ຫ້ອງການຄະນະພັກ ສສກ ຕີ​ລາຄາ​ຜົນ​ການ​ປະ​ເມີນໜ່ວຍພັກ​ເຂັ້ມ​ແຂງ-ຮູ້​ນຳພາ​ຮອບດ້ານ ປະຈຳ​ປີ 2016

ສຶກສາ

Written by Super User

ຫ້ອງການຄະນະພັກ ສສກ ຕີ​ລາຄາ​ຜົນ​ການ​ປະ​ເມີນໜ່ວຍພັກ​ເຂັ້ມ​ແຂງ-ຮູ້​ນຳພາ​ຮອບດ້ານ ປະຈຳ​ປີ 2016

28217823 1328662743902541 37166107 o   ຫ້ອງການຄະນະພັກ ກະຊວງສຶກສາທິການ ແລະ ກິລາ (ສສກ) ໄດ້ສະຫຼຸບຕີ​ລາຄາ​ຜົນ​ການ​ລົງ​​ຕິດຕາມປະ​ເມີນໜ່ວຍພັກ​ເຂັ້ມ​ແຂງ-ຮູ້​ນຳພາ​ຮອບດ້ານຂອງໜ່ວຍພັກ ​ທີ່​ຂຶ້ນ​ກັບອົງຄະນະ​ພັກ​ກະຊວງ​ສຶກສາ​ທິການ ​ແລະ​ ກິລາ ປະຈຳ​ປີ 2016 ແລະ ທິດທາງແຜນການກໍ່ສ້າງໜ່ວຍພັກ​ເຂັ້ມ​ແຂງ-ຮູ້​ນຳພາ​ຮອບດ້ານ ປີ 2017 ໃນວັນ​ທີ 15 ກຸມພາ ຜ່ານ​ມາ ທີ່​ຫ້ອງ​ປະຊຸມ​ສໍານັກງານ​ກະຊວງ​ ສສກ (ຂ້າງສະໜາມກິລາ​ເຈົ້າ​ອານຸວົງ), ​​ໃຫ້​ກຽດ​ເຂົ້າ​ຮ່ວມ​ຂອງ​ ສະຫາຍ ບົວ​ລານ  ສິລິ​ປັນຍາ ຄະນະ​ປະ​ຈໍາ​ພັກ, ຮອງ​ລັດຖະມົນຕີ ກະຊວງ​ສຶກສາ​ທິການ ​ແລະ ກິລາ ພ້ອມ​ດ້ວຍ​ເລຂາ​ຄະນະ​ພັກ​ມະຫາວິທະຍາ​ໄລ​ແຫ່ງ​ຊາດ, ​ເລຂາ​ຄະນະ​ພັກ​ຮາກ​ຖານ ​ແລະ ​ເລຂາ​ໜ່ວຍພັກ​ເອກະລາ​ດ ທີ່​ຂຶ້ນ​ກັບ​ອົງຄະ​ນະ​ພັກ​ກະຊວງ​ ສສກ ເຂົ້າ​ຮ່ວມ.

 

