ມອບ-ຮັບ​ ຕຳ​ແໜ່ງ​ຜູ້​ອຳ​ນວຍ​ການ​ ສະໜາມກິລາແຫ່ງຊາດ ຜູ້ເກົ່າ-ຜູ້ໃໝ່ ຢ່າງເປັນທາງການ

ສຶກສາ

Written by Super User

ມອບ-ຮັບ​ ຕຳ​ແໜ່ງ​ຜູ້​ອຳ​ນວຍ​ການ​ ສະໜາມກິລາແຫ່ງຊາດ  ຜູ້ເກົ່າ-ຜູ້ໃໝ່ ຢ່າງເປັນທາງການ

   28310262 1328663140569168 1715078350 o   ພິທີມອບ-ຮັບຕຳແໜ່ງດັ່ງກ່າວ ໄດ້ຈັດຂຶ້ນໃນວັນທີ 16 ກຸມພາ ຜ່ານມາ ທີ່ສະໜາມກິລາແຫ່ງຊາດ (ຫຼັກ 16) ນະຄອນຫຼວງວຽງຈັນ, ລະຫວ່າງ ທ່ານ ສີ​ທາ ຈູ​ຢາ​ປະ​ເສີດ ຮັກ​ສາ​ການຜູ້​ອຳ​ນວຍ​ການ​ສະ​ໜາມ​ກິ​ລາ​ແຫ່ງ​ຊາດ ທີ່ຮັກສາການແທນ ທ່ານ ຄູນ​ເພັງ ຄຳ​ມັງ ຜູ້​ອຳ​ນວຍ​ການ​ສະ​ໜາມ​ກິ​ລາ​ແຫ່ງ​ຊາດ ຄົນ​ເກົ່າ ທີ່ເຂົ້າຮັບເບ້ຍບຳນານໄປແລ້ວ ​ແລະ ທ່ານ ສຸ​ລິ​ວັນ ເຊີນ​ວິ​ໄລ ​ຮອງ​ຫົວ​ໜ້າ​ກົມ​ກິ​ລາ​ລະ​ດັບ​ສູງ ທີ່ຍ້າຍໄປເປັນຜູ້ອຳນວຍການສະໜາມກິລາແຫ່ງຊາດ ຜູ້ໃໝ່ ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ບົວ​ລານ ສິ​ລິ​ປັນ​ຍາ ຮອງ​ລັດ​ຖະ​ມົນ​ຕີ​ ກະ​ຊວງ​ສຶກ​ສາ​ທິ​ການ ແລະ ກິ​ລາ, ທ່ານ ແສງ​ພອນ ພົນ​ອາ​ມາດ ຫົວ​ໜ້າ​ກົມ​ກິ​ລາ​ລະ​ດັບ​ສູງ ກະ​ຊວງ​ສຶກ​ສາທິ​ການ ແລະ ກິ​ລາ ແລະ ທ່ານ ນາງ ບົວ​ຄຳ ດາວ​ສະ​ຫວັນ ຮອງ​ຫົວ​ໜ້າ​ກົມ​ຈັດ​ຕັ້ງ ແລະ ພະ​ນັກ​ງານ ກະ​ຊວງສຶກ​ສາ​ທິ​ການ ແລະ ກິ​ລາ, ມີ​ຮອງ​ຫົວ​ໜ້າ​ກົມ, ຫົວ​ໜ້າ​ພະ​ແນກ, ຄະນະອຳ​ນວຍ​ການ, ຫົວ​ໜ້າ​ຂະ​ແໜງ, ພະ​ນັກ​ງານ ແລະ ພາກສ່ວນທີ່ກ່ຽວຂ້ອງ.

