ສຶກສາ

ສຶກສາ

Written by Super User

ລົດຖີບ ນະຄອນຫຼວງ ຕັ້ງ​ເປົ້າ 4 ຫຼຽນ​ຄຳ ​ໃນຊຽງ​ຂວາງ ​ເກ​ມ ພ້ອມ​​ອັດ​ສີດ​ຫຼຽນລະ 10 ລ້ານ​ກີບ

36617124 1464275277007953 2513023216436379648 n   ຄະນະ​ບໍລິຫານ​ງານ​ສະຫະພັນ​ລົດຖີບ​ນະຄອນຫຼວງ​ວຽງ​ຈັນ (ນວ) ຊຸດ​ໃໝ່ ຕັ້ງ​​ເປົ້າ​ໝາຍ​ຈະ​ສູ້​ຊົນ​ສ້າງ​ຜົນງານ​ເພື່ອ​ຜືນ​ແຜ່ນດິນ​ເກີດ ຢ່າງ​ສຸດ​ຄວາມ​ສາມາດ ​ໂດຍ​ຈະ​ນຳພາ​ນັກ​ກິລາ​ລົດຖີບ ນວ ​ເຂົ້າ​ຮ່ວມ​ລ່າ 4 ຫຼຽນ​ຄຳ ​ໃນ​ງານ​ມະຫາ​ກຳ​ກິລາ​ແຫ່ງ​ຊາດ ຄັ້ງ​ທີ 11 ຫຼື ຊຽງ​ຂວາງ ​ເກ​ມ ທີ່​ແຂວງ​ຊຽງ​ຂວາງ ຮັບ​ກຽດ​ເປັນ​ເຈົ້າພາບ ລະຫວ່າງ​ວັນ​ທີ 11-21 ພະຈິກ​ນີ້ ພ້ອມ​ປະກາດ​ຈະອັດ​ສີດ​ຜົນງານ​ນັກ​ກິລາ​ຫຼຽນ​ຄຳ 10 ລ້ານ​ກີບ, ຫຼຽນ​ເງິນ 7 ລ້ານ​ກີບ ​ແລະ ຫຼຽນ​ທອງ 5 ລ້ານ​ກີບ.

      ພິທີ​ປະກາດ​ຄະນະ​ບໍລິຫານ​ງານ​ສະຫະພັນ​ລົດຖີບ​ນະຄອນຫຼວງ​ວຽງ​ຈັນ ຊຸດ​ໃໝ່ ​ໃນ​ຄັ້ງ​ນີ້ ​ໄດ້​ຈັດ​ຂຶ້ນ ​ເມື່ອ​ວັນ​ທີ 4 ກໍລະກົດ ຜ່ານ​ມາ ທີ່​ໂຮງ​ແຮມ​ຢູ່​ສຸກ ບ້ານ​ຊຽງ​ຍືນ ​ເມືອງ​ຈັນທະ​ບູລີ ນະຄອນ ຫຼວງ​ວຽງ​ຈັນ ​ໂດຍ​ໃຫ້ກຽດ​ເຂົ້າ​ຮ່ວມ​ເປັນ​ສັກຂີ​ພິຍານ​ຂອງ​ທ່ານ ສົມ​ພອນ ສອນ​ດາລາ ຮອງ​ຫົວໜ້າ​ພະ​ແນ​ກສຶກສາ​ທິການ ​ແລະ ກິລາ ນະຄອນຫຼວງ​ວຽງ​ຈັນ, ມີ​ທ່ານ ສຸກ​ສາຄອນ ​ໃສ​ທິລາດ ຜູ້ອຳ​ນວຍ​ການ​ບໍລິສັດ ​ໃສ​ທິລາດ ກຣຸບ ທັງ​ເປັນ​ປະທານ​ສະຫະພັນ​ລົດຖີບ​ນະຄອນຫຼວງ​ວຽງ​ຈັນຊຸດ​ໃໝ່ ພ້ອມ​ດ້ວຍ​ຄະນະ ​ແລະ ບັນດາ​ຄະນະ​ທີ່​ປືກສາ, ຫົວໜ້າ​ຂະ​ແໜງ​ກິລາ​ມວນ​ຊົນ ​ແລະ ພະນັກງານ​ທີ່​ກ່ຽວຂ້ອງ ຕະຫຼອດ​ຮອດ​ສື່​ມວນ​ຊົນ​ຈຳນວນ​ໜຶ່ງ​ເຂົ້າ​ຮ່ວມ.

