫົງ​ແກ້ວ ທຳ​ມະ​ວົງ ຫົວ​ໜ້າ​ຂະ​ແໜງ​ພະ​ລະ-ສິ​ລະ​ປະ​ສຶກ​ສາ ພະ​ແນກ​ສຶກ​ສາ​ທິ​ການ ແລະ ກິ​ລາ ນະ​ຄອນຫຼວງວຽງ​ຈັນ ແລະ ທ່ານ ນາງ ປະ​ທຸມ​ພອນ ພິມ​ປະ​ໄພ ຮອງ​ຜູ້​ອຳ​ນວຍ​ການ​​ໂຮງ​ຮຽນສຶກ​ສາ​ສົມ​ບູນ​ວຽງ​ຈັນ, ມີ​ພະ​ນັກງານວິ​ຊາ​ການ, ຄູ​ຝຶກ ແລະ ນັກ​ກິ​ລາເຂົ້າ​ຮ່ວມຢ່າງພ້ອມພຽງ.

 ການ​ແຂ່ງ​ຂັນກິລາບານ​ສົ່ງໃນຄັ້ງນີ້ ດຳເນີນເປັນເວລາ 3 ວັນ ລະຫວ່າງວັນທີ 11-13 ກຸມພາ 2020 ມີທັງໝົດ 20 ທີມ, ຍິງ 10 ທີມ ທີ່ມາຈາກ ສກມ ຈັນທະ​ບູລີ, ຫາດ​ຊາຍ​ຟອງ, ນາ​ຊາຍ​ທອງ, ​ໄຊ​ເຊດ​ຖາ , ​ສີໂຄດຕະບອງ, ສີສັດຕະນາກ  ແລະ ສກມ ໄຊທານີ,  3  ​ໂຮງຮຽນ​ຄື: ​ໂຮງຮຽນ ມັດທະຍົມ​ສຶກສາສົມ​ບູນວຽງຈັນ, ມສ ມິດຕະພາບລາວ-ຫວຽດນາມ ແລະ ມ.ປາຍ ນະຄອນຫຼວງວຽງຈັນ-ນະຄອນໂຮ່ຈິມິນ. ຊຶ່ງຮູບແບບການແຂ່ງຂັນແມ່ນຈັບສະຫຼາກປະກົບຄູ່ ເສຍຄັດອອກເລີຍ ທີມຊະນະແມ່ນຜ່ານເຂົ້າສູ່ຮອບຕໍ່ໄປ.

ສຳລັບຄູ່ຊີງຊະນະເລີດ ປະເພດທີມຍິງ ເປັນການໂຄຈອນມາພົບກັນລະຫວ່າງ ທີມຫ້ອງການ​ສຶກສາ​ທິການ ​ແລະ ກິລາ ​ເມືອງຫາດ​ຊາຍ​ຟອງ ດີກຣີແຊ໋ມເກົ່າປີ 2019 ພົບກັບ ທີມໂຮງ​ຮຽນ​ມັດ​ທະ​ຍົມສຶກສາ​ສົມ​ບູນ​ວຽງ​ຈັນ. ຜ່ານການແຂ່ງຂັນຜົນປະກົດວ່າ ມສ ວຽງຈັນ ໂຊຟອມເກັ່ງໄລ່ປາບແຊ໋ມເກົ່າ ສກມ ຫາດຊາຍຟອງ ໄປແບບໝົດສະພາບ 2-0 ເຊັດ ​25-15 ແລະ 25-19 ຄະແນນ ຄວ້າແຊ໋ມໄປຄອງໄດ້​ສຳເລັດ ໄດ້ຮັບຂັນ 1 ໜ່ວຍ ພ້ອມເງິນສົດ 1 ລ​້ານກີບ, ອັນດັບ 2 ສກມ ຫາດ​ຊາຍ​ຟອງ ໄດ້ຮັບຂັນ 1 ໜ່ວຍ ພ້ອມເງິນສົດ ​8 ແສນກີບ, ​ອັນດັບ 3  ສກມ ໄຊເຊດ​ຖາ ໄດ້ຮັບຂັນ 1 ໜ່ວຍ ພ້ອມເງິນສົດ ​7 ແສນກີບ ແລະ ອັນດັບ 4 ສກມ ສີ​ໂຄດ​ຕະ​ບອງ ໄດ້ຮັບເງິນສົດ​ 6 ແສນກີບ.  ສ່ວນປະເພດທີມຊາຍ ອັນດັບ 1  ຫ້ອງການ​ສຶກສາ​ທິການ ​ແລະ ກິລາເມືອງ​ໄຊ​ເຊດ​ຖາ ໄດ້ຮັບຂັນ 1 ໜ່ວຍ ພ້ອມເງິນສົດ 1 ລ້ານກີບ, ອັນດັບ 2 ຫ້ອງການ​ສຶກສາ​ທິການ ​ແລະ ກິລາ​ເມືອງ​ນາ​ຊາຍ​ທອງ ໄດ້​ຮັບຂັນ 1 ໜ່ວຍ ພ້ອມເງິນສົດ ​8 ແສນກີບ, ອັນດັບ 3 ຫ້ອງການ​ສຶກສາ​ທິການ ​ແລະ ກິລາເມືອງສີ​ໂຄດ​ຕະ​ບອງ ໄດ້ຮັບຂັນ 1 ໜ່ວຍ ພ້ອມເງິນສົດ ​7 ແສນກີບ.

ສຳລັບ​ກິ​ລາ​ບານ​ສົ່ງ​ຫາດ​ຊາຍ ​ທີມ​ຊາຍ ອັນດັບ 1 ສກມ ຈັນ​ທະ​ບູ​ລີ ​ໄດ້​​ຮັບຂັນ 1 ໜ່ວຍ ​ພ້ອມ​ເງິນ​ສົດ  7 ແສນ​ກີບ, ອັນດັບ 2 ສກມ ນາ​ຊາຍ​ທອງ ໄດ້​​ຮັບຂັນ 1 ໜ່ວຍ ​ພ້ອມ​ເງິນ​ສົດ  6 ແສນ​ກີບ, ອັນດັບ 3  ສກມ ໄຊ​ເສດ​ຖາ ໄດ້​​ຮັບຂັນ 1 ໜ່ວຍ ພ້ອມ​ເງິນ​ສົດ  6 ແສນ​ກີບ ແລະ ອັນດັບ 4 ມ​.ປາຍ ວຽງ​ຈັນ-ໂຮ່​ຈິ​ມິນ ໄດ້​ຮັບ​ເງິນ​ສົດ 3 ແສນ​ກີບ; ປະ​ເພດ​ທີມ​ຍິງ ອັນດັບ 1 ສກມ ສີ​ໂຄດ​ຕະ​ບອງ ​ໄດ້​​ຮັບຂັນ 1 ໜ່ວຍ ພ້ອມ​ເງິນ​ສົດ  7 ແສນ​ກີບ, ອັນດັບ 2 ມ.​ປາຍ ວຽງ​ຈັນ-ໂຮ່​ຈິ​ມິນ ໄດ້​​ຮັບຂັນ 1 ໜ່ວຍ ​ພ້ອມ​ເງິນ​ສົດ  6 ແສນ​ກີບ, ອັນດັບ 3   ມ​ສ ວຽງ​ຈັນ ໄດ້​​ຮັບຂັນ 1 ໜ່ວຍ ​ພ້ອມ​ເງິນ​ສົດ  6 ແສນ​ກີບ ແລະ ອັນດັບທີ 4 ສກມ ນາ​ຊາຍ​ທອງ ໄດ້​ຮັບ​ເງິນ​ສົດ 3 ແສນ​ກີບ.

                                                           ໂດຍ: ສີວອນ ( ສຶກສາ-ກິລາ ນວ )

ຮອງປະທານປະເທດ ເນັ້ນໃຫ້ຄະນະບໍລິຫານງານສູນກາງພັກ-ລັດຖະບານ ຍົກສູງຄວາມຮັບຜິດຊອບດ້ານການເມືອງ

ທ່ານຮອງປະທານປະເທດ ຮຽກຮ້ອງໃຫ້ຄະນະບໍລິຫານງານສູນກາງພັກ ແລະ ລັດຖະບານ ຍົກສູງຄວາມຮັບຜິດຊອບດ້ານການເມືອງ ໃນການສືບຕໍ່ນໍາໄປຄົ້ນຄວ້າເຊື່ອມຊຶມ ແລະ ຈັດຕັ້ງຜັນຂະຫຍາຍ ເຂົ້າໃນແຕ່ລະຂົງເຂດວຽກງານທີ່ຕົນຮັບຜິດຊອບຢ່າງເປັນເຈົ້າການ.

ເມື່ອວັນທີ 14 ກຸມພາ ຜ່ານມາ ທີ່ນະຄອນຫຼວງວຽງຈັນ ໄດ້ມີກອງປະຊຸມເຜີຍແຜ່, ເຊື່ອມຊຶມເອກະສານສໍາຄັນຂອງພັກ-ລັດ ພາຍໃຕ້ການເປັນປະທານຂອງທ່ານ ພັນຄໍາ ວິພາວັນ ກໍາມະການກົມການເມືອງສູນກາງພັກ, ຜູ້ປະຈໍາການ ຄະນະເລຂາທິການສູນາກາງພັກ, ຮອງປະທານປະເທດແຫ່ງ ສປປ ລາວ, ມີບັນດາກໍາມະການກົມການເມືອງ, ເລຂາທິການສູນກາງພັກ, ຜູ້ແທນທີ່ມາຈາກກະຊວງ, ອົງການ ແລະ ທ້ອງຖິ່ນເຂົ້າຮ່ວມ.

       ໃນກອງປະຊຸມ, ໄດ້ຮັບຟັງການເຜີຍແຜ່ກ່ຽວກັບຜົນການເຄື່ອນໄຫວວຽກງານຕ່າງປະເທດຂອງການນໍາພັກ-ລັດ ໃນປີ 2019 ແລະ ຕົ້ນປີ 2020 ເປັນຕົ້ນແມ່ນຜົນສໍາເລັດຂອງການຢ້ຽມຢາມ ແລະ ເຮັດວຽກຢູ່ ສສ ຫວຽດນາມ, ສປ ຈີນ ແລະ ຣາຊະອານາຈັກກໍາປູເຈຍ ຂອງສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ, ສະຫາຍ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ກ່ຽວກັບການກະກຽມສະເຫຼີມສະຫຼອງວັນປະຫວັດສາດສໍາຄັນຂອງຊາດ-ຂອງພັກ ໃນປີ 2020 ເພື່ອໃຫ້ຄະນະພັກ, ກະຊວງ, ອົງການ ແລະ ທ້ອງຖິ່ນໄດ້ເຊື່ອມຊຶມ, ກໍາແໜ້ນ ແລະ ພ້ອມກັນຈັດຕັ້ງຜັນຂະຫຍາຍບັນດາຂໍ້ຕົກລົງການພົວພັນຮ່ວມມືໃນແຕ່ລະຄົງເຂດວຽກງານ ກໍຄືໂຄງການຕ່າງໆກັບປະເທດເພື່ອນມິດໃຫ້ເຂົ້າສູ່ຕົວຈິງ ແລະ ມີປະສິດທິຜົນສູງ. ພ້ອມກັນນັ້ນ, ຍັງເຮັດໃຫ້ການກະກຽມສະເຫຼີມສະຫຼອງວັນສໍາຄັນປະຫວັດສາດ ໂດຍສະເພາະແມ່ນວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 65 ປີ, ວັນຊາດ ທີ 2 ທັນວາ ຄົບຮອບ 45 ປີ, ວັນເກີດປະທານໄກສອນ ພົມວິຫານ ຜູ້ນໍາທີ່ແສນເຄົາລົບຮັກ ຄົບຮອບ 100 ປີ ແລະ ວັນສໍາຄັນອື່ນໆ ເຕັມໄປດ້ວຍຄວາມເບີກບານມ່ວນຊື່ນ, ມີຄວາມເອກອ້າງພາກພູມໃຈຕໍ່ໝາກຜົນໃນການປົກປັກຮັກສາ ແລະ ສ້າງສາພັດທະນາປະເທດຊາດ.

