ຄູ​ດີ​ເດັ່ນ ​8 ແຂວງພາກເໜືອ ແລະ ນວ ຮ່ວມຖອດ​ຖອນ​ບົດຮຽນ ທີ່ໂຮງຮຽນປະຖົມທົ່ງກາງ

ສຶກສາ

Written by Super User

ຄູ​ດີ​ເດັ່ນ ​8 ແຂວງພາກເໜືອ ແລະ ນວ ຮ່ວມຖອດ​ຖອນ​ບົດຮຽນ ທີ່ໂຮງຮຽນປະຖົມທົ່ງກາງ

28080116 1323434194425396 1821941631 o    ຄະນະນຳກະຊວງ​ສຶກສາ​ທິການ ​ແລະ ກິລາ ​ໄດ້​ນໍາພາ​ຂະ​ບວນຄູ​ດີ​ເດັ່ນ 8 ​ແຂວງ​ພາກ​ເໜືອ ​ແລະ 1 ນະຄອນຫຼວງ​ວຽງ​ຈັນ (ນວ) ​ເພື່ອ​ຖອດຖອນ​ບົດຮຽນ ​ແລະ ​​ເຄື່ອນ​ໄຫວ​ທັດສະນະ​ສຶກສາ ທີ່​ໂຮງຮຽນ​ປະຖົມ​ສຶກສາ​ທົ່ງ​ກາງ ເມືອງສີສັດຕະນາກ ນະຄອນຫຼວງວຽງຈັນ ທີ່​ມີຄູ​ດີ​ເດັ່ນ​ ທີ່ໄດ້​ຮັບ​ລາງວັນ​ພະ​ຣາຊະທານ​ຈາກ​ມູນ​ນິທີ ເຈົ້າຟ້າ​ມະຫາ​ຈັກກຣີ ຄັ້ງ​ທີ 2 ທີ່ນະຄອນຫຼວງບາງ​ກອກ ປະ​ເທດໄທ ປະ​ຈໍາປີ 2017 ທີ່​ມີ​ວຸດ​ທິຄົບ​ຕາມ​ເງື່ອນ​ໄຂ, ການ​ສິດສອນ​ດີ​ເດັ່ນ, ມີ​ຄວາມ​ສາມາດ​ທາງ​ດ້ານການ​ຊ່ວຍ​ເຫຼືອ​ຊຸມ​ຊົນຕະຫຼອດ​ມາ.ການເຄື່ອນໄຫວໃນຄັ້ງນີ້ ​ໄດ້​ຈັດ​ຂຶ້ນ​ໃນ​ລະຫວ່າງ​ວັນ​ທີ 5-9 ກຸມພາ ຜ່ານ​ມາ ທີ່ໂຮງຮຽນ​ປະຖົມ​ສຶກສາ​ທົ່ງ​ກາງ, ນໍາ​ພາໂດຍ​ ທ່ານ ນາງ ບົວ​ຄໍາ ດາວສະຫວັນ ຮອງ​ຫົວໜ້າ​ກົມ​ຈັດ​ຕັ້ງ ​ແລະ ພະນັກງານ ກະຊວງສຶກສາ​ທິການ ​ແລະ ກິລາ ແລະ ​ໃຫ້ກຽດ​ຕ້ອນຮັບ​ຂອງ ທ່ານ ນາງ ຄູນ​ວິ​ໄລ ​ເຄນ​ກິ​ຕິ​ສັກ ຜູ້​ອໍານວຍ​ການ​ໂຮງຮຽນ​ປະຖົມ​ສຶກສາ​ທົ່ງ​ກາງ ທັງເປັນຄູ​ດີ​ເດັ່ນຂອງ ສປປ ລາວ​ ​ທີ່ໄດ້​ຮັບ​ລາງວັນ​ພະ​ຣາຊະທານ​ຈາກ​ມູນ​ນິທີ ເຈົ້າຟ້າ​ມະຫາ​ຈັກກຣີ ຄັ້ງ​ທີ 2 ທີ່ນະຄອນຫຼວງບາງ​ກອກ ປະ​ເທດໄທ ປະ​ຈໍາປີ 2017 ພ້ອມ​ດ້ວຍ​ທີມງານ ​ແລະ ຄູ​ດີ​ເດັ່ນ ຈາກ 8 ​ແຂວງ​ພາກ​ເໜືອ ​ແລະ ນະຄອນຫຼວງ​ວຽງຈັນ ​ເຂົ້າ​ຮ່ວມ​ 26 ທ່ານ.