      ​ໂອກ​າດນີ້, ​ທ່ານ ສຸກ​ສາຄອນ ​ໃສ​ທິລາດ ກ່າວ​ດ້ວຍ​ຄວາມ​ພາກພູມ​ໃຈ​​ເປັນຢ່າງ​ສູງ ທີ່​ການ​ນຳ​ຂັ້ນ​ເທິງ​​ເຫັນ​ໄດ້​ຄວາມ​ສຳຄັນ​ຂອງ​ຕົນ​ເອງ​​ ໃນ​ການ​ປະຕິບັດ​ໜ້າ​ທີ່​ເພື່ອຮັບ​ໃຊ້​ບ້ານ​ເກີດ​ເມືອງ​ນອນ ນະຄອນຫຼວງ​ວຽງ​ຈັນ ​ເພື່ອ​ກຽມ​ຄວາມ​ພ້ອມ​ນຳພາ​ທັບ​ນັກ​ກິລາ​ລົ​ດ​ຖີບ ນະຄອນຫຼວງ​ວຽງ​ຈັນ ເຂົ້າ​ຮ່ວມ​ຍາດ​ແຍ່ງ​ເອົາ​ຜົນງານ​​ໃນ​ງານ​ມະຫາ​ກຳ​ກິລາ​ແຫ່ງ​ຊາດ ຄັ້ງ​ທີ 11 ທີ່​ແຂວງຊຽງ​ຂວາງ ​ຮັບ​ກຽດ​ເປັນ​​ເຈົ້າພາບ ຈະ​ຈັດ​ຂຶ້ນ​ໃນ​ທ້າຍ​ປີ​ນີ້. ສະ​ນັ້ນ, ​ເພື່ອ​ເປັນການ​ຮັບປະກັນ​ສ້າງ​ຜົນງານ​ໃຫ້​ຜືນ​ແຜ່ນດິ​ນບ້ານ​ເກີດຂອງ​ພວກ​ເຮົາ ຄະນະບໍລິຫານ​ງານ​ຊຸດ​ໃໝ່ນີ້ ​ຂໍ​ໃຫ້​ຄຳໝັ້ນ​ສັນ​ວ່າ​ຈະ​ພ້ອມ​ກັນ​ສຸມ​ທຸກ​ກຳລັງ​ເຫື່ອ​ແຮງ ແລະ ສະຕິປັນຍາ ​ຢ່າງ​ສຸດ​ຄວາມ​ສາມາດ ​ເພື່ອ​ນຳພາ​ນັກ​ກິລາ​ລ່າ 4 ຫຼຽນ​ຄຳ ​ໃຫ້​ບັນລຸ​ເປົ້າ​ໝາຍທີ່​ຕັ້ງ​ໄວ້ ​ແລະ ​ເພື່ອ​ເປັນ​ການ​ຮັບປະກັນ​ໃຫ້​ປະສົບ​ຜົນສຳ​ເລັດຕາມ​ເປົ້າ​ໝາຍດັ່ງກ່າວນັ້ນ ພວກ​ເຮົາ​ຈະ​ໄດ້​ປຸກລະດົມ​ຂົນຂວາຍ​ຊອກ​ຫາ​ບັນດາ​ສະ​ປອນ​ເຊີ​ມາ​ຮ່ວມ​ສະໜັບສະໜູນ ​ແລະ ຈະ​ຄັດ​ເລືອກ​ນັກ​ກິລາ​ດີ​ເດັ່ນລ່າ 4 ຫຼຽນ​ຄຳໃຫ້​ໄດ້​ຕາມ​ເປົ້າ​ໝາຍທີ່​ວາງ​ໄວ້ ພ້ອມ​ທັງ​ຈະ​ສ້າງ​ກອງ​ທຶນສະ​ເພາະ​ຂອງ​ສະຫະພັນ ​​ແນ​ໃສ່​ສົ່ງ​ເສີມ​ພັດທະນາ​ນັກ​ກິລາລົດຖີບ ນວ ​ໃຫ້​ສອດຄ່ອງ​ກັບ​​ແຜນ​ຍຸດ​ທະ​ສາດ​ພັດທະນາ ​ໂດຍ​ຈະ​ສ້າງ​ໃຫ້​ເປັນ​ສະ​ໂມ​ສອນ​ອາ​ຊີບ ​ແລະ ມີ​ຕົວ​ເລກ​ບັນຊີຢ່າງ​ຄັກ​ແນ ສະ​ເພາະ​ສ່ວນ​ຕົວ​ແລ້ວ ພ້ອມ​ຈະ​ອອກ​ເງິນໃຫ້ການ​ສະໜັບສະໜູນ​​ໄປ​ກ່ອນ​ໃນເບື້ອງ​ຕົ້ນ 50 ລ້ານ​ກີບ, ໃນ​ນັ້ນ ກໍ່​ຍັງ​ໄດ້​ຕັ້ງ​ເງິນ​ລາງວັນ​ອັດ​ສີດ​ຜົນງານ​ໃຫ້ນັກ​ກິລາ​ຖ້າ​ຫາກ​ຜູ້​ໃດສາ​ມາດ​ສ້າງ​ຜົນງານ​ຍາດ​ໄດ້ຫຼຽນ​ຄຳ​ຕາມ​ເປົ້າ​ໝາຍ​ຈະ​​ໄດ້​ຮັບເງິນ​ລາງວັນ​ຫຼຽນ​ຄຳ 10 ລ້ານ​ກີບ, ຫຼຽນ​ເງິນ 7 ລ້ານ​ກີບ ​ແລະ ຫຼຽນ​ທອງ 5 ລ້ານ​ກີບ ​ແລະ ຖ້າ​ຫາກ​ວ່າ​ສະຫະພັນ​ສາມາດ​ລະດົມ​ທຶນໄດ້​ເງິນ​ຕາມ​ຄວາມ​ເໝາະ​ສົມ ກໍ່​ຈະ​ມີ​ການ​ອັດ​ສີດ​​​ເງິນໃຫ້ນັກ​ກິລາ​ເພີ່ມຂຶ້ນອີກ ຕົວຢ່າງຫຼຽນ​ຄຳ​ ​ແມ່ນ 15 ລ້ານ​ກີບ. ນອກຈາກ​ນັ້ນ, ກໍ່​ຍັງ​ມີ​ນະ​ໂຍບາຍ​ລວມຂອງ ນະຄອນຫຼວງ​ວຽງ​ຈັນ ​ຈະ​ໃຫ້​ລາງວັນ​ເງິນຫຼຽນ​ຄຳ 6 ລ້ານ​ກີບ, ຫຼຽນ​ເງິນ 4 ລ້ານ​ກີບ ​ແລະ ຫຼຽນ​ທອງ 2 ລ້ານ​ກີບ.

