ມຂ ຈັດສຳມະນາ ເພື່ອຊ່ວຍເຫຼືອນັກສຶກສາ ໄດ້ມີໂອກາດໄປຮຽນຕໍ່ທີ່ປະເທດອັງກິດມຂ ຈັດສຳມະນາ ເພື່ອຊ່ວຍເຫຼືອນັກສຶກສາ ໄດ້ມີໂອກາດໄປຮຽນຕໍ່ທີ່ປະເທດອັງກິດ

ສຶກສາ

Written by ພູ​ວອນ ດຳ​ລົງ​ບຸນ

ມຂ ຈັດສຳ​ມະ​ນາ​ ເພື່ອ​ຊ່ວຍ​ເຫຼືອ​ນັກ​ສຶກ​ສາ ໄດ້​ມີ​ໂອ​ກາດ​ໄປ​ຮຽນ​ຕໍ່​ທີ່​ປະ​ເທດ​ອັງ​ກິດ

5.2.2018 1    ມະ​ຫາ​ວິ​ທະ​ຍາ​ໄລສະ​ຫວັນ​ນະ​ເຂດ ຫຼື ມຂ ຮ່ວມກັບສະຖານເອກ​ອັກຄະ​ຣາ​ຊະ​ທູດແຫ່ງປະເທດອັງ​ກິດ ປະ​ຈຳສ​ປ​ປ ລາວ ໄດ້​ຈັດ​ສຳ​ມະ​ນາ​ເຜີຍ​ແຜ່​ການ​ສຶກ​ສາ ແລະ ການ​ຮຽນ​ຕໍ່ ເພື່ອ​ຊ່ວຍ​ເຫຼືອ​ນັກ​ສຶກ​ສາ ມ​ຂ ໄດ້​ມີ​ໂອ​ກາດ​ໄປ​ສຶກ​ສາ​ຕໍ່ທີ່​ປະ​ເທດ​ອັງ​ກິດ ພ້ອມ​ທັງ​ມີ​ການ​ເປີດ​ໂຕວາງ​ສະ​ແດງ​ກ່ຽວ​ກັບ​ໂຮງ​ຮຽ​ນ​ສອນ​ພາ​ສາ​ອັງ​ກິດ, ສູນ​ໃຫ້​ຄຳ​ປຶກ​ສາ ແລະ ຊ່ວຍ​ເຫຼືອ​ໃນ​ການ​ໄປ​ຮຽນ​ຕໍ່​ທີ່​ປະ​ເທດ​ອັງ​ກິດ ແລະ ບັນ​ດາ​ປະ​ເທດ​ຕ່າງໆ ເມື່ອວັນທີ 30 ມັງກອນ ຜ່ານມາ ທີ່ມະຫາວິທະຍາໄລດັ່ງກ່າວ, ໂດຍ​ການ​ເປັນ​ປະ​ທານ​ຮ່ວມຂອງ ທ່ານ ຮ​ສ. ປອ ບຸນ​ປົງ ແກ້ວ​ໂຣ​ດົມ ອະ​ທິ​ການ​ບໍ​ດີ​ ມະ​ຫາ​ວິ​ທະ​ຍາ​ໄລສະ​ຫວັນ​ນະ​ເຂດ ແລະ ທ່ານ​ ຮູວ ອີ​ວານ ເອກ​ອັກ​ຄະ​ຣາ​ຊະ​ທູດແຫ່ງປະເທດອັງ​ກິດ​ ປະ​ຈຳ​ສປປ ລາວ, ມີ ທ່ານ ພູ​ຂົງ ນາມ​ມະ​ຈັກ ຫົວ​ໜ້າ​ຫ້ອງວ່າ​ການ​ປົກ​ຄອງ​ແຂວງ ພ້ອມດ້ວຍຮອງ​ຫົວ​ໜ້າ​ພະ​ແນກ​ສຶກ​ສາ​ທິ​ການ ແລະ ກິ​ລາ​ແຂວງ, ຄູ-ອາ​ຈານ ແລະ ນັກ​ສຶກ​ສາ​ ໃນ​ມະ​ຫາ​ວິ​ທະ​ຍາ​ໄລ​ເຂົ້າ​ຮ່ວມ.

 

