3 ອົງການ​ຈັດ​ຕັ້ງ​ມະຫາຊົນ ສສກ ຫາລືຄົບຄະນະບໍລິຫານງານ ກຽມສະຫຼຸບຂໍ້ແຂ່ງຂັນ 3 ດີ ສະໄໝທີ 5

ສຶກສາ

Written by ຕຸ່ນຄຳ

3 ອົງການ​ຈັດ​ຕັ້ງ​ມະຫາຊົນ ສສກ ຫາລືຄົບຄະນະບໍລິຫານງານ ກຽມສະຫຼຸບຂໍ້ແຂ່ງຂັນ 3 ດີ ສະໄໝທີ 5

5.2.2018 2    3 ອົງການ​ຈັດ​ຕັ້ງ​ມະຫາຊົນ ປະກອບມີ ສະຫະພັນແມ່ຍິງ, ສະຫະພັນກຳມະບານ ແລະ ຄະນະບໍລິຫານງານຊາວໜຸ່ມ ກະຊວງ​ສຶກສາ​ທິການ ​ແລະ ກິລາ (ສສກ) ຈັດກອງປະຊຸມຄົບຄະນະບໍລິຫານງານ ເພື່ອກະ​ກຽມ​ສະຫຼຸບ​ການຈັດ​ຕັ້ງ​ປະ​ຕິ​ບັດຂໍ້​ແຂ່ງຂັນ 3 ດີ ​ໄລຍະ​ທີ 1 (2015-2017) ສະ​ໄໝ​ທີ 5 ເພື່ອ​ສະຫຼຸບ​ຕີ​ລາ​ຄືນ​ວຽກ​ງານ​ ​ແລະ ​ສືບ​ຕໍ່ວາງ​ແຜ​ນການໃນຕໍ່ໜ້າ ​ໃຫ້​ໄດ້​ຮັບ​ທັງ​ປະລິນ​ມານ ​ແລະ ຄຸນະພາບ​ສູງ​ຂຶ້ນ​​ເປັນ​ກ້າວໆ.

    

   

       ​ເມື່ອ​ວັນ​ທີ 2 ກຸມພາ ຜ່ານ​ມາ ທີ່​ຫ້ອງ​ປະຊຸມ​ສໍານັກງານ ກະຊວງ​ສຶກສາ​ທິການ ​ແລະ ກິລາ ​ໄດ້ຈັດ​ກອງ​ປະຊຸມ​ຄົບ​ຄະນະ​ບໍລິຫານ​ງານ 3 ອົງການ​ຈັດ​ຕັ້ງ​ມະຫາຊົນ ກະຊວງ​ສຶກສາ​ທິການ ​ແລະ ກິລາ, ​ໃຫ້​ກຽດ​​ເປັນ​ປະທານຂອງ​ ສະຫາຍ ນາງ ບົວ​ຄໍາ ດາວ​ສະຫວັນ ຄະນະ​ບໍລິຫານ​ງານ​ສູນ​ກາງ​ສະຫະພັນ​ແມ່ຍິງ​ລາວ, ຄະນະພັກ, ຮອງຫົວໜ້າກົມຈັດຕັ້ງ ແລະ ພະນັກງານ, ປະທານຄະນະ​ບໍລິຫານ​ງານ​​ສະຫະພັນ​ແມ່ຍິງ ກະຊວງ​ສຶກສາ​ທິການ ​ແລະ ກິລາ, ສະຫາຍ ສໍາ​ລານ ພັນ​ຄະ​ວົງ ຄະນະ​ບໍລິຫານ​ງານ​ສູນ​ກາງ​ຊາວ​ໜຸ່ມ​ປະຊາຊົນ​ປະຕິວັດ​ລາວ, ຄະນະພັກ, ຮອງຫົວໜ້າຫ້ອງການຄະນະພັກ, ເລຂາ​ຄະນະ​ບໍລິຫານ​ງານ​ຊາວ​ໜຸ່ມ​ປະຊາຊົນ​ປະຕິວັດ​ລາວ ກະຊວງ​ ສສກ ແລະ ສະຫາຍ ຄໍາ​ເພົ້າ ຈັນ​ເພັງ​ໄຊ ຮອງ​ປະທານ​ຄະນະ​ບໍລິຫານ​ງານ​ສະຫະພັນ​ກໍາມະບານ ກະຊວງ ສສກ, ມີ​ຄະນະ​ບໍລິຫານ​ງານ 3 ອົງການ​ຈັດ​ຕັ້ງ​ມະຫາຊົນ ກະຊວງ ສສກ ​ເຂົ້າ​ຮ່ວມ.

