ອົງການ​ອາຫານ​ໂລກ ຊ່ວຍ​ເຫຼື​ອອາຫານ ​ແລະ ​ອຸປະກອນ​ແຕ່ງ​ກິນ​​ໃຫ້​ໂຮງຮຽນ​ສຶກສາ​ພິ​ເສດ ນວ

ສຶກສາ

Written by Super User

ອົງການ​ອາຫານ​ໂລກ ຊ່ວຍ​ເຫຼື​ອອາຫານ ​ແລະ ​ອຸປະກອນ​ແຕ່ງ​ກິນ​​ໃຫ້​ໂຮງຮຽນ​ສຶກສາ​ພິ​ເສດ ນວ

28504102 356205291527822 820585927 o   ອົງການ​ອາຫານ​ໂລກ ປະ​ຈໍາ ສປປ ລາວ ​ໄດ້​ໃຫ້ການ​ຊ່ວຍ​ເຫຼືອ​ອາຫານ ​ແລະ ອຸປະ​ກ​ອນ​ແຕ່ງກິນ​ໃຫ້​ໂຮງຮຽນ​ສຶກສາ​ພິ​​ເສດ ນະຄອນຫຼວງ​ວຽງຈັນ ລວມມູນ​ຄ່າ 50 ລ້ານກວ່າກີບ​ (6.600 ​ໂດ​ລາ​ສະຫະລັດ) ​ເພື່ອ​​ໃຫ້​ນັກຮຽນ​ໄດ້ກິນ​ອີ່​ມ, ກິນ​ແຊບ ແລະ ມີ​ປັນຍາ​ມັນສະໝ​ອງ​ໃນ​ການ​ຮໍ່າຮຽນເອົາຄວາມຮູ້ມາພັດທະນາຕົນເອງ, ສະຖາບັນຄອບຄົວ ແລະ ປະເທດຊາດໃນອະນາຄົດ.

   ໃນ​ວັນ​ທີ 27 ກຸມພາ ຜ່ານ​ມາ ທີ່​ສູນ​ການ​ແພດ​ຟື້ນ​ຟູ​ໜ້າ​ທີ່​ການ ນະຄອນຫຼວງວຽງຈັນ, ​ໄດ້​ມີ​ພິທີ​ຖະ​ແຫຼ​ງຂ່າວ​ກ່ຽວ​ກັບ​ໂຄງການ​ອາຫານ​ໃນ​ໂຮງຮຽນ, ​ໂດຍ​ໃຫ້​ກຽດ​ຖະ​ແຫຼ​ງຂອງ​ທ່ານ ຊົມ​ພູ​ ແກ້ວ​ປັນຍາ ຫົວໜ້າ​ພະ​ແນ​ກສຶກສາ​ທິການ ​ແລະ ກິລາ ນະຄອນຫຼວງ​ວຽງ​ຈັນ ແລະ ທ່ານ ນາງ ຊາຣາ ​ໂກ​ເດິ​ນ ກິບຊັນ ຫົວໜ້າອົງການ​ອາຫານ​ໂລກ ປະ​ຈໍາ ສປປ ລາວ, ພ້ອມ​ດ້ວຍ​ຜູ້​ຮັບຜິດຊອບ​, ພະນັກງານ, ຄູ-​ອາຈານ ​ແລະ ນ້ອງ​ນັກຮຽນ​ພິ​ເສດ​ເຂົ້າ​ຮ່ວມ​ຢ່າງ​ພ້ອມພຽງ.

