ສປອ ປະຊຸມ ສະພາທີ່ປຶກສາການສຶກສາພາກເອກະຊົນ ສະໄໝສາມັນ ຄັ້ງທີ 6 ປະຈໍາປີ 2017

ສຶກສາ

Written by Super User

ສປອ ປະຊຸມ ສະພາທີ່ປຶກສາການສຶກສາພາກເອກະຊົນ ສະໄໝສາມັນ ຄັ້ງທີ 6 ປະຈໍາປີ 2017

28125075 1323434074425408 133259228 o   ຫ້ອງການສະພາທີ່ປຶກສາການສຶກສາພາກເອກະຊົນ (ສປອ) ກະຊວງສຶກສາທິການ ແລະ ກິລາ ໄດ້ຈັດກອງປະຊຸມສະພາທີ່ປຶກສາພາກເອກະຊົນ ສະໄໝສາມັນ ຄັ້ງທີ 6 ປະຈໍາປີ 2017 ໃນວັນທີ 13 ກຸມພາ ຜ່ານມາ ທີ່ສະໂມສອນເຂື່ອນໄຟຟ້ານໍ້າງື່ມ 1 (ທ່າລາດ) ເມືອງແກ້ວອຸດົມ ແຂວງວຽງຈັນ, ໂດຍໃຫ້ກຽດເປັນປະທານຂອງ ທ່ານ ຮສ.ປອ ກອງສີ ແສງມະນີ ຮອງລັດຖະມົນຕີ ກະຊວງສຶກສາທິການ ແລະ ກິລາ ທັງເປັນຜູ້ຊີ້ນໍາວຽກງານການສຶກສາພາກເອກະຊົນ, ມີທ່ານ ຄໍາພອນ ໄຊສົມພູ ຫົວໜ້າຫ້ອງການສະພາທີ່ປຶກສາການສຶກສາພາກເອກະຊົນ ໃນນາມເລຂາ, ຜູ້ປະຈໍາການ ສະພາທີ່ປຶກສາການສຶກສາພາກເອກະຊົນ, ພ້ອມດ້ວຍຫົວໜ້າ-ຮອງຫົວໜ້າຫ້ອງການ, ກົມ, ຜູ້ອໍານວຍການສູນ, ສະຖາບັນ, ພະແນກ, ຂະແໜງການ, ພະນັກງານວິຊາການ ຈາກກະຊວງສຶກສາທິການ ແລະ ກິລາ ແລະ ຄະນະບໍລິຫານງານ-ຜູ້ປະສານສະມາຄົມການສຶກສາພາກເອກະຊົນເຂົ້າຮ່ວມຢ່າງພ້ອມພຽງ.

     

      ກອງປະຊຸມດັ່ງກ່າວ, ໄດ້ຈັດຂຶ້ນເປັນ ຄັ້ງທີ 6 ເພື່ອຜ່ານບົດລາຍງານຜົນການຈັດຕັ້ງປະຕິບັດບົດບັນທຶກກອງປະຊຸມສະພາທີປຶກສາການສຶກສາພາກເອກະຊົນ ຄັ້ງທີ 5 ປະຈໍາປີ 2017 ທີ່ໄດ້ຮັບການແກ້ໄຂ ແລະ ຄົງຄ້າງ; ຜ່ານຮ່າງສະຫຼຸບການຈັດຕັ້ງເຄື່ອນໄຫວ 6 ເດືອນ ທ້າຍປີ 2017 ແລະ ທິດທາງແຜນການເຄື່ອນໄຫວ 6 ເດືອນ ຕົ້ນປີ 2018 ຂອງສະພາທີປຶກສາການສຶກສາພາກເອກະຊົນ ແລະ ປຶກສາຫາລື ແລກປ່ຽນບົດຮຽນ ແລະ ກໍານົດວິທີການແກ້ໄຂສະພາບບັນຫາທີ່ຄົງຄ້າງ ໃນການຄຸ້ມຄອງ ແລະ ສົ່ງເສີມການສຶກສາພາກເອກະຊົນໃນ 1 ປີຜ່ານມາ.ໂອກາດດັ່ງກ່າວ, ທ່ານ ຮສ.ປອ ກອງສີ ແສງມະນີ ກໍ່ໄດ້ກ່າວສະແດງຄວາມຍ້ອງຍໍຊົມເຊີຍທີ່ພາກສ່ວນດັ່ງກ່າວຈັດຕັ້ງປະຕິບັດກອງປະຊຸມໃນຄັ້ງນີ້, ເຊິ່ງເປັນກອງປະຊຸມທີ່ສໍາຄັນ ໂດຍຜູ້ເຂົ້າຮ່ວມກອງປະຊຸມຕ້ອງໄດ້ເອົາໃຈໃສ່ບາງບັນຫາເປັນຕົ້ນແມ່ນ ເບິ່ງຄືນບົດບັນທຶກຄັ້ງກ່ອນທີໄດ້ປະຕິບັດຫຍັງແດ່ແລ້ວ, ຕ້ອງສືບຕໍ່ແກ້ໄຂບັນຫາໃດແດ່; ບັນຫາທີ່ໂຮງຮຽນ ຫຼື ສະຖາບັນການສຶກສາພາກເອກະຊົນ ທີ່ກໍາລັງສະເໜີກະຊວງສຶກສາທິການ ແລະ ກິລາ ກໍ່ຄືລັດຖະບານ ຈະໄດ້ຄົ້ນຄວ້າສະເໜີຕໍ່ສະພາ ຖ້າສະພາຕົກລົງໄດ້ກໍ່ຕົກລົງ ຖ້າຕົກລົງບໍ່ໄດ້ກໍ່ຈະສະເໜີຕໍ່ການນໍາກະຊວງສຶກສາທິການ ແລະ ກິລາ ເພື່ອແກ້ໄຂ; ສັງເກດເບິ່ງໄລຍະຜ່ານມາ ຕໍ່ກັບປາກົດການຫຍໍ້ທໍ້ທີ່ເກີດຂຶ້ນໃນສັງຄົມກໍ່ຕ້ອງພ້ອມກັນແກ້ໄຂ ສ່ວນບັນຫາທີ່ເປັນອັນຕັ້ງໜ້າກໍ່ຈັດຕັ້ງເສີມຂະຫຍາຍ. ນອກຈາກນີ້, ກໍ່ຍັງມີບັນຫາອື່ນໆ ທີ່ພົວພັນກັບການສຶກສາພາກເອກະຊົນ ພ້ອມທັງຮຽກຮ້ອງໃຫ້ຜູ້ທີ່ເຂົ້າຮ່ວມກອງປະຊຸມເອົາໃຈໃສ່ໃນປະກອບຄໍາຄິດຄໍາເຫັນ ເພື່ອນໍາໄປຜັນຂະຫຍາຍ, ຈັດຕັ້ງປະຕິບັດໃຫ້ເກີດຜົນປະໂຫຍດ.