​       ປະທານ​ສະຫະພັນ​ລົດຖີບ​ນະຄອນຫຼວງ​ວຽງ​ຈັນ ຊຸດ​ໃໝ່ ກ່າວ​ຕື່ມ​ອີກ​ວ່າ: ​ໃນ​ໄລຍະ​ກະກຽມ​ຄວາມ​ພ້ອມ​ນັກ​ກິລາເຂົ້າ​ຮ່ວມ​ແຂ່ງຂັນ ຊຽງ​ຂວາງ ​ເກມ 2018 ທາງ​ຄະນະ​ບໍລິຫານ​ງານສະຫະພັນຊຸດ​ນີ້ ຈະ​ໄດ້​ຮ່ວມ​ແຮງ​ຮ່ວມ​ໃຈ​ກັນ​ວາງ​ແຜນ​ຈັດ​ກິດຈະກຳ​ແຂ່ງຂັນ​ລົດຖີບຫຼາຍ​ລາຍການຢ່າງ​ຕໍ່​ເນື່ອງ ​ເພື່ອ​ເປັນ​ການ​ທົດ​ສອບ​ຄວາມ​ສາມາດ​​ນັກ​ກິລາລົດຖີບ ນວ ​​ເສີມ​ສ້າງ​ປະສົບ​ການ​ໃຫ້​ແຂງ​ແກ່ນ ​ແລະ ສາ ມາ​ດ​ເຂົ້າ​ຮ່ວມ​ຄັດ​ເລືອກ​ນັກ​ກິລາດີ​ເດັ່ນ​ຖືກ​​ຕາມ​ເປົ້າ​ໝາຍຕົວ​ຈິງ ​ແລະ ນັກ​ກິລາ​ທີ່​ສາມາດ​ຕິດ​ທີ​ມ ນະຄອນຫຼວງ​ວຽງ​ຈັນ ກໍ່​ຈະ​ຮັກສາ​ໄວ້ຮ່ວມສັງກັດ ສະ​ໂມ​ສອນລົດຖີບ​ອາຊີບ ນະຄອນຫຼວງວຽງ​ຈັນ​ ​ເພື່ອ​ກຽມສົ່ງ​ເຂົ້າ​ຮ່ວມ​ແຂ່ງຂັນ​ລົດຖີບ​ອາຊີບ ຢູ່​ບັນດາປະ​ເທດ​ເພື່ອ​ນບ້ານ ໂດຍ​ສະ​ເພາະ​ແມ່ນໄທ ​ເປັນ​ຕົ້ນຕໍ.

