ທຫລ ຫວຼງພະບາງ ຄວ້າແຊ໋ມເຕະບານ ຊີງຂັນທ່ານເຈົ້າແຂວງ 2017

ສຶກສາ

Written by ອາພຸດເດດ, ຮຽບຮຽງໂດຍ ອ້ວນດຳ

ທຫລ ຫວຼງພະບາງ ຄວ້າແຊ໋ມເຕະບານ ຊີງຂັນທ່ານເຈົ້າແຂວງ 2017  

25394352 1272658302836319 1437734712 n

   ທີມນັກເຕະທະນາຄານແຫ່ງ ສປປ ລາວ ຫຼື ທຫລ ແຂວງຫຼວງພະບາງ ຄວ້າແຊ໋ມການ
ແຂ່ງຂັນເຕະບານຊາຍ ທົ່ວແຂວງ ປະຈຳປີ 2017 ຊີງຂັນທ່ານເຈົ້າແຂວງ ແລະ ເປັນລາຍ
ການທີ 2 ຕິດຕໍ່ກັນ ໃນຮອບປີນີ້  ພາຍຫຼັງຍິງຈຸດໂທດໄລ່ເອົາຊະນະ   ທີມເມືອງໂພນໄຊ
ໄປແບບຫວຸດຫວິດ 6-5 ປະຕູ ຫຼັງໃນເວລາ 120 ນາທີ ຍັງສະເໝີກັນ 2-2 ປະຕູ.

      ຕາມການລາຍງານຂອງ ທ່ານ ອາພຸດເດດ ບຸບຜາ ຫົວໜ້າຫ້ອງປະຈຳການນັກຂ່າວ ແລະ ບັນນາທິການຂ່າວຂອງສະຖານີວິທະຍຸແຂວງ
ຫຼວງພະບາງ ລາຍງານໃຫ້ຮູ້ວ່າ: ການແຂ່ງຂັນກິລາເຕະບານ ຊີງຂັນທ່ານເຈົ້າແຂວງຫຼວງພະບາງ ຄັ້ງນີ້ ໄດ້ຈັດຂຶ້ນລະຫວ່າງວັນທີ 18 ພະຈິກ
ຫາ 14 ທັນວາ 2017 ກໍ່ສຳເລັດລົງຕາມລະດັບຄາດໝາຍ ເພື່ອເປັນການສະເຫຼີມສະຫຼອງວັນຊາດ ຄົບຮອບ 42 ປີ ແລະ  ວັນຄ້າຍວັນເກີດ
ຂອງ ທ່ານປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ ຄົບຮອບ 97 ປີໂດຍມີທັງໝົດ 7 ທີມເຂົ້າຮ່ວມ
ການແຂ່ງຂັນ ແບ່ງອອກເປັນ 2 ສາຍຄື: ສາຍ ກ ປະກອບມີ ທະນາຄານແຫ່ງ ສປປ ລາວ ແຂວງຫຼວງພະບາງ, ເມືອງໂພນໄຊ ແລະ ທິບພະ
ຍະປະກັນໄພ. ສ່ວນສາຍ ຂ ປະກອບມີ ບໍລິສັດ ຮຸ່ງວິໄລ ກໍ່ສ້າງເຄຫາສະຖານ ຈຳກັດ, ລັດວິສາຫະກິດໄຟຟ້າລາວສາຂາແຂວງຫຼວງພະບາງ,
ໂດມີນິກ ແລະ ທີມນອກກອບ.