      ໂອ​ກາດ​ນີ້, ທ່ານ ຮູວ ອີ​ວານ ກ່າວ​ໃຫ້​ຮູ້​ວ່າ: ໂດຍ​ປະ​ຕິ​ບັດ​ຕາມ​ການ​ແລກ​ປ່​ຽນ​ຄຳ​ຄິດ​ເຫັນທີ່​ ທ່ານ ນາງ ແສງ​ເດືອນຫຼ້າ ​ຈັນ​ທະ​ບູນ ລັດ​ຖະ​ມົນ​ຕີ​ ກະ​ຊ​ວງ​ສຶກ​ສາ​ທິ​ການ ແລະ ກິ​ລາ ໄດ້​ເຂົ້າ​ຮ່ວມ​ປະ​ຊຸມ​ທີ່​ປະ​ເທດ​ອັງ​ກິດ ເຊິ່ງ​ໄດ້​ເນັ້ນ​ເລື່ອງ​ການ​ເພີ່ມ​ທະ​ວີ​ການ​ຮ່ວມ​ມື​ທາງ​ການ​ສຶກ​ສາ​ລະ​ຫວ່າງ​ 2 ​ປະ​ເທດ​ໃຫ້   ​ແໜ້ນ​ແຟ້ນ​ຍິ່ງຂຶ້ນ. ສະ​ນັ້ນ, ເປົ້າ​ໝາຍ​ທີ່ທາງ​ຄະ​ນະ​ທີມ​ງານ ແມ່ນເພື່ອ​​ຈັດ​ສຳ​ມະ​ນາ ​ເພື່ອ​ສ້າງ​ສາຍ​ພົວ​ພັນ​ກັບ​ມະ​ຫາ​ວິ​ທະ​ຍາ​ໄລ​ຕ່າງໆ​ໃນ​ທົ່ວ​ປະ​ເທດ​ລາວ ໃນ​ການ​ຮ່ວມ​ມື​ດ້ານ​ການ​ສຶກ​ສາ​ກັບ​ມະ​ຫາ​ວິ​ທະ​ຍາ​ໄລ​ຊື່​ດັງ​ໃນ​ປະ​ເທດ​ອັງ​ກິດ, ການ​ຮຽນ​ຮູ້​ພາ​ສາ​ອັງ​ກິດ ແລະ ການ​ເຊື່ອມ​ໂຍງ​ກັບ​ຂະ​ແໜງ​ການ​ສຶກ​ສາ​ຊັ້ນ​ສູງ​ຂອງ​ລາວ​ ແລະ ອັງ​ກິດ. ເຊິ່ງ​ມັນ​ເປັນ​ວິ​ໄສ​ທັດ​ອັນ​ໜຶ່ງ​ເພື່ອ​ເຮັດ​ໃຫ້​ອັງ​ກິດ​ເປັນ​ຄູ່​ຮ່ວມ​ງານ​ທາງ​ເລືອກ​ສຳ​ລັບ​ລະ​ບົບ​ການ​ສຶກ​ສາ​ຂອງ​ລາວ. ນອກ​ຈາກນັ້ນ, ຍັງ​ເປັນ​ການ​ໂຄ​ສະ​ນາ​ຄຸ​ນະ​ພາບ​ການ​ການ​ຮຽນ​ລະ​ດັບ​ໂລກ​ຂອງ​ການ​ສຶກ​ສາ ແລະ ໂອ​ກາດ​ສຳ​ລັບ​ການ​ຄົ້ນ​ຄວ້າ. ອັງກິດ ​ແມ່ນ​ບ່ອນ​ທີ 2 ຂອງ​ມະ​ຫາ​ວິ​ທະ​ຍາ​ໄລ​ຊັ້ນ​ສູງ​ ທີ່ມີຫຼາຍກວ່າເມືອງ​ອື່​ນໆໃນ​ໂລກ ແລະ ຈັດ​ເປັນ​ອັນ​ດັບ​ 2 ​ຂອງ​ໂລກ ​ໃນ​ການ​ສ້າງ​ບຸຄະ​ລາ​ກອນ​ທີ່​ມີ​ຄຸ​ນະ​ພາບ, ສະ​ຖານ​ທູດ​ອັງ​ກິດ​ ໄດ້​ເພີ່ມ​ຈຳ​ນວນ​ທຶກນ​ການ​ສຶກ​ສາ​ ສຳ​ລັບ​ສປປ ລາວ ໄດ້​ມີ​ໂອ​ກາດ​ໄປ​ຮຽນ​ຕໍ່​ທີ່​ປະ​ເທດ​ອັງ​ກິດຫຼາຍ​ຂຶ້ນ.

      ຈາກນັ້ນ, ທ່ານ​ເອກ​ອັກ​ຄະ​ຣາ​ຊະ​ທູດອັງ​ກິດ​ ປະຈຳ​ລາວ ແລະ ທ່ານອະ​ທິ​ການ​ບໍ​ດີ ມ​ຂ ພ້ອມ​ດ້ວຍ​ແຂກ​ທີ່​ເຂົ້າ​ຮ່ວມ ​ໄດ້​ຢ້ຽມ​ຢາມ​ບັນ​ດາ​ສູນ​ຕ່າງໆ​ທີ່​ມາ​ເປີດວາງ​ສະ​ແດງ​ໃຫ້​ຂໍ້​ມູນ​ ເພື່ອ​ສ້າງ​ປະ​ກາຍ​ຝັນ​ຂອງ​ນັກ​ສຶກ​ສາ ແລະ ຄູ​-ອາ​ຈານ​ ໂດຍ​ມີ​ສະ​ຖາ​ບັນ​ສອນ​ພາ​ສາ​ອັງ​ກິດ ໂກນ​ອິງ​ລິດ​ ທີ່​ມາ​ໃຫ້​ຄວາມ​ຮູ້​ ແລະລາຍ​ລະ​ອຽດ​ ກ່ຽວ​ກັບ​ມາດ​ຖານ​ຂອງ​ພາ​ສາ​ອັງ​ກິດ ທີ່​ຈະ​ຮຽນ​ຢູ່​ຕ່າງ​ປະ​ເທດ. ພ້ອມ​ດຽວ​ກັນ​ນັ້ນ, ກໍ່​ຍັງ​ມີ​ບໍ​ລິ​ສັດ​ປະ​ກັນ​ໄພ​ພ​ຣູ​ເດັນ​ໂຊ ​ເພື່ອ​ຊ່ວຍ​ຄອບ​ຄົວ​ ໃນ​ການ​ວາງ​ແຜນ​ການ​ເງິນການ​ໄປ​ຮຽນ​ຕໍ່​ຕ່າງ​ປະ​ເທດ, ສູນ​ໃຫ້​ຄຳ​ປຶກ​ສາ​ກ່ຽວ​ກັບ​ຂັ້ນ​ຕອນ ແລະ ວິ​ທີ​ການ​ຕ່າງໆ​ໃນ​ການ​ໄປ​ຮຽນ​ຕໍ່​ຢູ່​ຕ່າງ​ປະ​ເທດ.

ໂດຍ: ພູ​ວອນ ດຳ​ລົງ​ບຸນ