      ​ໂອກາດ​ດັ່ງກ່າວ, ສະຫາຍ ນາງ ບົວ​ຄໍາ ດາວ​ສະຫວັນ​ ​ໄດ້​ລາຍ​ງານ​ຮ່າງ​ບົດ​ສະຫຼຸບການຈັດ​ຕັ້ງ​ປະ​ຕິ​ບັດ​ຂະ​ບວນການ​ແຂ່ງຂັນ 3 ດີ ​ໄລຍະ​ທີ 1 ສະ​ໄໝ​ທີ 5 ໃຫ້​ຮູ້​ວ່າ: 3 ອົງການ​ຈັດ​ຕັ້ງ​ມະຫາຊົນ ກະຊວງ​ສຶກສາ​ທິການ ​ແລະ ກິລາ ​ ​ໄດ້​ຈັດ​ຕັ້ງ​ປະຕິບັດ​ຂໍ້ແຂ່ງຂັນ 3 ດີ ສະ​ໄໝທີ 5 ພາຍຫຼັງ​ກອງ​ປະຊຸມ​ສະຫຼຸບ​ບັ້ນ​ແຂ່ງຂັນ 3 ດີ ຂອງ​ອົງການ​ຈັ​ດຕັ້ງ​ມະຫາຊົນ ​ໃນ​ກາງ​ປີ 2015 ​ໄດ້​ ເລີ່​ມປະຕິບັດ​ຕາມ​ແຜນ​ຈຸດ​ສຸມ 5 ປີ (2016-2020) ​ແລະ ຄໍາ​ສັ່ງ​ແນະ​ນໍາ​ເປັນ​ບ່ອນ​ອີງ. ດັ່ງ​ນັ້ນ, ​ແຕ່​ລະ​ອົງການ​ຈັດ​ຕັ້ງ​ໄດ້​ກະກຽມ ​ແລະ ຄົ້ນຄວ້າ​ສ້າງ​ເປັນ​ແຜນການ​ລະອຽດ​ແລ້ວ​ລາຍ​ງານ ​ເພື່ອ​ຂໍ​ທິດ​ຊີ້​ນໍາ​ຈາກ​ຄະນະ​ພັກ, ຄະນະ​ນໍາເປີດ​ບັນ​ແຂ່ງຂັນ ​ເຊື່ອມ​ຊຶມ​ຂໍ້​ແຂ່ງຂັນ​ດັ່ງກ່າວ ​ໂດຍ​ຖື​ເອົາ​ເນື້ອ​ໃນ​ຂໍ້​ແຂ່ງຂັນ 3 ດີ ຂອງ​ສະຫະພັນ​ແມ່ຍິງ, ​ເນື້ອ​ໃນ​ຂໍ້​ຂັນ 4 ບຸກ ຂອງ​ອົງການ​ຈັດ​ຕັ້ງ​ຊາວ​ໜຸ່ມ ​ແລະ ​ເນື້ອ​ໃນ​ຂໍ້​ແຂ່ງຂັນ 5 ​ເປັນ​ເຈົ້າ​ຂອງ​ສະຫະພັນ​ກໍາມະບານ ຕິດ​ພັນ​ກັບ​ຂະ​ບວນການ​ແຂ່ງຂັນ​ຮັກ​ຊາດ ​ແລະ ພັດທະນາ, 3 ຂໍ້​ແຂ່ງຂັນ​ຂອງ​ຂະ​ແໜງ​ການ​ສຶກສາ ​ແລະ ກິລາ ຄື: ​ແຂ່ງຂັນ​ກັນ​ສອນ​ດີ​-ຮຽນ​ເກັ່ງຕ້ານ ​ແລະ ສະກັດ​ກັ້ນ​ປາກົດການ​ຫຍໍ້​ທໍ້​ຕ່າງໆ ​ແລະ ສ້າງ​ສິ່ງ​ແວດ​ລ້ອມ​ທີ່​ດີ​ພາຍ​ໃນ ​ແລະ ນອກ​ຫ້ອງ​ຮຽນ, 3 ລັກສະນະ ແລະ 5 ຫຼັກ​ມູນ​ຂອງ​ການ​ສຶກສາ ​ແລະ ການ​ສ້າງ​ໜ່ວຍ​ພັກ​ປອດ​ໃສ​ໜັກ​ແໜ້ນ​​ເຂັ້ມ​ແຂງ​ຢ່າງ​ເປັນ​ຂະ​ບວນ, ​ເຊິ່ງມີ​ຜູ້​ເຂົ້າ​​ເຊື່ອມ​ຊຶມ​ທັງ​ໝົດ 9.650 ຄົນ, ຍິງ 4.687 ຄົນ, ຜູ້​ເຂົ້າ​ຮ່ວມ​ແຂ່ງຂັນ 8.416 ຄົນ, ຍິງ 3.780 ຄົນ, ຂະ​ບວນ​ແຂ່ງຂັນ​ດັ່ງກ່າວ ​ໄດ້​ແຕ່ງ​ຕັ້ງ​ຄະນະ​ຮັບຜິດຊອບ​ຂະ​ບວນການ​ແຂ່ງຂັນ ຄື: ປະທານ​ຄະນະ​ບໍລິຫານ​ງານ​ສະຫະພັນ​ແມ່ຍິງ ກະຊວງ ສສກ ​ເປັນ​ປະທານ ຊີ້​ນໍາ​ລວມ, ​ເລຂາ​ຄະນະ​ບໍລິຫານ​ງານ​ຊາວ​ໜຸ່ມ ກະຊວງ ສສກ ​ເປັນ​ປະທານ​ຮ່ວມ, ຮັບ​ຜິດ​ຊອບ​ຊີ້​ນໍາ​ຂະ​ບວນການ​ແຂ່ງຂັນ 3 ດີ ​ແລະ ຂໍ້​ແຂ່ງຂັນ 4 ບຸກ ຂອງ​ອົງການ​ຈັດ​ຕັ້ງ​ຊາວ​ໜຸ່ມ, ປະທານ​ຄະນະ​ບໍລິຫານ​ງານ​ສະຫະພັນ​ດໍາ​ມະ​ບານ ກະຊວງ ສສກ ​ເປັນ​ປະທານ​ຮ່ວມ ຮັບຜິດຊອບ​ຊີ້​ນໍາ​ຂະ​ບວນການ​ແຂ່ງຂັນ 3 ດີ ​ແລະ ຂໍ້​ແຂ່ງຂັນ 5 ​ເປັນ​ເຈົ້າ​ຂອງ​ອົງການ​ຈັດ​ຕັ້ງ​ສະຫະພັນ​ກໍາມະບານ.

