ສຕລ ຍົກ​ລະດັບ​ກຳມະການ​ຕັດສິນ 30 ຄົນ ກຽມ​ຮອງ​ຮັບເຕະບານ ​ເປ​ບຊີ ລາວ ພຣີ​ເມຍ​ລີກ 2018

ສຶກສາ

Written by Super User

ສຕລ ຍົກ​ລະດັບ​ກຳມະການ​ຕັດສິນ 30 ຄົນ ກຽມ​ຮອງ​ຮັບເຕະບານ ​ເປ​ບຊີ ລາວ ພຣີ​ເມຍ​ລີກ 2018

 28232847 1330602220375260 1471434166 n     ສະຫະພັນ​ບານ​ເຕະ​ແຫ່ງ​ຊາດ​ລາວ ຫຼື ສຕລ ຈັດ​ເຝິກອົບຮົມຍົກ​ລະດັບ​ຄວາມ​ຮູ້​ຄວາມ​ສາມາດການ​ເປັນ​ກຳມະການ​ຕັດສິນ​ລະດັບ​ຊາດ ປະຈຳ​ປີ 2018 ​ໃຫ້ຜູ້ທີ່​ມີ​ຄວາມສາມາດດີ​ເດັ່ນ ຈຳນວນ 30 ຄົນ ​​ແຕ່​ຈະ​ຖືກ​ຄັດ​ເລືອກ​ເອົາ​ພຽງ 25 ຄົນ ໃນຂອບ​ເຂດ​ທົ່ວ​ປະ​ເທດ ​ເພື່ອ​ກຽມ​ຄວາມ​ພ້ອມ​ຈະ​ຕັດສິນ​ໃນ​ການ​ແຂ່ງຂັນ​​ເຕະບານ ​ລາຍການ ​ເປ​ບຊີ ລາວ ພຣີ​ເມຍ​ລີກ 2018 ທີ່​ຈະ​ເປີດ​ສາກ​ລະ​ເບີດຄວາມ​ມັນ​ໃນ​ວັນ​ເສົາ​ນີ້.ເມື່ອຕອນເຊົ້າວັນຈັນທີ 19 ກຸມພາ ຜ່ານ​ມາ ທີ່ຫ້ອງປະຊຸມສະຫະພັນບານເຕະແຫ່ງຊາດລາວ ໄດ້ຈັດ​ເຝິກອົບຮົມກຳມະການຕັດສິນ ຈຳນວນ 30 ຄົນ ຊຸດ​ກຽມ​ຮອງ​ຮັບ ເຕະບານ ​ເປ​ບຊີ ລາວ ພຣີ​ເມຍ​ລີກ 2018, ​ໃຫ້​ກຽດ​ເຂົ້າ​ຮ່ວມ​ເປັນ​ປະທານ​ຂອງ ທ່ານ ຄຳແພງ ວົງຂັນຕີ ຮອງປະທານສະຫະພັນບານເຕະແຫ່ງຊາດລາວ, ມີທ່ານ ສີປະເສີດ ສິນບັນດິດ ຫົວໜ້າພະແນກກຳມະການຕັດສິນ, ຜູ້ປະເມີນກຳມະການຕັດສິນ ທັງ​ເປັນ​ວິທະຍາກອນ ຂອງ ສຕລ, ພະນັກງານ​ທີ່​ກ່ຽວຂ້ອງ ແລະ ສຳມະກອນ​ເຂົ້າ​ຮ່ວມ. 

 