      ​ໂອກາດ​ດັ່ງກ່າວ, ສະ​ຫາຍ ພູທອນ ສີ​ລິ​ອຸດົມ ຜູ້ກວດກາໜ່ວຍພັກ, ຮອງ​ຫົວໜ້າ​ຫ້ອງການ​ຄະນະ​ພັກ ກະຊວງ​ສຶກສາ​ທິການ​ແລະ ກິລາ ​ໄດ້​ສະຫຼຸບຕີ​ລາຄາ​ຜົນ​ການ​ລົງ​ຕິດຕາມ​ການ​ປະ​ເມີນໜ່ວຍພັກ​ເຂັ້ມ​ແຂງ-ຮູ້​ນຳພາ​ຮອບດ້ານ ປີ 2016 ​ໃຫ້​ຮູ້​ວ່າ: ບັນດາໜ່ວຍພັກ​ທີ່​ຂຶ້ນ​ກັບ​ອົງຄະ​ນະ​ພັກກະຊວງ​ສຶກສາ​ທິການ ​ແລະ ກິລາ ມີ​ຈຸດ​ພິ​ເສດ​ແຕກ​ຕ່າງ​ກັນທາງ​ດ້ານ​ວຽກງານ, ວິຊາ​ການ ​ແລະ ສະພາບ​ແວດ​ລ້ອມ​ຕ່າງໆ, ​ເຊິ່ງ​ໄດ້​ແບ່ງ​ອອກ​ເປັນ 2 ລະດັບ​ ຄື: ໜ່ວຍພັກ​ເອກະລາດ ​ທີ່​ຂຶ້ນ​ກັບ​ອົງຄະ​ນະ​ພັກ​ກະຊວງ​ໂດຍ​ກົງ ຈໍານວນທັງ​ໝົດ 36 ໜ່ວຍ ​ແລະ ມີ 10 ໜ່ວຍພັກ​ ທີ່​ຂຶ້ນ​ກັບ​ຮາກ​ຖານ​ພັກ (ມີ 3 ຮາກ​ຖານ​ພັກ), ມີ 75 ໜ່ວຍ​ພັກ ​ທີ່​ຂຶ້ນ​ກັບ​ອົງຄະ​ນະ​ພັກ​ມະຫາວິທະຍາ​ໄລ​ແຫ່ງ​ຊາດ (ມີ 13 ຮາກ​ຖານ​ພັກ), ແຜນການ​ກໍ່ສ້າງໜ່ວຍພັກ​ເຂັ້ມ​ແຂງ-ຮູ້​ນຳພາ​ຮອບ​ດ້ານ ​ໃນ​ປີ 2016 ຈຳນວນທັງໝົດ 122  ໜ່ວຍ (ນັບທັງມະຫາວິທະຍາ​ໄລ​ແຫ່ງ​ຊາດ)​ ແລະ ​ໃນ​ປີ 2016 ​ໄດ້​ລົງຕິດຕາມປະເມີນຕົວຈິງ ຈຳ​ນວນ  113 ໜ່ວຍ (ມຊ 75 ໜ່ວຍ, ສຳນັກ ແລະ ອ້ອມຂ້າງກະຊວງ 38 ໜ່ວຍ) ຫຼຸດ​ຄາດໝາຍ 9 ໜ່ວຍ ເທົ່າກັບ 10,98 ​ເປີ​ເຊັນ ຂອງໜ່ວຍພັກ ທີ່ສ້າງແຜນ​ສູ້​ຊົນໃຫ້​ໄດ້​ເປັນໜ່ວຍພັກ​​ເຂັ້ມແຂງ-ຮູ້​ນຳພາ​ຮອບດ້ານ ​ແລະ ສ່ວນໜ່ວຍພັກທີ່​ເຫຼືອ​​ແມ່ນເລື່ອນໄປປະ​ເມີນ ປະ​ຈໍາປີ 2017 ເນື່ອງຈາກວ່າກາຍເວລາຫຼາຍແລ້ວ.