ໂອກາດດັ່ງກ່າວ, ທ່ານ ພັນຄໍາ ວິພາວັນ ໄດ້ເນັ້ນໜັກໃຫ້ຜູ້ແທນເຂົ້າຮ່ວມກອງປະຊຸມ ຈົ່ງໄດ້ຍົກສູງຄວາມຮັບຜິດຊອບດ້ານການເມືອງ ໃນການສືບຕໍ່ນໍາໄປຄົ້ນຄວ້າເຊື່ອມຊຶມ ແລະ ຈັດຕັ້ງຜັນຂະຫຍາຍ ເຂົ້າໃນແຕ່ລະຂົງເຂດວຽກງານທີ່ຕົນຮັບຜິດຊອບຢ່າງເປັນເຈົ້າການ, ຖືເອົາໝາກຜົນຂອງການພົວພັນຮ່ວມມືກັບບັນດາປະເທດເພື່ອນມິດ ກໍຄືການສະເຫຼີມສະເຫຼອງວັນສໍາຄັນທາງປະຫວັດສາດຂອງຊາດ, ຂອງພັກ ໃນປີ 2020 ເປັນຂະບວນການທີ່ແຂງແຮງ, ຟົດຟື້ນຕໍ່ເນື່ອງໃນຂອບເຂດທົ່ວປະເທດ ເພື່ອສືບຕໍ່ຍູ້ແຮງການຈັດຕັ້ງປະຕິບັດກອງປະຊຸມໃຫຍ່ ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ໃຫ້ມີຜົນສໍາເລັດຕາມລະດັບຄາດໝາຍ ແລະ ມີດ້ານລື່ນຄາດໝາຍ, ຕິດພັນກັບການກະກຽມ ແລະດໍາເນີນກອງປະຊຸມໃຫຍ່ ຄັ້ງທີ XI ຂອງພັກ ໃນຕົ້ນປີ 2021 ດ້ວຍຖ່ວງທ່າທີ່ໜັກແໜ້ນ ແລະ ໃຫ້ເປັນຂະບວນການກວ້າງຂວາງທົ່ວປວງຊົນລາວບັນດາເຜົ່າ.

ໂດຍ: ມະນີວົງ

ສຶກສາ-ກິລາ ນວ ຖອດຖອນບົດຮຽນວຽກຕິດຕາມກວດກາປະເມີນຜົນ ແລະ ປະກັນຄຸນນະພາບ

 ພະແນກສຶກສາທິການ ແລະ ກິລາ ນະຄອນຫຼວງວຽງຈັນ (ນວ) ຈັດກອງປະຊຸມສະຫຼຸບຖອດຖອນບົດຮຽນວຽກງານ​ຕິດ​ຕາມກວດກາປະເມີນຜົນ ແລະ ປະ​ກັນ​ຄຸນ​ນະ​ພາບ ປະຈໍາປີ 201​9 ໃນລະຫວ່າງວັນທີ 13-14 ກຸມພາ ຜ່ານມາ ທີ່ຫ້ອງປະຊຸມສູນພັດທະນາເດັກ ພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ໂດຍພາຍໃຕ້ການເປັນປະທານຂອງທ່ານ ບຸນ​ມີ ຈັນ​ທະ​ອຸ​ດົມ ຮອງ​ຫົວ​ໜ້າ​ກົມ​ກວດ​ກາ ກະ​ຊວງ​ສຶກ​ສາ​ທິ​ການ ແລະ ກິ​ລາ, ທ່ານ ພູ​ທອນ ແສງ​ດາ​ວົງ ຮອງຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ທ່ານ ນາງ ຈັນສຸກ ທຳມະວົງສາ ຫົວໜ້າຂະແໜງກວດກາ ປະເມີນຜົນ ແລະ ປະ​ກັນ​ຄຸນ​ນະ​ພາບ ພະແນກສຶກສາທິການ ແລະ ກິລາ ນວ, ມີຫົວໜ້າຫ້ອງການສຶກສາທິການ ແລະ ກິລາ 9 ເມືອງ, ​ຜູ້ອຳນວຍການໂຮງຮຽນທີ່ຂຶ້ນກັບ, ຂະແໜງການຕ່າງໆ, ຫົວ​ໜ້າ​ໝ່ວຍ​ງານກວດ​ກາ​ປະ​ເມີນ​ຜົນ ແລະ ປະ​ກັນ​ຄຸນ​ນະ​ພາບ ຈາກ 9 ເມືອງ ຕະຫຼອດຮອດພະນັກງານວິຊາການເຂົ້າຮ່ວມ.

      ​ໂອກາດ​ດັ່ງກ່າວ, ທ່ານ ນາງ ຈັນສຸກ ທຳມະວົງສາ ໄດ້ກ່າວໃຫ້ຮູ້ວ່າ: ການຈັດກອງປະຊຸມຄັ້ງນີ້ ແມ່ນເພື່ອເປົ້າໝາຍແບບແຜນວິທີເຮັດວຽກຂອງຜູ້ບໍລິຫານຂັ້ນຕ່າງໆໃຫ້ມີການປັບປຸງດີຂຶ້ນ, ເຮັດວຽກມີແຜນການ, ມີການແບ່ງວຽກໃຫ້ບຸກຄົນຮັບຜິດຊອບຢ່າງຈະແຈ້ງ, ກຳນົດລະບອບປະຊຸມ, ລະບອບສ່ອງແສງ, ການລາຍງານສາຍຕັ້ງ ແລະ ສາຍຂວາງ, ການປະຕິບັດພາລະບົດບາດໜ້າທີ່ ແລະ ຂອບເຂດສິດແຕ່ລະຂັ້ນຕາມລະດັບຄາດໝາຍ, ເປັນເຈົ້າການນຳພາຄົ້ນຄວ້າ, ເຊື່ອມຊຶມ ແລະ ຜັນຂະຫຍາຍແຜນພັດທະນາການສຶກສາປະຈຳປີ, ປະຕິບັດຕາມມະຕິກອງປະຊຸມຜູ້ບໍລິຫານການສຶກສາຂັ້ນເມືອງ, ຂັ້ນພະແນກສຶກສາທິການ ແລະ ກິລາ ທົ່ວນະຄອນຫຼວງວຽງຈັນ, ຜັນຂະຫຍາຍມາເປັນແຜນ, ໂຄງການ ແລະ ກິດຈະກຳເຄື່ອນໄຫວລາຍລະອຽດໃນຄວາມຮັບຜິດຊອບຂອງຕົນ, ສູ້ຊົນຈັດຕັ້ງປະຕິບັດບັນດາຄາດໝາຍວຽກທີ່ເປັນບຸລິມະສິດທີ່ກະຊວງສຶກສາທິການ ແລະ ກິລາວາງອອກ ເຮັດໃຫ້ການສຶກສາໄດ້ຂະຫຍາຍຕົວທາງດ້ານປະລິມານ ແລະ ຄຸນນະພາບ ທັງເປັນການແກ້ໄຂສິ່ງຫຍໍ້ທໍ່ຕ່າງໆໃນຂະແໜງການສຶກສາ ບໍ່ວ່າຢູ່ໃນຫ້ອງການ ແລະ ໂຮງຮຽນແຫ່ງຕ່າງໆໃຫ້ນັບມື້ນັບໜ້ອຍລົງເທື່ອລະກ້າວ.

      ກອງປະຊຸມຖອດຖອນບົດຮຽນວຽກງານກວດກາ ແລະ ປະເມີນຜົນຄັ້ງນີ້, ໄດ້ເອົາໃຈໃສ່ເນື້ອໃນຄາດໝາຍ ຄື: ວຽກງານກວດກາການສຶກສາຮອບດ້ານ, ວຽກງານຕິດຕາມ ແລະ ປະເມີນຜົນ, ວຽກງານກວດກາສະເພາະກິດ, ວຽກງານກວດກາຄຳຮ້ອງ ແລະ ຄຳສະເໜີ, ວຽກງານຕ້ານການສໍ້ລາດບັງຫຼວງ ແລະ ສະກັດກັ້ນປະກົດການຫຍໍ້ທໍ່ຕ່າງໆ ແລະ ສາເຫດທີ່ພາໃຫ້ມີດ້ານດີ ແລະ ດ້ານອ່ອນ.

     ຂະນະດຽວກັນນີ້, ທ່ານ ບຸນ​ມີ ຈັນ​ທະ​ອຸ​ດົມ ໄດ້​ມີ​ຄຳ​ຄິດ​ຄຳ​ເຫັນ​ວ່າ: ໃຫ້​ບັນ​ດາ​ຜູ້​ບໍ​ລິ​ຫານ​ມີ​ຄວາມ​ຮັບ​ຮູ້​ເຂົ້າ​ໃຈ​ຕໍ່​ວຽກ​ງານກວດ​ກາ​ປະ​ເມີນ​ຜົນ ແລະ ປະ​ກັນ​ຄຸນ​ນະ​ພາບ, ກຳ​ໄດ້​ພາ​ລະ​ໜ້າ​ທີ່​ວຽກ​ງານກວດ​ກາຕິດ​ຕາມ​ຢຸດ​ທະ​ສາດ​, ຈຸດ​ສຸມ​ຕ້ານ​ການ​ສະ​ກັດ​ກັ້ນ​ປະ​ກົດ​ການ​ຫຍໍ້​ທໍ່, ເພີ່ມ​ທະ​ວີ​ຕິດ​ຕາມກວດ​ກາ​ລັດ​ໃຫ້​ຮັດ​ກຸມ ແລະ ໃຫ້​ມີ​ປະ​ສິດ​ທິ​ພາບ, ກຳ​ໄດ້​ນິ​ຕິ​ກຳ​ພາ​ລະ​ບົດ​ບາດ​​ ເພີ່ມ​ຄວາມ​ຮັບ​ຮູ້, ຈຳ​ແນກ​ນິ​ຕິ​ກຳ​ໃຫ້​ໄດ້, ປັບ​ປຸງ​ກົງ​ຈັກ​ໃຫ້​ເຂັ້ມ​ແຂງ​ ຕ້ອງ​ໄປ​ຕາມ​ຄູ່​ມື​ເຮັດ​ວຽກ​ຂອງ​ລັດ​ວາງ​ອອກ​ໃຫ້​ເຂັ້ມ​ງວດ, ເອື້ອ​ອຳ​ນວຍ​ຄວາມ​ສະ​ດວກ​ໃນ​ການ​ເຄື່ອນ​ໄຫວ​ວຽກ​ງານກວດ​ກາ​ໃຫ້​ທັນ​ສະ​ໄໝ ແລະ ມີ​ປະ​ສິດ​ທິ​ພາບ, ເອົາ​ໃຈ​ໃສ່​ໃນ​ການ​ສ້າງ​ແຜນ​ຕິດ​ຕາມກວດ​ກາ​ໃນ​ການ​ໃຊ້​ງົບ​ປະ​ມານ​ອັນ​ໃດ​ເປັນຫຼັກ, ອັນ​ໃດ​ເປັນ​ສຳ​ຮອງ​. ພ້ອມ​ກັນ​ນັ້ນ, ການ​ນຳ​ແຕ່​ລະ​ຂັ້ນ​ຕ້ອງ​ເປັນ​ຜູ້​ພິ​ຈາ​ລະ​ນາ​ແກ້​ໄຂ​ປະ​ກົດ​ການ​ຫຍໍ້​ທໍ່​ແຕ່​ລະ​ຂັ້ນ​ແຕ່​ລະ​ເປົ້າ​ໝາຍ, ຕ້ອງ​ຮັບ​ຜິດ​ຊອບ​ແຕ່​ລະ​ພາກ​ສ່ວນ​ຂອງ​ໃຜ​ລາວ​ຢ່າງ​ເຂັ້ມ​ງວດ, ຂາດ​ຕົວ ແລະ ເດັດ​ຂາດ​ໃຫ້​ໄດ້.