      ໂອ​ກາດ​ດັ່ງ​ກ່າວ, ທ່ານ ​ສີ​ທາ ຈູ​ຢາ​ປະ​ເສີດ ໄດ້​ກ່າວອຳ​ລາຕຳ​ແໜ່ງ ແລະ ຜ່ານ​ບົດ​ສະຫຼຸບ​ຫ​ຍໍ້​ການ​ຈັດ​ຕັ້ງ​ເຄື່ອນ​ໄຫວ​ໄລ​ຍະ​ຜ່ານ​ມາໃຫ້ຮູວ່າ: ​ສະ​ໜາມ​ກິ​ລາ​ແຫ່ງ​ຊາດ (ຫຼັກ 16) ແມ່ນ​ໄດ້​ເລີ່ມ​ກໍ່​ສ້າງ​ຂຶ້ນ​ໃນ​ວັນ​ທີ 3 ເມ​ສາ 2007 ເປັນ​ຕົ້ນ​ມາ ດ້ວຍ​ທຶນ​ຂອງລັດ​ຖະ​ບານ ສ​ປ​ປ ລາວ ໂດຍມອບ​ໃຫ້​ກຸ່ມ​ບໍ​ລິ​ສັດ ວິ​ສາ​ວະ​ກຳ ຢູ​ນນານ ສ​ປ ຈີນ ເປັນ​ຜູ້​ຮັບ​ຜິດ​ຊອບ ໂຄງ​ການ​ກໍ່​ສ້າງ​ທັງ​ໝົດ ແລະ ໄດ້​ສຳ​ເລັດ​ລົງ​ພ້ອມມອບ-ຮັບ ນຳ​ໃຊ້​ຢ່າງ​ເປັນ​ທາງ​ການ ໃນ​ວັນ​ທີ 22 ກັນ​ຍາ 2009 ໂດຍ​ພາຍ​ໃຕ້ການ​ຄຸ້ມ​ຄອງ​ຂອງ​ຄະ​ນະ​ກຳ​ມະ​ການ​ກິ​ລາ-ກາ​ຍະ​ກຳ​ແຫ່ງ​ຊາດ (ຄກ​ຊ) ໃນ​ເມື່ອ​ກ່ອນ ເພື່ອ​ກະ​ກຽມ ແລະ ຮອງ​ຮັບ​ໃຫ້​ແກ່​ງານ​ມະ​ຫາກຳ​ກິ​ລາ​ຊີ​ເກມ ຄັ້ງ​ທີ 25 ປີ 2009 ທີ່ສປປ ລາວເຮົາ ​ໄດ້​ຮັບ​ກຽດ​ເປັນ​ເຈົ້າ​ພາບ ເຊິ່ງ​ລວມ​ມີ​ເນື້ອ​ທີ່​ທັງ​ໝົດ 125 ເຮັກ​ຕາ ປະ​ກອບ​ມີ​ສະ​ໜາມ​ແຂ່ງ​ຂັນ​ກິ​ລາ​ປະ​ເພດ​ຕ່າງໆ ປະ​ກອບ​ມີ: ສະ​ໜາມ​ກິ​ລາ​ບານ​ເຕະ 2 ສະ​ໜາມ, ສະ​ໜາມ​ກິ​ລາ​ລອຍ​ນ້ຳ 3 ສະໜາມ, ສະ​ໜາມ​ກິ​ລາ​ເທັນ​ນິ​ສ 1 ສະ​ໜາມ, ສະ​ໜາມ​ກິ​ລາ​ໃນ​ຮົ່ມ I ສະ​ໜາມ (ດອກ​ປີກ​ໄກ່) 1 ສະ​ໜາມ, ສະ​ໜາມ​ກິ​ລາ​ໃນ​ຮົ່ມ II (ບານ​ສົ່ງ​ໃນ​ຮົ່ມ) 1 ສະ​ໜາມ, ສະ​ໜາມ​ກິ​ລາ​ບານ​ສົ່ງ​ຫາດ​ຊາຍ 1 ສະ​ໜາມ, ສະ​ໜາມ​ກິ​ລາ​ຍິງ​ປືນ 1 ສະ​ໜາມ ແລະ ສະ​ໝາ​ມ​ກິ​ລາ​ຍິງ​ທະ​ນູ 1 ສະ​ໜາມ. ສ່ວນ​ການ​ເຄື່ອນ​ໄຫວ​ໄລ​ຍະ​ຜ່ານມາ ພາຍຫຼັງ​ສິ້ນ​ສຸດ​ງານ​ແຂ່ງ​ຂັນ​ກິ​ລາ​ຊີ​ເກມ ຄັ້ງ​ທີ 25 ປີ 2009 ສະ​ໜາມ​ກິ​ລາ​ແຫ່ງ​ຊາດ ໄດ້​ຮອງ​ຮັບ​ໃຫ້​ແກ່​ງານ​ສະ​ເຫຼີມ​ສະ​ຫຼອງ​ນະ​ຄອນຫຼວງວຽງ​ຈັນ ຄົບ​ຮອບ 450 ປີ ໃນ​ປີ 2010 ແລະ ມາ​ຮອດ​ເດືອນ​ມີ​ນາ ປີ 2011 ໄດ້​ມີ​ບົດ​ບັນ​ທຶກ​ການມອບ-ຮັບ​ການ​ຄຸ້ມ​ຄອງ​ນຳ​ໃຊ້​ສະ​ໜາມ​ກິ​ລາ​ປະ​ເພດ​ຕ່າງໆ ລະ​ຫວ່າງ ຄກ​ຊ ແລະ ບັນ​ດາ​ສະ​ຫະ​ພັນ​ກິ​ລາ​ແຫ່ງ​ຊາດ ປະເພດ​ຕ່າງໆ ​ເຂົ້າ​ມາ​ຄຸ້ມ​ຄອງ ແລະ ນຳ​ໃຊ້​ສະ​ໜາມ, ພ້ອມ​ທັງ​ປົກ​ປັກ​ຮັກ​ສາ​ຊັບ​ສິນ​ຂອງ​ພັກ-ລັດ ທີ່​ໄດ້​ປະ​ກອບ​ໄວ້​ໃຫ້ ຢູ່​ໃນ​ແຕ່​ສະ​ໜາມ ໃຫ້​ຢູ່​ໃນ​ສະ​ພາບ​ປົກ​ກະ​ຕິ, ຫຼັກ​ເວັ້ນ​ການ​ຕົກ​ເຮ່ຍ​ເສຍ​ຫາຍ ແລະ ຮັບ​ຜິດ​ຊອບ​ຕໍ່​ຄ່າ​ໃຊ້​ຈ່າຍ​ບໍ​ລິ​ຫານ​ຕ່າງໆ, ຕະຫຼອດ​ໄລ​ຍະ​ທີ່​ໄດ້​ມອບ​ໃຫ້​ບັນ​ດາ​ສະ​ຫະ​ພັນ​ກິ​ລາ​ແຫ່ງ​ຊາດ ເຂົ້າ​ມາ​ຄຸ້ມ​ຄອງ ແລະ ນຳ​ໃຊ້​ສະ​ໜາມ ພວກ​ເຮົາ​ສັງ​ເກດ​ເຫັນ​ວ່າ ບັນ​ດາ​ສະ​ຫະ​ພັນ​ກິ​ລາ​ດັ່ງ​ກ່າວ ແມ່ນ​ບໍ່​ສາ​ມາດ​ຮັບ​ພາ​ລະ ໃນ​ການ​ຊຳ​ລະ​ສະ​ສາງ​ຄ່າ​ໄຟ​ຟ້າ, ຄ່າ​ນ້ຳ​ປະ​ປາ, ການ​ປົກ​ປັກ​ຮັກ​ສາ, ການ​ບູ​ລະ​ນະ​ສ້ອມ​ແປງ ຕະຫຼອດ​ຮອດ​ການ​ອະ​ນາ​ໄມ​ຕຶກ​ອາ​ຄານ​ສະ​ຖານ​ທີ່​ຕ່າງໆ ເວົ້າ​ລວມ, ​ເວົ້​ສະ​ເພາະແມ່ນ​ເຮັດ​ບໍ່​ໄດ້​ເທົ່າ​ທີ່​ຄວນ ຊ້ຳ​ພັດ​ເປັນ​ການ​ສ້າງ​ໜີ້​ສິນ​ຄຸມ​ເຄືອ​ແກ່​ຍາວ ຄ້າງ​ຈ່າຍ​ໄວ້​ເປັນ​ຈຳ​ນວນຫຼວງຫຼາຍ ໂດຍ​ສະ​ເພາະ​ຄ່າ​ໄຟ​ຟ້າ ແລະ ນ້ຳ​ປະ​ປາ ຈົນ​ມາ​ຮອດ​ປັດ​ຈຸ​ບັນ​ນີ້.

