23 ບ້ານ ຈາກ​ 5 ເມືອງ​ ແຂວງສະຫວັນນະເຂດຮັບການຊ່ວຍເຫຼືອກໍ່ສ້າງຫ້ອງກຽມປະຖົມ

ສຶກສາ

Written by Super User

23 ບ້ານ ຈາກ​ 5 ເມືອງ​ ແຂວງສະຫວັນນະເຂດຮັບການຊ່ວຍເຫຼືອກໍ່ສ້າງຫ້ອງກຽມປະຖົມ

27785462 1317491765019639 1207409595 o   23 ບ້ານ​ເປົ້າ​ໝາຍ ຈາກ 5 ເມືອງ ​ແຂວງ​ສະ​ຫວັນ​ນະ​ເຂດ ເຊັນ​ສັນ​ຍາ​ກັບ ພະ​ແນກ​ສຶກ​ສາ​ທິ​ການແລະ ກິ​ລາ​ແຂວງ ໃນການ​ກໍ່​ສ້າງ​ຫ້ອງ​ກຽມ​ປະ​ຖົມ ໂດຍການ​ນຳ​ໃຊ້​ເງິນ​ກູ້​ຢືມ​ຈາກ​ທະ​ນາ​ຄານ​ໂລກ ພາຍ​ໃຕ້​ໂຄງ​ການສຶກ​ສາ​ກ່ອນ​ໄວ​ຮຽນ (ECE) ເພື່ອ​ແນ່ໃສ່​ເຮັດ​ໃຫ້​ອັດ​ຕາ​ການ​ເຂົ້າ​ຮຽນ​ຂອງ​ເດັກ 3-5 ປີ ​ທີ່​ຍັງ​ຕ່ຳເພີ່ມ​ຂຶ້ນ ແລະ ສ້າງ​ໂອ​ກາດ​ໃຫ້​ເດັກ​ໄດ້​ເຂົ້າ​ຮຽນ​ຢູ່​ໃນ​ບ້ານ​ຂອງ​ຕົນ​ເອງ. ພິ​ທີ​ເຊັນ​ສັນ​ຍາດັ່ງກ່າວ ​ໄດ້​ມີ​ຂຶ້ນໃນ​ວັນ​ທີ 2 ກຸມ​ພາ ຜ່ານ​ມາ​ ທີ່​ຫ້ອງ​ປະ​ຊຸມພະ​ແນກ​ສຶກ​ສາ​ທິ​ການແລະ ກິ​ລາ​ແຂວງ​ສະ​ຫວັນ​ນະ​ເຂດ, ລະ​ຫວ່າງ ທ່ານ ​ນາງ ຫຼິງ​ທອງ ແສງ​ຕ​າ​ວັນ ຫົວ​ໜ້າ​ພະ​ແນກ​ສຶກ​ສາ​ທິ​ການ ແລະ ກິ​ລາ​ແຂວງ ແລະ ​ນາຍ​ບ້ານ 23 ບ້ານຈາກ 5 ເມືອງ, ມີທ່ານ ບຸນ​ລ້ຳ ແກ້ວ​ມະ​ນີ​ວົງ ຜູ້​ຮັບ​ຜິດ​ຊອບ​ໂຄງ​ການ ECE, ພ້ອມດ້ວຍບັນ​ດາ​ຫົວ​ໜ້າ​ຫ້ອງ​ການ​ສຶກ​ສາທິການ ແລະ ກິ​ລາເມືອງ, ຄະ​ນະ​ພັດ​ທະ​ນາ​ການ​ສຶກ​ສາ​ຂັ້ນ​ບ້ານ​ ແລະ ພາກສ່ວນທີ່ກ່ຽວຂ້ອງເຂົ້າ​ຮ່ວມເປັນສັກຂີພິຍານ.