                                                      ໂດຍ: ສີວອນ (ສຶກສາ-ກິລາ ນວ)

ສກມ ສີໂຄດຕະບອງ ປ້ອງກັນແຊ໋ມກະຕໍ້ທີມຊາຍ ສະໄໝທີ 2 ໃນງານກິລານັກຮຽນທົ່ວນະຄອນຫຼວງວຽງຈັນ 2020

ທັບນັກກິລາກະຕໍ້ນັກຮຽນຫ້ອງການສຶກສາທິການ ແລະ ກິລາເມືອງ (ສກມ) ສີໂຄຕະບອງ ຍັງໂຊຟອມເກັ່ງສົມລາຄາແຊ໋ມເກົ່າ ຫຼັງໃນຮອບຊີງຊະນະເລີດ ສາມາດເອົາຊະນະ ທີມຫ້ອງການສຶກສາທິການ ແລະ ກິລາເມືອງປາກງື່ມ ໄປໄດ້ 2-0 ເຊັດ ຄວ້າແຊ໋ມໄປຄອງເປັນສະໄໝທີ 2 ໄດ້ສຳເລັດ ໃນການ​ແຂ່ງຂັນ​ກິລານັກຮຽນມັດທະຍົມສຶກສາ ທົ່ວນະຄອນຫຼວງວຽງຈັນ ປະຈຳປີ 2020 ເພື່ອ​ເປັນການຄັດ​ເລືອກ​ເອົາ​ນັກ​ກິລາ​ທີ່​ມີຄວາມສາມາດ ແລະ ​ພອນ​ສະຫວັນດີເດັ່ນ ເປັນຕົວແທນໃຫ້ນະຄອນຫຼວງວຽງຈັນ ​ເຂົ້າຮ່ວມ​ງານມະຫະກຳກິລາ​ແຫ່ງຊາດ ຄັ້ງທີ XI ຫຼື ຊຽງຂວາງ ເກມ ທີ່ແຂວງຊຽງຂວາງ ເປັນເຈົ້າພາບ ລະຫວ່າງວັນທີ 22 ມີນາ ຫາ 1 ເມສາ 2020.

ພິທີປິດການແຂ່ງຂັນກິລາກະຕໍ້ທີມຍິງ-ທີມຊາຍ ໃນງານກິລາຄັ້ງນີ້ ໄດ້ມີຂຶ້ນເມື່ອວັນທີ 11 ກຸມພາ ຜ່ານມາ ທີ່ສະໜາມກິລາກະ​ຕໍ້​ໃນ​ຮົ່ມໂຮງຮຽນມັດທະຍົມສຶກສາຕອນປາຍມິດຕະພາບ ນະ​ຄອນຫຼວງວຽງ​ຈັນ-ນະ​ຄອນ​ໂຮ່​ຈິ​ມິນ ເມືອງສີໂຄດຕະບອງ ນະຄອນຫຼວງວຽງຈັນ, ໂດຍໃຫ້ກຽດຮ່ວມຊົມ ແລະ ມອບລາງວັນຂອງ ທ່ານ ສົມ​ພອນ ສອນ​ດາ​ລາ ຮອງ​ຫົວ​ໜ້າ​ພະ​ແນກ​ສຶກ​ສາ​ທິ​ການ ແລະ ກິ​ລາ ນະ​ຄອນຫຼວງວຽງ​ຈັນ, ທ່ານ ຫົງ​ແກ້ວ ທຳ​ມະ​ວົງ ຫົວ​ໜ້າ​ຂະ​ແໜງ​ພະ​ລະ-ສິ​ລະ​ປະ​ສຶກ​ສາ ພະ​ແນກ​ສຶກ​ສາ​ທິ​ການ ແລະ ກິ​ລາ ນະ​ຄອນຫຼວງວຽງ​ຈັນ ແລະ ທ່ານ ວັນ​ນາ ກ້ອນ​ສູນ​ທະ​ສຸກ ຮອງ​ຜູ້​ອຳ​ນວຍ​ການໂຮງຮຽນ ມ.ປາຍ ນະ​ຄອນຫຼວງວຽງ​ຈັນ-ນະ​ຄອນ​ໂຮ່​ຈິ​ມິນ, ມີ​ພະ​ນັກງານວິ​ຊາ​ການ, ຄູ​ຝຶກ ແລະ ນັກ​ກິ​ລາເຂົ້າ​ຮ່ວມຢ່າງພ້ອມພຽງ.

 ການ​ແຂ່ງ​ຂັນກິລາກະ​ຕໍ້ຄັ້ງນີ້ ດຳເນີນເປັນເວລາ 2 ວັນ ລະຫວ່າງວັນທີ 10-11 ກຸມພາ 2020 ມີທັງໝົດ 19 ທີມ, ຍິງ 9 ທີມ ທີ່ມາຈາກ ສກມ ຈັນທະ​ບູລີ, ຫາດ​ຊາຍ​ຟອງ, ນາ​ຊາຍ​ທອງ, ​ໄຊ​ເຊດ​ຖາ, ປາກງື່ມ, ​ສີໂຄດຕະບອງ, ສີສັດຕະນາກ  ແລະ ສກມ ໄຊທານີ,  3  ​ໂຮງຮຽນ​ຄື: ​ໂຮງຮຽນ ມັດທະຍົມ​ສົມ​ບູນວຽງຈັນ, ມສ ມີດຕະພາບລາວ-ຫວຽດນາມ ແລະ ມ.ປາຍ ນະຄອນຫຼວງວຽງຈັນ-ນະຄອນໂຮ່ຈິມິນ. ຊຶ່ງຮູບແບບການແຂ່ງຂັນແມ່ນຈັບສະຫຼາກປະກົບຄູ່ ເສຍຄັດອອກເລີຍ ທີມຊະນະແມ່ນຜ່ານເຂົ້າສູ່ຮອບຕໍ່ໄປ.

ສຳລັບຄູ່ຊີງຊະນະເລີດ ເປັນການໂຄຈອນມາພົບກັນລະຫວ່າງ ທີມຫ້ອງການ​ສຶກສາ​ທິການ ​ແລະ ກິລາ ​ເມືອງສີ​ໂຄດ​ຕະ​ບອງ ດີກຣີແຊ໋ມເກົ່າປີ 2019 ພົບກັບ ທີມຫ້ອງການ​ສຶກສາ​ທິການ ​ແລະ ກິລາ ​ເມືອງປາກ​ງື່ມ. ຜ່ານການແຂ່ງຂັນຜົນປະກົດວ່າ ສກມ ສີໂຄດຕະບອງ ແຊ໋ມເກົ່າ ຍັງໂຊຟອມເກັ່ງໄດ້ສົມລາຄາ ເອົາຊະນະ ສກມ ປາກງື່ມ ໄປໄດ້ແບບສະບາຍ 2-0 ເຊັດ 21-19 ແລະ 21-16 ຄວ້າແຊ໋ມໄປຄອງໄດ້ສຳເລັດ ແລະ ຍັງເປັນການປ້ອງກັນແຊ໋ມສະໄໝທີ 2 ອີກດ້ວຍ ໄດ້ຮັບຂັນ 1 ໜ່ວຍ ພ້ອມເງິນສົດ 7 ແສນກີບ, ອັນດັບ 2 ສກມ ປາກງື່ມ ໄດ້ຮັບຂັນ 1 ໜ່ວຍ ພ້ອມເງິນສົດ 6 ແສນກີບ, ​ອັນດັບ 3  ສກມ ໄຊ​ທາ​ນີ ໄດ້ຮັບຂັນ 1 ໜ່ວຍ ພ້ອມເງິນສົດ 5 ແສນກີບ ແລະ ອັນດັບ 4 ສກມ ຫາດຊາຍຟອງ ໄດ້ຮັບເງິນສົດ 3 ແສນກີບ.  

ສ່ວນປະເພດທີມຍິງ ອັນດັບ 1  ຫ້ອງການ​ສຶກສາ​ທິການ ​ແລະ ກິລາເມືອງ​ຫາດ​ຊາຍ​ຟອງ ໄດ້ຮັບຂັນ 1 ໜ່ວຍ ພ້ອມເງິນສົດ 7 ແສນກີບ, ອັນດັບ 2 ຫ້ອງການ​ສຶກສາ​ທິການ ​ແລະ ກິລາ​ເມືອງ​ຈັນ​ທະ​ບູ​ລີ ໄດ້​ຮັບຂັນ 1 ໜ່ວຍ ພ້ອມເງິນສົດ 6 ແສນກີບ, ອັນດັບ 3 ຫ້ອງການ​ສຶກສາ​ທິການ ​ແລະ ກິລາເມືອງໄຊເຊດຖາ ໄດ້ຮັບຂັນ 1 ໜ່ວຍ ພ້ອມເງິນສົດ 5 ແສນກີບ ແລະ ອັນດັບ 3 ຫ້ອງ​ການ​ສຶກ​ສາ​ທິ​ການ ແລະ ກິ​ລາເມືອງ​ສີ​ສັດ​ຕະ​ນາກ ໄດ້​ຮັບ​ເງິນສົດ 3 ແສນກີບ.

