ສະມາຄົມ​ກິລາ​ພື້​ນ​ເມືອງ ສືບ​ຕໍ່ມອບເຄື່ອງ​​ຊ່ວຍ​ເຫຼືອ​ຕ້ານ​ໄພ​ໜາວ ແກ່ 2 ແຂວງພາກເໜືອ

ສຶກສາ

Written by Super User

ສະມາຄົມ​ກິລາ​ພື້​ນ​ເມືອງ ສືບ​ຕໍ່ມອບເຄື່ອງ​​ຊ່ວຍ​ເຫຼືອ​ຕ້ານ​ໄພ​ໜາວ ແກ່ 2 ແຂວງພາກເໜືອ

    28033848 1322610094507806 955194351 o ສະມາຄົມ​ກິລາ-ກາ​ຍະ​ກຳ​ພື້ນ​ເມືອງ ​ແລະ ກິລາ​ສັດ​ແຫ່ງ​ຊາດ​ລາວ ຮ່ວມ​ກັບ ກົມ​ກິລາ​ມວນຊົນ ກະຊວງ​ສຶກສາ​ທິການ ​ແລະ ກິລາ ສືບ​ຕໍ່​ໂຄງການ​ຊ່ວຍ​ເຫຼືອ​ຕ້ານ​ໄພ​ໜາວ ​ໃຫ້​ແກ່​ປະຊາຊົນ​ຜູ້​ທຸກ​ຍາກ​ຢູ່ 3 ​ເມືອງ​ ໃນ 2 ​ແຂວງພາກເໜືອ ກໍ່​ຄື ​ແຂວງ​ໄຊ​ຍະ​ບູລີ ​ແລະ ​ແຂວງ​ຫົວພັນ ລວມມູນ​ຄ່າ 30 ລ້ານ​ກີບ. ​ເມື່ອ​ວັນ​ທີ 9 ກຸມພາ ຜ່ານ​ມາ ທີ່​ສະພາ​ແຫ່ງ​ຊາດ, ຄະ​ນະນຳສະມາຄົມ​ກິລາ-ກາ​ຍະ​ກຳ​ພື້ນ​ເມືອງ ​ແລະ ກິລາ​ສັດ​ແຫ່ງ​ຊາດ​ລາວ ​ແລະ ກົມ​ກິລາ​ມວນຊົນ ກະຊວງ​ສຶກສາ​ທິການ ​ແລະ ກິລາ ນຳພາ​ໂດຍ ທ່ານ ສຸລິຍາ ວົງ​ສະໝໍລະ​ພູມ ປະທານ​ສະມາຄົມ​ກິລາ-ກາຍະກຳພື້ນ​ເມືອງ ແລະ ກິລາ​ສັດ​ແຫ່ງ​ຊາດ​ລາວ, ທ່ານ ທອງ​ສະຫວັດ ວົງ​ສະຫວ່າງ ຮອງ​ຫົວໜ້າ​ພະ​ແນ​ກກິລາ​ພື້ນ​ເມືອງ ກົມ​ກິລາ​ມວນ​ຊົນ ກະຊວງ​ ສສກ ພ້ອມ​ດ້ວຍ​ຄະນະ ​ໄດ້​​ນຳເອົາ​ເຄື່ອງນຸ່ງ​ຫົ່ມ ​ແລະ ​ເງິນສົດ ລວມມູນ​ຄ່າ 30 ລ້ານ​ກີບ ໄປມອບ​ໃຫ້​ແກ່ສະພາ​ແຫ່ງ​ຊາດ​ ໂດຍຕາງໜ້າກ່າວຮັບແມ່ນ ທ່ານ ນາງ ບົວ​ພັນ ລີ​ໄກ​ຢາ ປະທານ​ກຳມາ​ທິການ ບັນດາ​ເຜົ່າ ສະພາ​ແຫ່ງ​ຊາດ ​ແລະ ມອບ​ໂດຍ ທ່ານ ວັດທະນາ​ໄຊ ລາດ​ສະ​ວົງ​ສິງ ຮອງ​ປະທານ​ສະມາຄົມ​ກິລາ-ກາຍຍະກຳ​ພື້ນ​ເມືອງ ​ແລະ ກິລາ​ສັດແຫ່ງ​ຊາດ, ທັງ​ເປັນ​ປະທານ​ສະມາຄົມ​ໄກ່ຕີ​ແຫ່ງ​ຊາດ ​ແລະ ທ່ານ ທອງ​ວິ​ໄລ ລິດ​ທິ​ເດດ ປະທານ​ສະ​ໂມ​ສອນ​ງົວ​ຊົນ ​ເຊິ່ງມີ​ຄະນະ​ນຳທັງ 2 ຝ່າຍ, ພະນັກງານ, ວິຊາ​ການ ​ແລະ ສື່​ມວນ​ຊົນ ​ເຂົ້າ​ຮ່ວມ​ເປັນ​ສັກຂີ​ພະຍານ.

