ຮ​ຮ ໄຊ​ປັນ​ຍາ ສະຫຼຸບ​ຜົນ​ການ​ສອບ​ເສັງ​ພາກ​ຮຽນ I ສົກ​ຮຽນ 2017-2018

ສຶກສາ

Written by Super User

ຮ​ຮ ໄຊ​ປັນ​ຍາ ສະຫຼຸບ​ຜົນ​ການ​ສອບ​ເສັງ​ພາກ​ຮຽນ I ສົກ​ຮຽນ 2017-2018

     27999879 1323434234425392 1477694854 o ໂຮງ​ຮຽນອະ​ນຸ​ບານ, ປະ​ຖົມ ແລະ ມັດ​ທະ​ຍົມ​ຕອນ​ຕົ້ນ ​ໄຊ​ປັນ​ຍາ ຈັດ​ພິ​ທີ​ສະຫຼຸບ​ຜົນ​ການ​ສອບ​ເສັງ​ພາກ​ຮຽນ I ສົກ​ຮຽນ 2017-2018 ພ້ອມ​ກັບວາງແຜນ​ການພັດ​ທະ​ນາ ​ພາກ​ຮຽນທີ II ​ໃຫ້​ດີ​ຂຶ້ນ​ເລື້ອຍໆ ໂດຍ​ອີງ​ໃສ່​ການ​ຊີ້​ນຳ​ຂອງ​ຂັ້ນ​ເທິງ ເພື່ອ​ສືບ​ຕໍ່​ເອົາ​ຜົນ​ການ​ສອບ​ເສັງ​ພາກ​ຮຽນ II ໃຫ້​ໄດ້​ຄາດ​  ໝາຍ 100 ເປີ​ເຊັນ ຂອງ​ທຸກ​ຊັ້ນ​ຮຽນ.ເມື່ອ​ວັນ​ທີ 9 ກຸມ​ພາ ຜ່ານ​ມາ ທີ່​ໂຮງ​ຮຽນ​ດັ່ງກ່າວ ເມືອງ​ຫາດ​ຊາຍ​ຟອງ ນະ​ຄອນຫຼວງວຽງ​ຈັນ ໄດ້​ມີ​ພິ​ທີ​ສະຫຼຸບ​ຜົນ​ການ​ສອບ​ເສັງ​ພາກ​ຮຽນ I ​ສົກ​ຮຽນ 2017-2018, ໃຫ້​ກຽດ​ເຂົ້າ​ຮ່ວມ​ໂດຍ ທ່ານ ນາງ ຂັນ​ແກ້ວ ອິນ​ດາ​ເທບ ຜູ້​ອຳ​ນວຍ​ການ​ໂຮງ​ຮຽນ​ ໄຊ​ປັນ​ຍາ, ທ່ານ ຫຸມ​ແກ້ວ ອິນ​ດາ​ເທບ ທີ່​ປຶກ​ສາ​ໂຮງ​ຮຽນ​ໄຊ​ປັນ​ຍາ ພ້ອມ​ດ້ວຍ​ຄະ​ນະອຳ​ນວຍ​ການ, ພະ​ນັກ​ງານ, ວິ​ຊາ​ການ, ຄູ-ອາ​ຈານ ແລະ ນ້ອງໆ​ນັກ​ຮຽນ ເຂົ້າ​ຮ່ວມ.