      ​ຂະ​ນະ​ທີ່, ທ່ານ ສຸ​ລິ​ວັນ ເຊີນ​ວິ​ໄລ ກ່າວວ່າ: ສຳລັບແຜນ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ໃນ​ຕໍ່​ໜ້າ ກໍ່​ຄື ແຜນ​ງານ ແລະ ໂຄງ​ການ ແຕ່​ນີ້​ເຖິງ​ປີ 2022 ​ໂດຍສະ​ເພາະ​ແຜນ​ວຽກ​ຈຸດ​ສຸມ​ປະ​ຈຳ​ປີ 2018 ທີ່​ຈະ​ເລັ່ງ​ໃຫ້​ສຳ​ເລັດ ປະ​ກອບ​ມີ: ການ​ອະ​ນາ​ໄມ​ອາ​ຄານ​ສະ​ລອຍ​ນ້ຳ, ສະ​ນ້ຳ​ທັງ​ໝົດ ແລະ ບຳ​ບັດ​ນ້ຳ ໃຫ້​ສາ​ມາດ​ນຳ​ໃຊ້​ໄດ້ ພ້ອມ​ທັງ​ເປີດ​ບໍ​ລິ​ການ​ໃນ​ເດືອນ​ມີ​ນາ 2018, ຮັບ​ໃຊ້​ງານ​ແຂ່ງ​ຂັນ​ກິ​ລາ​ແຫ່ງ​ຊາດ ຄັ້ງ 11 ໃນ​ເດືອນ​ພະ​ຈິກ 2018 ແລະ ການ​ເຝິກ​ສອນ​ນັກ​ກິ​ລາ​ລອຍ​ນ້ຳ​ເຍົາ​ວະ​ຊົນ ພ້ອມ​ທັງ​ຮັບ​ໃຊ້​ການ​ເຝິກ​ແອບ​ນັກ​ກິ​ລາ​ທີມ​ຊາດ, ສ້ອມ​ແປງ​ແກ້​ໄຂ ລະ​ບົບ​ນ້ຳ​ປະ​ປາ ທີ່​ເປ່​ເສຍ​ຫາຍ ເພື່ອ​ຮັບ​ປະ​ກັນ​ການ​ໃຊ້​ຈ່າຍ​ຄ່າ​ໃຫ້​ປະ​ຢັດ ແລະ ໄຟ​ຟ້າ​ແສງ​ສະ​ຫວ່າ​ງ​ພາຍ​ໃນ​ສະ​ໜາມ​ກິ​ລາ​ຈຳ​ນວນ​ໜຶ່ງ, ຕັດ​ຫ​ຍ້າ​ສະ​ໜາມ​ກິ​ລາ​ທັງ​ໝົດ ບົວ​ລະ​ບັດ​ສະ​ໜາມ​ຫ​ຍ້າ ແລະ ສວນດອກ​ໄມ້​ໃຫ້​ມີ​ສີ​ຂຽວ​ກາຍ​ເປັນ​ສວນ​ສຸ​ຂະ​ພາບ ພ້ອມ​ທັງ​ສາ​ມາດ​ຈັດ​ກິດ​ຈະ​ກຳ​ຕ່າງໆ​ດ້ານ​ກິ​ລາ ເພື່ອ​ສ້າງ​ລາຍ​ຮັບ​ວິ​ຊາ​ການ​ອີກ​ດ້ານ​ໜຶ່ງ ແລະ ຂຶ້ນ​ແຜນ​ປັບ​ປຸງ​ອາ​ຄານ​ສະ​ໜາມ​ກິ​ລາ​ສ່ວນ​ທີ່​ເປ່​ເພ​ໃຫ້​ສາ​ມາດ​ນຳ​ໃຊ້​ໄດ້. ນອກ​ຈາກ​ນັ້ນ, ຍັງ​ມີ​ໂຄງ​ການ​ບຸ​ລິ​ມະ​ສິດ ທີ່​ຈະ​ເລັ່ງ​ໄດ້​ພ້ອມ​ກັນ ປະ​ກອບ​ມີ ສ້ອມ​ແປງ​ແກ້​ໄຂ ລະ​ບົບ​ໄຟ​ຟ້າ​ພາຍ​ໃນ​ສະ​ໜາມ​ກິ​ລາ​ທັງ​ໝົດ​ໃຫ້​ມີ​ແສງ​ສະ​ຫວ່າງ​ງາມ​ຕາ ແລະ ປອດ​ໄພ, ສົມ​ທົບ​ກັບ​ບັນ​ດາ​ສະ​ຫະ​ພັນ​ກິ​ລາ​ແຫ່ງ​ຊາດ ທີ່​ມີ​ສະ​ໜາມ​ກິ​ລາ​ປະ​ເພດ​ຕ່າງໆ ຮ່ວມ​ສ້າງ​ກິດ​ຈະ​ກຳ​ຈັດ​ການ​ແຂ່ງ​ຂັນ​ເພື່ອ​ພັດ​ທະ​ນາ​ກິ​ລາ​ຂອງ​ຕົນ ແລະ ນຳ​ໃຊ້​ສະ​ໜາມ​ໃຫ້​ເກີດ​ປະ​ໂຫຍດ​ສູງ​ສຸດ ແລະ ເປີດ​ກ້​ວາງ​ການ​ບໍ​ລິ​ການ​ສັງ​ຄົມ​ໃນ​ການ​ສ້າງ​ກິດ​ຈະ​ກຳ​ຕ່າງໆ ເພື່ອ​ສ້າງ​ລາຍ​ຮັບ​ດ້ານ​ວິ​ຊາ​ການ​ໃຫ້​ໄດ້ 40 ເປີ​ເຊັນ​ຂອງ​ແຜນ​ງົບ​ປະ​ມານ​ທີ່​ໄດ້​ຮັບ. ​ພ້ອມ​ກັບຈະ​ສຸມ​ໃສ່​ວຽກ​ງານໃໝ່​ຢ່າງ​ຕັ້ງ​ໜ້າ ແລະ ​ໃຫ້​ປະ​ສົບ​ຜົນ​ສຳ​ເລັດ.