ໂດຍ: ສີວອນ ( ສຶກສາ-ກິລາ ນວ )

ສູນຊີເມວ ສ້າງຄວາມເຂັ້ມແຂງດ້ານການຮ່ວມມືລະຫວ່າງໂຮງຮຽນກັບຊຸມຊົນ

ສູນການສຶກສາເພື່ອພັດທະນາຊຸມຊົນຂົງເຂດອາຊີຕາເວັນອອກສຽງໃຕ້ (ສູນຊີເມວ) ໄດ້ຈັດກອງປະຊຸມຝຶກອົບຮົມ ໃນຫົວຂໍ້ “ສ້າງຄວາມເຂັ້ມແຂງດ້ານການຮ່ວມມືລະຫວ່າງ ໂຮງຮຽນກັບຊຸມຊົນ ເພື່ອການຮຽນຮູ້ທີ່ມີຄຸນນະພາບ ແລະ ການຮຽນຮູ້ຕະຫຼອດຊີວິດ” ໂດຍຈະເລັງໃສ່ການພັດທະນາ ເຄື່ອງມືເພື່ອເສີມສ້າງຂີດຄວາມສາມາດຂອງສະຖາບັນ ສໍາລັບຄະນະພັດທະນາການສຶກສາຂັ້ນບ້ານ ໃຫ້ແກ່ບັນດາຜູ້ອຳນວຍການໂຮງຮຽນເປົ້າໝາຍ 5 ແຂວງ.

ກອງປະຊຸມດັ່ງກ່າວ, ໄດ້ຈັດຂຶ້ນເມື່ອວັນທີ 11 ກຸມພາ ຜ່ານມາ ທີ່ສູນການສຶກສາເພື່ອພັດທະນາຊຸມຊົນຂົງເຂດອາຊີຕາເວັນອອກສຽງໃຕ້, ໂດຍໃຫ້ກຽດເຂົ້າຮ່ວມຂອງທ່ານ ຮສ.ປອ ນາງ ສີລິນທອນ ສັກລໍຄຳ ວ່າການຫົວໜ້າກົມພົວພັນຕ່າງປະເທດ ກະຊວງສຶກສາທິການ ແລະ ກິລາ, ທ່ານ ຮສ.ປອ ນາງ ນຽນ ສີວົງໄຊ ຜູ້ອຳນວຍການສູນການສຶກສາເພື່ອພັດທະນາຊຸມຊົນຂົງເຂດອາຊີຕາເວັນອອກສຽງໃຕ້, ພ້ອມດ້ວຍບັນດາວິທະຍາກອນ, ສຳມະນາກອນ ຕະຫຼອດຮອດພະນັກງານ ແລະ ພາກສ່ວນທີ່ກ່ຽວຂ້ອງ.

ໂອກາດດັ່ງກ່າວ, ທ່ານ ຮສ.ປອ ນາງ ນຽນ ສີວົງໄຊ ໄດ້ກ່າວວ່າ: ການຈັດກອງປະຊຸມຝຶກອົບຮົມ ໃນຫົວຂໍ້ “ສ້າງຄວາມເຂັ້ມແຂງດ້ານການຮ່ວມມືລະຫວ່າງ ໂຮງຮຽນກັບຊຸມຊົນ ເພື່ອການຮຽນຮູ້ທີ່ມີຄຸນນະພາບ ແລະ ການຮຽນຮູ້ຕະຫຼອດຊີວິດ” ຊຶ່ງຈະເລັງໃສ່ການພັດທະນາເຄື່ອງມືເພື່ອເສີມສ້າງຂີດຄວາມສາມາດຂອງສະຖາບັນ ສໍາລັບຄະນະພັດທະນາການສຶກສາຂັ້ນບ້ານ. ໂຄງການນີ້ ຈະເປັນໂຄງການໜຶ່ງທີ່ສໍາຄັນທີ່ຈະໄດ້ຕອບສະໜອງເປົ້າໝາຍການພັດທະນາແບບຍືນຍົງທີ 4 (SDG.4) ການສຶກສາທີ່ມີຄຸນນະພາບ ຄື: ຮັບປະກັນການສຶກສາທີ່ມີຄຸນນະພາບເທົ່າທຽມກັນ ແລະ ທົ່ວເຖິງ, ສົ່ງເສີມກາລະໂອກາດໃນການຮຽນຮູ້ຕະຫຼອດຊີວິດສໍາລັບໝົດທຸກຄົນ. ໂຄງການດັ່ງກ່າວ ຖືເປັນໂຄງສ້າງທີ່ສໍາຄັນເພື່ອສົ່ງເສີມ ແລະ ສະໜັບສະໜູນການຮ່ວມມື ລະຫວ່າງໂຮງຮຽນ ແລະ ຊຸມຊົນ ທີ່ສະໜັບສະໜູນນະວັດຕະກໍາການສຶກສາ ແລະ ການປັບປຸງຄຸນນະພາບຂອງການສຶກສາ ແລະ ການຮຽນຮູ້ຕະຫຼອດຊີວິດໃນ ສປປ ລາວ ໃຫ້ດີຂຶ້ນ.

ການຈັດກອງປະຊຸມຄັ້ງນີ້, ມີບັນດາຜູ້ອຳນວຍການຈາກໂຮງຮຽນເປົ້າໝາຍຈາກ 4 ແຂວງ ແລະ  1 ນະຄອນຫຼວງເຂົ້າຮ່ວມ ຄື: ແຂວງບໍ່ແກ້ວ, ຫົວພັນ, ຈຳປາສັກ, ສະຫວັນນະເຂດ ແລະ ນະຄອນຫຼວງວຽງຈັນ, ໂດຍຈະໄດ້ຮັບຟັງ ແລະ ຮຽນຮູ້ການແນະນຳກ່ຽວກັບຄວາມເປັນມາ ແລະ ຜົນສຳເລັດດ້ານວຽກງານຂອງຄະນະພັດທະນາການສຶກສາຂັ້ນບ້ານ ແລະ ສູນການຮຽນຮູ້ຊຸມຊົນ, ການວາງແຜນສຳລັບຊຸມຊົນ, ບຸກຄົນທີ່ມີບົດບາດຢູ່ໃນຊຸມຊົນ; ການກຳນົດແນວທາງນະໂຍບາຍ, ກຳນົດແນວທາງພື້ນຖານຂອງຄະນະພັດທະນາການສຶກສາຂັ້ນບ້ານ ແລະ ສູນການຮຽນຮູ້ຊຸມຊົນ, ການແນະນຳກ່ຽວກັບອົງປະກອບພື້ນຖານທີ່ເຊື່ອມຕໍ່ໄປຍັງແນວທາງຂອງຄະນະພັດທະນາການສຶກສາຂັ້ນບ້ານ ແລະ ສູນການຮຽນຮູ້ຊຸມຊົນ, ການຮ່ວມມືດ້ານການຮຽນຮູ້ເພື່ອຊຸມຊົນໃນໂຮງຮຽນ, ຄວາມໝາຍຂອງເປົ້າໝາຍການພັດທະນາແບບຍືນຍົງ, ການຮຽນຮູ້ຕະຫຼອດຊີວິດ; ຮຽນຮູ້ກ່ຽວກັບວິທີການປ່ຽນແປງທີ່ມີຄວາມສຳຄັນທີ່ສຸດ; ການຄົ້ນຄວ້າກ່ຽວກັບຂັ້ນຕອນ ແລະ ຄຸນລັກສະນະຂອງວິທີການປ່ຽນແປງທີ່ມີຄວາມສຳຄັນທີ່ສຸດ; ທັກສະຂອງການຄົ້ນຄວ້າ ແລະ ການວາງແຜນວຽກງານ.

ບົວລະພາ

ສສກ ກຳນົດກອບແຜນຍຸດທະສາດການສຶກສາກ່ອນໄວຮຽນ 2021-2025

 ກົມການສຶກສາກ່ອນໄວຮຽນ ກະຊວງສຶກສາທິການ ແລະ ກິລາ (ສສກ) ໄດ້ຈັດກອງປະຊຸມກຳນົດກອບແຜນຍຸດທະສາດການສຶກສາກ່ອນໄວຮຽນ 2021-2025 ເມື່ອວັນທີ 10 ກຸມພາ ຜ່ານມາ ທີ່ຫ້ອງປະຊຸມລີສອດນາປ່າກວາງ ເມືອງແກ້ວອຸດົມ ແຂວງວຽງຈັນ, ໂດຍໃຫ້ກຽດເປັນປະທານຂອງ ທ່ານ ປອ ມີທອງ ສຸວັນວິໄຊ ຫົວໜ້າກົມການສຶກສາກ່ອນໄວຮຽນ ກະຊວງສຶກສາທິການ ແລະ ກິລາ, ມີຄະນະກົມ, ຄູຮ່ວມພັດທະນາ ແລະ ພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ກອງປະຊຸມຄັ້ງນີ້, ຈັດຂຶ້ນເພື່ອປຶກສາຫາລື ແລະ ປະກອບຄຳເຫັນໃສ່ຮ່າງວິໄສທັດ ແລະ ຍຸດທະສາດການສຶກສາກ່ອນໄວຮຽນ, ເພື່ອຄົ້ນຄວ້າຮ່າງແຜນຍຸດທະສາດການສຶກສາກ່ອນໄວຮຽນ ຮອດປີ 2025, ເພື່ອປະກອບຂໍ້ມູນໃສ່ແຜນປະຕິບັດງານຂະແໜງການຍ່ອຍການສຶກສາກ່ອນໄວຮຽນ ໄລຍະ 5 ປີ ຄັ້ງທີ IX (2021-2025). ກະຊວງສຶກສາ ແລະ ກິລາ ໄດ້ຂະຫຍາຍການຈັດຕັ້ງປະຕິບັດການສຶກສາກ່ອນໄວຮຽນໄປສູ່ເຂດຫ່າງໄກສອກຫຼີກ ເພື່ອເຮັດໃຫ້ເດັກນ້ອຍໄດ້ຮັບການດູແລ ເບິ່ງແຍງ ແລະ ມີພັດທະນາການທີ່ດີ ໂດຍສະເພາະການກຽມຄວາມພ້ອມທາງດ້ານການຮຽນກ່ອນເຂົ້າຮຽນໃນຊັ້ນປະຖົມສຶກສາ. ສະນັ້ນ, ການຮັບຮູ້ ແລະ ຜັນຂະຫຍາຍການຈັດຕັ້ງປະຕິບັດນະໂຍບາຍແຫ່ງຊາດ ວ່າດ້ວຍການສຶກສາກ່ອນໄວຮຽນ ເປັນວຽກທີ່ສຳຄັນສຳລັບຜູ້ບໍລິຫານການສຶກສາ ແລະ ວິຊາການທີ່ສັງກັດຢູ່ທຸກລະດັບ ແຕ່ລະຂັ້ນຄຸ້ມຄອງ ທີ່ຈຳເປັນຈະຕ້ອງໄດ້ຈັດຕັ້ງປະຕິບັດ. ປັດຈຸບັນໃນແຜນພັດທະນາຂະແໜງການສຶກສາ ແລະ ກິລາ 5 ປີ 2016-2020 ໄດ້ກໍາເອົາວຽກງານການສຶກສາກ່ອນໄວຮຽນ ເປັນວຽກບຸລິມະສິດໜຶ່ງທີ່ສໍາຄັນ ປະກອບມີ 5 ຍຸດທະສາດ 19 ວຽກຈຸດສຸມຂອງຂະແໜງການຍ່ອຍການສຶກສາກ່ອນໄວຮຽນ ແຕ່ເຖິງແນວໃດກໍຕາມ ຍຸດທະສາດດັ່ງກ່າວມີຂອບເຂດການປະຕິບັດຮອດປີ 2020 ເທົ່ານັ້ນ. ສະນັ້ນ, ເພື່ອກະກຽມໃຫ້ແກ່ການກຳນົດກອບແຜນຍຸດທະສາດ 5 ປີໃນຕໍ່ໜ້າ ຊຶ່ງຈໍາເປັນຕ້ອງມີຄວາມສອດຄ່ອງ ແລະ ສາມາດຜັນຂະຫຍາຍການຈັດຕັ້ງປະຕິບັດນະໂຍບາຍແຫ່ງຊາດ ວ່າດ້ວຍການສຶກສາກ່ອນໄວຮຽນ ຈຶ່ງມີຄວາມຈຳເປັນຕ້ອງໄດ້ກະກຽມ ແລະ ປຶກສາຫາລື ເພື່ອກຳນົດກອບແຜນວຽກດັ່ງກ່າວ ເພື່ອສ້າງເປັນແຜນຍຸດທະສາດ (2021-2025) ຮ່ວມກັບບັນດາຂະແໜງການຍ່ອຍຕ່າງໆທີ່ກ່ຽວຂ້ອງ.

