ເມືອງຫີນເຫີບ ເປີດແຂ່ງຂັນກິລາ ແລະ ສິລະປະ ນັກຮຽນມັດທະຍົມ ທົ່ວເມືອງ ຄັ້ງທີ 5

ສຶກສາ

Written by ອຳໄພວັນ

ເມືອງ​ຫີນ​ເຫີບ ​ເປີດແຂ່ງຂັນກິລາ ແລະ ສິລະປະນັກຮຽນມັດທະຍົມ ທົ່ວເມືອງ ຄັ້ງທີ 5

26854231 1293610040741145 1766994878 o    ເມືອງ​ຫີນ​ເຫີ​ບ  ແຂວງວຽງຈັນ ​ເປີດ​ການ​ແຂ່ງຂັນກິລາ  ແລະ  ສິລະປະ-ວັນນະຄະດີ
ສຳລັບນັກຮຽນມັດທະຍົມສຶກສາ ຄັ້ງທີ 5 ທົ່ວເມືອງ  ປະຈຳປີ 2018 ຢ່າງ​ເປັນ​ທາງ​ການ
ເພື່ອປະຕິບັດຕາມ 3 ລັກສະນະ ແລະ 5 ຫຼັກມູນການສຶກສາ, ແຜນພັດທະນາວຽກງານ
ກິລາ-ກາຍະກຳ ແລະ  ວຽກງານສິລະປະ-ວັນນະຄະດີ ຂອງຫ້ອງການສຶກສາທິການແລະ
ກິລາເມືອງ

      ແຕ່ນີ້ຮອດ ປີ 2020 ​ແລະ ສ້າງ​ຂະ​ບວນການ​ຕ້ອນຮັບ​ວັນ​ສຳຄັນ​ຂອງ​ຊາດ ​ພ້ອມ​ທັງເປັນ​ການ​ຄັດ​ເລືອກ​ນັກ​ກິລາ​ເປັນ​ຕົ​ວ​ແທນ​ຂອງ
​ເມືອງ ​ເພື່ອ​ເຂົ້າ​ຮ່ວມ​ແຂ່ງຂັນ​ໃນ​ລະດັບ​ແຂວງ.ເມື່ອ​ວັນ​ທີ 8 ມັງກອນຜ່ານ​ມາ ທີ່​ເມືອງ​ຫີນ​ເຫີ​ນ ​ແຂວງ​ວຽງ​ຈັນໄດ້​ມີ​ພິທີເປີດການແຂ່ງຂັນ
ກິລາ ແລະ ສິລະປະ -ວັນນະຄະດີ ສຳລັບນັກຮຽນມັດທະຍົມສຶກສາ ຄັ້ງທີ 5 ທົ່ວເມືອງ ປະຈຳປີ 2018, ໃຫ້​ກຽດ​ເຂົ້າ​ຮ່ວມ​ຂອງ  ທ່ານ
ຄໍາຫຼ້າ  ບຸນຍະສິນປະທານກວດກາພັກ-ລັດເມືອງຫີນເຫີບ ແລະ ທ່ານ ຄຳສອນ ຈັນທະລັງສີ ຫົວໜ້າຫ້ອງການສຶກສາທິການ ແລະ ກິລາ
ເມືອງຫີນເຫີບ,ມີຄະນະຫ້ອງການສຶກສາທິການ ແລະ ກິລາເມືອງແຂກທີ່ຖືກເຊີນ,ພະນັກງານ, ຄູ-ອາຈານແລະນ້ອງໆນັກຮຽນທີ່ມາຈາກ
7 ໂຮງຮຽນ.

​      ໂອກາດ​ດັ່ງກ່າວ, ທ່ານ ຄຳສອນ ຈັນທະລັງສີ ໄດ້ລາຍງານການກະກຽມການຈັດການແຂ່ງຂັນໃນຄັ້ງນີ້ ​ໃຫ້​ຊາບວ່າ: ການແຂ່ງຂັນກິລາ
ແລະສິລະປະ-ວັນນະຄະດີ  ສຳລັບນັກຮຽນມັດທະຍົມສຶກສາທົ່ວເມືອງ  ​ແມ່ນ​ເພື່ອເປັນສ້າງຂະບວນການຄຳນັບຮັບຕ້ອນວັນສຳຄັນຕ່າງໆ
ຂອງຊາດໃຫ້ມີຂະບວນຟົດຟື້ນມ່ວນຊື່ນ, ທັງເປັນການຄັດເລືອກນັກກິລາ ແລະ  ນັກສິລະປະຜູ້ມີພອນສະຫວັນດີເດັ່ນ ເປັນຕົວແທນໃຫ້
ແກ່ເມືອງເຂົ້າຮ່ວມການແຂ່ງຂັນລະດັບແຂວງ ແລະ  ພ້ອມທັງເປັນການຮັດ  ແໜ້ນຄວາມສາມັກຄີ ແລກປ່ຽນບົດຮຽນເຊິ່ງກັນ ແລະ ກັນ
ພາຍໃນເມືອງ.

