ເຊກອງ ຫາລື ກຽມສົ່ງ 6 ປະເພດກິລາຮ່ວມຊີງໄຊ ໃນຊຽງຂວາງ ເກມ 2018

19441162 1136774093091408 1200174546 n

      ພະແນກສຶກສາທິການ ແລະ ກິລາແຂວງເຊກອງ ຮ່ວມປຶກສາຫາລືກັບ
ບັນດາສະຫະພັນກິລາເປົ້າໝາຍ ເພື່ອກະກຽມຄວາມພ້ອມສົ່ງຄະນະນຳ, ຄູເຝິກ
ແລະ ນັກກິລາຈຳນວນ 6 ປະເພດເຂົ້າຮ່ວມຊີງໄຊໃນງານມະຫະກຳກິລາແຫ່ງ
ຊາດ ຄັ້ງທີ 11 ຫຼື ຊຽງຂວາງ ເກມທີ່ແຂວງຊຽງຂວາງເປັນເຈົ້າພາບໃນທ້າຍ
ປີ 2018.

      ກອງປະຊຸມປຶກສາຫາລືຄັ້ງນີ້ ໄດ້ຈັດຂຶ້ນໃນວັນທີ 16 ມິຖຸນາ ຜ່ານມາ
ທີ່ຫ້ອງປະຊຸມພະແນກດັ່ງກ່າວ, ໂດຍໃຫ້ກຽດເຂົ້າຮ່ວມຂອງທ່ານ ຖາວອນພົມ
ມະໄລລຸນ ຮອງເຈົ້າແຂວງເຊກອງ, ທັງເປັນປະທານສະມາຄົມກິລາ-ກາຍະກໍາ
ຂັ້ນແຂວງ, ທ່ານ ຂັນຕີ   ສີລະວົງສາ ຫົວໜ້າຫ້ອງວ່າການປົກຄອງແຂວງ,
ຮອງປະທານສະມະຄົມກິລາ-ກາຍະກໍາຂັ້ນແຂວງ ແລະ ທ່ານ ຂັນແກ້ວ ໂຮມ
ອິນຕາ ຫົວໜ້າພະແນກສຶກສາທິການ ແລະ ກິລາແຂວງພ້ອມດ້ວຍຜູ້ຕາງໜ້າ
ຈາກສະຫະພັນກິລາປະເພດຕ່າງໆ, ຫົວໜ້າຂະແໜງ ແລະ ພາກສ່ວນທີ່ກ່ຽວ
ຂ້ອງ.

      ໂອກາດນີ້, ທ່ານ ເວັນມະນີ ຍໍພູເງິນ ຫົວໜ້າຂະແໜງກິລາລະດັບສູງ
ພະແນກສຶກສາທິການ ແລະ ກິລາແຂວງເຊກອງ ໄດ້ລາຍງານໃຫ້ຮູ້ວ່າ: ການ
ເຂົ້າຮ່ວມງານມະຫະກໍາກິລາແຫ່ງຊາດ ຄັ້ງທີ 10 ທີ່ແຂວງອຸດົມໄຊ ເປັນເຈົ້າ
ພາບ ໃນປີ 2014 ຜ່ານມາ ແຂວງເຊກອງ ໄດ້ສົ່ງ 6 ປະເພດກິລາເຂົ້າຮ່ວມ,
ເຊິ່ງບົດຮຽນທີ່ຖອດຖອນໄດ້ໃນການເຂົ້າຮ່ວມຄັ້ງນັ້ນ ຍ້ອນວ່າພວກເຮົາມີເວລາ
ໃນການກະກຽມດົນ. ພ້ອມນັ້ນ,  ຍັງໄດ້ສົ່ງຄູເຝິກໄປເຝິກອົບຮົມ ແລະ ຖອດ
ຖອນບົດຮຽນນໍາຄະນະກໍາມະການກິລາ - ກາຍະກໍາແຫ່ງຊາດ ຍ້ອນເຫັນໄດ້
ຄວາມໝາຍ-ຄວາມສໍາຄັນຂອງວຽກງານກິລາ ຄະນະພັກອໍານາດການປົກຄອງ
ຂັ້ນເທິງ ກໍ່ຄືຂັ້ນແຂວງ ໄດ້ເອົາໃຈໃສ່ຊີ້ນໍາ-ນໍາພາ ຢ່າງໃກ້ຊິດຕິດແທດຄູເຝິກ
ກໍ່ໄດ້ຖ່າຍທອດວິຊາຄວາມຮູ້ໃນການເຝິກແອບນັກກິລາ ແລະ ນັກກິລາທຸກຄົນ
ມີຈິດໃຈຮັກການຫຼິ້ນກິລາຢ່າງສູງສົ່ງ ເຮັດໃຫ້ການເຂົ້າຮ່ວມງານກິລາອຸດົມໄຊ
ເກມ 2014ທັບນັກກິລາແຂວງພວກເຮົາຖືວ່າປະສົບຜົນສຳເລັດພໍສົມຄວນຫຼັງ
ຍາດມາໄດ້ 1 ຫຼຽນຄຳ, 4 ຫຼຽນເງິນ ແລະ 5 ຫຼຽນທອງ ລວມ 10 ຫຼຽນ.

