ໂພນໂຮງ ປະກາດຈົບຊັ້ນມັດທະຍົມຕອນຕົ້ນບຳລຸງ ທົ່ວເມືອງຢ່າງເປັນທາງການ

ສຶກສາ

Written by Super User

ໂພນໂຮງ ປະກາດຈົບຊັ້ນມັດທະຍົມຕອນຕົ້ນບຳລຸງ ທົ່ວເມືອງຢ່າງເປັນທາງການ

28381259 1330601637041985 1429629596 n   ຫ້ອງການສຶກສາທິການ ແລະ ກິລາເມືອງໂພນໂຮງ ແຂວງວຽງຈັນ ຈັດພິທີປະກາດຈົບຊັ້ນມັດທະຍົມຕອນຕົ້ນບຳລຸງ ສຳລັບປະຊາຊົນ ທົ່ວເມືອງ ຢ່າງເປັນທາງການ ແລະ ເປັນເມືອງທີ 7 ຂອງແຂວງວຽງຈັນ, ໃນວັນທີ 20 ກຸມພາ ຜ່ານມາ ທີ່ສະໂມສອນຫ້ອງວ່າການປົກຄອງເມືອງດັ່ງກ່າວ, ໂດຍໃຫ້ກຽດເຂົ້າຮ່ວມຂອງ ທ່ານ ຮສ. ປອ ຄໍາຜາຍ ສີສະຫວັນ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ນາງ ຈັນແພງ ວິພາວັນ ຫົວໜ້າພະແນກສຶກສາທິການ ແລະ ກິລາແຂວງວຽງຈັນ ແລະ ທ່ານ ນາງ ອິ່ນຄໍາ ພັນດາລາ ເຈົ້າເມືອງໂພນໂຮງ ພ້ອມດ້ວຍຄະນະນໍາຈາກກະຊວງ ສສກ, ການນຳພັກ-ລັດ ຂັ້ນແຂວງ, ເມືອງ, ຄະນະພະແນກສຶກສາທິການ ແລະ ກິລາ, ຫົວໜ້າຫ້ອງການສຶກສາທິການ ແລະ ກິລາເມືອງ, ຫົວໜ້າຫ້ອງການອ້ອມຂ້າງເມືອງ, ຜູ້ອຳນວຍການໂຮງຮຽນ ທັງພາກລັດ ແລະ ເອກະຊົນ, ພະນັກງານ, ຄູ-ອາຈານ, ນັກຮຽນ ແລະ ປະຊາຊົນ ເຂົ້າຮ່ວມ 100 ກວ່າຄົນ.

    ໃນພິທິ, ທ່ານ ວັນໄຊ ພົມມະຈັກ ຫົວໜ້າຫ້ອງການສຶກສາທິການ ແລະ ກິລາເມືອງໂພນໂຮງ ໄດ້ລາຍງານການຈັດຕັ້ງປະຕິບັດການຮຽນ-ການສອນ ມຕົ້ນບໍາລຸງ ພາຍໃນເມືອງໃຫ້ຮູ້ວ່າ: ພາຍຫຼັງສ້າງຕັ້ງເມືອງໂພນໂຮງ ໃນປີ 1957 ໄລຍະນັ້ນວຽກງານການສຶກສາພາຍໃນເມືອງ ແມ່ນບໍ່ທັນບັນລຸຕາມລະດັບຄາດໝາຍ, ຜູ້ປົກຄອງບາງຄົນຍັງນຳເອົາລູກຫຼານຂອງຕົນອອກໂຮງຮຽນກາງປີ ເພື່ອໄປຊ່ວຍວຽກຄອບຄົວ ເຊິ່ງເປັນສາເຫດເຮັດໃຫ້ນັກຮຽນຂາດຮຽນ ແລະ ປະລະການຮຽນເປັນຈຳນວນຫຼາຍ, ອັດຕາການປະລະການຮຽນໃນຊັ້ນປະຖົມ ແລະ ຊັ້ນມັດທະຍົມ ຍັງສູງ ໃນໄລຍະນັ້ນເມືອງຂອງພວກເຮົາໄດ້ສຸມໃສ່ການຈັດຕັ້ງການຮຽນ-ການສອນຊັ້ນປະຖົມບໍາລຸງທົ່ວເມືອງ ມີນັກຮຽນໃນເກນອາຍຸ 6-40 ປີທັງໝົດ 1.854 ຄົນ, ຍິງ 965 ຄົນ, ເຊິ່ງສາມາດລຶບລ້າງ ແລະ ປະກາດຈົບຊັ້ນປະຖົມບຳລຸງ ໃນວັນທີ 4 ພະຈິກ 2004. ຫຼັງຈາກນັ້ນກໍ່ໄດ້ສືບຕໍ່ຈັດຕັ້ງການຮຽນ-ການສອນບຳລຸງຊັ້ນປະຖົມທີ່ຍັງເຫຼືອ ສຳເລັດ 100 ເປີເຊັນ ໃນປີ 2010.

      ຫຼັງຈາກນັ້ນ, ໃນປີ 2010-2011 ໄດ້ຈັດຕັ້ງການຮຽນ-ການສອນ ຊັ້ນມັດທະຍົມຕອນຕົ້ນບຳລຸງໃຫ້ແກ່ປະຊາຊົນແລະ ໄດ້ປະຕິບັດຕາມແຜນ ເປັນແຕ່ລະໄລຍະຄື: ບາດກ້າວທີ 1: ຈັດສົ່ງພະນັກງານວິຊາການລົງເກັບກຳສະຖິຕິຂໍ້ມູນປະຊາກອນກຸ່ມເປົ້າໝາຍ 15-30 ປີ ທີ່ບໍ່ຈົບການຮຽນຊັ້ນມຕົ້ນໃນແຕ່ລະບ້ານ ທົ່ວເມືອງ ເພື່ອສັງລວມຂໍ້ມູນໃນການຈັດຕັ້ງການຮຽນ-ການສອນ; ບາດກ້າວທີ 2: ໄດ້ສົມທົບກັບການນຳຂັ້ນເມືອງ, ຄະນະພັດທະນາການສຶກສາຂັ້ນເມືອງ ພ້ອມກັນວາງແຜນ ເພື່ອຈັດຕັ້ງປະຕິບັດວຽກງານການຮຽນ-ການສອນບຳລຸງຊັ້ນ ມຕົ້ນ ຢູ່ພາຍໃນເມືອງ ໂດຍໄດ້ລົງສົມທົບກັບຄະນະພັດທະນາການສຶກສາຂັ້ນບ້ານ ເພື່ອກະຕຸກຊຸກຍູ້ໂຄສະນາ ໃຫ້ພໍ່-ແມ່ປະຊາຊົນເຫັນໄດ້ຄວາມສຳຄັນຂອງການສຶກສາຕໍ່ການພັດທະນາ ແລະ ປະກອບອາຊີບຂອງເຂົາເຈົ້າ; ບາດກ້າວທີ 3: ດໍາເນີນການຈັດຕັ້ງການຮຽນ-ການສອນ ໂດຍອີງໃສ່ຂໍ້ມູນ ແລະ ສະພາບຄວາມເປັນຈິງພາຍໃນເມືອງ ສາມາດຈັດຕັ້ງການຮຽນ-ການສອນຂຶ້ນ ຈຳນວນ 41 ບ້ານ ແບ່ງເປັນ 5 ສົກຮຽນ ຄື: ໃນສົກຮຽນ 2011-2012 ໄດ້ເລີ່ມເປີດການຮຽນ-ການສອນຊັ້ນມັດທະຍົມຕອນຕົ້ນບຳລຸງຢູ່ 9 ບ້ານຄື: ໂພນເງິນ, ນາໂພໃຕ້, ຫ້ວຍທົນ, ໂພນຕ້ອງ, ໂພນສະຫວ່າງ, ໂພນແກ້ວ, ແສນຊຸມ, ບ້ານຂາມ ແລະ ບ້ານທາດ ມີຈໍານວນນັກຮຽນທັງໝົດ 95 ຄົນ, ຍິງ 31 ຄົນ. ຜ່ານການຈັດຕັ້ງການຮຽນ-ການສອນເປັນເວລາ 6 ເດືອນ ເຊິ່ງເລີ່ມແຕ່ເດືອນທັນວາ 2011 ຫາເດືອນມິຖຸນາ 2012 ຄັ້ງວັນທີ 15-16 ສິງຫາ 2012 ໄດ້ຈັດຕັ້ງການສອບເສັງຈົບຊັ້ນອອກເປັນ 2 ສູນຄື: ສູນໂພນສີ ແລະ ສູນນາໂພໃຕ້ ຈໍານວນນັກຮຽນມີໜ້າສອບເສັງທັງໝົດ 93 ຄົນ, ຍິງ 31 ຄົນ, ຂາດ 2 ຄົນ, ຜ່ານການສອບເສັງເຫັນວ່າເສັງໄດ້ 97,89 ເປີເຊັນ; ສົກຮຽນ 2012-2013 ໄດ້ຈັດການຮຽນ-ການສອນຊັ້ນມັດທະຍົມຕອນຕົ້ນບຳລຸງຢູ່ 1 ບ້ານຄື: ໂພນສີເໜືອ, ນາກໍ່າ, ໂພນຫໍ, ນາມ່ວງ, ໂພນໂຮງ, ນໍ້າລິນ, ນໍ້າແຈ້ງ, ໂພນສີໃຕ້, ໂພນງາມ ແລະ ໂພນໄຊເໜືອ; ໃນສົກຮຽນ 2013-2014 ໄດ້ຈັດການຮຽນ-ການສອນຊັ້ນມັດທະຍົມຕອນຕົ້ນບຳລຸງຢູ່ 10 ບ້ານຄື: ໂພນສະຫວາດ, ໂພນສີດາ, ນາເຫຼົ່າ, ສະກ້າ, ວັງມົນ, ໜອງຂອນ, ຫ້ວຍເດື່ອ, ນາບອນ, ໂຮງເລື່ອຍ ແລະ ໂພນຄໍາໃຕ້ ມີຈໍານວນນັກຮຽນທັງໝົດ 106 ຄົນ, ຍິງ 24 ຄົນ. ຜ່ານການຈັດຕັ້ງການຮຽນ-ການສອນເປັນເວລາ 6 ເດືອນ ເຊິ່ງເລີ່ມແຕ່ເດືອນພະຈິກ 2013 ຫາເດືອນພຶດສະພາ 2014 ມາຮອດວັນທີ 14-15 ກໍລະກົດ 2014 ໄດ້ຈັດຕັ້ງການສອບເສັງຈົບຊັ້ັ້ັ້ັ້ນອອກເປັນ 2 ສູນຄື: ສູນນາເຫຼົ່າ ແລະ ສູນສະກ້າ  ຈໍານວນນັກຮຽນມີໜ້າສອບເສັງທັງໝົດ 103 ຄົນ, ຍິງ 23 ຄົນ, ຂາດ 3 ຄົນ, ຍິງ 1 ຄົນ ຜ່ານການສອບເສັງເຫັນວ່າເສັງໄດ້ 97,16 ເປີເຊັນ.