ໃນກອງປະຊຸມກຳນົດກອບແຜນຍຸດທະສາດການສຶກສາກ່ອນໄວຮຽນຄັ້ງນີ້, ຜູ້ເຂົ້າຮ່ວມໄດ້ແລກປ່ຽນຂໍ້ມູນທີ່ກ່ຽວຂ້ອງກັບການສ້າງຍຸດທະສາດການສຶກສາກ່ອນໄວຮຽນ; ນຳສະເໜີ ແລະ ປະກອບຄຳເຫັນ ໂຄງຮ່າງວິໄສທັດຮອດປີ 2030, ຍຸດທະສາດຮອດປີ 2025 ແລະ ແຜນປະຕິບັດງານຂະແໜງການຍ່ອຍການສຶກສາກ່ອນໄວຮຽນ 5 ປີ ຄັ້ງທີ IX (2021-2025); ສົນທະນາ ແລະ ປະກອບຄຳເຫັນຜົນສຳເລັດ ແລະ ຂໍ້ຄົງຄ້າງການຈັດຕັ້ງປະຕິບັດການສຶກສາກ່ອນໄວຮຽນໃນໄລຍະຜ່ານມາ (2016-2020); ສົນທະນາ ແລະ ປະກອບຄໍາຄິດເຫັນ ຮ່າງວິໄສທັດ ຮອດປີ 2030 ແລະ ຍຸດທະສາດການສຶກສາກ່ອນໄວຮຽນ ຮອດປີ 2025; ຄົ້ນຄວ້າ ແລະ ປະກອບຄຳເຫັນ ແຜນຍຸດທະສາດການສຶກສາກ່ອນໄວຮຽນ ຮອດປີ 2025 ຈຸດປະສົງ, ຄາດໝາຍ, ວຽກຈຸດສຸມຂອງແຕ່ລະຍຸດທະສາດ; ຄົ້ນຄວ້າ ແລະ ປະກອບຄຳເຫັນ ເປັນກຸ່ມ ກ່ຽວກັບແຜນປະຕິບັດງານການສຶກສາກ່ອນໄວຮຽນ 2021-2025; ນຳສະເໜີ ແລະ ປະກອບຄຳເຫັນ ຮ່າງແຜນປະຕິບັດງານການສຶກສາກ່ອນໄວຮຽນ 2021-2025; ນຳສະເໜີ ປະກອບຄຳຄິດເຫັນ ແລະ ຮັບຮອງດ້ານວິຊາການ ຮ່າງວິໄສທັດຮອດປີ 2030, ຍຸດທະສາດຮອດປີ 2025 ແລະ ແຜນປະຕິບັດງານຂະແໜງການຍ່ອຍການສຶກສາກ່ອນໄວຮຽນ 5 ປີ ຄັ້ງທີ IX (2021-2025) ແລະ ປຶກສາຫາລືແຜນກິດຈະກຳຕໍ່ໜ້າ ແລະ ຜ່ານມະຕິກອງປະຊຸມ.

(ບຸນທະວີ)

ສກຂ ອັດຕະປື ສ້າງຂີດຄວາມສາມາດວຽກງານໂຄສະນາຂ່າວສານການສຶກສາ-ກິລາ

ພະແນກສຶກສາທິການ ແລະ ກິລາແຂວງ (ສກຂ) ອັດຕະປື ສ້າງຂີດຄວາມສາມາດດ້ານວຽກງານໂຄສະນາຂ່າວສານໃຫ້ພະນັກງານວິຊາການ ຜູ້ທີ່ຮັບຜິດຊອບວຽກງານໂຄສະນາຂ່າວສານສຶກສາ-ກິລາ ຂອງຫ້ອງການສຶກສາທິການ ແລະ ກິລາເມືອງ, ສູນການສຶກສາຂັ້ນແຂວງ ແລະ ໂຮງຮຽນມັດທະຍົມສຶກສາທົ່ວແຂວງທີ່ຂຶ້ນກັບ, ແນໃສ່ເຮັດໃຫ້ການຈັດຕັ້ງຜັນຂະຫຍາຍແນວທາງນະໂຍບາຍຂອງຂັ້ນເທິງທາງດ້ານວຽກງານສຶກສາ-ກິລາ ຢູ່ແຕ່ລະທ້ອງຖິ່ນໄດ້ຮັບການເຜີຍແຜ່ຜ່ານສື່ທາງການໃຫ້ສັງຄົມໄດ້ຮັບຮູ້ຢ່າງກວ້າງຂວາງ, ທົ່ວເຖິງ ແລະ ວ່ອງໄວ.

     ໃນວັນທີ 12 ກຸມພາ ຜ່ານມາ, ພະແນກສຶກສາທິການ ແລະ ກິລາ ແຂວງອັດຕະປື ໄດ້ເປີດກອງປະຊຸມຝຶກອົບຮົມວຽກງານໂຄສະນາຂ່າວສານສຶກສາ-ກິລາ ຄັ້ງທີ I ປີ 2020 ທີ່ຫ້ອງປະຊຸມຂອງພະແນກດັ່ງກ່າວ, ໂດຍພາຍໃຕ້ການເປັນປະທານຂອງທ່ານ ຄຳພູນ ແກ້ວມາລາ ຫົວໜ້າພະແນກສຶກສາທິການ ແລະ ກິລາແຂວງ ແລະ ເປັນກຽດເຂົ້າຮ່ວມຂອງທ່ານ ສຸກສາຄອນ ສີປະເສີດ ຜູ້ອຳນວຍການສູນ ໂຄສະນາຂ່າວສານການສຶກສາ ແລະ ກິລາ ສະຖາບັນຄົ້ນຄວ້າວິທະຍາສາດການສຶກສາ ກະຊວງສຶກສາທິການ ແລະ ກິລາ, ທ່ານ ເຈັດຊິ້ງ ອິນທະວົງ ຮອງຜູ້ອຳນວຍການ ສູນໂຄສະນາຂ່າວສານການສຶກສາ-ກິລາ ພ້ອມດ້ວຍຄູຝຶກຂັ້ນແຂວງ ແລະ ສຳມະນາກອນ ຈຳນວນ 26 ທ່ານ.

ໂອກາດນີ້, ທ່ານ ຄຳພູນ ແກ້ວມາລາ ໄດ້ກ່າວໃຫ້ຮູ້ວ່າ: ການຈັດປະຊຸມຝຶກອົບຮົມໃນຄັ້ງນີ້ ແມ່ນ ເພື່ອສ້າງຂີດຄວາມສາມາດດ້ານວິຊາການວຽກງານໂຄສະນາຂ່າວສານສຶກສາ-ກິລາ ໃຫ້ກັບພະນັກງານວິຊາການ ຫ້ອງການສຶກສາທິການ ແລະ ກິລາເມືອງ, ໂຮງຮຽນ ແລະ ສູນການສຶກສາທີ່ຂຶ້ນກັບພະແນກສຶກສາທິການ ແລະ ກິລາແຂວງ ເພື່ອຮັບໃຊ້ວຽກງານໂຄສະນາ ໃນການຈັດຕັ້ງຜັນຂະຫຍາຍແນວທາງ ນະໂຍບາຍຂອງຂັ້ນເທິງ, ໂດຍສະເພາະໂຄສະນາການຈັດຕັ້ງປະຕິບັດແນວທາງນະໂຍບາຍວຽກງານການສຶກສາ ແລະ ກິລາ ຢູ່ແຕ່ລະທ້ອງຖິ່ນໃຫ້ສັງຄົມໄດ້ຮັບຮູ້ຢ່າງຖືກຕ້ອງ ແລະ ກວ້າງຂວາງ ໂດຍຜ່ານສື່ທີ່ເປັນທາງການ.

ສຳລັບການຝຶກອົບຮົມຄັ້ງນີ້, ສຳມະນາກອນທີ່ເຂົ້າຮ່ວມ ຈະໄດ້ຮຽນຮູ້ກ່ຽວກັບກົດໝາຍສື່ມວນຊົນລາວ, ພື້ນຖານການເປັນນັກຂ່າວ, ພື້ນຖານການຂຽນຂ່າວ, ຈັນຍາບັນຂອງນັກຂ່າວ, ພື້ນຖານການຖ່າຍພາບສຳລັບວຽກງານໂຄສະນາຂ່າວສານສຶກສາ-ກິລາ, ວິທີຕົບແຕ່ງພາບ ແລະ ການສົ່ງຂໍ້ມູນຜ່ານລະບົບອິນເຕີເນັດ ຈາກວິທະຍາກອນສູນໂຄສະນາຂ່າວສານສຶກສາ-ກິລາ ສະຖາບັນຄົ້ນຄວ້າວິທະຍາສາດການສຶກສາ ກະຊວງສຶກສາທິການ ແລະ ກິິລາ ແລະ ພະແນກສຶກສາທິການ ແລະ ກິລາແຂວງ, ໂດຍຈະໃຊ້ເວລາ 3 (12-14 ກຸມພາ 2020) ວັນຈຶ່ງສຳເລັດ.