      ນອກຈາກ​ນັ້ນ, ​ແຕ່​ລະ​ອົງການ​​ໄດ້​ຕິດຕາມ​ກວດກາ, ຊຸກຍູ້​ຢ່າງ​ເປັນ​ປົກກະຕິ​ໃນ​ການຈັດ​ຕັ້ງ​ປະຕິບັດ​ຂໍ້​ແຂ່ງຂັນ​ແຕ່ລະ​ຮາກ​ຖານ, ປະ​ເມີນ​ຄວາມ​ຄືບ​ໜ້າ​ໃນ​ການຈັດ​ຕັ້ງ​ປະຕິບັດ​ໃນ​ແຕ່ລະ​ປີ ​ແລະ ​ໄດ້ຄັດ​ເລືອກ​ບຸກຄົນ 3 ດີ ປະ​ເພດ 1, ປະ​ເພດ 2 ​ແລະ ກົມ​ກອງ, ຕົວ​ແທນ​ແມ່ 3 ດີ, ພໍ່ 3 ດີ, ລູກ 3 ດີ ​ໄວ້​ໃນ​ຂັ້ນ​ຈຸ, ຂັ້ນ​ໜ່ວຍ, ຂັ້ນ​ຮາກ​ຖານ ​ແລະ ຖ້າ​ບຸກຄົນ​ໃດ ຫາກ​ໄດ້​ຮັບ​ການ​ເລືອກ​​ເປັນ​ບຸກຄົນ 3 ດີ ທີ່​ດີ​ເດັ່ນ ຈໍານວນ 2 ຄັ້ງ ຕິດ​ຕໍ່​ກັນ​ບຸກຄົນ​ນັ້ນ ຈະ​ໄດ້​ຮັບ​ການ​ຄັດ​ເລືອກ​ເປັນ​ບຸກຄົນ 3 ດີ ປະ​ເພດ 1, ຖ້າ​ບຸກຄົນ​ໃດ​ຫາກ​ໄດ້​ຮັບ​ການ​ຄັດ​ເລືອກ​ເປັນ​ບຸກຄົນ 3 ດີ ປະ​ເພດ 2 ຈໍານວນ 1 ຄັ້ງ ຈະ​ໄດ້​ຮັບ​ການ​ຄັດ​ເລືອກ​ເປັນ​ບຸກຄົນ 3 ດີ ທີ່​ດີ​ເດັ່ນ ປະ​ເພດ 2.