      ຕໍ່ມາໃນສົກຮຽນ 2014-2015 ໄດ້ຈັດການຮຽນ-ການສອນຊັ້ນມັດທະຍົມຕອນຕົ້ນບຳລຸງຢູ່ 6 ບ້ານຄື: ໂພນຄໍາ  ເໜືອ, ຫຼັກ 52, ໜອງນາກ, ພູສັນ, ໂພນງາມໃຕ້ ແລະ ນາເລົາ ມີຈໍານວນນັກຮຽນທັງໝົດ 74 ຄົນ, ຍິງ 26 ຄົນ ຜ່ານການຈັດຕັ້ງການຮຽນ-ການສອນເປັນເວລາ 6 ເດືອນ ເຊິ່ງເລີ່ມແຕ່ເດືອນຕຸລາ 2014 ຫາທ້າຍເດືອນມີນາ 2015 ມາຮອດວັນທີ 18-19 ກໍລະກົດ 2015 ໄດ້ຈັດຕັ້ງການສອບເສັງຈົບຊັ້ນອອກເປັນ 2 ສູນຄື: ສູນ ມສ ຫຼັກ 52 ແລະ ສູນບ້ານພູສັນ  ຈໍານວນນັກຮຽນມີໜ້າສອບເສັງທັງໝົດ 73 ຄົນ, ຍິງ 26 ຄົນ, ຂາດ 1 ຄົນ ຜ່ານການສອບເສັງເຫັນວ່າເສັງໄດ້ 98,64 ເປີເຊັນ; ໃນສົກຮຽນ 2015-2016 ໄດ້ຈັດການຮຽນ-ການສອນຊັ້ນມັດທະຍົມຕອນຕົ້ນບຳລຸງຢູ່ 7 ບ້ານຄື: ໂພນຄ້ອງ, ແຈ້ງສະຫວ່າງ, ໜອງປຸ່ງ, ໂພນໄຊໃຕ້, ໂພນສູງ, ດົງຂາວ ແລະ ບ້ານໃໝ່ ມີຈໍານວນນັກຮຽນທັງໝົດ 50 ຄົນ, ຍິງ 19 ຄົນ. ຜ່ານການຈັດຕັ້ງການຮຽນ-ການສອນເປັນເວລາ 6 ເດືອນ ເຊິ່ງເລີ່ມແຕ່ເດືອນຕຸລາ 2015 ຫາເດືອນເມສາ2016 ມາຮອດວັນທີ 19-20 ກໍລະກົດ 2016 ໄດ້ຈັດຕັ້ງການສອບເສັງຈົບຊັ້ັ້ັ້ັ້ນອອກເປັນ 2 ສູນຄື: ສູນ ມສ ໂພນໄຊ ແລະ ສູນບ້ານໜອງປຸ່ງ  ຈໍານວນນັກຮຽນມີໜ້າສອບເສັງທັງໝົດ 49 ຄົນ, ຍິງ 19 ຄົນ, ຂາດ 1 ຄົນ ຜ່ານການສອບເສັງເຫັນວ່າເສັງໄດ້ 98,00 ເປີເຊັນ.