      ​ໂອກາດ​ດັ່ງກ່າວ, ທ່ານ ຊົມ​ພູ​ ​ແກ້ວ​ປັນຍາ ​ໄດ້​ກ່າວລາຍ​ງານ​ກ່ຽວ​ກັບ​ກາ​ນຊ່ວຍ​ເຫຼືອ​ຈາກ​ອົງການ​ອາຫານ​ໂລກ ​ໂດ​ຍ​ແນ​ໃສ່​ເພື່ອ​ເຮັດ​ໃຫ້​ນັກຮຽນ​​ໃນ​​ໂຮ​ງຮຽນ​ສຶກສາ​ພິ​ເສດ ນະຄອນຫຼວງ​ວຽງ​ຈັນ (ນັກຮຽນ​ພິການ​ຫູ-​ຕາ) ​ເດັກ​ທີ່​ມີ​ຄວາມ​ພິການ​ໃນ​​ໂຮງຮຽນ ມີ​ອາຫານ​ພຽງພໍ​ໃນ​ການ​ບໍລິ​ໂພ​ກຕາມ​ອັດຕາ​ສ່ວນ ​ແລະ ຄວາມ​ຕ້ອງການ​ຂອງ​ຮ່າງກາຍ​ໃຫ້​ມີ​ສຸຂະ​ພາບ​ແຂງ​ແຮງ, ມີ​ໂອກາດ​ເຂົ້າ​ເຖິງ​ການ​ສຶກສາ ຄື​ກັບ​ເດັກ​ທີ່​ບໍ່​ມີ​ຄວາມ​ເປັນ​ພິການ ​ແລະ ສາມາດ​ຮຽນ​ໄດ້​ດີ ຈົນ​ສາມາດ​ຮຽນ​ຕໍ່​ໃນ​ລະດັບ​ສູງ​ຂຶ້ນ ​ແລະ ມີ​ອາຊີບ​ສາມາດ​ລ້ຽງ​ກຸ້ມຕົນ​ເອງ​ໄດ້​ໃນ​ອະນາຄົດ. ພະ​ແນກສຶກສາ​ທິການ ​ແລະ ກິລາ ນະຄອນ​ຫຼວງ​ວຽງ​ຈັນ ​ໄດ້ຂໍ​ຄວາມ​ຊ່ວຍ​ເຫຼືອ​ທາງ​ດ້ານ​​ເຄື່ອງ​ບໍລິ​ໂພ​ກ​ໃຫ້​ແກ່​ນັກຮຽນ ​ເພື່ອ​ຮັບ​ໃຊ້​ຊີວິດ​ປະ​ຈໍາ​ວັນ, ​ເນື່ອງ​ຈາກ​ວ່າ ​ເບ້ຍລ້ຽງ​ຂອງ​ນັກຮຽນ​ທີ່​ໄດ້​ຮັບ​ຈາກ​ລັດຖະບານ ​ໃນ​ແຕ່ລະ​ເດືອນ​ແມ່ນ​ຍັງ​ບໍ່​ທັນ​ຕອບ​ສະໜອງ​ໄດ້​ຕາມ​ຄວາມ​ຕ້ອງການ​ຂອງ​ນັກຮຽນ.

      ສໍາລັບ​ການ​ຊ່ວຍ​ເຫຼືອ​ແກ່​ໂຮ​ງຮຽນ​ສຶກສາ​ພິ​ເສດ ຈາກ​ອົງການ​ອາຫານ​ໂລກ ​ລິ​ເລີ່​ມຊ່ວຍ​ເຫຼືອ​ໃນ​ສົກຮຽນ 2016-2017 ມີ​ປະ​ເພດ​ອາຫານ ປະກອບ​ດ້ວຍ ​ເຂົ້າສານຈ້າ​ວ (ຈາກ​ສະຫະລັດ​ອາ​ເມຣິກາ) ຈໍານວນ 3,6 ​ໂຕນ, ນໍ້າມັນ​ພືດ​ປະກອບ​ດ້ວຍ​ວິຕາມິນ​ເອ ​ແລະ ຄຸນະພາບ​ສານ​ອາຫານ ຈໍານວນ 0,36 ກິ​​ໂລ, ​ແກ່​ນໝາກ​ແຫ້ງ ຈໍານວນ 1 ​ໂຕນ, ປ໋ອງປາ​ ຈາກ​ຍີ່ປຸ່ນ ຈໍານວນ 0,35 ​ໂຕນ; ປະ​ເພດ​ອຸປະກອນ​ແຕ່ງກິນ​ ປະກອບ​ມີ ໝໍ້​ຂະໜາດ 80 ລິດ ຈໍານວນ 2 ໜ່ວຍ, ໝໍ້​ຂະໜາດ 20 ລິດ ຈໍາ​ນວນ 2 ໜ່ວຍ, ຈອງ​ໃຫຍ່​ຕັກ​ແກງ ​ແລະ ຈອງນ້ອຍ​ໃຊ້​ໄວ້​ຂົ້ວ​ ຈໍານວນ 8 ກ້ານ, ພ້າ​ໃຫຍ່ ຈໍານວນ 2 ດວງ, ມີດ​ຂະໜາດ​ກາງ ຈໍານວນ 4 ດວງ ​ແລະ ປື້​ມຄູ່​ມື​ການ​ປຸງ​ແຕ່ງອາຫານ ຈໍານວນ 2 ​ເຫຼັ້ມ ລວມມູນ​ຄ່າ​ທັງ​ໝົດ​ປະມານ 50 ​ລ້ານ​ ກວ່າກີບ (6.600 ​​ໂດ​ລາ​ສະຫະ​ລັດ).   ອາຫານ​ຈໍານວນ​ດັ່ງກ່າວ ​ແມ່ນ​ໃຊ້​ປະກອບ​ການ​ແຕ່ງກິນ ​ໂດຍ​ຄໍານວນ​​ແຕ່​ວັນ​ທີ 22 ທັນວາ 2017-30 ສິງຫາ 2018 ​ແຕ່​ອົງການ​ອາຫານ​ໂລກ​ ໄດ້​ຈັດ​ເປັນ 2 ຄັ້ງ ລວມທັງ​ໝົດປະລິມານ​ອາຫານ​ຄັ້ງ​ລະ 3,01 ​ໂຕນ ​ໂດຍ​ຄິດ​ໄລ່​ຄັງ​ລະ 90 ວັນ, ​ເຊິ່ງຕົ້ນ​ເດືອນມີນາ 2018 ຈະ​ຈັດ​ສົ່ງ​ຮອບ​ທີ 2 ຈໍານວນ ອາຫານ​ທັງ​ໝົດ 2,48 ​ໂຕນ.

