ຄະນະຜູ້ຊ່ຽວຊານ​ກິລາຢູ​ໂດ​ຍີ່ປຸ່ນ ​ເຂົ້າ​ຢ້ຽມ​ຄຳນັບ ລັດຖະມົນຕີ ສສກ ໂອກາດມາເຮັດວຽກຢູ່ ສປປ ລາວ

ສຶກສາ

Written by Super User

ຄະນະຜູ້ຊ່ຽວຊານ​ກິລາຢູ​ໂດ​ຍີ່ປຸ່ນ ​ເຂົ້າ​ຢ້ຽມ​ຄຳນັບ ລັດຖະມົນຕີ ສສກ ໂອກາດມາເຮັດວຽກຢູ່ ສປປ ລາວ ​

28547423 356190361529315 392005124 o      ຄະນະຜູ້​ຊ່ຽວຊານ​ກິລາ​ຢູ​ໂດ ຈາກ​ສະຫະພັນ​ຢູ​ໂດ​ແຫ່ງ​ປະ​ເທດ​ຍີ່ປຸ່ນ ​ເຂົ້າ​ຢ້ຽມ​ຄຳນັບ ​ທ່ານ ນາງ ​ແສງ​ເດືອນ ຫຼ້າ​ຈັນທະ​ບູນ ລັດຖະມົນຕີ ກະຊວງ​ສຶກສາ​ທິການ ​ແລະ ກິລາ (ສສກ) ​ເນື່ອງໃນ​ໂອກາດ​ມາປະຕິບັດ​ໜ້າ​ທີ່ວຽກ​ງານ ຢູ່ ສປປ ລາວ ກໍ່​ຄື​ການມາຖ່າຍ​ທອດ​ຄວາມ​ຮູ້​ຄວາມ​ສາມາດ​ ປະ​ເພດ​  ຟ້ອ​ນກາ​ຕະ ​ແລະ ການ​ສອບ​ເສັງ​ຂຶ້ນ​ດັ້ງສາຍ​ດຳ ​ໃຫ້​ນັກ​ກິລາ​ຢູ​ໂດ​ລາວ ​ລະຫວ່າງ​ວັນ​ທີ 22-26 ກຸມພາ ຜ່າ​ນມາ ​ທີ່​ນະຄອນຫຼວງ​ວຽງ​ຈັນ​.ເມື່ອ​ວັນ​ທີ 26 ກຸມພາ ຜ່ານ​ມາ ທີ່​ຫ້ອງ​ຮັບ​ແຂກ​ສຳນັກ ກະຊວງ ສສກ, ທ່ານ ໂມໂຕນາຣິ ສາເມະຊິມາ ຜູ້​ຊ່ຽວຊານ​ສາຍ​ດຳ ລະດັບ 8 ດັ້ງ, ຜູ້ອຳນວຍການຝ່າຍການສຶກສາ ຈາກສະຖາບັນຢູໂດໂຄໂດກັນ ປະເທດຍີ່ປຸ່ນ ແລະ ທ່ານ ຊະຊີໂຣ ຢາມາໂມະໂຕະ ຜູ້​ຊ່ຽວຊານສາຍ​ດຳ​ລະດັບ 7 ດັ້ງ ທັງ​ເປັນຜູ້ຈັດການຝ່າຍການຂຶ້ນດັ້ງ​ໃຫ້ນັກກິລາ ຈາກ​ສະຫະພັນ​ຢູ​ໂດ​ປະ​ເທດ​ຍີ່ປຸ່ນ ​ໄດ້​ເຂົ້າ​ຢ້ຽມ​ຄຳນັບ​ ທ່ານ ນາງ ​ແສງ​ເດືອນ ຫຼ້າ​ຈັນທະ​ບູນ ລັດຖະມົນຕີ ກະຊວງ ສສກ, ມີ​ທ່ານ ​ແສງ​ພອນ ພົນ​ອາມາດ ຫົວໜ້າ​ກົມ​ກິລາ​ລະດັບ​ສູງ ກະຊວງ ​ສສກ ​ແລະ ທ່ານ ​ເຂັ້ມ​ຊາດ ພິລາ​ພັນ​ເດຊ ປະທານ​ສະຫະພັນ​ຢູ​ໂດ​ແຫ່ງ​ຊາດ​ລາວ ພ້ອມ​ດ້ວຍ​ພະນັກງານ​ທີ່​ກ່ຽວຂ້ອງ​​ເຂົ້າ​ຮ່ວມ.