ສສກ-ບີຄວາ ທົບທວນຄືນຫຼັກສູດການສ້າງຄູ ຄັ້ງທີ 2

 ກະຊວງສຶກສາທິການ ແລະ ກິລາ (ສສກ) ຮ່ວມກັບແຜນງານບີຄວາ ໄດ້ຈັດກອງ​ປະ​ຊຸມ​ທົບ​ທວນ​ຄືນ​ຫຼັກ​ສູດ​ການສ້າ​ງ​ຄູ ຄັ້ງ​ທີ 2 ເມື່ອວັນທີ 10 ກຸມພາ ຜ່ານມາ ທີ່ຫ້ອງປະຊຸມສູນຝຶກອົບຮົມ ສູນກາງແນວລາວສ້າງຊາດ ນະຄອນຫຼວງວຽງຈັນ, ໂດຍເປັນກຽດເຂົ້າຮ່ວມຂອງທ່ານ ນາງ ຈັນ​ທະ​ໜອມ ທຳ​ມະ​ຈັກ ວ່າ​ການ​ຜູ້​ອຳ​ນວຍ​ການ​ສູນ​ພັດ​ທະ​ນາ​ຄູ, ທ່ານ ນາງ ພອນ​ທິ​ດາ ວົງ​ໄຊ ຜູ້​ຮັບ​ຜິດ​ຊອບ​ແຜນ​ງານ (ຝ່າຍ​ການ​ສຶກ​ສາ) ສະ​ຖານ​ທູດ​ອົດ​ສະ​ຕ​ຣາ​ລີ ແລະ ທ່ານ ນາງ ຄໍລິນ ວິຊ ຜູ້ບໍລິຫານວຽກງານການສຶກສາ ແຜນງານບີຄວາ, ພ້ອມດ້ວຍ​ທີມ​ພັດ​ທະ​ນາ​ຫຼັກ​ສູດ​ຫຼາຍກວ່າ 50 ທ່ານ ຈາກ​ວິ​ທະ​ຍາ​ໄລ​ຄູ, ກົມ​ສ້າງ​ຄູ, ສູນ​ພັ​ດ​ທະ​ນາ​ຄູ, ຄະ​ນະ​ສຶກ​ສາ​ສາດ ມະຫາວິທະຍາໄລແຫ່ງຊາດແລະ ສະ​ຖາ​ບັນ​ຄົ້ນ​ຄວ້າ​ວິ​ທະ​ຍາ​ສາດ​ການ​ສຶ​ກ​ສາຢ່າງພ້ອມພຽງ.

       ການຈັດກອງປະຊຸມຄັ້ງນີ້, ແມ່ນເພື່ອ​ທົບ​ທວນ, ກວດ​ແກ້ ແລະ ສຳ​ເລັດສື່​ການ​ຮຽນ​ການ​ສອນ​ສຳ​ລັບ​ປີ​ທີ 1 ພາກ​ຮຽນ​ທີ 1 ໂດຍ​ອີງ​ໃສ່​ຄຳ​ຄິດ​ຄຳເຫັນ​ຈາກ​ການ​ທົດ​ລອງ​ນຳ​ໃຊ້​ ພາຍ​ຫຼັງການ​ຈັດ​ການ​ຮຽນ​ການ​ສອນ​ສຳ​ເລັດ​ພາກ​ຮຽນ 1. ສໍາລັບຂະ​ບວນ​ການ​ພັ​ດ​ທະ​ນາ​ຫຼັ​ກ​ສູດ​ການ​ສ້າງ​ຄູນີ້ ໄດ້​ທົບ​ທວນ​ຄືນ ​ເພື່ອ​ການ​ຮຽນ​ຮູ້​ ແລະ ປັບ​ປຸງ​ຢ່າງ​ຕໍ່​ເນື່ອງ ໂດຍວິ​ທະ​ຍາ​ໄລ​ຄູ​​ທັງ 8 ແຫ່ງນຳ​ໃຊ້​ຫຼັກ​ສູດ​ການ​ສ້າງ​ຄູ​ສະ​ບັບ​ປັບ​ປຸງ​ໃໝ່ ແລະ ການ​ຈັດ​ຕັ້ງ​ປະ​ຕິ​ບັດນຳ​ໃຊ້​ສື່​ການຮຽນ​ການ​ສອນ​ຫຼັກ​ສູດ​ໃໝ່ ໄດ້​ມີ​ການ​ຕິດ​ຕາມ​ຢ່າງ​ໃກ້​ຊິດ​ຢູ່​ວິ​ທະ​ຍາ​ໄລ​ 2 ​ແຫ່ງ ​ຄື: ວິ​ທະ​ຍາ​ໄລ​ຄູ​ປາກ​ເຊ ແລະ ວິ​ທະ​ຍາ​ໄລ​ຄູ​ດົງ​ຄຳ​ຊ້າງ. ກອງ​ປະ​ຊຸມ​ພັດ​ທະ​ນາ ແລະ ກວດ​ແກ້​ຄືນ​ຫຼັກ​ສູດ​ການສ້າງ​ຄູ ໄດ້​ມີ​ການ​ກຳ​ນົດໄວ້​ຕະ​ຫຼອດ​ສົກ​ຮຽນ ເພື່ອ​ປັບ​ປຸງ​ສື່​ການຮຽນ​ການ​ສອນ ​ໂດຍ​ອີ​ງ​ໃສ່​ປະ​ສົບ​ການ ແລະ ການ​ຮຽນ​ຮູ້ຈາກ​ທົດ​ລອງ​ນຳ​ໃຊ້​ສື່​ກາ​ນຮຽນ​ການ​ສອນ.

       ກອງປະຊຸມດັ່ງກ່າວ, ແມ່ນໄດ້ດຳເນີນໄປເປັນເວລາ 5 ວັນ (ວັນທີ 10-14 ກຸມພາ 2020) ໂດຍທີມ​ພັດ​ທະ​ນາ​ຫຼັກ​ສູດ​ຈະ​ທົບ​ທວນ​ຄືນ​ສື່​ການ​ຮຽນ​ການ​ສອນ​ສຳ​ລັບ 11 ລາຍ​ວິ​ຊາ ທີ່​ສອນ​ໃນ​ປີ​ທີ 1 ພາກ​ຮຽນ​ທີ 1 ຄື: ວິ​ຊາ​ພາ​ສາ​ລາວ, ວິ​ຊາ​ຄະ​ນິດ​ສາດ, ວິ​ຊາ​ວິ​ທະ​ຍາ​ສາດ ແລະ ສິ່ງ​ແວດ​ລ້ອມ, ​ພັດ​ທະ​ນາການ​ເດັກ, ໄອ​ຊີ​ທີ, ສັງ​ຄົມ​ສຶກ​ສາ, ສິ​ລະ​ປະ ແລະ ຫັດ​ຖະ​ກຳ, ຫຼັກ​ສູດ​ຊັ້ນ​ປະ​ຖົມ, ຄຸນ​ສົມ​ບັດ, ​ພະລະ​ສຶກ​ສາ ແລະ ການ​ບໍ​ລິ​ຫານ​ໂຮງ​ຮຽນ ແລະ ການ​ພັດ​ທະ​ນາ​ຊຸມ​ຊົນ,  ການ​ກວດ​ແກ້​ຄືນນັ້​ນຈະ​ອີງ​ໃສ່​ຄຳ​ຄິດ​ຄຳ​ເຫັນ​ທົ່ວ​ໄປ ແລະ ຄຳ​ເຫັນ​ສະ​ເພາະ​ຂອງແຕ່​ລະ​ວິ​ຊາ​ຈາກ​​ຄູອາ​ຈານ​ສອນ ໂດຍ​ສະ​ເພາະ​ແມ່ນ​ເນັ້ນ​ໃສ່​ຄຳ​ເຫັນ​ການ​ຖອດ​ຖອນ​ບົດ​ຮຽນ​ຈາກວິ​ທະ​ຍາ​ໄລ​ຄູ 2 ​ແຫ່ງ, ຄຳ​​ຄິດ​ຄຳເຫັນ​ຂອງ​​ເຂົາເຈົ້າ​ຈະ​ໄດ້​ຮັບ​ການ​ວິ​ເຄາະ ແລະ ຮວບ​ຮວມ​ເຂົ້າ​ໃນ​ສື່​ໃນ​ພາກ​ຮຽນ 1 ເນື່ອງ​ຈາກ​ທີມ​ພັດ​ທະ​ນາ​ຫຼັກ​ສູດ​ຍັງ​ແມ່ນ​ຄູອາ​ຈານ​ສອນ, ພວກ​ເຂົາ​ຈະ​ນຳ​ໃຊ້​ປະ​ສົບ​ການ​ການ​ສອນ​ຂອງ​ຕົນ​ໃນ​ພາກ​ຮຽນ 1 ເພື່ອ​ແນະ​ນຳ​ການ​ປັບ​ປຸງກວດ​ແກ້​ຄືນຕໍ່​ໄປ. ນອກຈາກນີ້, ທີມ​ງານ​ຍັງ​ຈະ​ໄດ້​ອອກ​ແບບ​ວາງ​ແຜນ​ເພື່ອ​ຮັບ​ປະ​ກັນ​ວ່າ​ສື່​ການ​ຝຶກ​ອົບ​ຮົມ​ຈະ​ສຳ​ເລັດ​ໃນ​ກາງ​ເດືອນ​ມີນາ​ນີ້.

       ພາຍ​ຫຼັງສົ່ງ​ຮ່າງ​ສະ​ບັບ​ສຸດ​ທ້າຍ, ສື່​ຝຶກ​ອົບ​ຮົມ​ຈະ​ຖືກ​ນຳ​ສະ​ເໜີ​ໃຫ້​ທີ​ມກວດ​ແກ້ ຊຶ່ງມີກົມ​ສ້າງ​ຄູ ແລະ ພະ​ນັກ​ງານ​ຈາກ​ສູນ​ພັດ​ທະ​ນາ​ຄູ, ອາ​ຈານ​ຈາກວິ​ທະ​ຍາ​ໄລ​ຄູ ແລະ ​ການຄັດ​ເລືອກ​ທີມ​ພັດ​ທະ​ນາ​ຫຼັກ​ສູດ ເພື່ອ​ຮັບ​ປະ​ກັນ​ຄຸນ​ນະ​ພາບ ແລະ ການ​ດັດ​ແກ້. ສຸດ​ທ້າຍ ຫຼັ​ກ​ສູດ​ດັ່ງ​ກ່າວ ​ຈະ​​ຖືກ​ນຳ​ສະ​ເໜີ​ໃຫ້​ຄະ​ນະສະ​ພາ​ທີ່​ປຶກ​ສາ​ດ້ານ​ວຽກ​ງານ​ສ້າງ​ຄູ​ແຫ່ງ​ຊາດ ແລະ ກົມ​ສ້າງ​ຄູ ​ເພື່ອ​ຮັບ​ຮອງ. ເມື່ອ​ສື່​ຖືກ​ຮັບ​ຮອງ​ແລ້ວ, ສື່​ຈະ​ຖືກ​ສົ່ງ​ໄປຂັ້ນ​ຕອນ​ສຸດ​ທ້າຍ​ ຄື ການ​ຈັດ​ໜ້າ​ເຈ້ຍ, ​ຈັ​ດ​ພິມ ແລະ ແຈກ​ຢາຍ​ໃຫ້​ວິ​ທະ​ຍາ​ໄລ​ຄູ 8 ແຫ່ງ​ ສຳ​ລັບນັກ​ສຶກ​ສາປີ​ທີ 1 ລຸ້ນ​ຕໍ່​ໄປ ຜູ້​ທີ່​ຈະ​ເລີ່ມ​ການ​ຝຶກ​ອົບ​ຮົມ​ໃນ​ເດືອນ​ກັນ​ຍາ 2020.