      ​ໃນ​ສົກຮຽນ 2017-2018 ທາງ​ໂຮງຮຽນ​ໄດ້​ຈັດ​ແບ່ງ​ຕາຕະລາງ​ແຕ່ງອາຫານ​ເຂົ້າຈ້າວ​ໃສ່​ຖົ່ວ​ເຫຼືອງ ​ແລະ ປຸງ​ແຕ່ງ​ໃຫ້​ນັກຮຽນ ​ແລະ ຄູ​ໃນ​ໂຮງຮຽນ​ກິນ​ແຕ່​ເດືອນ​ມັງ​ກິນ 2018 ​ເປັນ​ຕົ້ນ​ມາ ຈົນ​ເຖິງ​ປັດ​ຈຸ​ບັນ. ພ້ອມ​ກັນ​ນັ້ນ, ຄູ​ຍັງ​ໄດ້​ນໍາພາ​ນັກຮຽນ​ເຮັດ​ເຂົ້າໜົມ, ຕົ້ມ​ເຂົ້າປຽກ, ສະ​ລັດ​ປາທູ​ ​ແລະ ນໍ້າ​ເຕົ້າຮູ້​ອີກ​ດ້ວຍ. ຜ່ານ​ການ​ຕິດຕາມ ການ​ປຸງ​ແຕ່ງອາຫານ​ໃຫ້​ນັກຮຽນ​ກິນ​ສັງ​ເກດ​ເຫັນ​ວ່າ ນັກຮຽນ​ມີ​ສຸ​ຂະ​ພາ​ບ​ແຂງ​ແຮງ​ດີ​ຂຶ້ນ​ໄດ້ ກິນ​ອີ່​ມ, ກິນ​ແຊບ, ມີ​ປັນຍາ​ມັນສະໝ​ອງ​ໃນ​ການ​ຮໍ່າຮຽນ ​ແລະ ​ເອົາ​ໃຈ​ໃສ່​ໃນ​ການ​ຄົ້ນຄວ້າ​ຮໍ່າຮຽນ.​ໄລຍະ​ຜ່ານ​ມາ, ອົງການ​ອ​າຫານ​ໂລກ​ ກໍ່​ໄດ້​ຊ່ວບ​ເຫຼື​ອ​ເລື່ອງ​ອາຫານ​ໃນ​ໂຮງຮຽນ ​ໃນ​ປີ 2002 ທີ່​ແຂວງຜົງ​ສາລີ, ອຸດົມ​ໄຊ ​ແລະ ຫຼວງ​ພະ​ບາງ ​ແລະ ​ໃນ​ປີ  2009 ​ໄດ້​ຂະຫຍາຍ​ໄປ​ຊ່ວຍ​ເຫຼື​ອທີ່​ແຂວງ ສາລະ​ວັນ, ຈໍາປາ​ສັກ, ອັດ​ຕະປື, ​ແລະ ​ເຊ​ກອງ. ສໍາລັບ​ໂຮງຮຽນ​ສຶກສາ​ພິ​ເສດ​ແມ່ນ​​ເລີ່​ມຊ່ວຍ​ເຫຼືອ​ໃນ​ປີ 2016 ທີ່​ແຂວງ​ຫຼວງ​ພະ​ບາງ ​ແລະ ປີ 2017 ​ແມ່ນ​ນະຄ​ອນຫຼວງ​ວຽງ​ຈັນ. ສໍາລັບ​ແຜນການ​ໃນ​ຕໍ່ໜ້າ​ແມ່ນ​ຈະ​ຂະຫຍາຍ​ໄປ​ຊ່ວຍ​ເຫຼື​ອທີ່​ແຂວງ​ຄໍາ​ມ່ວນ.

(ບຸນທະວີ)