ເມືອງຫຼວງພະບາງ ຄອງເຈົ້າຫຼຽນຄຳ ງານແຂ່ງຂັນກິລາເຂດ 3 ຄັ້ງທີ 4 ແລ້ວພົບກັນໃໝ່ ປີ 2019 ທີ່ເມືອງຊຽງເງິນ

ສຶກສາ

Written by Super User

ເມືອງຫຼວງພະບາງ ຄອງເຈົ້າຫຼຽນຄຳ ງານແຂ່ງຂັນກິລາເຂດ 3 ຄັ້ງທີ 4 ແລ້ວພົບກັນໃໝ່ ປີ 2019 ທີ່ເມືອງຊຽງເງິນ

      28081075 1323434154425400 829726059 oທັບນັກກິລາເມືອງຫຼວງພະບາງ ເຈົ້າພາບ ສ້າງຜົນງານໄດ້ຢ່າງໂດດເດັ່ນ ຫຼັງຍາດມາໄດ້ທັງໝົດ 6 ຫຼຽນຄຳ, 4 ຫຼຽນເງິນ ແລະ 5 ຫຼຽນທອງ ລວມ 15 ຫຼຽນ ເປັນອັນດັບ 1 ຂອງຕາຕະລາງ ປິດສາກງານແຂ່ງຂັນກິລາເຂດ 3 ທີ່ມາຈາກ 4 ເມືອງໃຕ້ ຄື: ຊຽງເງິນ, ນານ, ພູຄູ ແລະ ຫຼວງພະບາງ ເຈົ້າພາບ ຄັ້ງທີ 4 ທີ່ເມືອງຫຼວງພະບາງ ເຈົ້າພາບ ປີ 2018 ແລ້ວພົບກັນໃໝ່ ຄັ້ງທີ 5 ທີ່ເມືອງຊຽງເງິນ ຮັບກຽດເປັນເຈົ້າພາບ ໃນປີ 2019.ພິທີປິດການແຂ່ງຂັນໄດ້ຈັດຂື້ນໃນຕອນເຊົ້າຂອງວັນທີ 8 ກຸມພາ ຜ່ານມາ ທີ່ສະໜາມກິລາແຂວງຫຼວງພະບາງ, ໂດຍມີ ທ່ານ ສຸກັນ ບຸນຍົງ ເຈົ້າເມືອງຫຼວງພະບາງ ທັງເປັນປະທານຈັດງານ ແລະ ທ່ານ ຊາຍສະຫວັນ ຈັນມານິດ ຮອງຫົວໜ້າພະແນກສຶກສາທິການ ແລະ ກິລາແຂວງຫຼວງພະບາງ, ມີຄະນະນຳຈາກ 4 ເມືອງ, ຄະນະຮັບຜິດຊອບ, ຄູເຝິກ ແລະ ນັກກິລາ ພ້ອມດ້ວຍແຂກທີ່ຖືກເຊີນເຂົ້າຮ່ວມ.

 

      ການແຂ່ງຂັນກິລາເຂດຄັ້ງນີ້ ກໍ່ເພື່ອສ້າງຂະບວນການສະເຫຼີມສະຫຼອງວັນປະຫວັດສາດ ທີ່ສຳຄັນຂອງພັກ-ລັດ ໂດຍສະເພາະແມ່ນວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 63 ປີ (22 ມີນາ 1955-22 ມີນາ 2018), ວັນແມ່ຍິງສາກົນ ຄົບຮອບ 108 ປີ (8 ມີນາ 1910-8 ມີນາ 2018). ໃນນີ້ ພິເສດ ກໍ່ຄືການເປີດປີທ່ອງທ່ຽວລາວ 2018 ແລະ ການກຽມປະກາດເມືອງຫຼວງພະບາງ ໃຫ້ເປັນນະຄອນຫຼວງພະບາງໃນມໍ່ໆນີ້. ອີກດ້ານໜຶ່ງກໍ່ເພື່ອເປັນການແລກປ່ຽນບົດຮຽນເຊິ່ງກັນແລະກັນ ລະຫວ່າງເມືອງຕໍ່ເມືອງ ແລະ ນັກກິລາແຕ່ລະພາກສ່ວນມີຄວາມສາມັກຄີໄມຕີຈິດມິດຕະພາບອັນໜັກແໜ້ນ ໃນການຮ່ວມມືປະສານສົມທົບພົວພັນທາງດ້ານວຽກງານ ເວົ້າລວມ, ເວົ້າສະເພາະແມ່ນ ວຽກງານການທ່ອງທ່ຽວ, ວຽກງານກິລາ-ກາຍະກຳ ແລະ ສິລະປະ-ວັນນະຄະດີ ໃນຕໍ່ໜ້າ.