      ໂອ​ກາດ​ດັ່ງ​ກ່າວ, ທ່ານ ທາ​ນິນ ບົວ​ເຂັມ ຮອງ​ຜູ້​ອຳ​ນວຍ​ການ​ໂຮງ​ຮຽນ​ໄຊ​ປັນ​ຍາ ໄດ້​​ບົດ​ສະຫຼຸບ​ຜົນ​ການ​ສອບ​ເສັງ​ພາກ​ຮຽນ I ສົກຮຽນ 2017-2018 ຂອງ​ໂຮງ​ຮຽນ​ ​ແມ່ນ​ໄດ້​ສິດ​ສອນ​ຕາມ​ແຜນ​ການ​ຂອງ​ໂຮງ​ຮຽນ ໂດຍ​ອີງ​ໃສ່ຫຼັກ​ສູດ​ທີ່​ທາງ​ກະ​ຊວງ​ສຶກ​ສາ​ທິ​ການ ແລະ ກິ​ລາ ວາງ​ອອກ ຄື: ໂຮງ​ຮຽນ​ອອກ​ແຮງ​ສ້າງ​ຄູ-ອາ​ຈານ ແລະ ນັກ​ຮຽນ ສູ້​ຊົນ​ໃຫ້​ໄດ້​ຕາມ 3 ​ລັກ​ສະ​ນະ ແລະ 5 ຫຼັກ​ມູນ​ຂອງການ​ສຶກ​ສາ ​ໃຫ້​ໄດ້ ປະ​ກອບ​ມີ ຄຸນ​ສົມ​ບັດ​ສຶກ​ສາ, ປັນ​ຍາ​ສຶກ​ສາ, ພະ​ລະ​ສຶກ​ສາ, ສິລະ​ປະ​ສຶກ​ສາ ແລະ ແຮງ​ງານ​ສຶກ​ສາ. ດ້ານ​ນັກ​ຮຽນ​ເກັ່ງ ​ແມ່ນ​ທາງ​ໂຮງ​ຮຽນ​ຂອງ​ພວກ​ເຮົາ​ມີ​ການ​ກະ​ກຽມ, ຈັດ​ຕັ້ງ​ສິດ​ສອນ​ນັກ​ຮຽນ​ເກັ່ງ​ນັບ​ແຕ່​ຕົ້ນ​ປີ​ເປັນ​ຕົ້ນ​ມາ ໃຫ້​ແຕ່​ລະ​ຊັ້ນ​ຮຽນ. ນອກ​ຈາກ​ນີ້​ແລ້ວ ສົກ​ຮຽນ 2017-2018 ພາກ​ຮຽນ I ນີ້ ທາງ​ໂຮງ​ຮຽນ​ຍັງ​ໄດ້​ຊອກ​ເອົາ​ເປົ້າ​ໝາຍ, ຄາດ​ໝາຍ​ເອົາ​ມະ​ຫາ​ຊົນ​ຜູ້​ກ້າວ​ໜ້າ​ເຂົ້າ​ເປັນ​ຊາວ​ໜຸ່ມ ລວມ​ເຖິງອະ​ນຸ​ຊົນ ແລະ ເຍົາ​ວະ​ຊົນ ເຊິ່ງ​ປະ​ກອບ​ມີ ເປົ້າ​ໝາຍ​ຊາວ​ໜຸ່ມ ຈຳ​ນວນ 11 ນ້ອງ, ​ຍິງ 2 ນ້ອງ, ເປົ້າ​ໝາຍ​ເຍົາ​ວະ​ຊົນ ຈຳ​ນວນ 93 ນ້ອງ, ​ຍິງ 50 ຄົນ ແລະ ເປົ້າ​ໝາຍ​​ອະ​ນຸ​ຊົນ ຈຳ​ນວນ 48 ນ້ອງ, ​ຍິງ 31 ນ້ອງ.