      ສຳລັບການ​ເຝິກອົບຮົມກຳມະການຕັດສິນຄັ້ງ​ນີ້ ໄດ້ດຳເນີນການ​ເຝິກອົບຮົມ​ລະຫວ່າ​ງວັນທີ 19-22 ກຸມພາ 2018 ໂດຍສຳມະກອນໄດ້ມີ​ການຮຽນຮູ້ທາງດ້ານທິດສະດີ-ການປະຕິບັດຕົວຈິງ ​ເຊິ່ງຜູ້​ທີ່​ເຂົ້າ​ຮ່ວມ​ເຝິກອົບຮົມ ຈຳນວນ 30 ຄົນ ​ຈະ​ໄດ້​ມີ​ການ​ຄັດ​ເລືອກ​ເອົາ​ຕົວ​ຈິງພຽງ 25 ຄົນ ກໍ່ມີ ກຳມະການ​ລະດັບຟີຟາ (FIFA) ຈຳນວນ 7 ທ່ານ ຄື: ທ່ານ ໄຊປະເສີດ ພົງຊະນິດ ຈາກ ສຕລ, ທ່ານ ຄຳສິງ ໄຊຍະວົງສີ ຈາກຄະນະສຶກສາສາດ ມະຫາວິທະຍາ​ໄລ​ແຫ່ງ​ຊາດ (ມຊ), ທ່ານ ສວຍ ວົງຄຳ ຈາກຄະນະວິທະຍາສາດການກິລາ-ກາຍະກຳ ມຊ, ທ່ານ ຄຳປະສົງ ໄຊຍະວົງສີ ຈາກ ສຕລ, ທ່ານ ກິຫຼ້າ ລາດຊະວົງ ຈາກ ສຕລ, ທ່ານ ສົມພາວັນ ຫຼວງລາດ ຈາກ ກະຊວງ ປກສ ​ແລະ ທ່ານ ພອນສຸກສິນ ເຕໂຊ ຈາກ ກົມກິລາລະດັບສູງ ກະຊວງສຶກສາທິການ ແລະ ກິລາ, ທ່ານ ສຸພີ ເຄືອບມະວົງ ຈາກແຂວງສະຫວັນນະເຂດ ສ່ວນ​​ກຳມະການ​ຕັດ​ສິນຜູ້​ທີ່​ບໍ່​ມີ​ລະດັບ ຟີຟາ ມີ ທ່ານ ວົງວິໄລ ໄຊຍະບັນດິດ ຈາກຄະນະວິທະຍາສາດການກິລາ-ກາຍະກຳ ມຊ, ທ່ານ ທິບພະພອນ ອິນທະວົງ ຈາກ ແຂວງຈຳປາສັກ, ທ່ານ ບຸນພັນ ສີສຸວັນ (New FIFA) ຈາກຫ້ອງການສຶກສາທິການ ແລະ ກິລາ ເມືອງໄຊເຊດຖາ, ທ່ານ ວິສິດ ແສງອຳພັນ ຈາກວິທະຍາໄລ ພະລະສຶກສາ, ທ່ານ ຄຳພູວົງ ສີຫາລາດ ຈາກກະຊວງ ປກສ ທັງ​ໝົດ​ເຫຼົ່າ​ນີ້ ຈະ​ໄດ້​ເປັນ​ກຳມະການ​ຕັດສິນ​ກາງ​ສະໜາມ ​ແລະ ຜູ້​ຊ່ວຍ​ກຳມະການ​ຕັດສິນ​ຂ້າງ​ສະໜາມ. ​

      ສ່ວນ​ອີກ 18 ຄົນ ​ແມ່ນພາກສ່ວນຜູ້ຊ່ວຍກຳມະການຕັດສິນ ມີ ທ່ານ ແກ້ວ ລຸນທອງແສງ ຈາກ ຄະນະວິທະຍາສາດການກິລາ-ກາຍະກຳ ມຊ, ທ່ານ ບຸນອູ້ມ ລາດຊະວົງ ຈາກ ໂຄສະນາອົບຮົມສູນກາງພັກ, ທ່ານ ສຸລິຖັນ ມ້າວປັນຍາ ຈາກສູນເຝິກກິລາແຫ່ງຊາດ, ທ່ານ ທິບພະພອນໄຊ ແພງສີ (FIFA) ຈາກຄະນະວິທະຍາສາດການກິລາ-ກາຍະກຳ ມຊ, ທ່ານ ອິນທະວົງ ວົງຜ່ອງສີ ຈາກ ແຂວງສະຫວັນນະເຂດ, ທ່ານ ຫີນກ້າ ຈັນດີລາວົງ ຈາກ ມສ ຈັນທະບູລີ, ທ່ານ ບຸນເຊິນ            ໝອນອາລັກ ຈາກ ມຊ, ທ່ານ ອະນຸລັກ ອິນທະວົງ ຈາກ ແຂວງຈຳປາສັກ, ທ່ານ ຄຳໄພ ອ່ອນຄຸນມີ ຈາກ ແຂວງຈຳປາສັກ, ທ່ານ ໄຊຊະນະ ບັນນະວົງ ຈາກ ກອງທັບ, ທ່ານ ຄຳພັນ ສຸວັນນະວົງ ຈາກ ຄະນະວິທະຍາສາດການກິລາ-ກາຍະກຳ ມຊ, ທ່ານ ວິລະພົນ ຄຳແພງເພັດ ຈາກແຂວງຈຳປາສັກ, ທ່ານ ນິຍົມ ວົງລັດສະໝີ ຈາກ ສຕລ, ທ່ານ ຄາລົມ ປັນຍາທອງ ຈາກເມືອງໄຊທານີ, ທ່ານ ສົມພອນ ເພັດສະຫວ່າງ ຈາກວິທະຍາໄລ ເຕັກນິກ ປາກປ່າສັກ, ທ່ານ ຄຳພວງ ບຸນທະວົງ ຈາກກະຊວງສຶກສາທິການ ແລະ ກິລາ, ທ່ານ ຄຳຫອມ ສີນວນໄຊ ຈາກຫ້ອງການສຶກສາທິການ ແລະ ກິລາ ເມືອງໄຊເຊດຖາ 

