ຫົວພັນ ສັ່ງໂຈະການຮຽນ-ການສອນຊົ່ວຄາວ ຫຼັງສະພາບອາກາດໜາວເຢັນ

ສຶກສາ

Written by Super User

ຫົວພັນ ສັ່ງໂຈະການຮຽນ-ການສອນຊົ່ວຄາວ ຫຼັງສະພາບອາກາດໜາວເຢັນ 

27783815 1317491928352956 312035181 nພະແນກສຶກສາທິການ ແລະ ກິລາ ແຂວງຫົວພັນ ອອກແຈ້ງການສັ່ງໂຈະການຮຽນ-ການສອນ ຊົ່ວຄາວ ເນື່ອງຈາກສະພາບດິນ, ຟ້າ, ອາກາດ ທີ່ໜາວເຢັນ ຈາກປະເທດຈີນຍັງມີກໍາລັງແຮງ ໄດ້ແຜ່ລົງມາປົກຄຸມ ສົ່ງຜົນໃຫ້ຢ້ານກະທົບດ້ານສຸຂະພາບຄູ-ອາຈານ ແລະ ນ້ອງນັກຮຽນ.

ພາຍຫຼັງທີ່ກົມອຸຕຸນິຍົມ ແລະ ອຸທົກກະສາດ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ພະຍາກອນສະພາບອາກາດ ໃນວັນທີ 5 ກຸມພາ ຜ່ານມາ ມວນອາກາດໜາວເຢັນຈາກປະເທດຈີນ ຍັງມີກໍາລັງແຮງ ໄດ້ສືບຕໍ່ແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວດ້ວຍກຳລັງປານກາງ, ສົມທົບກັບກະແສລົມຕາເວັນອອກສຽງເໜືອຍັງພັດປົກຄຸມເປັນສ່ວນໃຫຍ່, ເຊິ່ງຈະເຮັດໃຫ້ອາກາດສືບຕໍ່ເຢັນ ຫາ ໜາວເຢັນຢູ່ທົ່ວໄປ ໃນແຕ່ລະພາກ ແລະ ອາກາດຍັງໜາວເຢັນຫຼາຍ ຢູ່ແຂວງພາກເໜືອ, ແຂວງໄຊສົມບູນ ແລະ ເຂດພູພຽງບໍລະເວນ ພ້ອມມີລົມພັດແຮງຢູ່ທົ່ວໄປ. ສໍາລັບແຂວງພາກເໜືອດ້ານຕາເວັນອອກອາກາດຍັງໜາວເຢັນຫຼາຍໃນຕອນເຊົ້າ ພ້ອມມີໝອກໜາປົກຫຸ້ມຢູ່ທົ່ວໄປ ອຸນຫະພູມຕໍ່າສຸດ 5-7 ອົງສາ ແລະ ສູງສຸດ 16-18 ອົງສາ. ສໍາລັບແຂວງຫົວພັນ ອຸນຫະພູມຕໍ່າສຸດ 5 ອົງສາ ແລະ ສູງສຸດ 15 ອົງສາ

ຈາກສະພາບອາກາດທີ່ໜາວເຢັນດັ່ງກ່າວ, ພະແນກສຶກສາທິການ ແລະ ກິລາ ແຂວງຫົວພັນໄດ້ອອກແຈ້ງການ ເຖິງຫ້ອງການສຶກສາ ແລະ ກິລາເມືອງ 10 ເມືອງ ແລະ ໂຮງຮຽນອ້ອມຂ້າງແຂວງ ທີ່ີຂຶ້ນກັບພະແນກສຶກສາທິການ ແລະ ກິລາແຂວງ ໃຫ້ພັກການຮຽນ-ການສອນຊົ່ວຄາວ ເນື່ອງຈາກສະພາບດິນ, ຟ້າ, ອາກາດ ທີ່ບໍ່ເອື້ອອໍານວຍຄວາມສະດວກໃຫ້ແກ່ການຈັດການຮຽນ-ການສອນ ທີ່ຢ້ານມີຜົນກະທົບທາງດ້ານສຸຂະພາບຂອງຄູ-ອາຈານ ແລະ ນ້ອງນັກຮຽນ ໂດຍໃຫ້ຫ້ອງການສຶກສາທິການ ແລະ ກິລາເມືອງ ແຈ້ງໃຫ້ບັນດາໂຮງຮຽນທີ່ຢູ່ໃນຄວາມຮັບຜິດຊອບຂອງຕົນໂຈະການຮຽນ-ການສອນຊົ່ວຄາວ, ໃຫ້ໂຮງຮຽນອ້ອມຂ້າງແຂວງ ທີ່ຂຶ້ນກັບພະແນກສຶກສາທິການ ແລະ ກິລາແຂວງ ໂຈະການຮຽນ-ການສອນຊົ່ວຄາວ ນັບແຕ່ວັນທີ 5-9 ກຸມພາ 2018.

ຢ່າງໃດກໍ່ຕາມ, ໃນວັນທີ 12 ກຸມພາ 2018 ເປັນຕົ້ນໄປ ແມ່ນໃຫ້ກັບມາດໍາເນີນການຮຽນ-ການສອນເປັນປົກກະຕິ (ຖ້າຫາກດິນ, ຟ້າ, ອາກາດ ຍັງສືບຕໍ່ໜາວເຢັນອີກຕື່ມ ພະແນກສຶກສາທິການ ແລະ ກິລາ ຈະມີແຈ້ງການເພີ່ມຕື່ມ).

(ບຸນທະວີ)