ຂ່າວປະຈໍາວັນທີ 24 ກໍລະກົດ 2018
ຂ່າວກອງປະຊຸມ
ກອງປະຊຸມຄົບຄະນະເປີດກວ້າງກາງສະໄໝ ຄະນະບໍລິຫງານງານພັກ ສສກ ໄຂຂຶ້ນທີ່ແຂວງບໍລິຄຳໄຊ
ກອງປະຊຸມຄົບຄະນະເປີດກວ້າງກາງສະໄໝຂອງຄະນະບໍລິຫານງານພັກ ກະຊວງສຶກສາທິການ ແລະ ກິລາ (ສສກ) ໄດ້ຈັດຂຶ້ນໃນວັນທີ 23 ກໍລະກົດ ຜ່ານມາ ທີ່ຫ້ອງວ່າການປົກຄອງ ແຂວງບໍລິຄຳໄຊ, ໂດຍພາຍໃຕ້ການເປັນປະທານຂອງສະຫາຍ ນາງ ແສງເດືອນ ຫຼ້າຈັນທະບູນ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກະຊວງສຶກສາທິການ ແລະ ກິລາ, ມີຮອງເລຂາຄະນະບໍລິຫານງານພັກ, ຄະນະປະຈຳພັກ, ຄະນະພັກ, ບັນດາເລຂາໜ່ວຍພັກ, ຫົວໜ້າກົມ, ສະຖາບັນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໂອກາດນີ້, ສະຫາຍ ນາງ ແສງເດືອນ ຫຼ້າຈັນທະບູນ ໄດ້ສະເໜີບົດລາຍງານກ່ຽວກັບການຕີລາຄາການຈັດຕັ້ງປະຕິບັດກອງປະຊຸມຄົບຄະນະຂອງຄະນະບໍລິຫານງານສູນກາງພັກ ຄັ້ງທີ 5 ສະໄໝທີ 10 ແລະ ມະຕິກອງປະຊຸມໃຫຍ່ ຄັ້ງທີ 10 ຂອງພັກ ໃນໄລຍະຜ່ານມາ ແລະ ບາງໜ້າທີີ່ຈຸດສຸມໃນຕໍ່ໜ້າ, ເຊິ່ງສະຫາຍໄດ້ຍົກໃຫ້ເຫັນເຖິງຜົນສຳເລັດ, ດ້ານດີ, ດ້ານອ່ອນ, ຂໍ້ຄົງຄ້າງ ແລະ ທິດທາງໃນຊຸມປີຕໍ່ໜ້າ ເປັນຕົ້ນແມ່ນການເຄື່ອນໄຫວອັນສຳຄັນ, ກວມລວມ ແລະ ມີລັກສະນະບຸກທະລຸ ສູ່ການສ້າງການຫັນປ່ຽນໃໝ່ ໃນການນຳພາຂອງພັກເຮົາ ຫຼັງກອງປະຊຸມໃຫຍ່ ຄັ້ງທີ 10 ຂອງພັກ ຕໍ່ເນື່ອງຮອດປັດຈຸບັນ ຄືການສົມທົບລະຫວ່າງການຈັດຕັ້ງເຊື່ອມຊຶມກຳແໜ້ນບັນດາຈິດໃຈພື້ນຖານຂອງມະຕິ 10 ກັບການກຳນົດບັນດາເນື້ອໃນຈຸດສຸມ ໃນການເຄື່ອນໄຫວນຳພາຂອງພັກ ແນໃສ່ແກ້ໄຂບັນຫາຕົວຈິງ ລວມທັງການກຳນົດ ບັນດາມາດຕະການແກ້ໄຂຈຸດອ່ອນ, ຂໍ້ຄົງຄ້າງ ແລະ ວາງທິດທາງເຄື່ອນໄຫວຮັບມືກັບການເລັ່ງທວງຂອງສະພາບການໃໝ່; ສົມທົບລະຫວ່າງການປັບປຸງລະບອບແບບແຜນໃນການເຄື່ອນໄຫວນຳພາ ໄປຄຽງຄູ່ກັບການຕີຖອຍບັນດາປາກົດການຫຍໍ້ທໍ້ຢູ່ພາຍໃນ. ພ້ອມນັ້ນ, ສະຫາຍຍັງໄດ້ຍົກໃຫ້ເຫັນເຖິງຜົນສຳເລັດທີ່ຍາດມາໄດ້ໃນແຕ່ລະຂົງເຂດວຽກງານ ເປັນຕົ້ນແມ່ນວຽກງານປ້ອງກັນຊາດ-ປ້ອງກັນຄວາມສະຫງົບ, ການພັດທະນາເສດຖະກິດ, ຂົງເຂດວັດທະນະທຳ-ສັງຄົມ, ຂົງເຂດອຳນາດລັດ, ຂົງເຂດວຽກງານແນວໂຮມ, ວຽກງານປັບປຸງກໍ່ສ້າງພັກ, ວຽກງານປັບປຸງກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານ.