(ບຸນທະວີ)

ສກຂ ຈໍາປາສັກ ໄດ້ຫົວໜ້າຜູ້ໃໝ່ ຂະນະທີ່ຫຼາຍພະແນກການກໍມີການຍົກຍ້າຍ-ແຕ່ງຕັ້ງ ລວມ 12 ທ່ານ

  ພະແນກສຶກສາທິການ ແລະ ກິລາແຂວງ (ສກຂ) ຈຳປາສັກ ໄດ້ຜູ້ອໍານວຍການວິທະຍາໄລເຕັກນິກ-ວິຊາຊີບ ແຂວງຈໍາປາສັກ ມາເປັນຫົວໜ້າຜູ້ໃໝ່ ພາຍຫຼັງຫົວໜ້າຜູ້ເກົ່າໄດ້ຮັບການປະກາດຍົກຍ້າຍ-ແຕ່ງຕັ້ງໄປປະຈໍາການຢູ່ສະພາປະຊາຊົນແຂວງ. ຂະນະທີ່ ຫຼາຍພະແນກການອ້ອມຂ້າງແຂວງກໍໄດ້ມີການປະກາດຍົກຍ້າຍ-ແຕ່ງຕັ້ງ ລວມມີ 12 ທ່ານ.

  ເມື່ອວັນທີ 7 ກຸມພາ ຜ່ານມາ, ແຂວງຈໍາປາສັກ ໄດ້ຈັດພິທີປະກາດຍົກຍ້າຍ ແລະ ແຕ່ງຕັ້ງພະນັກງານນໍາ-ຄຸ້ມຄອງ ທີ່ສະໂມສອນແຂວງ ໂດຍການເຂົ້າຮ່ວມຂອງທ່ານ ປອ ບຸນຖອງ ດີວິໄຊ ກໍາມະການສູນກາງພັກ ເລຂາພັກແຂວງ ເຈົ້າແຂວງຈໍາປາສັກ, ມີຮອງເລຂາພັກແຂວງ, ບັນດາຄະນະປະຈໍາພັກແຂວງ, ກໍາມະການພັກແຂວງ, ເລຂາພັກນະຄອນ, ເລຂາພັກເມືອງ, ການນໍາພະແນກການ, ກົມກອງອ້ອມຂ້າງແຂວງ ແລະ ຂະແໜງການທີ່ກ່ຽວຂ້ອງ.

ໃນພິທີ, ໄດ້ຜ່ານເອກະສານການຍົກຍ້າຍ ແລະ ແຕ່ງຕັ້ງພະນັກງານນໍາພາ-ຄຸ້ມຄອງ ຈໍານວນ 12 ທ່ານ ຄື: ຍົກຍ້າຍ-ແຕ່ງຕັ້ງ ທ່ານ ສະນັ່ນ ສີພາພົມມະຈັນ ກໍາມະການພັກແຂວງ ອະດີດເລຂາພັກເມືອງ ເຈົ້າເມືອງໂຂງ ເປັນຫົວໜ້າຫ້ອງວ່າການແຂວງ; ຍົກຍ້າຍ-ແຕ່ງຕັ້ງທ່ານ ບົວລີ ເພັດສົງຄາມ ກໍາມະການພັກແຂວງ ຫົວໜ້າຫ້ອງວ່າການແຂວງ ເປັນຫົວໜ້າພະແນກກະສິກໍາ ແລະ ປ່າໄມ້ແຂວງ; ຍົກຍ້າຍ- ແຕ່ງຕັ້ງ ທ່ານ ປະດິດ ວັນນະລັດສະໝີ ກໍາມະການພັກແຂວງ ຫົວໜ້າພະແນກກະສິກໍາ ແລະ ປ່າໄມ້ແຂວງ ເປັນຫົວໜ້າພະແນກແຮງງານ ແລະ ສະຫວັດດີການສົງຄົມແຂວງ; ຍົກຍ້າຍ-ແຕ່ງຕັ້ງ ທ່ານ ສົມສີ ມະນີນິນ ກໍາມະການພັກແຂວງ ເລຂາພັກເມືອງ ເຈົ້າເມືອງສຸຂຸມາ ເປັນຫົວໜ້າຄະນະໂຄສະນາອົບຮົມແຂວງ; ຍົກຍ້າຍ-ແຕ່ງຕັ້ງ ທ່ານ ໂສມ ບຸດຕະກຸນ ກໍາມະການພັກແຂວງ ເລຂາພັກເມືອງ ເຈົ້າເມືອງບາຈຽງຈະເລີນສຸກ ເປັນຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ; ຍົກຍ້າຍ- ແຕ່ງຕັ້ງ ທ່ານ ບົວທອງ ສຸວັນນະສານ ກໍາມະການພັກແຂວງ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ ເປັນຜູ້ອໍານວຍການໂຮງຮຽນການເມືອງ-ການປົກຄອງແຂວງ; ຍົກຍ້າຍ- ແຕ່ງຕັ້ງ ທ່ານ ຄໍາຕັນ ຊົມພັນດອນ ກໍາມະການພັກແຂວງ ອະດີດເລຂາພັກເມືອງ ເຈົ້າເມືອງຈໍາປາສັກ ປະຈໍາການຢູ່ຄະນະກວດກາພັກແຂວງ.

ຂະນະດຽວກັນນີ້, ໄດ້ຍົກຍ້າຍ-ແຕ່ງຕັ້ງ ທ່ານ ນາງ ແສງສຸວັນ ຊຸຍພະສິດ ກໍາມະການພັກແຂວງ ຫົວໜ້າພະແນກສຶກສາທິການ ແລະ ກິລາແຂວງ ປະຈໍາການຢູ່ສະພາປະຊາຊົນແຂວງ ແລະ ຍົກຍ້າຍ-ແຕ່ງຕັ້ງ ທ່ານ ບົວໄຂ ສຸພາອອນ ຜູ້ອໍານວຍການວິທະຍາໄລເຕັກນິກ-ວິຊາຊີບ ແຂວງຈໍາປາສັກ ເປັນຫົວໜ້າພະແນກສຶກສາທິການ ແລະ ກິລາແຂວງ.ນອກຈາກນັ້ນ, ຍົກຍ້າຍ-ແຕ່ງຕັ້ງ ທ່ານ ສົມເພັດ ບຸດສະດີ ຮອງເລຂາຄະນະພັກຮາກຖານ ຮອງຫົວໜ້າຫ້ອງການເມືອງ ກອງບັນຊາການທະຫານແຂວງ ເປັນເລຂາພັກເມືອງ ເຈົ້າເມືອງສຸຂຸມາ; ຍົກຍ້າຍ-ແຕ່ງຕັ້ງ ທ່ານ ວັນນະສັກ ຊາດຕະກຸນ ຮອງຫົວໜ້າພະແນກພະລັງງານ ແລະ ບໍ່ແຮ່ແຂວງ ເປັນຫົວໜ້າພະແນກການຕ່າງປະເທດແຂວງ ແລະ ແຕ່ງຕັ້ງ ທ່ານ ປອ ວັນນະໄຊ ຊາດຕະກຸນ ຮອງຫົວໜ້າພະແນກສາທາລະນະສຸກແຂວງ ຂຶ້ນເປັນຫົວໜ້າພະແນກສາທາລະນະສຸກແຂວງ.

ສຳລັບການຍົກຍ້າຍ-ແຕ່ງຕັ້ງ ພະນັກງານນໍາພາ-ຄຸ້ມຄອງຄັ້ງນີ້, ແມ່ນປະຕິບັດຕາມມະຕິຕົກລົງຂອງກົມການເມືອງສູນກາງພັກ ສະບັບເລກທີ 031/ກມສພ ວ່າດ້ວຍວຽກງານຄຸ້ມຄອງພະນັກງານ ແລະ ອີງຕາມກົດໝາຍວ່າດ້ວຍການປົກຄອງທ້ອງຖິ່ນ ເລກທີ 68/ສພຊ, ໃນໝວດທີ IV ມາດຕາ 20 ແລະ ອີງໃສ່ແຈ້ງການຂອງຄະນະຈັດຕັ້ງສູນກາງພັກ ສະບັບເລກທີ 36/ຄຈສພ, ລົງວັນ 3 ກຸມພາ 2020 ແລະ ອີງໃສ່ໜັງສືແຈ້ງຕອບຂອງບັນດາກະຊວງຕ່າງໆທີ່ກ່ຽວຂ້ອງ.

(ໂດຍ: ທູນທອງໃຈ)

ໄຟຟ້າລາວ ບຽດຊະນະ ເມືອງໂພນໄຊ ຫວຸດຫວິດ 1-0 ຄອງແຊ໋ມເຕະບານຊີງຂັນເຈົ້າແຂວງຫຼວງພະບາງ 2020

 ທັບນັກເຕະທີມໄຟຟ້າລາວ ສາຂາແຂວງຫຼວງພະບາງ ໂຊຟອມເກັ່ງບຽດເອົາຊະນະ ທີມເມືອງໂພນໄຊ ໄປໄດ້ແບບຫວຸດຫວິດ 1-0 ປະຕູ ຄວ້າແຊ໋ມການແຂ່ງຂັນເຕະບານ ຊີງຂັນທ່ານເຈົ້າແຂວງຫຼວງພະບາງ ຄັ້ງທີ V  ປະຈຳປີ 2020 ແລະ ຍັງເປັນແຊ໋ມຄັ້ງທຳອິດລາຍການຊີງຂັນເຈົ້າແຂວງອີກດ້ວຍ. ຂະນະທີ່ອັນດັບ 3 ຕົກເປັນຂອງ ທີມທະນາຄານແຂວງຫຼວງພະບາງ ດີກຣີຮອງແຊ໋ມເກົ່າ ຫຼັງໄລ່ເອົາຊະນະ ທີມນອກກອບ ດີກຣີແຊ໋ມເກົ່າ ໄປໄດ້ 3-1 ປະຕູ.

      ການແຂ່ງຂັນເຕະບານນັດຊີງຊະນະເລີດ ແລະ ຊີງອັນດັບທີ 3 ຊີງຂັນທ່ານເຈົ້າແຂວງຫຼວງພະບາງ ຄັ້ງທີ V ປະຈຳປີ 2020 ໄດ້ມີຂຶ້ນໃນວັນທີ 8 ກຸມພາ ຜ່ານມາ ທີ່ສະໜາມກິລາແຂວງຫຼວງພະບາງ ໂດຍໃຫ້ກຽດເຂົ້າຮ່ວມ ແລະ ມອບລາງວັນຂອງ ທ່ານ ຊາຍສະຫວັນ ຈັນມານິດ ຮັກສາການຫົວໜ້າພະແນກສຶກສາທິການ ແລະ ກິລາແຂວງຫຼວງພະບາງ ແລະ ທ່ານ ຄຳແພງ ວົງຂັນຕີ ຮອງປະທານສະຫະພັນກິລາບານເຕະແຫ່ງຊາດລາວ, ມີຜູ້ຕາງໜ້າຈາກສະຫະພັນກິລາບານເຕະແຂວງ, ຄະນະຮັບຜິດຊອບຈັດການແຂ່ງຂັນ, ຄະນະນຳ, ຄູຝຶກ ແລະ ນັກກິລາ ຕະຫຼອດຮອດກອງເຊຍແຕ່ລະພາກສ່ວນຮ່ວມຊົມຮ່ວມເຊຍຢ່າງຫຼວງຫຼາຍ.