      ສຳລັບການ​ແຂ່ງຂັນ​ເຕະບານ ເປບຊີ ລາວ ພຣີ​ເມຍ​ລີກ 2018 ແມ່ນ​ມີ​ທີ​ມ​ເຂົ້າ​ຮ່ວມ​ທັງ​ໝົດ 8  ທີ​ມ ປະກອບ​ມີ: ​ແຊ໋ມ​ເກົ່າ 2 ສະໄໝ ສະ​ໂມ​ສອນ ລາວ ​ໂຕ​ໂຢຕ້າ ​ເອັຟຊີ, ​ສະ​ໂມ​ສອນ ປກສ ​ເອັຟຊີ, ສະໂມ​ສອນ ດີ​ເຄ ​ເອັຟຊີ, ສະ​ໂມ​ສອນ ສະຫວັນ ຢູ​ໄນ​ເຕັດ, ສະ​ໂມ​ສອນ ກອງທັບ ​ເອັຟຊີ, ສະ​ໂມ​ສອນ ມາສ​ເຕີ 7 ​ເອັຟຊີ, ສະ​ໂມ​ສອນ ຊ້າງ​ນ້ອຍ ​ເອັຟຊີ ​ແລະ ສະ​ໂມ​ສອນ ຫຼວງ​ພະ​ບາງ ​ຢູ​ໄນ​ເຕັດ.ຂະນະທີ່ໂປຣແກຣມການແຂ່ງຂັນຮອບຂາໄປ ນັດທຳອິດ ໃນວັນເສົາວັນ​ທີ 24 ກຸມພາ 2018 ເວລາ 15:00 ໂມງ ສະໂມສອນ ປກສ ເອັຟຊີ ພົບກັບ ສະໂມສອນ ສະຫວັນ ຢູໄນເຕັດ ທີ່ສະໜາມກິລາແຫ່ງຊາດ ຫຼັກ 16 (ຖ່າຍທອດສົດ ທີວີ-ລາວ), ເວລາ 17:30 ​ໂມງ ​ແຊ໋ມ​ເກົ່າ 2 ສະໄໝ ສະໂມສອນ ລາວໂຕໂຢຕ້າ ​ເອັຟຊີ ພົບກັບ ສະໂມສອນ ກອງທັບ ເອັຟຊີ ທີ່ສະໜາມກິລາແຫ່ງຊາດ ຫຼັກ 16 (ຖ່າຍທອດສົດ ທີວີ-ລາວ). ສ່ວນໃນວັນ​ທີ 25 ກຸມພາ 2018 ເວລາ 17:00 ​ໂມງ ສະໂມສອນ ຊ້າງນ້ອຍ ເອັຟຊີ ພົບກັບ ສະໂມສອນ ມາສເຕີ ເຊເວັນ ເອັຟຊີ ທີ່ສະໜາມກິລາແຫ່ງຊາດ ຫຼັກ 16    (ຖ່າຍທອດສົດ mycujoo.tv) ​ແລະ ເວລາ 17:00 ສະໂມສອນ ດີເຄ ເອັຟຊີ ພົບກັບ ສະໂມສອນ ຫຼວງພະບາງ ຢູໄນເຕັດ ທີ່ສະໜາມກິລາກາງ​ມະຫາວິທະຍ​າໄລ​ແຫ່ງ​ຊາດ (ມຊ).

​ໂດຍ ສົງການ