ສະຫວັນນະເຂດ ຕັ້ງເປົ້າລະດົມເງິນນຳມວນຊົນ ໃຫ້ໄດ້ 2,8 ຕື້ກວ່າກີບ ກຽມຮ່ວມງານກິລານັກຮຽນ ທົ່ວປະເທດ ປີ 2020

ສຶກສາ

Written by ວອນ ດຳລົງບຸນ

ສະ​ຫວັນ​ນະ​ເຂດ ຕັ້ງເປົ້າລະດົມ​ເງິນ​ນຳມວນ​ຊົນ ​ໃຫ້​ໄດ້ 2,8 ຕື້​ກວ່າກີບ​ ກຽມຮ່ວມ​ງານ​ກິ​ລາ​ນັກ​ຮຽນ​ ທົ່ວ​ປະ​ເທດ ປີ 2020

5.2.2018    ແຂວງ​ສະ​ຫວັນ​ນະ​ເຂດ ຕັ້ງ​ເປົ້າ​ໝາຍ​ຈະ​ລະດົມທຶນ​ນຳພໍ່-​ແມ່​ປະຊາຊົນ​ຊາວທົ່ວ​ແຂວງ ໃຫ້ໄດ້ເຖິງ 2,8 ຕື້ກວ່າກີບ ເພື່ອຫ້າງຫາກະ​ກຽມ​ຄວາມພ້ອມຈະສົ່ງ​ນັກ​ກິ​ລາ 300 ຄົນ ຈາກທັງໝົດ​ 12 ປະ​ເພດ ເຂົ້າ​ຮ່ວມງານ​ມະ​ຫາ​ກິ​ລາ​ນັກ​ຮຽນ​ມັດ​ທະ​ຍົມ​ສຶກ​ສາ​ ທົ່ວ​ປະ​ເທດ ຄັ້ງ​ທີ 7 ທີ່​ແຂວງ​ສາ​ລ​ະ​ວັນ ຮັບກຽດເປັນ​ເຈົ້​ພາບ​ໃນ​ປີ 2020. ເມື່ອວັນ​ທີ 1 ກຸມ​ພາ ຜ່ານ​ມາ​ ທີ່​ຫ້ອງ​ປະ​ຊຸມ​ສະ​ໜາມ​ກິ​ລາ​ແຂວງ​ສະ​ຫວັນ​ນະ​ເຂດ (ຫຼັກ 4) ໄດ້​ມີ​ກອງ​ປະ​ຊຸມ​ປຶກ​ສາ​ຫາ​ລືກ່ຽວ​ກັບ​ກ​ານ​ລະ​ດົມ​ທຶນ​ເຂົ້າ​ກອງ​ທຶນ​ກິ​ລາ​ນັກ​ຮຽນ​ມັດ​ທະ​ຍົມ​ສຶກ​ສາ​ ຂອງ​ແຂວງ​ສະ​ຫວັນ​ນະ​ເຂດ, ໂດຍ​ເຂົ້າ​ຮ່ວມ​ເປັນ​ປະ​ທານຂອງ ທ່ານ ນາງ ຫຼິງ​ທອງ ແສງ​ຕາ​ວັນ ຫົວ​ໜ້າ​ພະ​ແນກ​ສຶກ​ສາ​ທິ​ການ ແລະ ກິ​ລາແຂວງສະຫວັນນະເຂດ, ມີຄະນະພະແນກສຶກສາທິການ ແລະ ກິລາແຂວງ​, ​ບັນ​ດາ​​ຄະ​ນະ​ຫ້ອງ​ການ​ສຶກ​ສາທິການ ແລະ ກິ​ລາ​ເມືອງ 15 ເມືອງ ອ້ອມຂ້າງແຂວງ ພ້ອມ​ດ້ວຍ​ແຂກ​ທີ່​ຖືກ​ເຊີນ​ເຂົ້າ​ຮ່ວມ.

