ສາລະວັນ ເປີດງານແຂ່ງຂັນກິລາ ປະຈຳປີ 2018 ເຟັ້ນຫາຜູ້ດີເດັ່ນ ກຽມຮ່ວມງານ “ຊຽງຂວາງ ເກມ” ເມື່ອວັນທີ 2 ກຸມພາ ຜ່ານມາ ທີ່ສະໜາມແດງສະໂມສອນແຂວງສາລະວັນ ໄດ້ຈັດພິທີເປີດງານແຂ່ງຂັນກິລາ-ກາຍະກຳ ປະຈຳປີ 2018 ຂຶ້ນຢ່າງເປັນທາງການ, ໂດຍພາຍໃຕ້ການເປັນປະທານຂອງ ທ່ານ ພູທົງ ຄຳມະນີວົງ ຮອ

ສຶກສາ

Written by Super User

ສາລະວັນ ເປີດງານແຂ່ງຂັນກິລາ ປະຈຳປີ 2018 ເຟັ້ນຫາຜູ້ດີເດັ່ນ ກຽມຮ່ວມງານ “ຊຽງຂວາງ ເກມ”

   27786619 1317491848352964 46054835 o  ເມື່ອວັນທີ 2 ກຸມພາ ຜ່ານມາ ທີ່ສະໜາມແດງສະໂມສອນແຂວງສາລະວັນ ໄດ້ຈັດພິທີເປີດງານແຂ່ງຂັນກິລາ-ກາຍະກຳ ປະຈຳປີ 2018 ຂຶ້ນຢ່າງເປັນທາງການ, ໂດຍພາຍໃຕ້ການເປັນປະທານຂອງ ທ່ານ ພູທົງ ຄຳມະນີວົງ ຮອງເຈົ້າແຂວງສາລະວັນ ແລະ ທ່ານ ສີລິສັກ ຖະໜອມຮັກ ຫົວໜ້າພະແນກສຶກສາທິການ ແລະ ກິລາແຂວງສາລະວັນ, ມີບັນດາການນຳຂັ້ນແຂວງ, ຂັ້ນເມືອງ, ຫົວໜ້າຫ້ອງການສຶກສາທິການ ແລະ ກິລາເມືອງ, ກ້ອນກຳລັງ 8 ຕົວເມືອງ, ກຸ່ມວັດທະນະທຳ-ສັງຄົມ, ກຸ່ມເສດຖະກິດ, ກຸ່ມພັກ-ພະນັກງານ, ກຸ່ມປົກປ້ອງກົດໝາຍ, ກຸ່ມລັດວິສາຫະກິດ, ກຸ່ມນັກສຶກສາ, ກອງດຸລິຍາງຈາກ ມສ ສາລະວັນ ແລະ ຕົວແທນກຳມະການ ພ້ອມດ້ວຍມວນຊົນຊາວແຂວງສາລະວັນເຂົ້າຮ່ວມ 1.454 ຄົນ.

 

      ໃນພິທີ, ທ່ານ ສີລິສັກ ຖະໜອມຮັກ ກ່າວວ່າ: ເພື່ອເປັນການກະກຽມເງື່ອນໄຂປັດໄຈຕ່າງໆໃນງານກິລາລະດັບຊາດ ໂດຍສະເພາະງານມະຫາກຳກິລານັກຮຽນມັດທະຍົມສຶກສາ ທົ່ວປະເທດ ຄັ້ງທີ 7 ທີ່ແຂວງສາລະວັນ ຮັບກຽດເປັນເຈົ້າພາບ ໃນປີ 2020, ທັງເປັນການແຂ່ງຂັນມິດຕະພາບ ເພື່ອເສີມສ້າງສຸຂະພາບປູກຈິດສໍານຶກໃຫ້ທຸກຄົນຮັກການອອກກໍາລັງກາຍ, ເປັນການແລກປ່ຽນບົດຮຽນເຊິ່ງກັນແລະກັນດ້ານຍຸດທະວິທີ, ເຕັກນິກເພື່ອພ້ອມພາກັນຍົກລະດັບ ແລະ ເປັນການຄັດເລືອກຕົວນັກກິລາປະເພດຕ່າງໆເຂົ້າຮ່ວມງານມະຫາກໍາກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ເປັນເຈົ້າພາບ ໃນທ້າຍປີ 2018. ການແຂ່ງຂັນຄັ້ງນີ້ ມີທັງໝົດ 13 ປະເພດກິລາຄື: ເຕະບານຊາຍ-ຍິງ,ບານສົ່ງຊາຍ-ຍິງ, ກະຕໍ້ຊາຍ-ຍິງ, ເປຕັງຊາຍ-ຍິງ, ແລ່ນ-ລານຊາຍ-ຍິງ, ດອກປີກໄກ່ຊາຍ-ຍິງ,  ດຶງເຊືອກຊາຍ-ຍິງ, ໝາກແລ້ຊາຍ-ຍິງ, ໝາກເສິກຊາຍ-ຍິງ, ມວຍລາວ, ກ໊ອຟ, ໜ້າເກັກ ແລະ ປິ່ງປ່ອງຊາຍ-ຍິງ ລວມທັງໝົດ 24 ລາຍການ  ເຊິ່ງຈະດໍາເນີນການແຂ່ງຂັນຕັ້ງແຕ່ວັນທີ 2 ກຸມພາ ຫາວັນທີ 30 ມີນາ ຈຶ່ງຈະສຳເລັດ.