       ການແຂ່ງຂັນກິລາ  ແລະ  ສິນລະປະ-ວັນນະຄະດີ  ສຳລັບນັກຮຽນມັດທະຍົມສຶກສາທົ່ວເມືອງຫີນເຫີບໃນຄັ້ງນີ້  ມີທັງໝົດ 7 ໂຮງ
ຮຽນເຂົ້າຮ່ວມຄື: ມສ ຫີນເຫີບ, ມສ ຄອນແກ້ວ, ມສ ນາຊໍາ, ມຕົ້ນ ວຽງຄຳ, ມຕົ້ນ ປ່ອງຊ່ອງ, ມຕົ້ນ ວັງຄີ, ມຕົ້ນ ສົມສະໜຸກ ແລະ ມ
ຕົ້ນຜາບ່ອງ.ເຊິ່ງການແຂ່ງຂັນກັນທັງໝົດ 5 ປະເພດກິລາ ປະກອບ​ມີ: ເຕະບານຊາຍ, ບານສົ່ງຍິງ-ຊາຍ, ກະຕໍ້ຊາຍ, ເປຕັງຍິງ-ຊາຍ  ແລະ
ແລ່ນ-ລານ ໂດຍການແຂ່ງຂັນແຕ່ລະປະເພດແບ່ງເປັນ 2 ຮຸ່ນຄື: ລະດັບ ມັດທະຍົມ​ຕອນຕົ້ນ ແລະ ມັດທະຍົມ​ຕອນປາຍ.

       ສຳລັບກິລາເຕະບານ ຊະນະເລີດ ຈະໄດ້ຮັບຂັນລາງວັນ 1 ໜ່ວຍ  ແລະ ເງິນລາງວັນ 6 ​ແສນກີບ, ຮອງຊະນະເລີດ 5 ​ແສນກີບແລະ
ອັນດັບ 3 ​ຈຳນວນ 4 ​ແສນກີບ; ບານສົ່ງ ຊະນະເລີດຈະໄດ້ຮັບຂັນ 1 ໜ່ວຍ ແລະ ເງິນລາງວັນ 3 ​ແສນກີບ, ຮອງຊະນະເລີດ 4​ ແສນກີບ
ແລະ ອັນດັບ 3 ຈຳນວນ 3 ​ແສນກີບ; ກະຕໍ້ ຊະນະເລີດ ໄດ້ຮັບຂັນ ແລະ ເງິນລາງວັນ 4 ​ແສນກີບ, ຮອງຊະນະເລີດ 3 ​ແສນກີບແລະອັນ
ດັບ 3 ​ຈຳນວນ 2 ​ແສນກີບ; ເປຕັງ ຊະນະເລີດ ໄດ້ຮັບຂັນ ແລະ ເງິນລາງວັນ 4 ​ແສນກີບ, ຮອງຊະນະເລີດ 3​ ແສນກີບ ແລະ ອັນດັບ 3
​ຈຳນວນ 2 ​ແສນກີບ; ກິລາແລ່ນ-ລານ  ຊະນະເລີດ ໄດ້ຮັບເງິນລາງວັນ 3 ​ ແສນກີບ,  ຮອງຊະນະເລີດ 2 ​ແສນກີບ ແລະ ອັນດັບ 3  ຈຳ
ນວນ 1 ​ແສນກີບ.

       ສ່ວນການແຂ່ງຂັນສິລະປະ-ວັນນະຄະດີ  ມີ  2 ປະເພດຄື: ບົດເພງ ແລະ ບົດຟ້ອນ ​ໂດຍ​ລາງວັນ​ຂອ​ງການ​ແຂ່ງຂັນບົດຟ້ອນ ຊະນະ
ເລີດ ຈະໄດ້ຮັບເງິນລາງວັນ 5 ​ແສນກີບ, ຮອງຊະນະເລີດ 4 ​ແສນກີບ ແລະ ອັນດັບ 3 ​ຈຳນວນ 3 ​ແສນກີບ; ບົດເພງຊະນະເລີດ 3 ​ແສນ
ກີບ,  ຮອງຊະນະເລີດ 2 ​ແສນ​ກີບ ແລະ ອັນດັບ 3 ​ຈຳນວນ 1 ​ແສນກີບ. ຂະນະ​ທີ່ກິດຈະກຳໃນຄັ້ງນີ້ແມ່ນຈະດຳເນີນໄປເປັນເວລາ 5 ວັນ
ລະຫວ່າງ​ວັນ​ທີ 8-12 ມັງກອນ 2018 ຈຶ່ງຈະສຳເລັດລົງຕາມລະດັບ ຄາດໝາຍ.