​ໂດຍ ສົງການ

     

Written by Super User

​ຄູ່​ປະສົມ ຊຽງ​ຂວາງ ຄວ້າຫຼຽນ​ຄຳ​ ໃນ​ເປ​ຕັງ ທົ່ວ​ປະ​ເທດ ຄັ້ງ​ທີ 10 ຊີງ​ຂັນ​ນາຍົກ

36611099 1464275180341296 8337229969117675520 n   ທ້າວ ​ໂນ​ລະຄອນ ຈັນທະ​ວົງ ຈັບ​ຄູ່​ກັບ ນາງ ບັນ​ທະ​ໄລ ນັກ​ກິລາ​ຊາວ​ແຂວງ​ຊຽງ​ຂວາງ ​ແຈ້ງ​ເກີດ​ສາມາດ​ເອົາ​ຊະນະ ທ້າວ ບຸນ​ແກ້ວ ອຸ່ນ​ແກ້ວ ອະດີດ​ນັກ​ກິລາ​ທີ​ມຊາດ ຄູ່​ກັບ ນາງ ສອນ​ສຸ​ລິດ ​ໄຊ​ຍະ​ຈັກ ​13-9 ຄະ​ແນນ ຄວ້າ​ຫຼຽນ​ຄຳ ປະ​ເພດ​ທີ​ມຄູ່​ປະສົມ ໃຫ້ທັບນັກ​ກິລາ​ໂຍນ​ລູກ​ເຫຼັກຊາວ​ວິລະ​ຊົນ ​ດິນ​ແດນ​​ທົ່ງ​ໄຫ​ຫີ​ນ ​ແຂວງ​ຊຽງ​ຂວາງ ​ເປັນ​ຫຼຽນ​ຄຳ ຫຼຽນ​ທີ 4 ພ້ອມ​ລຸ້ນຄອງ​ເຈົ້າ​ຫຼຽນ​ຄຳ ໃນ​ການ​ແຂ່ງຂັນ​ເປ​ຕັງ ທົ່ວປະ​ເທດ ຄັ້ງ​ທີ 10 ຊີງ​ຂັນ​ພະນະ​ທ່ານ​ນາຍົກລັດຖະມົນ​ຕີ ​ແຫ່ງ ສປປ ລາວ ທີ່​ແຂວງ​ຊຽງ​ຂວາງ ​ຮັບ​ກຽດ​ເປັນ​ເຈົ້າພາບ ລະຫວ່າງ​ວັນ​ທີ 1-5 ກໍລະກົດ 2018.

