ຮອງລັດຖະມົນຕີ ສສກ ຕ້ອນຮັບ ເອກອັກລັດຖະຖະທູດສະເປນຄົນໃໝ່

ສຶກສາ

Written by Super User

ຮອງລັດຖະມົນຕີ ສສກ ຕ້ອນຮັບ ເອກອັກລັດຖະຖະທູດສະເປນຄົນໃໝ່

    28079758 1323434027758746 1497256147 o  ທ່ານ ຮສ.ປອ ຄຳຜາຍ ສີສະຫວັນ ຮອງລັດຖະມົນຕີ ກະຊວງສຶກສາທິການ ແລະ ກິລາ ໄດ້ໃຫ້ກຽດຕ້ອນຮັບການເຂົ້າຢ້ຽມຄຳນັບຂອງ ທ່ານ ອິມີລີໂອ ເດີ ມິເກວ ຄາລາເບຍ ເອກອັກຄະລັດຖະທູດ ສະເປນ ປະຈໍາສປປ ລາວ ຄົນໃໝ່ ເນື່ອງໃນໂອກາດເດີນທາງມາຍື່ນສານຕາຕັ້ງຕໍ່ ພະນະທ່ານ ປະທານປະເທດແຫ່ງ ສປປ ລາວ ເພື່ອດຳລົງຕຳແໜ່ງ ເປັນເອກອັກຄະລັດຖະທູດ ສະເປນ ປະຈຳ ສປປລາວ ຄົນໃໝ່ ຢ່າງເປັນທາງການ ທີ່ສຳນັກກະຊວງສຶກສາທິການ ແລະ ກິລາ ເມື່ອວັນທີ 10 ກຸມພາ ຜ່ານມາ, ມີບັນດາຫົວໜ້າ-ຮອງຫົວໜ້າກົມທີ່ກ່ຽວຂ້ອງ, ພະນັກງານ, ວິຊາການ ແລະ ພາກສ່ວນທີ່ກ່ຽວຂ້ອງທັງ 2 ຝ່າຍ ເຂົ້າຮ່ວມ.

     

 

      ໂອກາດດັ່ງກ່າວ, ທ່ານ ອິມີລີໂອ ເດີ ມິເກວ ຄາລາເບຍ ກ່າວໃຫ້ຮູ້ວ່າ: ການເຂົ້າຢ້ຽມຄໍານັບຄັ້ງນີ້ ແມ່ນເນື່ອງໃນໂອກາດທີ່ໄດ້ເດີນທາງມາ ຍື່ນສານຕາຕັ້ງຕໍ່ ພະນະທ່ານປະທານປະເທດແຫ່ງ ສປປ ລາວ ເພື່ອດຳລົງຕຳແໜ່ງ ເປັນເອກອັກຄະລັດຖະທູດ ສະເປນ ປະຈຳ ສປປ ລາວ ຄົນໃໝ່. ນອກຈາກນັ້ນ, ກໍ່ເພື່ອໄດ້ປຶກສາຫາລືກັນກ່ຽວກັບການຮ່ວມມື ທາງດ້ານການສຶກສາ ລະຫວ່າງ 2 ປະເທດ ທັງໄລຍະຜ່ານມາ ແລະ ການຮ່ວມມືກັນໃນອະນາຄົດ ໂດຍທາງສະເປນໄດ້ສະເໜີ ໃຫ້ການຊ່ວຍເຫຼືອ ກ່ຽວກັບການເປີດຫຼັກສູດ ການຮຽນ-ການສອນ ພາສາຝຣັ່ງ ໃນສະຖານການສຶກສາ ໂດຍສະເພາະແມ່ນມະຫາວິທະຍາໄລ 4 ແຫ່ງຂອງລາວ ໂດຍຜ່ານການປະສານງານລະຫວ່າງ ມະຫາວິທະຍາໄລຂອງລາວ ແລະ ມະຫາວິທະຍາໄລຂອງສະເປນ ໃນການ​ຍົກ​ລະດັບ​ຄູ ​ແລະ ໃຫ້ການຊ່ວຍເຫຼືອທຶນການສຶກສາ ແກ່ຄູສອນ ແລະ ນັກສຶກສາລາວ ເພື່ອຍົກລະດັບຄວາມຮູ້ດ້ານພາສາຝຣັ່ງ ໃຫ້ມີຄວາມຊໍານານ  ຕະຫຼອດຮອດການສະໜັບສະໜຸນດ້ານການກິລາ ໂດຍເນັ້ນໜັກ ກິລາເຕະບານ, ເຊິ່ງການຮ່ວມມືດັ່ງກ່າວ ໃຫ້ຜ່ານໂຄງການຂອງສະຫະພາບຢູໂຣບ ຫຼື EU.

      ຂະນະດຽວກັນ, ທ່ານ ຮສ.ປອ ຄຳຜາຍ ສີສະຫວັນ ​ໄດ້​ກ່າວ​ສະ​ແດງ​ຄວາມ​ຂອບ​ໃຈ​ຕໍ່​ທ່ານ ເອກອັກຄະລັດຖະທູດ ສະເປນ ປະຈໍາ ສປປ ລາວ ຄົນໃໝ່ ທີ່ສະແດງເຈດຈຳນົງຈະ​ໄດ້​ສືບ​ຕໍ່​ການ​ຮ່ວມ​ມື​​ໃນ​ຂະ​ແໜງ​ການ​ສຶກສາ ​ແລະ ກິລາ ​​​ເປັນ​ຕົ້ນ​ແມ່ນ​ການ​ຮຽນ-ການ​ສອນ​ພາສາຝຣັ່ງ, ຍົກ​ລະດັບ​ຄູ ​​ແລະ ຊ່ວຍ​ເຫຼືອ​ເຝິກ​ຄູ​ໃນ​ດ້ານ​ກິລາ ​ໃຫ້​ມີ​ຄວາມ​ຊໍານານ ​ແລະ ມີ​ຄຸນະພາບ​ສູງ​ຂຶ້ນ ໃນອະນາຄົດ.

​ໂດຍ: ນາງ ຕຸ່ນ​ຄໍາ