      ສໍາລັັບຜົນການປະເມີນຂອງ​ບັນດາໜ່ວຍພັກ ​ແລະ ສະມາຊິກ​ພັກ. ​ໃນ​ນັ້ນ, ຜົນ​ການ​ປະ​ເມີນ​ໜ່ວຍ​ພັກ, ​ເຊິ່ງບັນດາໜ່ວຍພັກ ທີ່ໄດ້ລົງຕິດຕາມປະເມີນທັງໝົດ  113 ໜ່ວຍ (ສຳນັກ ແລະ ອ້ອມຂ້າງກະຊວງມີທັງໝົດ 38 ໜ່ວຍ, ມຊ ຈຳນວນ 75 ໜ່ວຍ) ເທົ່າກັບ 92,62 ເປີເຊັນ ຫຼຸດຄາດໝາຍວາງໄວ້ 7,38 ເປີເຊັນ, ໜ່ວຍພັກເຂັ້ມແຂງ-ຮູ້ນຳພາຮອບດ້ານ 100 ໜ່ວຍ ເທົ່າກັບ  81,97 ເປີເຊັນ ຂອງ​ຈໍານວນ​ໜ່ວຍ​ພັກ​ທັງ​ໝົດ ຖ້າທຽບໃສ່ປີ 2015 ຫຼຸດຄາດໝາຍ 18,03 ເປີເຊັນ, ໜ່ວຍພັກແຂງ 13 ໜ່ວຍ ເທົ່າກັບ  10,66 ເປີເຊັນ, ໜ່ວຍພັກກາງ ແລະ ອ່ອນບໍ່ມີ. ສໍາລັບຜົນ​ການ​ປະ​ເມີນ​ສະມາ​ຊິກ​ພັກ ປະກອບ​ມີສະມາຊິກພັກໃນ 113 ໜ່ວຍ ມີຈໍານວນ 2.170 ສະຫາຍ, ຍິງ 720 ສະຫາຍ ເທົ່າກັບ 85,06 ​ເປີ​ເຊັນ ຂອງຈຳນວນສະມາຊິກພັກທັງໝົດ, ສະມາຊິກພັກທີ່ມີເງື່ອນໄຂປະເມີນຕົວຈິງທັງໝົດຈຳນວນ (ລວມທັງ ມຊ) 1.815 ສະຫາຍ, ຍິງ 539 ສະຫາຍ ເທົ່າກັບ 83,64 ​ເປີ​ເຊັນ ຂອງສະມາຊິກພັກທັງໝົດຈຳນວນ 113 ໜ່ວຍທີ່ໄດ້ປະເມີນ, ສະມາຊິກພັກເຂັ້ມແຂງ-ຮູ້ນຳພາຮອບດ້ານທັງໝົດ ຈຳນວນ 1.781 ສະຫາຍ, ຍິງ 371 ສະຫາຍ ເທົ່າກັບ 73,90 ​ເປີ​ເຊັນ ຂອງສະມາຊິກພັກທີ່ໄດ້ປະເມີນຕົວຈິງ ​ແລະ ບໍ່ໄດ້ປະເມີນ 355 ສະຫາຍ (ບໍານານ, ນັກສຶກສາຮຽນຕໍ່, ສຳຮອງ, ຍົກຍ້າຍບ່ອນປະຈຳການ, ພັກປິ່ນປົວ, ໄປອົບຮົມ ແລະອື່ນໆຂອງ​ໜ່ວຍ​ພັກ​ທີ່​ໄດ້​ຮັບ​ການ​ປະ​ເມີນ​).

      ສ່ວນ​ການສັງ​ເກດ​ຕີລາຄາ​ດ້ານດີ, ດ້ານ​ອ່ອນ, ສາ​ເຫດ ​ແລະ ບົດຮຽນທີ່​ຖອດ​ຖອນ​ ໄດ້ທັງ 4 ດ້ານ ​ແລະ 5 ​ເນື້ອ​ໃນ. ​ໃນ​ນັ້ນ, ການຕີ​ລາຄາ​ດ້ານ​ດີ​ໃນການ​ເຄື່ອນ​ໄຫວ​ນຳພາ​ກໍ່ສ້າງໜ່ວຍພັກ​ເຂັ້ມ​ແຂງ-ຮູ້​ນຳພາ​ຮອບດ້ານ ທັງ 4 ດ້ານ ຄື: ດ້ານ​ການ​ເມືອງ, ດ້ານ​​ແນວ​ຄິດ, ດ້ານການຈັດຕັ້ງ ​ແລະ ດ້ານ​ແບບ​ແຜນ​ວິທີ​ເຮັດ​ວຽກ. ສໍາລັບ​ການຕີ​ລາຄາ​ດ້ານດີ​ໃນ​ການ​ເຄື່ອນ​ໄຫ​ວນຳພາ​ກໍ່ສ້າງໜ່ວຍພັກ​ຕາມ 5 ​ເນື້ອ​ໃນ​ ຄື: ຮູ້ນຳພາ​ຮອບດ້ານ​ການ​ເມືອງ-ແນວ​ຄິດ, ຮູ້​ນຳພາ​ທາງ​ດ້ານ​ວິຊາ​ສະ​ເພາະ, ຮູ້ນຳພາອົງການປົກຄອງ ແລະ ອົງການຈັດຕັ້ງມະຫາຊົນ, ຮູ້ນຳພາວຽກງານປ້ອງກັນຊາດ-ປ້ອງກັນຄວາມສະຫງົບ ​ແລະ ນຳພາການປັບປຸງກໍ່ສ້າງພາຍໃນພັກ ແລະ ຂະຫຍາຍພັກ.