      ອີງຕາມ​ການ​ລາຍ​ງານ​ຈາກ​ຄະນະ​ຮັບຜິດ​ຊອບ​ຈັດການ​ແຂ່ງຂັນ ​ແຈ້ງ​ໃຫ້​ຊາບ​ວ່າ: ​ເມື່ອ​ວັນ​ທີ 3 ກໍລະກົດ ຜ່ານ​ມາ ທີ່​ສະໜາມກິລາ​ເປ​ຕັງ​ສະ​ໂມ​ສອນ​ກິລາ​ໃນ​ຮົ່ມ​ບານ​ສົ່ງ​ແຂວງ​ຊຽງ​ຂວາງ ບ້ານ  ​ໂງ​ຍ ​ເມືອງ​​ແປກ ​​ແຂວງ​ຊຽງ​ຂວາງ ມີ​ການແຂ່ງຂັນປະ​ເພດ​ທີ​ມຄູ່​ປະສົມ ​ແລະ ທີ​ມອາວຸ​ໂສ ອາຍຸ 50 ປີ​ຂຶ້ນ​ໄປ ມີທີ​ມນັກ​ກິລາ​ເປ​ຕັງ​ຈາກ 4 ກະຊວງ, 1 ນະຄອນຫຼວງ​ວຽງ​ຈັນ, 14 ​ແຂວງ, ​ບໍ່​ມີ​ແຕ່​ແຂວງ​ສະຫວັນ​ນະ​ເຂດ, ​ແຂວງ​ຄຳ​ມ່ວນ, ​ແຂວງ​ເຊ​ກອງ ​ແລະ ​ແຂວງ​ຫຼວງ​ນໍ້າ​ທາ ​ເຂົ້າ​ຮ່ວມ. ນອກຈາກ​ນັ້ນ, ກໍ່ຍັງ​ມີບັນດາ​ພະ​ແນ​ກການ, ຫ້ອງການ ​ຕະຫຼອດສະ​ໂມ​ສອນ​ອ້ອມ​ຂ້າງ​​ແຂວງເຂົ້າ​ຮ່ວມທັງ​ໝົດ 40 ກວ່າ​ພາກສ່ວນ ການ​ແຂ່ງຂັນ​​ໄດ້ຈັບ​ສະຫຼາກ​ປະ​ກົບ​ຄູ່​ເສຍ​ຕົກ​ຮອບ​ເລີຍ ຜ່ານ​ການ​ແຂ່ງຂັນ​ນັດ​ຊີງ​ຊະນະ​ເລີດປະ​ເພດ​ທີ​ມຄູ່​ປະສົມ ເປັນການ​ໂຄຈອນ​ມາ​ພົບ​ກັນ​ລະຫວ່າງ ​ເຈົ້າ​ພາບ ​ແຂວງ​ຊຽງ​ຂວາງ ທ້າວ ​ໂນ​ລະຄອນ ຈັນທະ​ວົງ+ນາງ ບັນ​ທະ​ໄລ ພົບ​ກັບ ທ້າວ ບຸນ​ແກ້ວ ອຸ່ນ​ແກ້ວ+ນາງ ສອນ​ສຸ​ລິດ ​ໄຊ​ຍະ​ຈັກ ຈາກ​ແຂວງ​ຫຼວງ​ພະ​ບາງ ຜົນ​ປາ​ກົດ​ວ່າ​: ຊຽງ​ຂວາງ ຫຼິ້ນ​ໄດ້​ດີກ​ວ່າ ​ເປັນ​ຝ່າຍ​ເອົາ​ຊະນະ​ໄປ​ແບບ​ສຸດ​ມັນ 13-9 ຄະ​ແນນ ​ຄວ້າຫຼຽນ​ຄຳ​ໄປ​ຄອງ ​ແລະ ​ເປັນ​ຫຼຽນ​ທີ 4 ​ໃຫ້​ທັບ​ນັກ​ໂຍນ​ລູກ​ເຫຼັກ​ແຂວງ​ຊຽງ​ຂວາງ ມີ​ໂອກາດ​ລຸ້ນ​ເຈົ້າ​ຫຼຽນ​ຄຳ ​ເປ​ຕັງ​ ທົ່ວປະເທດ ຄັ້ງທີ 10 ຊີງ​ຂັນ​ພະນະ​ທ່ານ​ນາຍົກລັດຖະມົນຕີ. ຂະນະ​ທີ່ ກຳລັງ​ລາຍ​ງານ ​ໃນ​ວັນ​ທີ 5 ກໍລະກົດນີ້ ກໍ່​ຍັງ​ມີ​ການ​​ແຂ່ງຂັນ​ນັດ​ຊີງ​ຊະນະ​ເລີດ 3 ຮຸ່ນ ຈາກຮຸ່ນ​ອາວຸ​ໂສ 50 ປີ ຂຶ້ນ​ໄປ, ປະ​ເພດ​ທີ​ມຊຸດ​ຊາຍ ​ແລະ ທີ​ມຊຸດ​ຍິງ ສ່ວນຜົນ​ການ​ແຂ່ງຂັນຈະ​ເປັນ​ແນວ​ໃດ​ນັ້ນຈະຂໍລາ​ຍງານ​ໃຫ້​ຊາບ​ຕື່ມ​ອີກ.

