ມ​ສ ສາ​ລາ​ຄຳ ເປີດ​ການແຂ່ງ​ຂັນ​ກິ​ລາ-ສິ​ປະ​ລະ ສົກ​ຮຽນ 2017-2018

ສຶກສາ

Written by Super User

ມ​ສ ສາ​ລາ​ຄຳ ເປີດ​ການແຂ່ງ​ຂັນ​ກິ​ລາ-ສິ​ປະ​ລະ ສົກ​ຮຽນ 2017-2018

27999803 1322609794507836 725940835 o   ໂຮງ​ຮຽນ​ມັດ​ທະ​ຍົມ​ສົມບູນ ສາ​ລາ​ຄຳ ເປີດ​ການ​ແຂ່ງ​ຂັນ​ກິ​ລາ ແລະ ສິ​ລະ​ປະ ປະ​ຈຳ​ສົກ​ຮຽນ 2017-2018 ຢ່າງ​ເປັນ​ທາງ​ການ ເພື່ອສົ່ງເສີມຕາມ​ 3 ລັກ​ສະ​ນະ ແລະ 5 ຫຼັກ​ມູນຂອງ​ການ​ສຶກ​ສາ ທີ່ກະຊວງສຶກສາທິການ ແລະ ກິລາ ວາງອອກ ໃຫ້​ປາ​ກົດ​ຜົນ​ເປັນ​ຈິງ ທັງເປັນການສ້າງ​ຂະ​ບວນ​ການ​ຊົມ​ເຊີຍ​ວັນ​ສຳ​ຄັນ​ຕ່າງໆຂອງຊາດ, ສ້າງ​ສາຍ​ພົວ​ພັນ, ຄວາມ​ສາ​ມັກ​ຄີອັນດີງາມ ລະ​ຫວ່າງ​ຄູ-ອາ​ຈານ ແລະ ນ້ອງໆ​ນັກ​ຮຽນ ພາຍໃນໂຮງຮຽນ ໃຫ້ມີຄວາມໃກ້ຊິດກັນຫຼາຍຂຶ້ນ.ເມື່ອ​ວັນ​ທີ 9 ກຸມ​ພາ ຜ່ານ​ມາ ທີ່​ໂຮງ​ຮຽນ​ມັດ​ທະ​ຍົມ​ສົມບູນ ສາ​ລາ​ຄຳ ເມືອງ​ຫາດ​ຊ​າຍ​ຟອງ ນະ​ຄອນຫຼວງວຽງ​ຈັນ, ໄດ້​ມີ​ພິ​ທີ​ເປີດ​ການ​ແຂ່ງ​ຂັນ​ກິ​ລາ ແລະ ສິ​ລະ​ປະ ປະ​ຈຳ​ສົກ​ຮຽນ 2017-2018 ໂດຍມີ ທ່ານ ສຸກ​ສະ​ຫວັນ ບຸດ​ຕະ​ວົງ ຮອງ​ເຈົ້າ​ເມືອງ​ຫາດ​ຊາຍ​ຟອງ, ທ່ານ ສົມ​ມະ​ລີ ບູ​ລົມ ຫົວ​ໜ້າ​ຫ້ອງ​ການ​ສຶກ​ສາ​ທິ​ການ ແລະ ກິ​ລາ​ເມືອງ​ຫາດ​ຊາຍ​ຟອງ ແລະ ທ່ານ ບຸນ​ຊູ ສຸດ​ທິ​ວົງ ຜູ້​ອຳ​ນວຍ​ການ​ໂຮງ​ຮຽນ​ມັດ​ທະ​ຍົມ​ສົມບູນ ສາ​ລາ​ຄຳ ພ້ອມ​ດ້ວຍ​ຄະ​ນະອຳ​ນວຍ​ການ​, ເລ​ຂາ​ຊາວ​ໜຸ່ມ​ເມືອງ, ແຂກ​ທີ່​ມີ​ກຽດ, ພະ​ນັກ​ງານ, ວິ​ຊາ​ການ, ຜູ້​ປົກ​ຄອງ​ນັກ​ຮຽນ ແລະ ຂະ​ບວນກອງ​ກຳ​ລັງນ້ອງໆນັກ​ຮຽນ ເຂົ້າ​ຮ່ວມ 2.040 ​ຄົນ.