      ຂະ​ນະ​ທີ່ຜົນ​ງານ​ປະ​ຈຳ​ພາກ​ຮຽນ I ດ້ານ​ການ​ຮຽນ ຄູ-ອາ​ຈານ ສຳ​ເລັດ​ການ​ສິດ​ສອນ​ຕາມຫຼັກ​ສູດ ຕາມ​ແຜນ​ການ​ທີ່​ວາງ​ໄວ້, ດ້ານ​ລະ​ບຽບ ເອົາ​ໃຈ​ໃສ່​ຕິດ​ຕາມ, ແນະ​ນຳການ​ປະ​ຕິ​ບັດ​ລະ​ບຽບ​ຢ່າງ​ເປັນ​ປົກ​ກະ​ຕິ. ດັ່ງ​ນັ້ນ, ຈຶ່ງ​ມີ​ຄວາມ​ສະ​ຫງົບ​ປອດ​ໄພ​ມາ​ຕະຫຼອດ​ໃນ​ພາກ​ຮຽນ I, ດ້ານ​ກິ​ລາການ​ແຂ່ງ​ຂັນ​ກິ​ລາ​ໄດ້​ພຽງ​ແຕ່​ເຂົ້າ​ແຂ່ງ​ຂັນ​ກັບ​ເຂດ​ເທົ່າ​ນັ້ນ ແລະ ດ້ານ​ສິ​ລະ​ປະ ການ​ແຂ່ງ​ຂັນ​ສິ​ລະ​ປະ​ຂັ້ນ​ປະ​ຖົມ​ທົ່ວ​ເຂດ ແມ່ນ​ໄດ້​ທີ 1 (ແຂ່ງ​ຢູ່​ເມືອງ ແມ່ນ​ໄດ້​ອັນ​ດັບ​ທີ 5) ແລະ ການ​ແຂ່ງ​ຂັນ​ຂັ້ນ​ມັດ​ທະ​ຍົມ​ແມ່ນ​ໄດ້​ພຽງ​ແຕ່​ລາງວັນ​ຊົມ​ເຊີຍ. ​ແນວ​ໃດ​ກໍ່​ຕາມ, ​ດ້ານຈຸດ​ດີ ຂອງຄູ-ອາ​ຈານ ແລະ ນ້ອງ​ນັກ​ຮຽນ ມີ​ແນວ​ຄິດ​ອຸ່ນ​ອ່ຽງ​ທຸ່ນ​ທ່ຽງ ເຊື່ອ​ໝັ້ນ​ຕໍ່​ການ​ນຳ​ພາ​ຂອງ​ຂັ້ນ​ເທິງ​ທີ່​ວາງ​ອອກ ແລະ ມີ​ຄວາມ​ສາ​ມັກ​ຄີ ຊ່ວຍ​ເຫຼືອ​ເຊິ່ງ​ກັນ​ແລະ​ກັນ​ເປັນ​ຢ່າງ​ດີ.ທ່ານ​ຍັງ​ໄດ້​ກ່າວໃຫ້​ຊາບ​ຕື່ມ​ອີກວ່າ: ສຳ​ລັບແຜນ​ການ​ຂອງ​ພາກ​ຮຽນທີ II ຈະ​ສືບ​ຕໍ່​ພັດ​ທະ​ນາ​ການ​ສຶກ​ສາ​ແຜນ​ການ​ຂອງ​ໂຮງ​ຮຽນ, ເມືອງ​ໃຫ້​ດີ​ຂຶ້ນ​ເລື້ອຍໆ ໂດຍ​ອີງ​ໃສ່​ການ​ຊີ້​ນຳ​ຂອງ​ຂັ້ນ​ເທິງ ກໍ່​ຄື​ທາງ​ພະ​ແນກ​ສຶກ​ສາ​ທິ​ການ ແລະ ກິ​ລາ ນະ​ຄອນ​ຫຼວງວຽງ​ຈັນ ແລະ ຫ້ອງ​ການ​ສຶກ​ສາ​ທິ​ການ ແລະ ກິ​ລາ ເມືອງ​ຫາດ​ຊາຍ​ຟອງ ແລະ ຈະ​ສືບ​ຕໍ່​ເອົາ​ຜົນ​ການ​ສອບ​ເສັງ​ພາກ​ຮຽນ II ໃຫ້​ໄດ້​ຄາດ​ໝາຍ 100 ເປີ​ເຊັນ ຂອງ​ທຸກ​ຊັ້ນ​ຮຽນ.

      ພິ​ທີ​ສະຫຼຸບ​ໃນ​ຄັ້ງ​ນີ້ ຍັງ​ມີ​ການມອບ​ໃບ​ຍ້ອງ​ຍໍ ແລະ ຂອງ​ຂວັນ ໃຫ້​ແກ່​ຄູ-ອາ​ຈານ ທີ່​ມີ​ຜົນ​ງານ​ໂດດ​ເດັ່ນ ແລະ ນ້ອງໆ​ນັກ​ຮຽນ ທີ່​ຮຽນ​ດີ​ຮຽນ​ເກັ່ງ ແລະ ຊະ​ນະ​ເລີດ​ໃນ​ການ​ແຂ່ງ​ຂັນ​ສິລະ​ປະ, ຕອບ-ຖາຍ​ວິ​ທະ​ຍາ​ສາດ ປະ​ກອບ​ມີ ຊັ້ນ​ອະ​ນຸ​ບານ, ຊັ້ນ​ປະ​ຖົມ ແລະ ຊັ້ນ​ມັດ​ທະ​ຍົມ​ຕອນ​ຕົ້ນ. ໃຫ້​ກຽດ​ມອ​ບ​ໂດຍ ທ່ານ ນາງ ຂັນ​ແກ້ວ ອິນ​ດາ​ເທບ ແລະ ທ່ານ ຫຸມ​ແກ້ວ ອິນ​ດາ​ເທບ. ນອກ​ຈາກ​ນັ້ນ, ໃນ​ພິ​ທີ​ຍັງ​ມີ​​ກິດ​ຈະ​ກຳ, ​ການ​ສະ​ແດງ​ສິ​ລະ​ປະ, ຟ້ອນມວຍ​ລາຍລາວ ແລະ ອື່ນໆ ອີກ​ດ້ວຍ.

ອຳໄພວັນ