​ທ່ານ ​ອຸ​ດົມ​ສັກ ພົນ​ສີ​ທອງ ຜູ້​ປະ​ສານ​ງານ​ໂຄງ​ການສຶກສາກ່ອນໄວຮຽນ ກ່າວໃຫ້​ຮູ້​ວ່າ: ຫຼັງ​ຈາກ​ມີ​ການ​ເຝິກອົບ​ຮົມ​ໃຫ້​ບັນ​ດາ​ຄະ​ນະ​ພັດ​ທະ​ນາ​ຂັ້ນ​ບ້ານ​ ໃນ​ຈຳ​ນວນ 74 ບ້ານ​ເປົ້າ​ໝາຍ ໃນ 5 ເມືອງ​ຄື: ເມືອງເຊ​ໂປນ 26 ບ້ານ, ເມືອງພີນ 16 ບ້ານ, ເມືອງ​ພະ​ລານ​ໄຊ 6 ບ້ານ, ເມືອງ​ອຸ​ທຸມ​ພອນ 11 ບ້ານແລະ ເມືອງ​ສອງ​ຄອນ 15 ບ້ານ. ໂດຍການ​ນຳ​ໃຊ້​ເງິນ​ກູ້​ຢືມ​ຈາກ​ທະ​ນາ​ຄານ​ໂລກ ພາຍ​ໃຕ້​ໂຄງ​ການສຶກ​ສາ​ກ່ອນ​ໄວ​ຮຽນ ເພື່ອ​ແນ​ໃສ່​ເຮັດ​ໃຫ້​ອັດ​ຕາ​ການ​ເຂົ້າ​ຮຽນ​ຂອງ​ເດັກ 3-5 ປີ​ ທີ່​ຍັງ​ຕ່ຳເພີ່ມ​ຂຶ້ນ ແລະ ສ້າງ​ໂອ​ກາດ​ໃຫ້​ເດັກ​ໄດ້​ເຂົ້າ​ຮຽນ​ຢູ່​ໃນ​ບ້ານ​ຂອງ​ຕົນ​ເອງ. ເຊິ່ງ​ແຜນ​ໃນ​ການກໍ່​ສ້າງ​ແມ່ນ​ຈະ​ໄດ້​ແບ່ງ​ອອກ​ເປັນ 3 ງວດ​ຄື: ເມືອງ​ເຊ​ໂປນ 5 ບ້ານ, ເມືອງພີນ 5 ບ້ານ, ເມືອງ​ພະ​ລານ​ໄຊ 3 ບ້ານ, ເມືອງ​ອຸ​ທຸມ​ພອນ 5ບ້ານ ແລະ ເມືອງ​ສອງ​ຄອນ 5 ບ້ານ ລວມ​ເປັນ​ມູນ​ຄ່າກໍ່​ສ້າງ​ທັງ​ໝົດ 2,6 ຕື້ກວ່າ​ກີບ ເຊິ່ງ​ຈະ​ໄດ້​ເລີ່ມ​ລົງ​ມືນັບ​ແຕ່​ເດືອນກຸມພາ ຫາເດືອນເມສາ 2018 ຈຶ່ງຈະສຳ​ເລັດ​ໃນ​ງວດ​ທີໜຶ່ງ.

ໂອ​ກາດ​ດັ່ງ​ກ່າວ, ທ່ານ​ຫົວ​ໜ້າ​ພະ​ແນກ​ສຶກ​ສາທິການ ແລະກິ​ລາ​ແຂວງ ໄດ້​ສະ​ແດງ​ຄວາມ​ຂອບ​ໃຈ​ຕໍ່​ໂຄງ​ການ ECE ທີ່​ໃຫ້​ການ​ຊ່ວຍ​ເຫຼືອ​ຊຸມ​ຊົນຂອງ​ແຂວງ​ສະ​ຫວັນ​ນະ​ເຂດ​ພວກ​ເຮົາ ໂດຍ​ສະ​ເພາະ​ການກໍ່​ສ້າງ​ຫ້ອງ​ກຽມ​ປະ​ຖົມ ເພື່ອ​ເຮັດ​ໃຫ້​ເດັກ​ໃນ​ເກນ​ອາ​ຍຸ​ໄດ້​ເຂົ້າ​ຮຽນ​ຢ່າງ​ທົ່ວ​ເຖິງ ພ້ອມທັງ​ເຮັດ​ໃຫ້​ອັດ​ຕາ​ການ​ເຂົ້າ​ຮຽນ​ຂອງ​ເດັກ​ໃນ​ເກນອາ​ຍຸ 3-5 ປີ ຢູ່​ໃນ​ບັນ​ດາ 5 ເມືອງ​ດັ່ງ​ກ່າວ​ເພີ່ມ​ຂຶ້ນ.

ໂດຍ: ພູ​ວອນ ດຳ​ລົງ​ບຸນ