      ໂອກາດດຽວກັນ, ທ່ານ ບົວ​ລານ ສິ​ລິ​ປັນ​ຍາ ​ໄດ້​ກ່າວ​ສະ​ແດງ​ຄວາມ​ຊົ​ມ​ເຊີຍ​ຕໍ່​ຜູ້​ອຳ​ນວຍ​ການ​ຜູ້ເກົ່າ ແລະ ຜູ້​ໃໝ່ ທີ່​ຕັ້ງ​ໜ້າ​ເຮັດ​ວຽກ​ງານ​ບໍ​ລິ​ຫານ​ສະ​ໜາມ​ກິ​ລາ​ແຫ່ງ​ຊາດ, ພ້ອມ​ກັບ​ມີ​ຄຳ​ເຫັນ ຕໍ່ຄະ​ນະ​ບໍ​ລິ​ຫານ​ງານ​ຊຸດ​ໃໝ່ ກໍ່​ຄືຜູ້​ອຳ​ນວຍ​ການ​ສະ​ໜາມ​ກິ​ລາ​ແຫ່ງ​ຊາດ ຄົນ​ໃໝ່ ຕັ້ງ​ໜ້າ​ປະ​ຕິ​ບັດ 5 ແຜນ​ງານ ແລະ 7 ໂຄງ​ການ​ບຸ​ລິ​ມະ​ສິດ ໃຫ້​ສຳ​ເລັດ. ແຕ່​ແນວ​ໃດ​ກໍ່​ຕາມ, ທ່ານ​ຍັງ​ໄດ້ຝາກ​ເຖິງ​ທຸກໆ​ທ່ານ ຈົ່ງເອົາ​ໃຈ​ໃສ່​ກັບ​ວຽກ​ງານ​ປະ​ສານ​ງານ​​ກັບ​ອຳ​ນາດ​ການ​ປົກ​ຄອງ​ບ້ານ ແລະ ​ເມືອງ​ໄຊ​ທາ​ນີ ເພື່ອ​ໃຫ້​ສະ​ໜາມ​ກິ​ລາ​ແຫ່ງ​ຊາດ ມີຄວາມ​ສະ​ດວກ, ຄວາມ​ສະ​ຫງົບ ແລະ ປອດ​ໄພ, ເອົາ​ໃຈ​ໃສ່​ການ​ຈັດ​ແບ່ງ​ຮັບ​ໃຊ້​ສັງ​ຄົມ, ສະ​ຫະ​ພັນ​ກິ​ລາ​ແຫ່ງ​ຊາດ​ຕ່າງໆ ແລະ ພາກ​ສ່ວນ ​ທີ່​ສົນ​ໃຈເຂົ້າ​ມາ​ນຳ​ໃຊ້​ບໍ​ລິ​ກາ​ນ ໃຫ້​ມີ​ຄວາມ​ເປັນ​ລະ​ບຽບ ແລະ ຊັດ​ເຈນ, ເອົາ​ໃຈ​ໃສ່​ກວດ​ກາ​ຄືນ​ໃໝ່​ ລະ​ບົບ​ໄຟ​ຟ້າ, ນ້ຳ​ປະ​ປາ ແລະ ອື່ນໆ ໃຫ້​ສົມ​ບູນ. ພ້ອມ​ກັບ​ໃຫ້​ທຸກໆ​ທ່ານ ຈົ່ງ​​ຮັກ​ສາ​ຄວາມ​ສາ​ມັກ​ຄີ​ພາຍ​ໃນ ໃຫ້​ເປັນ​ອັນ​ດຽວ​ກັນ.

ອຳໄພວັນ