      ການແຂ່ງຂັນດັ່ງກ່າວ ປະກອບມີ 6 ປະເພດກິລາ ຄື: ເຕະບານ, ບານສົ່ງ, ກະຕໍ້, ແລ່ນ-ລານ,ໜ້າເກັກ ແລະ ເປຕັງ. ຜ່ານການແຂ່ງຂັນ ຕະຫຼອດໄລຍະ 3 ວັນຜົນປະກົດວ່າ: ຊະນະເລີດປະເພດກິລາເຕະບານຊາຍ ເມືອງຫຼວງພະບາງເຈົ້າພາບ, ຊະນະເລີດ ບານສົ່ງຊາຍ ເມືອງພູຄູນ, ຊະນະເລີດ ກະຕໍ້ຊາຍ ເມືອງຊຽງເງິນ, ຊະນະເລີດ ກະຕໍ້ຍິງ ເມືອງຫຼວງພະບາງ, ຊະນະເລີດ ແລ່ນ-ລານ 800 ແມັດຊາຍ ເມືອງຫຼວງພະບາງ ເຈົ້າພາບ, ຊະນະເລີດ ແລ່ນ-ລານ 800 ແມັດຍິງ ເມືອງພູຄູນ, ຊະນະເລີດ  ແລ່ນ-ລານ 3.000 ແມັດຍິງ ແລະ 5.000 ແມັດຊາຍ ເມືອງພູຄູນ, ຊະນະເລີດ ກິລາເຕັ້ນຍາວຊາຍ ເມືອງຫຼວງພະບາງ, ຊະນະເລີດ ເຕັ້ນຍາວຍິງ ເມືອງຊຽງເງິນ, ຊະນະເລີດ ກິລາໜ້າເກັກຊາຍ ເມືອງຫຼວງພະບາງ ແລະ ຊະນະເລີດ ໜ້າເກັກຍິງ ເມືອງພູຄູນ. ສ່ວນກິລາເປຕັງທີມການນຳ ຊະນະເລີດ ເມືອງຫຼວງພະບາງ.

ສະຫຼຸບຕາຕະລາງຫຼຽນລາງວັນ ອັນດັບ 1 ເມືອງຫຼວງພະບາງ ເຈົ້າພາບ ຍາດໄດ້ 6 ຫຼຽນຄຳ, 4 ຫຼຽນເງິນ ແລະ 5 ຫຼຽນທອງ ລວມ 15 ຫຼຽນ, ອັນດັບ 2 ເມືອງພູຄູນ ຍາດໄດ້ 5 ຫຼຽນຄຳ, 6 ຫຼຽນເງິນ ແລະ 1 ຫຼຽນທອງ ລວມ 12 ຫຼຽນ, ອັນດັບ 3 ເມືອງຊຽງເງິນ ຍາດໄດ້ 2 ຫຼຽນຄຳ ແລະ 4 ຫຼຽນທອງ ລວມ 6 ຫຼຽນ ແລະ ອັນດັບ 4 ເມືອງນານ ຍາດໄດ້ 3 ຫຼຽນເງິນ ແລະ 3 ຫຼຽນທອງ ລວມ 6 ຫຼຽນ.ຕອນທ້າຍຂອງພິທີ ທ່ານ ສຸກັນ ບຸນຍົງ ເຈົ້າເມືອງຫຼວງພະບາງ ໄດ້ໃຫ້ກຽດມອບທຸງກິລາ ໃຫ້ເມືອງຊຽງເງິນ ເພື່ອເປັນເຈົ້າພາບ ຄັ້ງທີ 5 ໃນປີ 2019 ແລະ ກ່າວຮັບທຸງກິລາໂດຍ ທ່ານ  ສາຍສະໝອນ ທິດາກອນ ເຈົ້າເມືອງຊຽງເງິນ.