      ໂອກາດນີ້, ທ່ານ ຖາ​ວອນ ອິນ​ສີ​ຊຽງ​ໃໝ່ ຮອງ​ຫົວ​ໜ້າ​ພະ​ແນກ​ສຶກ​ສາ​ທິ​ການ ແລະ ກິ​ລາ​ແຂວງລາຍ​ງານ​ໃຫ້​ຮູ້​ວ່າ: ໂດຍ​ປະ​ຕິ​ບັດ​ຕາມ​ຂໍ້​ຕົກ​ລົງ​ຂອງ​ທ່ານ​ເຈົ້າ​ແຂວງ​ສະ​ຫວັນ​ນະ​ເຂດ ວ່າ​ດ້ວຍ​ການ​ລະ​ດົມ​ທຶນ​ເຂົ້າ​ກອງ​ທຶນ​ກິ​ລາ​ນັກ​ຮຽນ​ມັດ​ທະ​ຍົມ​ສຶກ​ສາ​ຂອງ​ແຂວງ​ສະ​ຫວັນ​ນະ​ເຂດ ເພື່ອ​ກະ​ກຽມຄວາມພ້ອມ​ເຂົ້າ​ຮ່ວມ​ງານ​ແຂ່ງ​ຂັນ​ກິ​ລາ​ນັກ​ຮຽນ​ມັດ​ທະ​ຍົມ​ສຶກ​ສາ​ ທົ່ວ​ປະ​ເທດ​ ຄັ້ງ​ທີ 7 ປີ 2020 ທີ່​ແຂວງ​ສາ​ລະ​ວັນ​ ເປັນ​ເຈົ້າ​ພາບ ເຊິ່ງກອງ​ປະ​ຊຸມ​ໄດ້​ເຫັນ​ດີ​ເປັນ​ເອ​ກະ​ພາບ​ໃຫ້​ລະ​ດົ​ມ​ທຶນ​ຈາກພະ​ນັກ​ງານ, ຄູ-ອາ​ຈານ ໃນ​ຂະ​  ແໜງ​ການ​ສຶກ​ສາ ແລະ ຜູ້​ປົກ​ຄອງ​ນັກ​ຮຽນ​ຊັ້ນ​ມັດ​ທະ​ຍົມ​ຕອນ​ຕົ້ນ ແລະ ຕອນ​ປາຍ ນັບ​ແຕ່​ສົກ​ຮຽນ 2017 ​​ເປັນຕົ້ນ​ໄປ ຈົນ​ເຖິງ​ປີ 2020 (ໄລຍະເວລາ 3 ປີ).

    ທ່ານ ຖາ​ວອນ ອິນ​ສີ​ຊຽງ​ໃໝ່ ກ່າວ​ຕື່ມ​ອີກ​ວ່າ: ສຳ​ລັບ​ແຜນການ​ຄາດ​ຄະ​ເນຈຳ​ນວນ​ພະ​ນັກ​ງານ ​ແລະ ຄູ-ອາຈານ​ ທົ່ວ​ແຂວງ​ ທີ່ຈະ​ປະ​ກອບ​ສ່ວນ​ເງິນ ຈຳນວນ 10.000 ກີບ​ຕໍ່​ຄົນ ​ເຂົ້າ​ຄັງ​ກອງ​ທຶນ​ກິ​ລາ​ນັກ​ຮຽນ​ມັດ​ທະ​ຍົມ​ສຶກ​ສາ​ຂອງ​ແຂວງ ສົກ​ຮຽນ 2017-2020 ມີ​ທັງ​ໝົດ 8.542 ຄົນ ລວມ​ເປັນ​ເງິນ​ທີ່​ຈະ​ໄດ້ 683 ລ້ານກວ່າ​ກີບ ​ແລະ ຈະ​ລະດົມເງິນນຳ​ພໍ່-​ແມ່​ນັກ​ຮຽນ​ມັດ​ທະ​ຍົມ​ສຶກ​ສາ ​ທົ່ວ​ແຂວງ ຄອບຄົວ​ລະ 5.000 ກີບ ລວມ​ມີ​ທັງ​ໝົດ 74.008 ຄົນ ຄາດ​ວ່າ​ ຈະ​ລະດົມ​ເງິນ​ເຂົ້າ​ກອງ​ທຶນ​ໄດ້ 2,1 ຕື້ກວ່າ​ກີບ ເຊິ່ງ​ລວມ​ເງິນກອງ​ທຶນ​ທັງ​ຄູ​ ແລະ ນັກ​ຮຽນຈະ​ໄດ້​ທັງ​ໝົດ 2,8 ຕື້ກວ່າ​ກີບ ໃນ​ນັ້ນ​ຄາດ​ວ່າ​ຈະ​ສົ່ງ​ຄະ​ນະ​ນຳ, ຄູ​ເຝິກ ແລະ ນັກ​ກິ​ລາ​ທັງ​ໝົດ 300 ຄົນ, ນັກ​ກິ​ລາ 202 ຄົນ ຈາກທັງ​ໝົດ 12 ປະ​ເພດ​ກິ​ລາ ​ຄື: ກິ​ລາ​ເຕະບານ​ຊາຍ-ຍິງ, ບານ​ສົ່ງຊາຍ-ຍິງ, ບານ​ບ້ວງຊາຍ-ຍິງ, ​ກະ​ຕໍ້ຊາຍ-ຍິງ, ແລ່ນ-ລານຊາຍ-ຍິງ, ເປ​ຕັງຊາຍ-ຍິງ, ໜ້າ​ເກັກຊາຍ-ຍິງ, ດອກ​ປີກ​ໄກ່ຊາຍ-ຍິງ, ​ປິ່ງ​ປ່ອງຊາຍ-ຍິງ, ​ເທ​ຄວັນ​ໂດຊາຍ-ຍິງ, ໝາກ​ເສິກ ຊາຍ-ຍິງ ແລະ ກິລາປັນ​ຈັກ​ສີ​ລັດຊາຍ-ຍິງ.

ໂດຍ: ພູ​ວອນ ດຳ​ລົງ​ບຸນ