      ​ໂອກາດ​ດັ່ງກ່າວ, ທ່ານ ສຸລິຍາ ວົງ​ສະໝໍລະ​ພູມ ກໍ່​ໄດ້​ສະ​ແດງ​ຄວາມ​ພູມ​ໃຈ ​ແລະ ດີ​ໃຈ​ທີ່​ໄດ້​ເປັນ​ສ່ວນ​ໜຶ່ງ​ໃຫ້ການ​ຊ່ວຍ​ເຫຼືອ​ປະຊາຊົນ​ລາວ​ເຮົາ ທີ່​ມີ​ຄວາມ​ຂາດ​ເຂີນ ​ແລະ ທຸກ​ຍາກ​ລຳບາກ. ສະ​ນັ້ນ ​ໃນ​ມື້​ນີ້ ທາງ​ສະມາຄົມ​ກິລາ-ກາ​ຍະ​ກຳ​ພື້ນ​ເມືອງ ​ແລະ ກິລາ​ສັດ​ແຫ່ງ​ຊາດ​ລາວ ຈຶ່ງ​ໄດ້​ສືບ​ຕໍ່ ໂຄງການ “ມອບ​ເຄື່ອງ​ຊ່ວຍ​ເຫຼືອ​ຕ້ານ​ໄພ​ໜາວ” ​ໃຫ້​ແກ່ 3 ​ເມືອງທີ່​ທຸກ​ຍາກລຳບາກ ​ໃນ 2 ​ແຂວງ​ພາກ​ເໜືອຄື: ​ເມືອງ​ຄອບ ​ແຂວງ​ໄຊ​ຍະ​ບູລີ ​ແລະ ​ເມືອງ​ຊ່ອນ, ​ເມືອງ​ຮ້ຽມ ​ແຂວງ​ຫົວພັນ ​ໂດຍ​ໄດ້​ມອບ​ເຄື່ອງນຸ່ງ​ຮົ່ມ ທີ່​ປະກອບ​ມີ ​ເສື້ອ​ຜ້າ, ຜ້າ​ຮົ່ມ ​ແລະ ​ເງິນສົດ ລວມມູນ​ຄ່າ 30 ລ້ານກີບ ​ໃຫ້​ແກ່ ສະພາ​ແຫ່ງ​ຊາດ ​ເພື່ອ​ໃຫ້​ກຳມາ​ທິການບັນດາ​ເຜົ່າ ທີ່​ໄດ້​ລົງ​ພື້ນຖານ​​ເກັບ​ກຳສະພາບ​ຕົວ​ຈິງ ​ແລະ ຄວາມ​ຂາດ​ເຂີນ​ຂອງ​ປະຊາຊົນ​ບັນດາ​ເຜົ່າ ​ໄດ້​ນຳ​ວັດຖຸ​ປັດ​ໃຈ​ທັງ​ໝົດ​ນີ້ ​ໄປ​ມອບ​​ຕໍ່ໃຫ້ຖິງ​ເປົ້າ​ໝາຍທີ່​ຕັ້ງ​ໄວ້. ນອກຈາກ​ມອບ​ເຄື່ອງນຸ່ງ​ໃນ​ຄັ້ງ​ນີ້​ແລ້ວ ​ໃນ​ໄວໆ​ນີ້ ທາງ​ສະມາຄົມ​ພວກ​ເຮົາ ຍັງ​ຈະ​ໄດ້​ເດີນທາງ​ຂຶ້ນ​ໄປ​ແຂວງ​ໄຊ​ຍະ​ບູລີ ​ເພື່ອ​ນຳ​ເອົາ​ເຄື່ອງ​ຊ່ວຍ​ເຫຼືອ ​ແລະ ອື່ນໆ ຈາກ​ສະມະ​ຊິກ​ພວກ​ເຮົາ ​ໄປ​ຊ່ວຍ​ເຫຼືອ​ທາງ​ເຂດ​ນັ້ນ​ຕື່ມ ​ແລະ ​ໂຄງການ​ນີ້ ກໍ່​ຈະ​ສືບ​ຕໍ່​ໄປ​ເລື້ອຍໆ  ທົ່​ວປະ​ເທດ ​ແລະ ທຸກໆ​ແຂວງ.