       ສໍາລັບ 3 ອົງການ​ຈັດ​ຕັ້ງ​ມະຫາຊົນ ກະຊວງ​ສຶກສາ​ທິການ ​ແລະ ກິລາ ​ໄດ້​ຈັດ​ຕັ້ງ​ເຄື່ອນ​ໄຫວ​ຕາມ​ແຜນການ​ຂອງ 3 ອົງການ​ຈັດ​ຕັ້ງ​ມະຫາຊົນ​ແຕ່ລະ​ຂັ້ນ​ກະຊວງ​ຈົນ​ຮອດ​ຂັ້ນ​ຮາກ​ຖານ​ຢ່າງ​ເປັນ​ຂະ​ບວນການ ​ແລະ ທົ່ວ​ເຖິງ, ​ເຊິ່ງມີ​ຈໍານວນ​ສະມາຊິກ​ທັງ​ໝົດ 28.380 ຄົນ, ຍິງ 12.700 ຄົນ, ມີ 30 ຮາກ​ຖານ ​ແລະ ອົງການ​ຈັດ​ຕັ້ງ​ມະຫາຊົນ ກະຊວງ​ ສສກ ​ແມ່ນ​ອົງການ​ຈັດ​ໜຶ່ງ ​ໂດຍ​ໃຕ້​ການ​ຊີ້​ນໍາ-ນໍາພາ​ຂອງ​ຄະນະ​ພັກ, ຄະນະ​ນໍາ ກະຊວງ ສສກ, ສາຍ​ຕັ້ງ​ແມ່ນ​ຂຶ້ນ​ກັບ​ສູນ​ກາງ, ສາຍ​ຂວາງ​ແມ່ນ​ຂຶ້ນ​ກັບ ກະຊວງ​ ສສກ ​ໂດຍ​ຜັນ​ຂະຫຍາຍ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ 7 ຂອງ​ຜູ້​ແທນ​ແມ່ຍິງ​ລາວ​ທົ່ວ​ປະ​ເທດ, ມະຕິ​ກອງ​ປະຊຸມ​ໃຫຍ່ ຄັ້ງ​ທີ 8 ຂອງ​ອົງຄະ​ນະ​ພັກ ກະຊວງ ​ສສກ, ມະຕິ​ກອງ​ປະຊຸມ​ໃຫຍ່ຜູ້​ແທນ​ແມ່ຍິງ ກະຊວງ​ ສສກ ຄັ້ງ​ທີ 9 ​ແລະ ​ເພື່ອ​ຈັດ​ຕັ້ງ​ຜັນ​ຂະຫຍາ​ຍການ​ແນະ​ນໍາ​ການຈັດ​ຕັ້ງ​ປະຕິບັດ​ຂໍ້​ແຂ່ງຂັນ 3 ດີ ຂອງ​ສູນ​ກາງ​ສະຫະພັນ​ແມ່ຍິງ​ລາວ ​ແລະ ​ແຜນການ​ເຄື່ອນ​ໄຫວ​ຂອງ 3 ອົງການ​ຈັດ​ຕັ້ງ​ມະຫາຊົນ ກະຊວງ​ ສສກ ​ໃຫ້​ໄດ້​ຮັບ​ການຈັດ​ຕັ້ງ​ປະຕິບັດ​ວຽກ​ງານ​ດັ່ງກ່າວ​ຢ່າງ​ເປັນ​ຂະ​ບວນການ​ກວ້າງ​ຂວາງ.