      ທ່ານ ເວັນມະນີ ຍໍພູເງິນ ກ່າວອີກວ່າ:ສຳລັບການເຂົ້າຮ່ວມ
ງານກິລາ ຊຽງຂວາງ ເກມ 2018 ແຂວງເຊກອງພວກເຮົາຄາດວ່າຈະສົ່ງຄະນະ
ຄູເຝິກແລະ ນັກກິລາ ເຂົ້າຮ່ວມທັງໝົດ 6 ປະເພດຄື:  ແລ່ນ-ລານຍິງ-ຊາຍຟຸດ
ຊໍຊາຍ, ໜ້າເກັກຍິງ-ຊາຍ, ມວຍລາວຍິງ-ຊາຍ, ເປຕັງຍິງ-ຊາຍ ແລະ  ໝາກ
ແລ້ຍິງ-ຊາຍ.ສະນັ້ນ, ເພື່ອເປັນການກະກຽມຄວາມພ້ອມໃຫ້ຮອບດ້ານ ພວກເຮົາ
ໄດ້ມີແຜນການຈັດຕັ້ງປະຕິບັດການເຝິກແອບ ແລະການເຂົ້າຮ່ວມແຂ່ງຂັນຕົວຈິງ
ອອກເປັນດັ່ງນີ້: ໃນໄລຍະເດືອນມິຖຸນາຫາເດືອນກໍລະກົດ2018ຈະລົງຄັດເລືອກ
ເອົານັກກິລາໃນແຕ່ລະເມືອງ, ບັນທຶກລາຍຊື່ນັກກິລາຜູ້ທີ່ດີເດັ່ນມີພອນສະຫວັນ
ແລະມີຄວາມສາມາດໄວ້ທີ່ພະແນກສຶກສາທິການແລະກິລາແຂວງ(ຂະແໜງກິລາ
ລະດັບສູງ).ສ່ວນໃນເດືອນສິງຫາຫາ ເດືອນກັນຍາ 2018 ກະກຽມແຜນງົບປະ
ມານເພື່ອນໍາສະເໜີອໍານາດການປົກຄອງຂັ້ນແຂວງ ແລະຄະນະປະທານສະມະ
ຄົມກິລາ-ກາຍະກຳຂັ້ນແຂວງກຽມຄັດເລືອກນັກກິລາປະເພດຕ່າງໆໄດ້ຜ່ານການ
ຮັບຮອງຈັດສົ່ງເຂົ້າຮ່ວມການແຂ່ງຂັນ. ຫຼັງຈາກນັ້ນ, ໃນວັນທີ 1 ຕຸລາ 2018 
ແມ່ນເຂົ້າສູນເກັບຕົວເຝິກຊ້ອມຢ່າງເປັນທາງການ ພ້ອມທັງຄັດເລືອກເອົານັກກິ
ລາທີ່ມີຄວາມສາມາດແລະພອນສະຫວັນດີເດັ່ນເປັນຕົວແທນຂອງແຂວງກ່ອນທີ່
ໃນວັນທີ 20-30ຕຸລາ2018ຈະເລີ່ມເຝິກຊ້ອມຢ່າງເປັນປົກກະຕິໄລຍະສຸດທ້າຍ
ແລະກະກຽມອອກເດີນທາງໄປແຂ່ງຂັນຕົວຈິງ.

ໂອກາດດຽວກັນ, ທ່ານ  ຖາວອນ ພົມມະໄລລຸນ ໄດ້ສະແດງຄວາມ
ຍ້ອງຍໍຊົມເຊີຍຕໍ່ຜົນງານຂອງ ຂອງຄະນະນໍາ, ຄູເຝິກ ແລະນັກກິລາທີ່ເປັນຕົວ
ແທນຂອງແຂວງຍາດໄດ້ບັນດາຜົນງານໃນໄລຍະຜ່ານມາ. ພ້ອມນັ້ນ, ທ່ານຍັງ
ໄດ້ເນັ້ນໃຫ້ສະມາຄົມກິລາ-ກາຍະກຳຂັ້ນແຂວງ ແລະສະຫະພັນກິລາແຕ່ລະປະ
ເພດຄັດເລືອກເອົາກິລາປະເພດທີ່ມີຄວາມຫວັງຫຼຽນ ສົ່ງເຂົ້າຮ່ວມແຂ່ງຂັນ.ຄຽງ
ຄູ່ກັນນີ້, ຍັງໄດ້ຮຽກຮ້ອງໃຫ້ພະແນກສຶກສາທິການ ແລະ ກິລາແຂວງ ກະກຽມ
ບຸລະນະຮັກສາສະໜາມກິລາທີ່ຈະເຝິກຊ້ອມນັກກິລາແລະເນັ້ນເຖິງຄວາມພ້ອມ
ກິລາແຕ່ລະປະເພດທີ່ສົ່ງເຂົ້າແຂ່ງຂັນ ບໍ່ວ່າຈະເປັນດ້ານອຸປະກອນຄູເຝິກແລະ
ສ້າງແຜນງົບປະມານໃຫ້ລະອຽດ ເພື່ອເຮັດແນວໃດໃຫ້ບັ້ນການກະກຽມ ແລະ
ການເຂົ້າຮ່ວມແຂ່ງຂັນຕົວຈິງ ມີໝາກຜົນສຳເລັດຕາມລະດັບຄາດໝາຍ.