      ​ໂອກ​າດດັ່ງກ່າວ, ທ່ານ ນາງ ບົວ​ຄໍາ ດາວສະຫວັນ ​ໄດ້​ລາຍ​ງານ​ໃຫ້​ຮູ້​ວ່າ: ການ​​ນໍາພາ​ຂະ​ບວນຄູ​ດີ​ເດັ່ນຄັ້ງ​ນີ້, ​ກໍ່​ເພື່ອ​ເປັນ​ການ​ຖອດຖອນ​ບົດຮຽນ ​ແລະ ​​ເຄື່ອນ​ໄຫວ​ໄປ​ທັດສະນະ​ສຶກສາ, ​ເຊິ່ງອີງ​ຕາມ​ຂໍ້​ຕົກລົງ ວ່າ​ດ້ວຍ​ການ​ແຕ່ງ​ຕັ້ງ​ຄະນະ​ຮັບຜິດຊອບ​ກອງ​ປະຊຸມ​ຖອດຖອນ​ບົດຮຽນ ​ແລະ ທັດສະນະ​ສຶກສາ ຄູ​ດີ​ເດັ່ນ ທົ່ວ​ປະ​ເທດ ປະ​ຈໍາ​ສົກ​ປີ 2016-2017, ​ເຊິ່ງ​​ໄດ້​ນໍາພາ​ຂະ​ບວນການ​ດັ່ງກ່າວ ລົງ​ຖອດ​ຖອນ​ບົດຮຽນ ທີ່​ໂຮງຮຽນ​ປະຖົມ​ສຶກສາ​ທົ່ງ​ກາງ ເມືອງສີສັດຕະນາກ ນະຄອນຫຼວງວຽງຈັນ ທີ່​ມີຄູ​ດີ​ເດັ່ນຂອງ ສປປ ລາວ​ ກໍ່​ຄື ທ່ານ ນາງ ຄູນ​ວິ​ໄລ ​ເຄນ​ກິ​ຕິ​ສັກ ທີ່ໄດ້​ຮັບ​ລາງວັນ​ພະ​ຣາຊະທານ​ຈາກ​ມູນ​ນິທີ ເຈົ້າຟ້າ​ມະຫາ​ຈັກກຣີ ຄັ້ງ​ທີ 2 ທີ່ນະຄອນຫຼວງບາງ​ກອກ ປະ​ເທດໄທ ປະ​ຈໍາປີ 2017 ທີ່​ມີ​ວຸດ​ທິຄົບ​ຕາມ​ເງື່ອນ​ໄຂ, ການ​ສິດສອນ​ດີ​ເດັ່ນ, ມີ​ຄວາມ​ສາມາດ​ທາງ​ດ້ານ​ການ​ຊ່ວຍ​ເຫຼືອ​ຊຸມ​ຊົນຕະຫຼອດ​ມາ. ພ້ອມ​ທັງ​ເປັນ​ຄູ​ດີ​ເດັ່ນ​ ທີ່ໄດ້ເຂົ້າຮ່ວມປະຕິບັດແຕ່ລະໂຄງການ ຢ່າງເປັນເອກະພາບກັນ ໂດຍໄດ້ຈັດແບ່ງຄູໃຫ້ມີຄວາມຮັບຜິດຊອບສູງ ແລະ ໃຫ້ຂຽນໂຄງການຜ່ານ ຜູ້ອໍານວຍການ ເພື່ອເຕົ້າໂຮມຜ່ານອໍານາດການປົກຄອງບ້ານ, ຄະນະພັດທະນາການສຶກສາກ່ອນ ຈະ ນໍາໄປຜ່ານຫ້ອງການສຶກສາທິການ ແລະ ກິລາເມືອງ. ຫຼັງຈາກນັ້ນ, ກໍ່ພ້ອມປະຕິບັດຕົງຈິງ, ເຊິ່ງໃນນັ້ນທາງໂຮງຮຽນ ກໍ່ຍັງໄດ້ເຂົ້າຮ່ວມປະຕິບັດຫຼາຍໆໂຄງການ ປະກອບມີ: ໂຄງການ ບໍາລຸງນັກຮຽນອ່ອນ, ໂຄງການສອນພາສາອັງກິດ, ໂຄງການອະນາໄມປາກ, ແຂ້ວ ແລະ ລ້າງມື, ໂຄງການສົ່ງເສີມສຸຂະພາບ ໃນໂຮງຮຽນ, ໂຄງການໂຮງຮຽນຄຸນະພາບ, ໂຄງການສອນລູກຄິດຍີ່ປຸ່ນ, ໂຄງການໂຮງຮຽນຂຽວສະອາດ+ຄຸນະພາບດີ, ໂຄງການເລື່ອນຂັ້ນແບບຕໍ່ເນື່ອງ ແລະ ໂຄງການສອນຫຼັກສູດທ້ອງຖິ່ນ ຜ່ານການຈັດຕັ້ງການຮຽນບການສອນ ແລະ ເຂົ້າໂຄງການຕ່າງໆ ຈົນໄດ້ກາຍເປັນໂຮງຮຽນດີເດັ່ນໃນການພັດທະນາ ໃຫ້ກາຍເປັນໂຮງຮຽນຄຸນະພາບ ແລະ ຕົວແບບ.