      ໂອ​ກາດ​ດັ່ງ​ກ່າວ, ທ່ານ ບຸນ​ຊູ ສຸດ​ທິ​ວົງ ກ່າວວ່າ: ການ​ແຂ່ງ​ຂັນ​ກິ​ລາ ແລະ ສິ​ລະ​ປະ​ໃນ​ຄັ້ງ​ນີ້ ແມ່ນ​ເພື່ອສົງເສີມການພັດທະນາວຽກງານການສຶກສາຂອງໂຮງຮຽນໃຫ້ໄປຕາມ 3 ລັກ​ສະ​ນະ ແລະ 5 ຫຼັກ​ມູນຂອງ​ການ​ສຶກ​ສາ ທີ່ກະຊວງສຶກສາທິການ ແລະ ກິລາ ວາງອອກ ໃຫ້​ປະ​ກົດ​ຜົນ​ເປັນ​ຈິງ ແລະ ເພື່ອ​ເປັນ​ການສ້າງ​ສາຍ​ພົວ​ພັນ, ຄວາມ​ສາ​ມັກ​ຄີ ລະ​ຫວ່າງ​ຄູ-ອາ​ຈານ ແລະ ນ້ອງໆ​ນັກ​ຮຽນ, ເພື່ອ​ເນັ້ນ​ການ​ສ້າງ​ໃຫ້​ນັກ​ຮຽນ​ມີ​ສຸ​ຂະ​ພາບ, ພະລະ​ນາ​ໄມ ທີ່​ສົມ​ບູນ​ແຂງ​ແຮງ ແລະ ປາ​ສະ​ຈາກ​ໂລກ​ໄພ​ໄຂ້​ເຈັບ, ເພື່ອ​ໃຫ້​ນ້ອງໆ​ນັກ​ຮຽນ​ໄດ້​ໃຊ້​ເວ​ລາ​ວ່າງ​ໃຫ້​ເປັນ​ປະ​ໂຫຍດ ບໍ່​ໃຫ້​ຫ​ຍຸ່ງ​ກ່ຽວ​ກັບ​ສິ່ງ​ເສບ​ຕິດ ແລະ ເພື່ອ​ສ້າງ​ໃຫ້​ນັກ​ຮຽນ​ທຸກ​ຄົນ ມີ​ນ້ຳ​ໃຈ​ເສຍ​ສະຫຼະ, ຮູ້​ເສຍ​ຮູ້​ຊະ​ນະ ຮຸ້​ໃຫ້​ອະ​ໄພ ໃນ​ການ​ແຂ່ງ​ຂັນ​ກິດ​ຈະ​ກຳ​ຕ່າງໆ. ສຳ​ລັບ ການ​ແຂ່ງ​ຂັນ​ໃນ​ຄັ້ງ​ນີ້ ແມ່ນ​ເລີ່ມ​ແຂ່ງ​ຂັນ​ກັນ​ມາ​ແຕ່​ທ້າຍ​ເດືອນ​ກັນ​ຍາ 2017 ແລະ ຈະ​ສຳ​ເລັດ​ໃນ​ເດືອນ​ເມ​ສາ 2018. ເຊິ່ງ​ແຂ່ງ​ຂັນ​ກັນ​ທັງ​ໝົດ 4 ກິ​ລາ ປະ​ກອບ​ມີ: ​ເຕະບານ​ຊາຍ-ຍິງ, ​ກະ​ຕໍ້​ຊາຍ-ຍິງ, ບານ​ສົ່ງ​ຊາຍ-ຍິງ, ເປ​ຕັງຊາຍ-ຍິງ ແລະ ການ​ແຂ່ງ​ຂັນ​ສິ​ລະ​ປະ-ວັດ​ນະ​ຄະ​ດີ ທີ່​ປະ​ກອບ​ມີ ການ​ແຂ່ງ​ຂັນ​ຟ້ອນ, ຮ້ອງ​ເພງ ແລະ ອື່ນໆ. ນອກ​ຈາກ​ນັ້ນ, ພິ​ເສດ​ໃຫ້​ປີ​ນີ້ ຍັງ​ຈະ​ມີ​ການ​ເພີ່ມ​ການ​ແຂ່ງ​ຂັນ​ກິ​ລາ​ ຍ່າງ 31 ຂາ ເຂົ້າ​ໃນ​ການ​ແຂ່ງ​ຂັນ​ອີກ​ດ້ວຍ.

      ຂະ​ນະ​ທີ່ ທ່ານ ສຸກ​ສະ​ຫວັນ ບຸດ​ຕະ​ວົງ ກໍ່ໄດ້​ກ່າວເປີດ​ພິ​ທີ​ການ​ແຂ່ງ​ຂັນ​ກິ​ລາ ແລະ ສິ​ລະ​ປະ ຢ່າງ​ເປັນ​ທາງ​ການ ພ້ອມ​ທັງກ່າວຊົມ​ເຊີຍ ແລະ ໃຫ້​ທິດ​ຊີ້​ນຳ​ແກ່​ການ​ຈັດ​ແຂ່ງ​ຂັນ​ໃນ​ຄັ້ງ​ນີ້ ຂໍ​ໃຫ້​ນັກ​ຮຽນທຸກ​ຄົນ ແລະ ຄູ-ອາ​ຈານ ເອົາ​ໃຈ​ໃສ່​ໃນ​ການ​ແຂ່ງ​ຂັນ​ ຫຼິ້ນ​ໃນ​ເກມ ຮູ້​ຈັກ​ໃຫ້​ອາ​ໄພ​ເຊິ່ງ​ກັນແລະກັນ ແລະ ຮູ້​ຮັກ​ສາ​ຄວາມ​ສາ​ມັກ​ຄີ​ທັງ​ພາຍ​ໃນ ແລະ ນອກ​ໂຮງ​ຮຽນ ແລະ ສືບຕໍ່​ພັດ​ທະ​ນາ​ຕົນ​ເອງ​ໃຫ້​ເກັ່ງ ແລະ ດີ​ຂຶ້ນ​ໄປ​ເລື້ອຍໆ ກຽມຕາງໜ້າໃຫ້ໂຮງຮຽນ ເຂົ້າຮ່ວມແຂ່ງຂັນລະດັບເມືອງ, ນະຄອນຫຼວງ ແລະ ລະດັບຊາດໃນອະນາຄົດ..

ອຳ​ໄພ​ວັນ