ມວນຊົນຫຼາຍຮ້ອຍຄົນ ຮ່ວມກິດຈະກຳເພື່ອສຸຂະພາບ ສະຫຼອງວັນສ້າງຕັ້ງໂອແລມປິກລາວ ຄົບຮອບ 39 ປີ

ສຶກສາ

Written by ອ້ວນດຳ

ມວນຊົນຫຼາຍຮ້ອຍຄົນ ຮ່ວມກິດຈະກຳເພື່ອສຸຂະພາບ ສະຫຼອງວັນສ້າງຕັ້ງໂອແລມປິກລາວ

ຄົບຮອບ 39 ປີ  

26037958 1280142888754527 1804015277 o

  ພະນັກງານ, ລັດຖະກອນ ຂະແໜງການສຶກສາ ແລະ ກິລາລວມທັງປະຊາຊົນຊາວນະຄອນ
ຫຼວງວຽງຈັນ ຫຼາຍຮ້ອຍຄົນ ຮ່ວມກິດຈະກຳອອກກຳລັງເພື່ອສຸຂະພາບເພື່ອສ້າງຂະບວນການ
ສະເຫຼີມສະຫຼອງວັນສ້າງຕັ້ງຄະນະກຳມະການໂອແລມປິກແຫ່ງຊາດລາວ(ຄອລ)ຄົບຮອບ39
ປີ (23 ທັນວາ 1978 ຫາ 23 ທັນວາ 2017)ຢ່າງມີຄວາມໝາຍຄວາມສຳຄັນ ແລະ ເປັນຂະ
ບວນການຟົດຟື້ນ, ເບີກບານມ່ວນຊື່ນ.

      ກິດຈະກຳຈັດຄັ້ງນີ້ ຈັດຂຶ້ນເມື່ອຕອນເຊົ້າວັນເສົາທີ 23 ທັນວາ ຜ່ານມາ ທີ່ສະໜາມກິລາເຈົ້າອານຸວົງ ນະຄອນຫຼວງວຽງຈັນ, ໂດຍໃຫ້
ກຽດເຂົ້າຮ່ວມຂອງ ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ ທັງເປັນປະທານ ຄອລທ່ານ ປອ.
ພູທອງ ແສງອາຄົມ ອະດີດລັດຖະມົນຕີ ປະຈຳສຳນັກງານນາຍົກລັດຖະມົນຕີ, ອະດີດປະທານຄະນະກຳມະການກິລາ-ກາຍະກຳແຫ່ງຊາດ
ແລະ ອະດີດປະທານ ຄອລ, ມີບັນດາອະດີດການນຳຂອງ ຄອລ, ຫົວໜ້າ-ຮອງຫົວໜ້າກົມ, ຫ້ອງການ, ອົງການສາກົນຄະນະອຳນວຍການ
ສະຖາບັນ, ສູນ ແລະ ໂຮງຮຽນອ້ອມຂ້າງ ກະຊວງ ສສກ ຕະຫຼອດຮອດພະນັກງານ, ຄູ-ອາຈານ, ນັກສຶກສາ  ແລະ  ພໍ່-ແມ່ປະຊາຊົນຊາວ
ລາວ  ກໍ່ຄື ຊາວນະຄອນຫຼວງວຽງຈັນ ເຂົ້າຮ່ວມຢ່າງຫຼວງວຫຼາຍ.   

      ໂອກາດນີ້, ທ່ານ ສົມພູ ພົງສາ ຜູ້ຊ່ວຍລັດຖະມົນຕີ ກະຊວງ ສສກ, ຮອງປະທານ ແລະ ເລຂາທິການ ຄອລໄດ້ຍົກໃຫ້ເຫັນເຖິງຄວາມ
ເປັນມາ ແລະ ການເຄື່ອນໄຫວໂດຍຫຍໍ້ຂອງ ຄອລ ໃຫ້ຊາບວ່າ: ຄອລ ໄດ້ຖືກສ້າງຕັ້ງຂຶ້ນ ແລະ ລົງລາຍເຊັນໂດຍປະທານສະພາລັດຖະມົນ
ຕີ ລົງໃນວັນທີ 25 ທັນວາ 1978 ແລະ ຖືກຮັບຮອງເປັນສະມາຊິກ ໂອແລມປິກສາກົນ (ຄອສ) ສຳຮອງໃນປີ 1978 ແລະ ສະມາຊິກສົມ
ບູນໃນປີ 1979 ພ້ອມດ້ວຍ 7 ສະຫະພັນກິລາແຫ່ງຊາດ ປະກອບມີ ແລ່ນ-ລານ, ມວຍສາກົນ, ເຕະບານ, ບານສົ່ງ, ຍິງປືນ,ບານບ້ວງແລະ
ປິ່ງປ່ອງ ເພື່ອເປັນຕົວແທນຄະນະກິລາແຫ່ງ ສປປ ລາວ ກຽມເຂົ້າຮ່ວມງານມະຫາກຳກິລາໂອແລມປິກເກມຄັ້ງທີ 20 ປີ 1980 ທີ່ນະຄອນ
ຫຼວງ ມອສໂຄ ອະດີດສະຫະພາບໂຊວຽດ ເປັນເຈົ້າພາບ ໂດຍ ຄອລ ມີທຳມະນູນເປັນຂອງຕົນເອງແລະ ສອດຄ່ອງກັບທຳມະນູນໂອແລມ
ປິກສາກົນ ເພື່ອເປັນບ່ອນອີງໃນການເຄື່ອນໄຫວຕາມພາລະບົດບາດຂອງຕົນ ແລະ ລາວ ກໍ່ໄດ້ເຂົ້າເປັນສະມາຊິກຄອສເຊິ່ງມີ 206 ປະເທດ
ເຂົ້າເປັນຊາດສະມາຊິກດ້ວຍກັນ. ນັບແຕ່ນັ້ນມາ ຈົນມາຮອດປັດຈຸບັນ ໄດ້ມີ ຄະນະບໍລິຫານງານ ຄອລ ເປັນຊຸດທີ  7  ເຊິ່ງແຕ່ລະຊຸດກໍ່ມີ
ຜົນງານຢ່າງຫຼວງຫຼາຍ ໂດຍໄດ້ປະຕິບັດຕາມພາລະບົດບາດຕາມທຳມະນູນໂອແລມປິກຂອງລາວເຮົາ ແລະ  ສອດຄ່ອງກັບທຳມະນູນຂອງ
ຄອສ ນຳພາການເຄື່ອນໄຫວເຮັດວຽກເປັນຕົວແທນກິລາລາວອອກເຄື່ອນໄຫວໃນງານກິລາໂອແລມປິກເກມ, ກິລາຊີເກມ ແລະ ງານກິລາ
ເອເຊຽນເກມ ເປັນລຳດັບ.

