ມຊ ຈັດກິດຈະກຳສານສຳພັນມິດຕະພາບລາວ-ໄທ ຮ່ວມກັບ ມະຫາວິທະຍາໄລຂອນແກ່ນ

ສຶກສາ

Written by Super User

ມຊ ຈັດກິດຈະກຳສານສຳພັນມິດຕະພາບລາວ-ໄທ ຮ່ວມກັບ ມະຫາວິທະຍາໄລຂອນແກ່ນ

 28504743 356207271527624 704971833 o    ມະຫາວິທະຍາໄລແຫ່ງຊາດ (ມຊ) ໄດ້ຈັດກິດຈະກໍາສານສໍາພັນມິດຕະພາບລາວ-ໄທ ຮ່ວມກັບ ມະຫາວິທະຍາໄລຂອນແກ່ນ ປະ​ເທດ​ໄທ ໃນວັນທີ 23 ກຸມພາ ຜ່ານມາ ທີ່ສະໂມສອນໃຫຍ່ ມະຫາວິທະຍາໄລແຫ່ງຊາດ, ໂດຍມີ ທ່ານ ຮສ.ປອ ນາງ ສົມຈັນ ບຸນພັນມີ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ຮສ. ພຽງສັກ ພັກດີ ຮອງອະທິການບໍດີ ມະຫາວິທະຍາໄລຂອນແກ່ນ ປະ​ເທດ​ໄທ, ມີທ່ານຫົວໜ້າ-ຮອງຫົວໜ້າຫ້ອງການ, ຜູ້ອຳນວຍການສະຖາບັນ, ພ້ອມ​ດ້ວຍພະນັກງານ-ຄູອາຈານ ແລະ ນັກສຶກສາ ຈາກ 2 ມະຫາວິທະຍາໄລເຂົ້າຮ່ວມ.

      ໂອກາດດັ່ງກ່າວ, ທ່ານ ຮສ.ປອ ນາງ ສົມຈັນ ບຸນພັນມີ ​ໄດ້ລາຍ​ງານ​ໃຫ້​ຮູ້​ວ່າ: ນັບແຕ່ປີ 2014 ເປັນຕົ້ນມາ ມະຫາວິທະຍາໄລແຫ່ຊາດລາວ ແລະ ມະຫາວິທະຍາໄລຂອນແກ່ນ ໄດ້ມີການຈັດກິດຈະກຳສານສຳພັນມິດຕະພາບລາວ-ໄທ  ດ້ວຍການແລກປ່ຽນວັດທະນະທຳ ເບື້ອງຕົ້ນມີພຽງມະຫາວິທະຍາໄລແຫ່ງຊາດ ຈາກສປປ ລາວ ແລະ 4 ມະຫາວິທະຍາໄລ ຈາກປະເທດໄທ ເທົ່ານັ້ນ, ແຕ່ຍ້ອນມີການຈັດກິດກຳຢ່າງຕໍ່ເນື່ອງ ມາຮອດປັດຈຸບັນ ມີ 4 ມະຫາວິທະຍາຈາກລາວ (ມະຫາວິທະຍາໄລແຫ່ງຊາດ, ມະຫາວິທະຍາໄລວິທະຍາສາດສຸຂະພາບ, ມະຫາວິທະຍາໄລຈຳປາສັກ ແລະ ມະຫາວິທະຍາໄລສຸພານຸວົງ) ແລະ 9 ມະຫາວິທະຍາໄລຈາກໄທເຂົ້າຮ່ວມ (ມະຫາວິທະຍາໄລ ມະຫາສາລະຄາມ, ມະຫາວິທະຍາໄລອຸບົນຣາຊະທານີ, ມະຫາວິທະຍາໄລນະເລສວນ, ມະຫາວິທະຍາໄລແມ່ຟ້າຫຼວງ, ມະຫາວິທະຍາພະເຍົາ, ມະຫາວິທະຍາໄລຊຽງໃໝ່, ມະຫາວິທະຍາໄລແມ່ໂຈ້, ມະຫາວິທະຍາໄລຣາຊະພັດຊຽງ ໃໝ່ ແລະ ມະຫາວິທະຍາໄລພະເຍົາ), ເຊິ່ງກິດຈະກໍາສານສໍາພັນຄັ້ງລ່າສຸດ ແມ່ນໄດ້ຈັດຂຶ້ນທີ່ມະຫາວິທະຍາໄລຣາຊະພັດຊຽງໃໝ່ ປະເທດໄທ ໃນລະຫວ່າງ ວັນທີ 17 ພະຈິກ-ວັນທີ 20 ພະຈິກ 2017 ທີ່ຜ່ານມາ, ຈຸດປະສົງຂອງການຈັດກິດຈະກຳ ແມ່ນເພື່ອແລກປ່ຽນທາງດ້ານວິຊາການ, ວັດທະນະທຳ ລະຫວ່າງນັກສຶກສາດ້ວຍກັນໂດຍຜ່ານການນຳສະເໜີຜົນງານນະວັດຕະກຳ ແລະ ການສະແດງສິລະປະທີ່ເປັນເອກະລັກ.

      ສໍາລັບ​ງານ​ດັ່ງກ່າວ ຜູ້ເຂົ້າຮ່ວມ ຍັງໄດ້ຮັບຊົມການນຳເໜີຜົນງານທາງດ້ານວິຊາການຂອງນັກສຶກສາ ຂອງລາວ ແລະ ໄທ, ພ້ອມທັງໄດ້ຮັບຊົມການສະແດງບົດຟ້ອນຂອງນັກສຶກສາລາວໃນບົດຟ້ອນສຽງແຄນລາວ ທີ່ສະແດງເຖິງຮີດຄອງປະເພນີວັດທະນະທຳລາວອັນດີງາມ, ບົດຟ້ອນ ແລະ ລຳພື້ນເມືອງຂອງແຂວງຂອນແກ່ນ ປະເທດໄທ ທີ່ໄດ້ສືບສານສຽງລຳ ແລະ ບົດຟ້ອນອັນເປັນເອກະລັກ ປະກອບກັບສຽງພິນກັບແຄນທີ່ມີທຳນອງອັນມ່ວນຊື່ນ ອີກດ້ວຍ. ນອກນັ້ນ ບັນດາແຂກທີ່ເຂົ້າຮ່ວມຍັງໄດ້ຮ່ວມກັນຟ້ອນລຳວົງລາວ ແລະ ເຕັ້ນບັດສະລົບຮ່ວມກັນຢ່າງມ່ວນຊື່ນ.

​ໂດຍ: ນາງ ຕຸ່ນ​ຄໍາ