     ໂດຍຄູ່ທີ່ໜ້າສົນໃຈເປັນການແຂ່ງຂັນຄູ່ຊີງຊະນະເລີດ ລະຫວ່າງ ທີມໄຟຟ້າລາວ ສາຂາແຂວງຫຼວງພະບາງ ພົບກັບ ທີມເມືອງໂພນໄຊ. ຜ່ານການແຂ່ງຂັນຜົນປະກົດເປັນຝ່າຍ ທີມໄຟຟ້າລາວ ສາຂາແຂວງຫຼວງພະບາງ ທີ່ຫຼິ້ນໄດ້ດີກວ່າເລັກໜ້ອຍບຽດເອົາຊະນະ ທີມເມືອງໂພນໄຊ ໄປໄດ້ແບບຫວຸດຫວິດ 1-0 ປະຕູ ຄວ້າແຊ໋ມການແຂ່ງຂັນເຕະບານ ຊີງຂັນທ່ານເຈົ້າແຂວງຫຼວງພະບາງ ຄັ້ງທີ V  ປະຈຳປີ 2020 ແລະ ຍັງເປັນແຊ໋ມຄັ້ງທຳອິດລາຍການຊີງຂັນເຈົ້າແຂວງອີກດ້ວຍ ຈາກການຜ່ານເຂົ້າສູ່ຮອບຊີງຊະນະເລີດ 2 ຄັ້ງ.

    ສະຫຼຸບຜົນການແຂ່ງຂັນເຕະບານ ຊີງຂັນທ່ານເຈົ້າແຂວງຫຼວງພະບາງ ຄັ້ງທີ V ປະຈຳປີ 2020 ອັນດັບ 1 ທີມໄຟຟ້າລາວສາຂາແຂວງຫຼວງພະບາງ ໄດ້ຮັບຂັນໝູນວຽນ 1 ໜ່ວຍ, ຂັນແຊ໋ມປະຈຳປີ 1 ໜ່ວຍ, ຫຼຽນ ພ້ອມເງິນສົດ 10 ລ້ານກີບ, ອັນດັບ 2 ເມືອງໂພນໄຊ ໄດ້ຮັບຂັນ 1 ໜ່ວຍ, ຫຼຽນ ພ້ອມເງິນສົດ 7 ລ້ານກີບ, ອັນດັບ 3 ທະນາຄານແຂວງຫຼວງພະບາງ ໄດ້ຮັບຂັນ 1 ໜ່ວຍ, ຫຼຽນ ພ້ອມເງິນສົດ 5 ລ້ານກີບ ແລະ ອັນດັບ 4 ນອກກອບ ໄດ້ຮັບເງິນສົດ 3 ລ້ານກີບ. ສ່ວນລາງວັນນັກກິລາຍິງປະຕູສູງສຸດ ທ້າວ ບຸນທຳ ຈາກທີມນອກກອບ ໄດ້ຮັບໂລ້ລາງວັນ ພ້ອມເງິນສົດ 5 ແສນກີບ, ຜູ້ຮັກສາປະຕູດີເດັ່ນ ທ້າວ ສຸດທິສັກ ຈາກທີມໄຟຟ້າລາວສາຂາແຂວງຫຼວງພະບາງ ໄດ້ຮັບໂລ້ລາງວັນ ພ້ອມເງິນສົດ 5 ແສນກີບ ແລະ ທີມມາລະຍາດດີເດັ່ນ ທີມພະຍາອິນຊີ ໄດ້ຮັບໂລ້ລາງວັນ ພ້ອມເງິນສົດ 1 ລ້ານກີບ.

 (ຂ່າວໂດຍ: ອາຜຸດເດດ ບຸບຜາ)

ອຸກກີ້ ໂມບາຍ ແລະ ວົງດົນຕີ ໝາກແຂ່ນແດນເໜືອ ມອບເຄື່ອງຊ່ວຍເຫຼືອຕ້ານໄພໜາວ

  ຮ້ານຂາຍ ແລະ ສ້ອມແປງໂທລະສັບ ອຸກກີ້ ໂມບາຍ ແລະ ວົງດົນຕີ ໝາກແຂ່ນແດນເໜືອ ມອບເຄື່ອງຊ່ວຍເຫຼືອຕ້ານໄພໜາວໃຫ້ແກ່ພະແນກສຶກສາທິການ ແລະ ກິລາແຂວງ (ສກຂ) ຫົວພັນ ເພື່ອນຳໄປມອບຕໍ່ໃຫ້ແກ່ນັກຮຽນທຸກຍາກຂອງແຂວງຫົວພັນ ລວມມູນຄ່າ 10 ລ້ານກວ່າກີບ.ພິທີມອບ-ຮັບເຄື່ອງຊ່ວຍເຫຼືອຕ້ານໄພໜາວຄັ້ງນີ້, ໄດ້ມີຂຶ້ນເມື່ອວັນທີ 10 ຕຸລາ ຜ່ານມາ ທີ່ສະໜາມກິລາຂອງແຂວງຫົວພັນ, ໂດຍຕາງໜ້າກ່າວມອບຂອງທ່ານ ສີສົມສັກ ພົມມາທຳ ຫົວໜ້າ ວົງດົນຕີ ໝາກແຂ່ນແດນເໜືອ ແລະ ເປັນກຽດກ່າວຮັບຂອງທ່ານ ມົນທອງ ລຽນຕິຄຸນ ຫົວໜ້າພະແນກສຶກສາທິການ ແລະ ກິລາແຂວງ, ມີຫົວໜ້າຂະແໜງ ແລະ ພະນັກງານພາຍໃນພະແນກ ສກຂ ເຂົ້າຮ່ວມເປັນສັກຂີພິຍານ.

      ສະເພາະເຄື່ອງທີ່ນຳມາມອບໃນຄັ້ງນີ້, ປະກອບມີ ເຄື່ອງນຸ່ງເດັກນ້ອຍ ຍິງ-ຊາຍ, ເຄື່ອງນຸ່ງຫົ່ມ ຜູ້ໃຫຍ່ ຍິງ-ຊາຍ, ຖົງຕີນ, ຖົງມື ແລະ ອື່ນໆ ລວມມູນຄ່າ 10 ລ້ານກວ່າກີບ, ຊຶ່ງ ເຄື່ອງດັ່ງກ່າວ, ແມ່ນ ທ່ານ ສຸກສະຫວັນ ພົມມາທຳ ເຈົ້າຂອງຮ້ານຂາຍ ແລະ ສ້ອມແປງໂທລະສັບ ອຸກກີ້ ໂມບາຍ ຢູ່ນະຄອນຫຼວງວຽງຈັນ ໄດ້ປຸກລະດົມຮັບບໍລິຈາກ ຈາກຜູ້ໃຈບຸນທີ່ມີນໍ້າໃຈໃສສັດທາ ໃນນະຄອນຫຼວງວຽງຈັນ ແລະ ຕ່າງແຂວງ ທີ່ມີຄວາມສົນໃຈ ແລະ ຈຸດປະສົງຢາກຊ່ວຍເຫຼືອສັງຄົມ ໂດຍສະເພາະແມ່ນຄອບຄົວ ແລະ ລູກຫຼານນັກຮຽນທີ່ທຸກຍາກຂາດເຂີນ, ເດັກກຳພ້າ, ເດັກກຳພອຍ, ຜູ້ດ້ອຍໂອກາດ ແລະ ອື່ນໆທົ່ວແຂວງຫົວພັນ ໄດ້ມີອຸປະກອນຮັບໃຊ້, ມີເຄື່ອງນຸ່ງຫົ່ມ ເພື່ອມີກຳລັງໃຈສູ້ຊີວິດຕໍ່ໄປ.

      ໂອກາດດຽວກັນ, ທ່ານ ມົນທອງ ລຽນຕິຄຸນ ໄດ້ກ່າວສະແດງຄວາມຂອບໃຈ ແລະ ຮູ້ບຸນຄຸນຢ່າງລົ້ນເຫຼືອມາຍັງບັນດາພໍ່ແມ່ພີ້ນ້ອງທຸກພາກສ່ວນ ທີ່ໄດ້ຮ່ວມຈິດຮ່ວມໃຈບໍລິຈາກເຄື່ອງຊ່ວຍເຫຼືອໃນຄັ້ງນີ້ ໂດຍຜ່ານ ທ່ານ ສຸກສະຫວັນ ພົມມາທຳ ເຈົ້າຂອງຮ້ານຂາຍ ແລະ ສ້ອມແປງໂທລະສັບ ອຸກກີ້ໂມບາຍ.ນອກຈາກນີ້, ທ່ານຫົວໜ້າພະແນກສຶກສາທິການ ແລະ ກິລາ ແຂວງຫົວພັນ ຍັງໄດ້ມອບໃບຍ້ອງຍໍຂັ້ນພະແນກໃຫ້ແກ່ ທ່ານ ສຸກສະຫວັນ ພົມມາທຳ ເຈົ້າຂອງຮ້ານຂາຍ ແລະ ສ້ອມແປງໂທລະສັບ ອຸກກີ້ໂມບາຍ, ຊຶ່ງຕາງໜ້າຮັບໂດຍ ທ່ານ ສີສົມສັກ ພົມມາທຳ ຫົວໜ້າວົງດົນຕີ ໝາກແຂ່ນແດນເໜືອອີກດ້ວຍ.

      ຂະນະດຽວກັນ, ໃນຕອນເຊົ້າຂອງວັນທີ 11 ກຸມພາ ຜ່ານມາ, ກຸ່ມອາສາສະໝັກ ຊຳເໜືອ ແລະ ວິທະຍາ ອາສາຮ່ວມໃຈຕ້ານໄພໜາວ ນະຄອນຫຼວງວຽງຈັນ ໄດ້ນຳເອົາເຄື່ອງນຸ່ງຈຳນວນ 2 ເປົາ ໄປສົບທົບກັບພະແນກສຶກສາທິການ ແລະ ກິລາ ແຂວງຫົວພັນ ເພື່ອນຳໄປມອບໃຫ້ແກ່ນັກຮຽນຜູ້ທີ່ທຸກຍາກຂາດເຂີນ, ເດັກກຳພ້າ, ເດັກກຳພອຍ, ເດັກດ້ອຍໂອກາດ ແລະ ທຸກຍາກຂາດເຂີນຢູ່ເຂດຫ່າງໄກສອກຫຼີກທົ່ວແຂວງຫົວພັນ, ໂດຍຕາງໜ້າ ກຸ່ມອາສາສະໝັກ ຊຳເໜືອ ແລະ ວິທະຍາອາສາຮ່ວມໃຈຕ້ານໄພໜາວ ນະຄອນຫຼວງວຽງຈັນ ມອບໂດຍ ທ່ານ ສຸລັດ ແລະ ກ່າວຮັບຂອງທ່ານ ມົນທອງ ລຽນຕິຄຸນ ຫົວໜ້າພະແນກ ສກຂ.

(ໂດຍ ສີສົມສັກ)