      ກອງປະຊຸມດັ່ງກ່າວ, ໄດ້ດໍາເນີນໃນລະຫວ່າງວັນທີ13-14 ກຸມພາ 2018 ໂດຍຜູ້ເຂົ້າຮ່ວມກອງປະຊຸມໄດ້ຄົ້ນຄວ້າປະກອບຄໍາຄິດຄໍາເຫັນຕໍ່ກັບການສະເໜີຂໍຂະຫຍາຍຊັ້ນຮຽນຂອງໂຮງຮຽນ ອີຊາລອນ ແລະ ໂຮງຮຽນແສງດາລາ; ປຶກສາຫາລື ແລະ ປະກອບຄໍາເຫັນໃສ່ວຽກງານຈັດຕັ້ງ ການຮຽນ-ການສອນຂອງໂຮງຮຽນຈໍານວນໜຶ່ງຍັງບໍ່ທັນໄດ້ຮັບອະນຸຍາດ ແຕ່ໄດ້ທົດລອງໄປກ່ອນ; ປຶກສາຫາລື ແລະ ປະກອບຄໍາເຫັນໃສ່ວຽກງານການແບ່ງຂັ້ນຄຸ້ມຄອງສະຖານການສຶກສາ ໃນແຕ່ລະຂັ້ນຍັງບໍ່ທັນລົງຕົວຕາມທີ່ໄດ້ກໍານົດໄວ້ໃນກົດໝາຍທີ່ກ່ຽວຂ້ອງ (ການລົງທຶນຂອງຕ່າງປະເທດເຂົ້າໃນການສຶກສາ, ໂຮງຮຽນນາໆຊາດ, ສາຂາມະຫາວິທະຍາໄລຂອງຕ່າງປະເທດຢູ່ ສປປ ລາວ, ການຢັ້ງຢືນສະຖານການສຶກສາ, ໂຮງຮຽນ, ສູນ, ວິທະຍາໄລ ເປັນຕົວແທນທີ່ຈັດສົ່ງຜູ້ຮຽນໄປຮຽນຕໍ່ຢູ່ຕ່າງປະເທດ; ປຶກສາຫາລືການດໍາເນີນເອກະສານ ແລະ ຂັ້ນຕອນຂໍອະນຸມັດຈາກຂັ້ນເທິງຂອງແຕ່ລະໆດັບຊັ້ນຮຽນ (ກ່ອນໄວຮຽນ, ສາມັນສຶກສາ, ອາຊີວະ ແລະ ການສຶກສາຊັ້ນສູງ ແລະ ການພົວພັນຕ່າງປະເທດຂອງສະຖານການສຶກສາພາກເອກະຊົນ (ການເຊັນສັນຍາ ແລະ ການຈັດຕັ້ງປະຕິບັດສັນຍາ, ການຂໍວິຊາ ແລະ ການຢ້ຽມຢາມແລກປ່ຽນບົດຮຽນຂອງສະຖານການສຶກສາ ແລະ ສະມາຄົມການສຶກສາພາກເອກະຊົນ).

(ບຸນທະວີ)