      ທ່ານ ນາງ ແສງເດືອນ ຫຼ້າ ຈັນທະບູນ ກ່າວວ່າ: ເພື່ອລະນຶກເຖິງວັນສ້າງຕັ້ງ ຄອລ ໃນແຕ່ລະປີ ຄະນະບໍລິຫານງານແຕ່ລະຊຸດ ກໍ່ໄດ້ຈັດ
ກິດຈະກຳໃສ່ໃນວັນຄົບຮອບຂອງແຕ່ລະປີຕະຫຼອດມາເປັນການສະແດງເຖິງພັນທະທີ່ສຳຄັນຂອງ ຄອລ ຕໍ່ພາລະກິດໃນການປະກອບສ່ວນ
ການພັດທະນາກິລາຂອງຊາດ ພໍດີແທດເໝາະກັບການສະເຫຼີມສະຫຼອງປີທ່ອງທ່ຽວ ສປປ ລາວ ໃນປີ  2018.  ເຊື່ອໝັ້ນວ່າກິດຈະກຳກິລາ
ວັນນີ້ ເປັນກິດຈະກຳເຕົ້າໂຮມຄວາມສາມັກຄີ ຢ່າງມີຄວາມເບີກບານ ແລະ ມ່ວນຊື່ນ.

ໃນກິດຈະກຳຄັ້ງນີ້ ມວນຊົນຊາວລາວ ໄດ້ຮ່ວມກັນຊົມການສະແດງເຕັ້ນເຊຍຣິດດິງ ດີກຣີແຊ໋ມ ທົ່ວປະເທດ ຊີງຂັນ ປະທານ ຄອລຈາກວິ
ທະຍາໄລຣັຕະນະບໍລິຫານທຸລະກິດ ແລະ ເຕັ້ນໂຊທີມແຊ໋ມສາຍມັດທະຍົມ ຊີງຂັນປະທານ ຄອລ ຂອງທີມໂຮງຮຽນ 2 ພາ ລາວ-ຫວຽດ
ນາມ ຫຼື    ຫງວຽນຢູ, ລຳຕັ່ງຫວາຍ 1 ລາຍການ, ຮ້ອງເພງ ແລະ ເຕັ້ນແອໂຣບິກ. ຫຼັງຈການັ້ນ, ກໍ່ຍັງມີການຍ່າງອອກກຳລັງເພື່ອສຸຂະພາບ
ເຊິ່ງເລີ່ມຈາກສະໜາມກິລາເຈົ້າອານຸວົງ ເມືອງຈັນທະບູລີ ອອກຈາກຫ້ອງການ ຄອລ ຜ່ານສູນກິລາໂບລິ້ງ ແລ້ວໄປລ້ຽວຂວາຕໍ່ໜ້າໂຮງແຮມ
ຈະເລີນໄຊ ຜ່ານກະຊວງໄປສະນີ ແລະ ກະຊວງສຶກສາທິການ ແລະ ກິລາ ໂຄ້ງກັບຕໍ່ໜ້າສຳນັກງານປະທານປະເທດ (ຫໍຄຳ) ລ້ຽວຊ້າຍຍ່າງ
ທາງຂຶ້ນ ໄປຫໍວັດທະນະທໍາແລ້ວໄປລ້ຽວຂວາມືຮ່ອມໂຮງແຮມລາວພລາຊາ ກັບເຂົ້າສະໜາມກິລາເຈົ້າອານຸວົງຄືນ.