      ສ່ວນທິດ​ທາງ​ແຜນການ ​ລົງ​ຕິດຕາມ​ປະ​ເມີນໜ່ວຍພັກ​ເຂັ້ມ​ແຂງ-ຮູ້​ນຳພາ​ຮອບດ້ານ ປະຈຳ​ປີ 2017 ​ແມ່ນ​ຈະ​ສືບຕໍ່ຈັດຕັ້ງປະຕິບັດ​ແຜນການ​ສົກ​ປີ (2017-2018) ຂອງ​ກອງ​ປະຊຸມ​ໃຫຍ່ ຄັ້ງທີ 8 ຂອງ​ອົງຄະ​ນະ​ພັກ ​ເພື່ອສ້າງໜ່ວຍພັກ​, ສະມາຊິກ​ພັກ​ ທີ່​ຂຶ້ນກັບ​ອົງຄະ​ນະ​ພັກ​ກະຊວງ​ສຶກສາ​ທິການ ​ແລະ ກິລາ​ ໃຫ້​ກາຍ​ເປັນໜ່ວຍພັກ​ເຂັ້ມ​ແຂງ​-ຮູ້​ນຳພາ​ຮອບດ້ານ​ຕາມ​ແຜນການ​ຂອງ​ຄະນະ​ພັກ​ກະຊວງ​ສຶກສາ​ທິການ ​ແລະ ກິລາ​ວາງ​ອອກ. ນອກຈາກ​ນັ້ນ, ສືບຕໍ່ສ້າງໜ່ວຍພັກ, ສະມາຊິກ​ພັກ​ແຕ່ລະໜ່ວຍ, ​ແຕ່​ລະສະ​ຫາຍ​ມີ​ຄວາມ​ປອດ​ໃສໜັກ​ແໜ້ນ​ເຂັ້ມ​ແຂງ, ​ເປັນ​​ເຈົ້າການ​ໃນ​ການປະຕິບັດ​ກົດ​ລະບຽບຂອງ​ພັກ, ກົດໝາຍຂອງ​ລັດ, ມີ​ຄວາມ​ຮັບຜິດຊອບ​ ແລະ ​ເຮັດ​ສຳ​ເລັດໜ້າທີ່​ວຽກງານ​ທີ່​ໄດ້​ຮັບ​ມອບໝາຍ, ເພີ່ມ​ທະວີ​ການກໍ່ສ້າງ​ພັກ​ໃຫ້​ເຂັ້ມ​ແຂງ​ທາງ​ດ້ານ​ການຈັດຕັ້ງ ​ເພື່ອ​ຮັບປະກັນ​ຄວາມ​ສາມັກ​ຄີ​ເປັນ​ເອກ​ະພາ​ບສູງ​ພາຍ​ໃນ​ພັກ, ​ໂດຍ​ສະ​ເພາະ​ແມ່ນ​ການ​ເສີມ​ຂະຫຍາຍປະຊາທິປະ​ໄຕ​ພາຍ​ໃນ​ພັກ, ຄວາມ​ເປັນ​​ແບບຢ່າ​ນຳໜ້າຂອງ​ຄະນະ​ພັກ, ສະມາຊິກ​ພັກ, ນຳພາ​ສ້າງ​ໃຫ້​ໄດ້ໜ່ວຍພັກ​ເຂັ້ມ​ແຂງ-ຮູ້​ນຳພາ​ຮອບດ້ານ ​ແລະ ສືບ​ຕໍ່​ຈັດ​ຕັ້ງ​ປະຕິບັດ​ວຽກ​ງານ​ໃນ​ແຕ່​ລະ​ດ້ານ ​ໃຫ້​ໄດ້​ຮັບ​ປະສິດທິ​ຜົນ ​ແລະ ຄຸນະພາບ​ສູງ​ຂຶ້ນ​ກວ່າ​ເກົ່າ.

​ໂດຍ: ນາງ ຕຸ່ນ​ຄໍາ