       ສຳລັບພິທີປິດການແຂ່ງຂັນລາຍການດັ່ງກ່າວ ຈັດຂຶ້ນ ເມື່ອວັນທີ 14 ທັນວາ ຜ່ານມາ ທີ່ສະໜາມກິລາແຂວງ, ໂດຍໃຫ້ກຽດເຂົ້າຮ່ວມ
ແລະ ມອບລາງວັນຊະນະເລີດຂອງ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ແລະ ທ່ານ ພອນໄຊ ລາວມົວຊົງ ຫົວໜ້າຄະນະຈັດ
ຕັ້ງແຂວງຫຼວງພະບາງ, ມີບັນດາຄະນະພະແນກອ້ອມຂ້າງ ແລະ ພະນັກງານ ທະຫານ-ຕຳຫຼວດ ຕະຫຼອດຮອດພໍ່-ແມ່ປະຊາຊົນຊາວແຂວງ
ເຂົ້າຮ່ວມຢ່າງຫຼວງຫຼາຍ.  ໂດຍຄູ່ຊີງຊະນະເລີດ ເປັນການພົບກັນລະຫວ່າງ ທະນາຄານແຫ່ງ ສປປ ລາວ ແຂວງຫຼວງພະບາງ ແຊ໋ມເຕະບານ
ທົ່ວແຂວງ ປະຈຳປີ 2017 ພົບກັບ ເມືອງໂພນໄຊ ທີມມ້າມືດທີ່ສ້າງຜົນງານໄດ້ຢ່າງໂດດເດັ່ນ ທີ່ເຂົ້າຮ່ວມການແຂ່ງຂັນຄັ້ງທຳອິດ. ຜ່ານການ
ແຂ່ງຂັນໃນເຄິ່ງເວລາທຳອິດ ຜົນປາກົດວ່າ ທັງ 2 ທີມຍັງສະເໝີກັນຢູ່ 1-1 ປະຕູ.

         ກັບເຂົ້າມາແຂ່ງຂັນກັນຕໍ່ໃນເວລາທີ 2 ເປັນຝ່າຍ ເມືອງໂພນໄຊ ຂຶ້ນນຳໄປກ່ອນ 2-1 ຫຼັງຈາກເສຍປະຕູຄືແນວນັ້ນ, ນັກເຕະ ທຫລ
ແຂວງ ກໍ່ໃຊ້ຄວາມພະຍາຍາມເປີດເກມບຸກຢ່າງຕໍ່ເນື່ອງຫວັງຕີສະເໝີ ແລະ ຍັງເຫຼືອເວລາພຽງ 10 ນາທີ ທີມທະນາຄານກໍ່ມາປະສົບຜົນສຳ
ເລັດ ສາມາດຍິງປະຕູຕີສະເໝີ 2-2 ປະຕູ ກ່ອນຈົບ 90 ນາທີ ທັງ 2 ທີມຍັງສະເໝີກັນຢູ່ 2-2 ຕ້ອງໄດ້ຕໍ່ເວລາພິເສດອີກ 30 ນາທີ ອອກ
ໄປອີກ ແລະ ກໍ່ເປັນ ທະນາຄານແຫ່ງ ສປປ ລາວ ແຂວງຫຼວງພະບາງ ເປັນຝ່າຍຄອງຄວາມໄດ້ປຽບ ເປີດເກມບຸກຢ່າງ  ແລະ  ກໍ່ມີໂອກາດ
ຫຼາຍຄັ້ງ ແຕ່ໜ້າເສຍດາຍຍິງບໍ່ຄົມພໍ ສົ່ງຜົນໃຫ້ຍັງສະເໝີກັນຢູ່ ຕ້ອງໄດ້ຕັດສີນດ້ວຍການດວນຈຸດໂທດແລະກໍ່ເປັນ ທຫລ ແຂວງຍິງແມ້ນ
ກວ່າເອົາຊະນະເມືອງໂພນໄຊດ້ວຍປະຕູລວມ 6-5 ລວມຜົນ 120 ນາທີ ເປັນ 8-7 ສາມາດຄວ້າແຊ໋ມລາຍການນີ້ໄປຄອງໄດ້ສຳເລັດແລະ
ເປັນລາຍການທີ 2 ຂອງປີ 2017 ອີກດ້ວຍ.

     ສະຫຼຸບຜົນການແຂ່ງຂັນໃນຄັ້ງນີ້ ອັນດັບທີ 1 ທຫລ ແຂວງຫຼວງພະບາງ ໄດ້ຮັບຂັນທ່ານເຈົ້າແຂວງ ພ້ອມເງິນສົດ 7 ລ້ານກີບ, ອັນດັບ
ທີ 2 ເມືອງໂພນໄຊ ໄດ້ຮັບຂັນ ພ້ອມເງິນສົດ 5 ລ້ານກີບ, ອັນດັບທີ 3 ບໍລິສັດ ຮຸ່ງວິໄລ ກໍ່ສ້າງເຄຫາສະຖານ ຈຳກັດ ໄດ້ຮັບຂັນພ້ອມເງິນ
ສົດ 3 ລ້ານກີບ ແລະ ອັນດັບທີ 4 ໂດມີນິກ ໄດ້ຮັບຂັນ ພ້ອມເງິນສົດ 2 ລ້ານກີບ.