      ​ໂອກາດ​ນີ້, ທ່ານ ນາງ ​ແສງ​ເດືອນ ຫຼ້າ​ຈັນທະ​ບູນ ກໍ່​​ໄດ້​ສະ​ແດງ​ຄວາມ​ຕ້ອນຮັບຄະນະ​ຜູ້​ຊ່ຽວຊານ​ກິລາ​ຢູ​ໂດປະ​ເທດ​ຍີ່ປຸ່ນ ທັງ​ 2 ທ່ານ ຢ່າງ​ອົບ​ອຸ່ນ ​ແລະ ​ສະ​ແດງ​ຄວາມ​ຮູ້​ບຸນຄຸນ​ເປັນ​ຢ່າງ​ສູງ ຕໍ່​ລັດຖະບານ​ຍີ່ປຸ່ນ ທີ່​​ໄດ້ສ້າງ​ໂຄງການຍີ່ປຸ່ນ-ອາຊຽນ ຈິຕະຄີໂອຍ (JITA-KYOEI) ທີ່​ຊ່ວຍຈັດ​ເຝິກອົບຮົມ​ຍົກ​ລະດັບ​ຄວາມ​ຮູ້​ຄວາມ​ສາມາດ​ໃຫ້​ບຸ​ຄະລາ​ກອນກິລາ​ຢູ​ໂດ​ລາວ ​​​ໄດ້​ມີ​ຄວາມ​ຮູ້​ຄວາມ​ສາມາດ​ສູງ​ຂຶ້ນ​ກວ່າ​ເກົ່າ ເຊິ່ງຈະ​ເປັນ​ເງື່ອນ​ໄຂສ້າງ​ໃຫ້​ນັກ​ກິລາ​ລາວ​ມີ​ປະສົບ​ການ ​ແລະ ຄວາມ​ພ້ອມ​ເຂົ້າຮ່ວມ​ສ້າງ​ຜົນງານ​ໃນ​ການ​ແຂ່ງຂັນ​ງານ​ກິລາ​ລະດັບ​ພາກ​ພື້ນ ​ແລະ​ ສາກົນ ​ເປັນ​ຕົ້ນ​ແມ່ນ ງານ​ມະຫາ​ກຳ​ກິລາ​ໂອ​ແລມປິກ​ສາກົນ ຈະ​ຈັດ​ຂຶ້ນ​ໃນ​ປີ 2020 ທີ່​ປະ​ເທດ​ຍີ່ປຸ່ນ ຮັບ​ກຽດ​ເປັນ​​ເຈົ້າ​ພາບ ​ແລະ ກ່ອນ​ທ່ານ​ຈະ​ກັບ​ບ້ານ​ເກີດ​ເມືອງ​ນອນ​ຂໍ​ອວຍ​ໄຊ​ໃຫ້​ພອນ​ໃຫ້​ທ່ານເດີນທາງ​ກັບ​ບ້ານ​ດ້ວຍຄວາມ​ສະ​ຫວັດ​ດີ​ພາບ ​​ແລະ ​ໄປ​ທ່ຽວ​ຊົມ​ສະຖານ​ທີ່​ສຳຄັນ​ໃນ ນະຄອນຫຼວງ​ວຽງ​ຈັນ ​ເພາະ​ປີ​ນີ້​ເປັນ​ປີ​ທີ່​ພິ​ເສດ ສປປ ລາວ ​ໄດ້​ເປີດ​ປີ​ທ່ອງ​ທ່ຽວ 2018 ​ເຊິ່ງມີ​ຫຼາຍໆ​ຢ່າງ​ທີ່​ຈະ​ໄດ້​ຊົມ ​ແລະ ເຫັນ​ສິ່ງ​ສວຍ​ງາມຄວາມ​ເປັນ​ວັດທະນະ​ທຳ​ປະ​ເພນີ​ຂອງ​ຊາດລາວ.