      ການ​ແຂ່ງຂັນລາຍການດັ່ງກ່າວ ຈັດ​ຂຶ້ນ ກໍ່​ເພື່ອ​ເປັນ​ການ​ທົດ​ສອບ​ຄວາມ​ພ້ອມ​ໃຫ້​ຄະນະ​ຮັບຜິດ​ຊອບຈັດການ​ແຂ່ງຂັນ, ຄູ​ເຝິກ ​ແລະ ນັກ​ກິລາ ກຽມ​ຮ່ວມ ຊຽງ​ຂວາງ ​ເກ​ມ 2018 ​ແລະ ​ຄັດ​ເລືອກ​ນັກ​ກິລາ​ຕິດ​ທີ​ມຊາດ ​ກຽມເຂົ້າ​ຮ່ວມ​ງານ​ກິລາ​ພາກ​ພື້ນ ​ແລະ ສາກົນ ​ໃນ​ຕໍ່ໜ້າ ​​ໂດຍໄດ້​ຮັບ​ການ​ສະໜັບສະໜູນ​ຫຼັກ​ຈາກ ບໍລິສັດ ​ເບຍ​ລາວ ຈຳກັດ 88 ລ້ານ​ກວ່າ​ກີບ ​ເຊິ່ງມີ​ການ​ຊີງ​ໄຊ​ກັນ​ທັງ​ໝົດ 10 ລາຍການ ປະກອບ​ມີ ປະ​ເພດ​ດ່ຽວ​ຍິງ-ຊາຍ, ຊຸດ​ຕິງຍິງ-ຊາຍ, ທີ​ມຄູ່​ຍິງ-ຊາຍ, ທີ​ມຊຸດ​ຍິງ​-ຊາຍ, ທີ​ມຄູ່​ປະສົມ ​ແລະ ທີ​ມຄູ່​ຊາຍ​ອາວຸ​ໂສ ຮຸ່ນ​ອາຍຸ 50 ປີ​ຂຶ້ນ​ໄປ ​ໂດຍ​ມີ​ນັກ​ກິລາ​ແຕ່​ລະ​ພາກສ່ວນ​ເຂົ້າ​ຮ່ວມ 300 ກວ່າ​ຄົນ ນັບ​ມາ​ຮອດ​ປັດຈຸບັນ ​ແຂວງ​ຊຽງ​ຂວາງ ຍາດ​ມາ​ໄດ້ 4 ຫຼຽນ​ຄຳ ​ແລະ 3 ຫຼຽນ​ທອງ ນຳ​ໜ້າ​ເຈົ້າ​ຫຼຽນ​ຄຳ ສ່ວນ​ອັນ​ດັບ​ທີ 2 ​​ແມ່ນ​ແຂວງ​ບໍ່​ແກ້ວ ຍາດ​ໄດ້ 2 ຫຼຽນ​ຄຳ ​ແລະ 1 ຫຼຽນ​ທອງ ​ແລະ ທີ 3 ​ແຂ​ວງວຽງ​ຈັນ ​ຍາດ​ໄດ້ 1 ຫຼຽນ​ຄຳ, 1 ຫຼຽນ​ເງິນ ​ແລະ 1 ຫຼຽນ​ທອງ.   

​      ໂດຍ ສົງການ        

Written by Super User

ລັດຖະມົນຕີ ສສກ ຕາງໜ້າລັດຖະບານລາວ ຮ່ວມສະຫຼອງວັນປະກາດເອກະລາດ ສະຫະລັດ ຄົບຮອບ 242 ປີ

36693019 1464275417007939 6410982835313704960 n   ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ  ກະຊວງສຶກສາທິການ ແລະ ກິລາ (ສສກ), ທ່ານ ໂພໄຊ ໄຂຄຳພິທູນ  ຫົວໜ້າຫ້ອງການ ກະຊວງການຕ່າງປະເທດ ໄດ້ຕາງໜ້າ ລັດຖະບານ ສປປ ລາວ ເຈົ້າຮ່ວມງານສະເຫຼີມສະຫຼອງວັນປະກາດເອກະລາດ ສະຫະລັດອາເມຣິກາ ຄົບຮອບ 242 ປີ ໃນວັນທີ 3 ກໍລະກົດ ຜ່ານມາ ທີ່ສະຖານທູດ ສະຫະລັດອາເມລິກາ ປະຈຳ​ ສປປ ລາວ ນະຄອນຫຼວງວຽງຈັນ, ມີເຈົ້າໜ້າທີ່ອາວຸໂສຈາກລັດຖະບານ ສປປ ລາວ,  ບັນດາທູຕານຸທູດ ແລະ ນັກທຸລະກິດ ເຂົ້າຮ່ວມຫຼາຍກວ່າ 600 ທ່ານ.  