      ຂະນະທີ່ບາດກ້າວທີ 4: ຜ່ານການຈັດຕັ້ງການຮຽນ-ການສອນ ສຳເລັດຕາມໂຄງການຫຼັກສູດແລ້ວ ຫ້ອງການສຶກສາທິການ ແລະ ກິລາເມືອງໂພນໂຮງ ໄດ້ລາຍງານພະແນກສຶກສາທິການ ແລະ ກິລາແຂວງວຽງຈັນ ເພື່ອຂໍອານຸຍາດຈັດຕັ້ງການສອບເສັງໃຫ້ຖືກຕ້ອງຕາມລະບຽບຫຼັກການໃນຄັ້ງວັນທີ 13-17 ພະຈິກ 2017 ເຊິ່ງໄດ້ຈັດຕັ້ງເປັນ 11 ສູນ, ນັກຮຽນມີໜ້າສອບເສັງຕົວຈິງ 339 ຄົນ, ຍິງ 154 ຄົນ ສາມາດປະເມີນໄດ້ 99,41 ເປີເຊັນ. ເຊິ່ງວິຊາສອບເສັງລວມມີ 5 ວິຊາຄື: ວິຊາພາສາລາວ-ວັນນະຄະດີ, ວິທະຍາສາດສັງຄົມ, ສຶກສາພົນລະເມືອງ, ຄະນິດສາດ ແລະ ວິທະຍາສາດທຳມະຊາດ ໂດຍສະເລ່ຍລວມ ຄະແນນສູງສຸດ ແມ່ນ 7 ແລະ ຄະແນນຕໍ່າສຸດ ແມ່ນ 5 ຈຶ່ງໄດ້ຮັບອະນຸມັດຈາກກະຊວງສຶກສາທິການ ແລະ ກິລາ ໃຫ້ປະກາດເປັນເມືອງຈົບຊັ້ນມັດທະຍົມສຶກສາຕອນຕົ້ນບຳລຸງ ຢ່າງເປັນທາງການ.ພ້ອມນັ້ນ, ໃນພິທີຍັງໄດ້ມີການປະກອບຄຳເຫັນຂອງຕາງໜ້າຄູ, ນັກຮຽນ, ນາຍບ້ານ ແລະ ໄດ້ມອບ-ຮັບ ໃບຢັ້ງຢືນ ແລະ ໃບຍ້ອງຍໍຂັ້ນຕ່າງໆ, ຟັງການໂອ້ລົມໃຫ້ທິດຊີ້ນຳຈາກ ທ່ານ ຮສ. ປອ ຄໍາຜາຍ ສີສະຫວຫນ ຮອງລັດຖະມົນຕີກະຊວງສຶກສາທິການ ແລະ ກິລາ, ພ້ອມນັ້ນຄະນະປະທານ ແລະ ຜູ້ແທນເຂົ້າຮ່ວມລັ່ນຄ້ອງ 9 ບາດ ແລະ ເປີດປ້າຍພິທີປະກາດຈົບຊັ້ນມັດທະຍົມຕອນຕົ້ນບຳລຸງທົ່ວເມືອງໂພນໂຮງ ຢ່າງເປັນທາງການ.

                        ຂ່າວໂດຍ: ນາງ ກິນດາລອນ ພົມມະຈັນ