ບຸຄະລາກອນ 30 ຄົນ ຮັບໃບຢັ້ງຢືນການເປັນຄູເຝິກກິລາໝາກແລ້

ສຶກສາ

Written by Super User

ບຸຄະລາກອນ 30 ຄົນ ຮັບໃບຢັ້ງຢືນການເປັນຄູເຝິກກິລາໝາກແລ້

27846373 1317491681686314 596862032 o   ສະຫະພັນກິລາໝາກແລ້ແຫ່ງຊາດລາວ (ສລຊ) ສຳ​ເລັດ​ການ​​ເຝິກອົບຮົມຍົກ​ລະດັບ​ຄູ​ເຝິກ​ກິລາໝາກ​ແລ້ ​ໃຫ້ນັກສຶກສາຄູພະລະສຶກສາ ລະບົບປະລິນຍາຕີຕໍ່ເນື່ອງ ແລະ ຈາກຕ່າງ​ແ​ຂວງ 30 ຄົນ ໃນຍົກຮຽນ 2017-2018 ກ່ອນນຳເອົາຄວາມຮູ້ຄວາມສາມາດທີ່ໄດ້ຈາກການເຝິກອົບຮົມຄັ້ງນີ້ ໄປສືບຕໍ່ຈັດຕັ້ງຜັນຂະຫຍາຍໃນທ້ອງຖິ່ນຂອງໃຜລາວ ແນໃສ່ສ້າງໄດ້ຄູເຝິກ ແລະ ນັກກິລາ ກຽມເຂົ້າຮ່ວມງານມະຫາກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ເປັນເຈົ້າພາບ ໃນທ້າຍປີນີ້.

 

      ໃນວັນທີ 6 ກຸມພາ ຜ່ານມາ ທີ່ມະຫາວິທະຍາໄລແຫ່ງຊາດ ນະຄອນຫຼວງວຽງຈັນ ໄດ້ມີພິທີປິດການເຝິກອົບຮົມການຮຽນ-ການສອນວິຊາກິລາໝາກແລ້ຂອງນັກສຶກສາຄູພະລະສຶກສາ ລະບົບປະລິນຍາຕີ ຕໍ່ເນື່ອງ ​ແລະ ຕ່າງ​ແ​ຂວງ ໄລຍະ 3 ເດືອນ ສົກຮຽນ 2017-2018, ໃຫ້ກຽດເຂົ້າຮ່ວມ ແລະ ມອບໃບຢັ້ງຢືນຂອງ ທ່ານ ນາງ ຄຳພອນ ພົມມະວັນ ປະທານສະຫະພັນກິລາໝາກແລ້ແຫ່ງຊາດລາວ, ມີທ່ານ ພູແກ້ວ ພານໄທອິນທະວົງ ຫົວໜ້າພາກວິຊາພະລະສຶກສາ ຄະນະວິທະຍາສາດການກິລາ-ກາຍະກຳ ມະຫາວິທະຍາໄລແຫ່ງຊາດ ພ້ອມດ້ວຍເລຂາທິການ, ພະນັກງານ, ວິຊາການ, ສຳມະນາກອນ ແລະ ພາກສ່ວນທີ່ກ່ຽວຂ້ອງ.

      ໂອກາດດັ່ງກ່າວ, ທ່ານ ນາງ ຄຳພອນ ພົມມະວັນ ກ່າວວ່າ: ການຈັດເຝິກອົບຮົມວິຊາກິລາ ໝາກແລ້ ຄັ້ງນີ້ ແມ່ນເລີ່ມຈັດຕັ້ງປະຕິບັດກັນມາແຕ່ວັນທີ 10 ທັນວາ 2017 ຫາ 6 ກຸມພາ 2018 ກໍ່ສຳເລັດລົງຕາມລະດັບຄາດໝາຍ ແລະ ຖືວ່າສຳະນາກອນທັງໝົດ 30 ຄົນ ທີ່​ເປັນນັກສຶກສາຄູພະລະສຶກສາ ລະບົບປະລິນຍາຕີ ຕໍ່ເນື່ອງ ​ແລະ ມາ​ຈາກຕ່າງ​ແ​ຂວງ. ​ເຊິ່ງການ​ເຝິກອົບຮົມ​ດັ່ງ​ກ່າວ ສຳ​ມະ​ນາກ​ອນທີ່ເຂົ້າຮ່ວມ ສາມາດກຳແໜ້ນ​ໄດ້​ດີທັງພາກທິດສະດີ ແລະ ການລົງປະຕິບັດຕົວຈິງ, ມີຄວາມເອົາໃຈໃສ່, ກະຕືລື້ລົ້ນ ແລະ ຫ້າວຫັນ.  ການເຝິກອົບຮົມໃນຄັ້ງນີ້ ແມ່ນເປັນຄັ້ງທີ II ທີ່ທາງສະຫະພັນກິລາໝາກແລ້ແຫ່ງຊາດລາວ ຮ່ວມກັບພາກວິຊາພະລະສຶກສາ ຄະນະວິທະຍາສາດການກິລາ-ກາຍະກຳ ມະຫາວິທະຍາໄລແຫ່ງຊາດ ຈັດຂຶ້ນມາ ເພື່ອຖ່າຍທອດວິຊາກິລາໝາກແລ້ ໃຫ້ແກ່ສຳມະນາກອນ ໄດ້ນຳໄປເຜີຍແຜ່ ແລະ ຜັນຂະຫຍາຍໃນອະນາຄົດ ​ແລະ ສ້າງ​ຜົນງານ​ໃຫ້​ກັບ​ບ້ານ​ເກີດ​ເມືອງ​ນອນ ​ໃນ​ງານ​ກິລາ​ພາຍ​ໃນ​ປະ​ເທດ ​​ເປັນ​ຕົ້ນແມ່ນ ງານ​ມະຫາ​ກຳ​ກິລາ​ແຫ່ງ​ຊາດ ຄັ້ງ​ທີ XI ທີ່​ແຂວງ​ຊຽງ​ຂວາງ ​ເປັນ​ເຈົ້າພາບ​ໃນ​ທ້າຍ​ປີ​ນີ້.

      ທັງນີ້, ພາຍຫຼັງສຳເລັດການເຝິກອົບຮົບດັ່ງກ່າວ ທາງສະຫະພັນກິລາໝາກແລ້ແຫ່ງຊາດລາວ ຍັງໄດ້ເປີດການແຂ່ງຂັນກິລາໝາກແລ້ປະເພດດ່ຽວ ເພື່ອກວດກາ ແລະ ປະເມີນຜົນການເຝິກອົບຮົມການຮຽນ-ການສອນ ໃນໄລຍະ 3 ເດືອນ ຊຸດທີ II ສົກຮຽນ 2017-2018 ແລະ ເພື່ອທົດສອບນັກກິລາ ແລະ ຄູເຝິກ ວ່າຮັບຮູ້ບົດຮຽນໄດ້ຫຼາຍ-ໜ້ອຍເທົ່າໃດ.

ອຳໄພວັນ