ສກຂ ຊຽງ​ຂວາງ ​ຫາລືຊີ້​ນໍາຄະນະ​ຮັບຜິດຊອບ​ການ​ສອບ​ເສັງຈົບ​ ມ4 ສົກ 2017-2018

ປະຕິທິນການສຶກສາ

Written by Super User
Category:

ສກຂ ຊຽງ​ຂວາງ ​ຫາລືຊີ້​ນໍາຄະນະ​ຮັບຜິດຊອບ​ການ​ສອບ​ເສັງຈົບ​ ມ4

ສົກ 2017-2018

35151483 1431777166924431 8236816846372732928 n    ພະ​ແນ​ກສຶກສາ​ທິການ ​ແລະ ກິລາ​ແຂວງ​ (ສກຂ) ຊຽງ​ຂວາງ ​ໄດ້​ຈັດ​ກອງ​ປະຊຸມ​ເພື່ອ​ຊີ້​ນໍາ​ຄະນະ​ຮັບຜິດຊອບ​ການ​ສອບ​ເສັງຈົບ​ຊັ້ນມັດທະຍົມສຶກສາຕອນຕົ້ນ (ມ4) ກ່ອນ​ທີ່​ຈະ​ລົງ​ປະຕິບັດ​ໜ້າ​ທີ່ປະຈໍາຢູ່​ແຕ່ລະ​ສູນ​ສອບ​ເສັງ​ ສົກຮຽນ 2017-2018 ໃນຕອນ​ບ່າຍ​ຂອງ​ວັນ​ທີ 8 ມິຖຸນາ ຜ່ານມາ ທີ່​ຫ້ອງ​ປະຊຸມພະແນກດັ່ງກ່າວ, ​ໂດຍ​ພາຍ​ໃຕ້​ການ​ເປັນ​ປະທານ​ຂອງ​ທ່ານ ບົວ​ລີ ພັນ​ນາ​ວົງ ຫົວໜ້າພະ​ແນ​ກສຶກສາ​ທິການ ​ແລະ ກິລາແຂວງ, ​ ມີ​ຄະນະ​ຮັບຜິດຊອບ​ການ​ສອບ​ເສັງ ​ແລະ ພາກສ່ວນ​ທີ່​ກ່ຽວຂ້ອງເຂົ້າ​ຮ່ວມ.

     

 

       ໃນກອງປະຊຸມ, ທ່ານ ນາງ ວຽງ​ເພັດ ​ເທບ​ອຸດົມ ​ຮອງ​ຫົວໜ້າຂະ​ແໜງມັດທະຍົມ​ສຶກສາ ​ໄດ້​​ຜ່ານຂໍ້​ຕົກລົງ​ຂອງ​ຫົວໜ້າ​ພະ​ແນ​ກ ວ່າ​ດ້ວຍ​ການ​ແຕ່ງ​ຕັ້ງຄະນະ​ຮັບຜິດຊອບ​ການ​ສອບ​ເສັງ​ຂັ້ນ​ແຂວງ ​ເພື່ອ​ລົງ​ປະ​ຈໍາ​ຢູ່​ແຕ່​ລະ​ສູນ​ສອບ​ເສັງ​ໃນ​ແຕ່ລະ​ເມືອງ ໃນ​ການ​ຈັດສອບ​ເສັງ​ຈົບ​ ມ4 ​ເອກະ​ພາບ​ທົ່ວ​ປະ​ເທດ ປະ​ຈໍາສົກຮຽນ 2017-2018 ລະຫວ່າ​ງວັນ​ທີ 12-14 ມິຖຸນານີ້ ທີ່​ແຂວງ​ຊຽງ​ຂວາງ, ​ພ້ອມ​ທັງ​ຜ່ານ​ຂໍ້​ກໍານົດ​ກົດ​ລະບຽບ​ການ​ສອບ​ເສັງ ​ເພື່ອ​ໃຫ້​ພະ​ນັກ​ງານ​ທີ່​ຖືກ​ແຕ່ງ​ຕັ້ງ​ໄດ້​ຮັບຮູ້ ​ເຂົ້າ​ໃຈ ​ແລະ ພ້ອມກັນຈັດ​ຕັ້ງ​ປະຕິບັດ​ໃຫ້​ໄດ້​ຮັບ​ຜົນ​ດີ, ​ເປັນ​ຕົ້ນ​ແມ່ນ​ການ​ປະຕິບັດ​ສິດ, ​ໜ້າ​ທີ່ ​ແລະ ພາລະ​ບົດບາດ, ການ​ປະຕິ​ບັດ​ໂມງເວລາ, ​ການ​ຄວບ​ຄຸມ​ສະພາບການສອບ​ເສັງ​ທັງ​ໃນ ​ແລະ ນອກ, ການ​ແນະ​ນໍາ​ຕໍ່ກ່ຽວ​ກັບສິດ, ໜ້າ​ທີ່ຂອງກໍາມະການ​ຍາມ​ຫ້ອງ​ສອບຢູ່​ແຕ່​ລະ​ສູນສອບ​ເສັງ ​ແລະ ລະບຽບ​ການ​ສອບ​ເສັງ​ຂອງ​ນັກ​ສອບ​ໃຫ້​ເຂົາ​ເຈົ້າ​ຈັດ​ຕັ້ງ​ປະຕິບັດ​ຢ່າງເຂັ້ມ​ງວມ. ພ້ອມ​ດຽວ​ກັນ​ນັ້ນ, ການຈັດ​ເກັບ​ຫົວບົດສອບເສັງ, ການ​ໃສ່​ລະຫັດ​ລັບ​ຂອງ​ຄະນະ​ປະທານ​ສອບ​ເສັງຕ້ອງ​ໃຫ້​ມີ​ຄວາມ​ຮອບ​ຄອບ ​ລະອຽດ​ຊັດ​ເຈນ ​​ເພື່ອ​ຫຼີກ​ເວັ້ນຈາກ​ຂໍ້​ບົກພ່ອງ​ຕ່າງໆທີ່​ອາດ​ຈະ​ເກີດ​ຂຶ້ນ.