ໂອກາດດຽວກັນ, ທ່ານ ພູທົງ ຄຳມະນີວົງ ກ່າວສະແດງຄວາມຊົມເຊີຍຕໍ່ຄະນະກໍາມະການຝ່າຍຕ່າງໆທີ່ທຸ້ມເທເຫື່ອແຮງ, ສະຕິປັນຍາ, ເວລາໃນການຈັດງານແຂ່ງຂັນກິລາປະຈໍາປີເທື່ອນີ້,ສະມາຄົມກິລາ-ກາຍະກໍາແຂວງ, ສະຫະພັນກິລາປະເພດຕ່າງໆ, ຜູ້ໃຫ້ການອຸປະຖໍາ, ຄະນະນໍາ, ຄູເຝິກ, ນັກກິລາທີ່ເດີນທາງມາຈາກເມືອງ, ພະແນກການ, ກົມກອງ, ສະຖາບັນການສຶກສາ ແລະປະຊາຊົນບັນດາເຜົ່າຊາວແຂວງສາລະວັນ ທີ່ໄດ້ອອກແຮງປະກອບສ່ວນເຂົ້າໃນການກະກຽມ ແລະ ສ້າງເງື່ອນໄຂຕ່າງໆ ເພື່ອເຮັດໃຫ້ງານແຂ່ງຂັນຄັ້ງນີ້ປະກົດຜົນເປັນຈິງ. ພ້ອມນັ້ນ, ທ່ານຍັງໄດ້ຮຽກຮ້ອງມາຍັງຄະນະນໍາ, ຄູເຝິກ, ນັກກິລາທຸກໆຄົນ ຈົ່ງຮັກສາລະບຽບວິໄນ, ກົດລະບຽບຕ່າງໆຂອງການແຂ່ງຂັນ, ມີຄວາມບຸກບືນອົດທົນ ແລະ ມີນ້ຳໃຈນັກກິລາຢ່າງແທ້ຈິງ. ພ້ອມດຽວກັນນັ້ນ, ກໍ່ຂໍໃຫ້ຄະນະກໍາມະການຈັດການແຂ່ງຂັນ ຈົ່ງເອົາໃຈໃສ່ ແລະ ຄຸ້ມຄອງການແຂ່ງຂັນ, ມີຄວາມເປັນທໍາ, ປອດໃສ, ຈົບງາມ, ມ່ວນຊື່ນ, ມີໄມຕີຈິດທີ່ດີຕໍ່ກັນ ແລະ ຮຽກຮ້ອງມາຍັງທຸກພາກສ່ວນຈົ່ງໃຫ້ການສະໜັບສະໜູນເຊີດຊູນ້ຳໃຈນັກກິລາ ເພື່ອພັດທະນາກິລາແຂວງສາລະວັນ ໃຫ້ມີຄວາມເຕີບໃຫຍ່ ແລະ ເຂັ້ມແຂງເທື່ອລະກ້າວ.

ຂ່າວໂດຍ ແຫຼັງຄຳ ບຸດນາໂຄກ