      ຂະນະ​ທີ່ ທ່ານ ນາງ ບົວ​ພັນ ລີ​ໄກ​ຢາ ກໍ່​ໄດ້​ກ່າວ​ສະແດງຄວາມຂອບ​ໃຈ ​ແລະ ຈະ​ນຳ​ເຄື່ອງ​ທີ່​ໄດ້​ມາ​ຄັ້ງ​ນີ້ ​ເດີນທາງ​ໄປ​ບໍລິຈາກ, ຊ່ວຍ​ເຫຼືອຕາມ​ຈຸດປະສົງ​ທີ່​ທາງສະມາຄົມ​ກິລາ-ກາ​ຍະ​ກຳ​ພື້ນ​ເມືອງ ​ແລະ ກິລາ​ສັດ​ແຫ່ງ​ຊາດ​ລາວ ​ໄດ້​ຕັ້ງ​ໃຈ​ເອົາ​ໄວ້ ​ໃນ​ວັນ​ທີ 11 ກຸມພາ ຈະ​ເຖິງ​ນີ້ ທີ່​ແຂວງ​ໄຊ​ຍະ​ບູລີ. ​ໂດຍ​ການ​ມອບ​ນັ້ນ ​ແມ່ນ​ຈະ​ມອບ​ໃຫ້​ກັບ​ທາງ​ອຳ​ນາຍ​ການ​ປົກຄອງ​ບ້ານໂດຍ​ກົງ ​ເພື່ອ​ໃຫ້​ທາງ​ຄະນະ​ການຈັດ​ຕັ້ງຂັ້ນ​ບ້ານ ​ເປັນ​ຜູ້​ກະຈາຍ​ມອບ​ຕໍ່ ​ແລະ ຂໍ​ໃຫ້​ທາງສະມາຄົມ​ກິລາ-ກາ​ຍະ​ກຳ​ພື້ນ​ເມືອງ ​ແລະ ກິລາ​ສັດ​ແຫ່ງ​ຊາດ​ລາວ ສືບ​ຕໍ່ ​ແລະ ຊ່ວຍ​ເຫຼືອ​ແບບ​ນີ້​ຕໍ່ໆ​ໄປ ​ເພາະ​ເປັນ​ການ​ຊ່ວຍ​ເຫຼືອ​ທີ່​ດີ​ທີ່​ສຸດ ​ໃນ​ການຕ້ານ​ໄພ​ໜາວ.

ອຳ​ໄພ​ວັນ