  ທ່ານ ນາງ ຣີນາ ບິດເຕີ ເອກອັກຄະລັດຖະທູດ  ສະຫະລັດອາເມຣິກາ ປະຈຳ ສປປ ລາວ ໄດ້ຍົກໃຫ້ເຫັນເຖິງຄວາມສຳຄັນຂອງບັນດາຄະນະເຈົ້າໜ້າທີ່ຂັ້ນສູງຈາກສະຫະລັດອາເມຣິກາ ທີ່ໄດ້ມາຢ້ຽມຢາມ ສປປ ລາວ ໃນປີທີ່ຜ່ານມາ ລວມທັງລັດຖະມົນຕີກະຊວງການຄ້າ ແລະ ຄະນະຜູ້ແທນຂັ້ນສູງແຫ່ງລັດຖະສະພາ,  ເຊິ່ງ​ເປັນຄວາມພະຍາຍາມຂອງລັດຖະບານສະຫະລັດອາເມຣິກາ  ໃນການຊ່ວຍເຫຼືອຫຼຸດຜ່ອນຜົນກະທົບຈາກລະເບີດທີ່ບໍ່ທັນແຕກ (UXO) ຕໍ່ການພັດທະນາ ໃນ ສປປ ລາວ. 

       ພ້ອມກັນນີ້, ທ່ານເອກອັກຄະລັດຖະທູດ ໄດ້ກ່າວອີກວ່າ:  ການເຮັດວຽກຮ່ວມກັນກັບ ລັດຖະບານ ສປປ ລາວ ​ ແມ່ນມີຄວາມມຸ້ງໝັ້ນ ເພື່ອເກັບກູ້ລະເບີດບໍ່ທັນແຕກໃຫ້ໝົດໄປກ່ອນ ປີ 2030, ເຊິ່ງເປັນອຸປະສັກຕໍ່ການພັດທະນາປະເທດຊາດ. ສະຫະລັດອາເມຣິກາ  ເຫັນຄວາມສຳຄັນ ໃນການຮ່ວມມືແບບກວມລວມທີ່ນັບມື້ນັບມີຄວາມເຂັ້ມແຂງ ແລະ ເຕີບໃຫຍ່ຂະຫຍາຍຕົວໃນອະນາຄົດ. ພວກ​ເຮົາຮູ້ສຶກພາກພູມໃຈຫຼາຍທີ່ມີລັດຖະບານລາວເປັນຄູ່ຮ່ວມມື ທີ່​ໄດ້​ຮັບການສະໜັບສະໜູນຈາກປະຊາຊົນອາເມຣິກາ ແລະ ປະຊາຊົນລາວ  ໃນການເສີມຂະຫຍາຍເປົ້າໝາຍອັນດຽວກັນ  ເພື່ອເຮັດຊ່ວຍໃຫ້ ສປປ ລາວ  ໄດ້ພັດທະນາເປັນປະເທດທີ່ມີຄວາມຜາສຸກ,  ເປັນສະມາຊິກອາຊຽນ ທີ່ມີຄວາມເຂັ້ມແຂງ  ​ແລະ ເປັນສູນກາງທາງດ້ານການຄ້າເສລີ ແລະ ເປີດກວ້າງຢູ່ໃນພາກພື້ນ. ການສະເຫຼີມສະຫຼອງວັນຊາດຂອງສະຫະລັດອາເມຣິກາ ແມ່ນເພື່ອລະລຶກເຖິງການປະກາດເອກກະລາດຢ່າງເປັນທາງການ ໃນວັນທີ 4 ກໍລະກົດ 1776. ປະຊາຊົນຊາວສະຫະລັດອາເມຣິກາ  ໄດ້ສະຫຼອງວັນປະກາດ ແລະ ເສລີພາບ,  ໂດຍການຍິງບັ້ງໄຟດອກສູ່ທ້ອງຟ້າຢ່າງສວຍງາມ  ຢູ່ເດີ່ນສວນສະໜາມ ແລະ ຈັດງານລ້ຽງສະຫຼອງຢູ່​ແຫ່ງຕ່າງໆ ໃນຊຸມຊົນ.

(ໂດຍ ຂປລ)