      ທ່ານ ໂມໂຕນາຣິ ສາເມະຊິມາ ກໍ່​ໄດ້​ສະ​ແດງ​ຄວາມ​ຂອບ​ໃຈ ​ແລະ ຮູ້​ສຶກ​ເປັນ​ກຽດ​ຢ່າງ​ສູງ​ທີ່​ທ່ານ​ລັດຖະມົນຕີ ສສກ ພ້ອມ​ດ້ວຍ​ຄະນະ ​​ໃຫ້ການ​ຕ້ອນຮັບ​ຢ່າງ​ອົບ​ອຸ່ນ ຄື: ທ່ານ​ຮູ້​ນຳ​ກັນ​ແລ້ວ​ວ່າ​ກິລາ​ຢູ​ໂດ​ ແມ່ນ​​ເປັນ​ກິລາ​ທີ່​ມີ​ສິລະ​ປະ​ໃນ​ການ​ຕໍ່ສູ້​ສຳຄັນ​ຫຼາຍ​ ​ແລະ ​ເປັນ​ກິລາ​ປະຈຳ​ຊາດຂອງ​ຊາວ​ຍີ່ປຸ່ນ ທີ່​ນິຍົມ​ກັນ​ຫຼິ້ນ ​ເສີມ​ສ້າງ​ໃຫ້​ສຸຂະພາບ​ຮ່າງກາຍ​ມີ​ຄວາມ​ແຂງ​ແກ່ນ​ສູງ ​ແລະ ງານ​ແຂ່ງຂັນ​ກິລາ​ໂອ​ແລມປິກ​ສາກົນ ຈະ​ຈັດ​ຂຶ້ນ​ໃນ​ປີ 2020 ທີ່​ປະ​ເທດ​ຍີ່ປຸ່ນ ​ເປັນ​ເຈົ້າພາບ ຈະ​ມີ​ນັກ​ກິລາ​ແຕ່ລະ​ທະວີບ ທີ່​ມີ​ຄວາມ​ສາມາດ​ລະດັບ​ໂລກ​ເຂົ້າ​ຮ່ວມ​ແຂ່ງຂັນ. ສະ​ນັ້ນ, ຖ້າ​ຫາກ​ນັກ​ກິລາ​ລາວ ຈະ​ເຂົ້າ​ຮ່ວມ​ແຂ່ງຂັນ​ໄດ້​ກໍ່​ຕ້ອງ​ໄດ້​​ເຂົ້າ​ຮ່ວມ​ການ​ແຂ່ງຂັນ​ລາຍການ​ນາໆ​ຊາດຕ່າງໆ ​ເພື່ອ​ສະ​ສົມຄະ​ແນນ ​ແລະ ຕ້ອງ​ມີ​ຄະ​ແນນ​ທີ່​ສູງ ຈຶ່ງ​ຈະ​ສາມາດ​ເຂົ້າ​ຮ່ວມ​ແຂ່ງຂັນ​ໄດ້ ​ແລະ ​ເຊື່ອ​ໝັ້ນ​ວ່າ ຜ່ານ​ການ​ເຝິກອົບຮົມ​ໃນ​ຊຸດ​ນີ້ ກໍ່​​ເຫັນ​ນັກ​ກິລາ​ຜູ້​ທີ່​ມີ​ຄວາມ​ສາມາດ​ຫຼາຍ​ຄົນ ​ແລະ ມີ​ໂອກາດ​ເປັນ​ໄປ​ໄດ້​ສູງທີ່​ຈະ​ກ້າວ​ເຂົ້າ​ຮ່ວມ​ແຂ່ງຂັນ​ລະດັບ​ງານ​ນີ້​ໄດ້.

      ​ໂດຍ ສົງການ