ສະຫາຍເລຂາຄະນະບໍລິຫານງານພັກ ກະຊວງ ສສກ ກ່າວອີກວ່າ: ຄຽງຄູ່ກັບຜົນສຳເລັດທີ່ຍາດມາໄດ້ນັ້ນ ຍັງມີດ້ານອ່ອນ ລະ ຂໍ້ຄົງຄ້າງ ໂດຍສະເພາະແມ່ນຂົງເຂດວັດທະນະທຳ-ສັງຄົມ ການກໍ່ສ້າງແຫຼ່ງຊັບພະຍາກອນມະນຸດ ຍັງບໍ່ທັນຕິດພັນກັບການພັດທະນາດ້ານເສດຖະກິດ, ການເຝິກສີມືແຮງງານນັບມື້ນັບຫຼາຍ ແຕ່ລັດຍັງບໍ່ໄດ້ບັງຄັບໃຊ້ກົດໝາຍປົກປ້ອງຕຳແໜ່ງງານໃຫ້ແຮງງານລາວ ຈຶ່ງເກີດມີສະພາບແຮງງານຕ່າງປະເທດເຂົ້າມາຍາດຕຳແໜ່ງງານຂອງຄົນລາວຢ່າງບໍ່ມີຂອບເຂດຈຳກັດ, ແຮງງານລາວຈຳນວນບໍ່ໜ້ອຍ ຕ້ອງຫຼັ່ງໄຫຼໄປຊອກວຽກເຮັດງານທຳຢູ່ປະເທດໃກ້ຄຽງເປັນຕົ້ນ.ສຳລັບທິດທາງລວມໃນຊຸມປີຕໍ່ໜ້າ ແມ່ນສ້າງການຫັນປ່ຽນຢ່າງຕໍ່ເນື່ອງ, ເລິກເຊິ່ງ, ຮອບດ້ານ, ເນື້ອໃນ ແລະ ແບບແຜນນຳພາຂອງສູນກາງ ກໍ່ຄືຂອງຄະນະພັກທຸກຂັ້ນ ຕິດພັນກັບການສືບຕໍ່ເສີມຂະ ຫຍາຍຜົນຂອງການດຳເນີນຊີວິດການເມືອງປັບປຸງປົວແປງພັກ, ສ້າງພັກປອດໃສ, ເຂັ້ມແຂງ ແລະ ໜັກ ແໜ້ນ; ສູ້ຊົນບຸກບືນແກ້ໄຂຄວາມຫຍຸ້ງຍາກດ້ານການເງິນ-ງົບປະມານ ດ້ວຍບັນດາມາດຕະການໄລຍະສັ້ນ ແລະ ໄລຍະຍາວ, ສ້າງບັນດາປັດໃຈຕົວຈິງ ເພື່ອຄ້ຳປະກັນປັບປຸງເສດຖະກິດມະຫາພາກໃຫ້ເຂັ້ມແຂງຂຶ້ນ, ສ້າງຄວາມສາມາດໃໝ່ຂອງພື້ນຖານການຜະລິດ ແລະ ບໍລິຫານ, ຮັບປະກັນຄວາມໝັ້ນຄົງ ແລະ ຍືນຍົງໃນການພັດທະນາເສດຖະກິດ-ສັງຄົມ, ນຳພາປະເທດຊາດຫຼຸດພົ້ນສະພາບດ້ອຍພັດທະນາຕາມຄາດ ໝາຍວາງອອກ; ຍົກສູງປະສິດທິພາບຂອງການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ຕິດພັນກັບການເຮັດໃຫ້ກົງຈັກລັດກະທັນຮັດ, ເຂັ້ມແຂງ, ຫຼຸດຜ່ອນຂັ້ນ-ຂອດບໍລິຫານ, ເຄື່ອນໄຫວເປັນລະບົບຮັດກຸມ, ໂປ່ງໃສ ແລະ ວ່ອງໄວ.
ພ້ອມນັ້ນ, ໃນກອງປະຊຸມຄັ້ງນີ້ ບັນດາຄະນະຜູ້ແທນທີ່ເຂົ້າຮ່ວມ ຍັງໄດ້ຮັບຟັງການເຜີຍແຜ່ມະຕິຄະນະບໍລິຫານງານສູນກາງພັກ ສະບັບເລກທີ 037/ຄບສພ, ລົງວັນທີ 18/06/2018 ວ່າດ້ວຍການຍົກສູງປະສິດທິພາບການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ; ບົດລາຍງານຕີລາຄາການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ 8 ຂອງອົງຄະນະພັກກະຊວງ ສສກ ໃນໄລຍະ 2 ປີກວ່າຜ່ານມາ ແລະ ແຜນວຽກຈຸດສຸມຊີ້ນຳ-ນຳພາໃນຕໍ່ໜ້າ; ລາຍງານໂດຍຫຍໍ້ຜົນສຳເລັດ, ສະພາບບັນຫາຫຼັກໃນການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ກໍ່ຄືການພັດທະນາເປົ້າໝາຍແບບຍືນຍົງ ໃນໄລຍະ 2 ປີກວ່າຜ່ານມາ, ທິດທາງແຜນການ ແລະ ມາດຕະການແກ້ໄຂສະພາບບັນດາດັ່ງກ່າວໃນຕໍ່ໜ້າ; ໂຄງຮ່າງຍົກສູງຄຸນະພາບການສຶກສາ ແລະ ກິລາຢູ່ເຂດຫ່າງໄກສອກຫຼີກ ແລະ ຮັບຟັງການໂອ້ລົມຂອງ ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ.
ຂ່າວໂດຍ: ລູກນ້ຳເຊ