      ​ໂອກ​າດດຽວ​ກັນ, ທ່ານ ນາງ ຄູນ​ວິ​ໄລ ​ເຄນ​ກິ​ຕິ​ສັກ ​ໄດ້​ລາຍ​ງານ​ໃຫ້​ຮູ້​ວ່າ: ​​​ລາງວັນ​ພະ​ຣາຊະທານ​ຈາກ​ມູນ​ນິທີ ເຈົ້າຟ້າ​ມະຫາ​ຈັກກຣີ ຄັ້ງ​ທີ 2 ທີ່ນະຄອນຫຼວງບາງ​ກອກ ປະ​ເທດໄທ ປະ​ຈໍາປີ 2017 ​ແມ່ນໄດ້​ຈັດ​ຂຶ້ນ​ເມື່ອ​ວັນ​ທີ 11 ຕຸລາ 2017, ​ເຊິ່ງ​ເປັນ​ລາງວັນ​ທີ່​ມີ​ຄວາມ​ໝາຍ​ຄວາມ​ສໍາຄັນ ​ເພາະວ່າ​ເປັນ​ຈຸດໝາຍ​ອັນ​ສໍາຄັນ​ຂອງ​ຂະ​ແໜງ​ການ​ສຶກສາ ​ໂດຍ​ສະ​ເພາະ​ແມ່ນດ້ານ​ການ​ສິດສອນ​ຂອງ​ຄູ, ​​ເພາະວ່າຄູທຸກຄົນມີຈັນຍາບັນຂອງຄວາມເປັນຄູ, ມີຄວາມຮັກ, ຄວາມຜູກພັນ, ເມດຕາກະລຸນາ ແລະ ຍາມໃດກໍ່ເປັນຫ່ວງເປັນໃຍ ເອົາໃຈໃສ່ເບິ່ງແຍງຕໍ່ນ້ອງນັກຮຽນ ປຽບດັ່ງພໍ່-ແມ່ຜູ້ທີ 2, ທັງເປັນຄົນຄອຍສິດສອນອົບຮົມບົ່ມນິໄສໃຫ້ກັບນັກຮຽນ ມີການພັດທະນາທັງສະໝອງ, ຈິດໃຈ ແລະ ຮ່າງກາຍ ແລ້ວກໍ່ຈະເປັນອາວຸດ ກໍ່ຄື ແມ່ພິມທີ່ດີທີ່ສຸດຂອງໂຮງຮຽນນັ້ນເອງ ເພື່ອຈະເປັນການສ້າງນັກຮຽນໃຫ້ມີຄວາມຮູ້ຄວາມສາມາດ ກາຍເປັນບຸຄະລາກອນທີ່ມີຄວາມຮູ້, ມີຄຸນສົມບັດສິນທໍາປະຕິວັດ ເພື່ອອອກໄປຮັບໃຊ້ສັງຄົມ ແລະ ປະເທດຊາດໃນອະນາຄົດ.

      ສໍາລັບ​ການ​ນໍາພາ​ຂະ​ບວນຄູ​ດີ​ເດັ່ນ​ດັ່ງກ່າວ ​ແມ່ນ​ໄດ້​ແບ່ງ​ອອກ​ເປັນ 2 ຊຸດ ຄື: ຊຸດ​ທີ 1 ລະຫວ່າງວັນທີ 5-9 ກຸມພາ 2018 ​ປະກອບ​ມີ 8 ​ແຂວງພາກເໜືອ ແລະ 1 ນະຄອນຫຼວງ​ວຽງ​ຈັນ​ ເຂົ້າ​ຮ່ວມ ​ໂດຍ​ໄດ້​ໄປຖອດຖອນ​ບົດຮຽນ ​ແລະ ​​ເຄື່ອນ​ໄຫວ​ທັດສະນະ​ສຶກສາ ທີ່​ໂຮງຮຽນ​ປະຖົມ​ສຶກສາ​ທົ່ງ​ກາງ. ຫຼັງຈາກ​ນັ້ນ, ​ໄດ້​ໄປ​ທັດສະນະ​ສຶກສາ​ທີ່​ພາກ​ໃຕ້​ ຄື: ​ແຂວງ​ສະຫວັນ​ນະ​ເຂດ ​ແລະ ​ແຂວງ​ຈໍາປາ​ສັກ. ສ່ວນ​ຊຸດ​ທີ 2 ​ໃນ​ລະຫວ່າງ​ວັນ​ທີ 26 ກຸ​ມພາ ຫາ 2 ມີນາ 2018, ​ເຊິ່ງປະກອບ​ມີ ພາກ​ໃຕ້ ​ແລະ ພາກ​ກາງ ​ໂດຍ​ຈະໄດ້​ໄປຖອດຖອນ​ບົດຮຽນ ​ແລະ ​​ເຄື່ອນ​ໄຫວ​​ທັດສະນະ​ສຶກສາ ທີ່​ໂຮງຮຽນ​ປະຖົມ​ສຶກສາ​ທົ່ງ​ກາງ. ແລ້ວ​ຈະ​​ໄປ​ທັດສະນະ​ສຶກສາ​ທີ່​ແຂວງ​ຊຽງ​ຂວາງ ​ແລະ ​ແຂວງ​ຫົວພັນ.

​ໂດຍ: ນາງ ຕຸ່ນ​ຄໍາ