        ​ໂອກາດ​ດຽວ​ກັນ, ທ່ານ ບົວ​ລີ ພັນນາ​ວົງ ໄດ້​ເນັ້ນ​ໜັກ​ໃຫ້ທຸກ​ພາກສ່ວນ​ຈົ່ງ​ມີ​ສ່ວນ​ຮ່ວມ​ເປັນ​ເຈົ້າ​ການ​ໃນ​ການຈັດ​ຕັ້ງ​ປະຕິບັດ​ຕາມ​ໜ້າ​ວຽກທີ່​ໄດ້​ຮັບ​ມອບ​ໝາຍ​ໃຫ້​ປະສົບ​ຜົນ​ສໍາ​ເລັດ, ບັນຫາ​ໃດ​ທີ່​ແກ້​ໄຂ​ບໍ່​ຕົກ​ໃຫ້​ລາຍ​ງານ​ຕໍ່ຄະນະ​ພະ​ແນ​ກ ​ແລະ ຂະ​ແໜງ​ການ​ທີ່​ກ່ຽວຂ້ອງ ​ເພື່ອຈະ​ໄດ້​ຊອກ​ຫາ​ຊ່ອງ​ທາງ​ແກ້​ໄຂ​ໃຫ້​ທັນຕາ​ມກໍານົດ​ເວລາ ​ແນໃສ່ເຮັດ​ໃຫ້​ບັ້ນ​ດໍາ​ເນີນ​ການ​ສອບ​ເສັງ​ຈົບ ​ມ4 ຢູ່​ແຂວງ​ຊຽງ​ຂວາງ​ສົກ​ນີ້ມີ​ຜົນ​ສໍາ​ເລັດ ​ແລະ ບັນລຸ​ຕາມ​ຈຸດປະສົງ​ເປົ້າ​ໝາຍ.ສຳລັບສົກຮຽນ 2017-2018 ທົ່ວ​ແຂວງ​ຊຽງ​ຂວາງມີ​ນັກ​ສອບ​ເສັງ​ຈົບ ມ4 ທັງ​ໝົດ 5.201 ຄົນ, ຍິງ 2.397 ຄົນ, ​​ແບ່ງ​ອອກ​ເປັນ 38 ສູນ​ສອບ​ເສັງ, 256 ຫ້ອງ​ສອບເສັງ​ ​ແລະ ວາງ​ຄາດໝາຍ​ຜົນ​ການ​ສອບ​ຈະ​ໃຫ້​ບັນລຸ 98 ເປີເຊັນ.

(​ໂດຍ: ຄານ​ສີສະ​ຫວັນ ພົງ​ພັກດີ)