​ສູນໄອ​ຊີ​ທີ ສໍາ​ເລັດໂຄງການ​ທົດ​ລອງ​ການ​ສ້າງ​ຂີ​ດຄວາມ​ສາ​ມາດ​ ການສຶກສາ​ທາງ​ໄກ ໃນລາວ

ສຶກສາ

Written by Super User

​ສູນໄອ​ຊີ​ທີ ສໍາ​ເລັດໂຄງການ​ທົດ​ລອງ​ການ​ສ້າງ​ຂີ​ດຄວາມ​ສາ​ມາດ​ ການສຶກສາ​ທາງ​ໄກ ໃນລາວ

 28643452 356569621491389 957334220 o    ສູນເຕັກ​ໂນ​ໂລ​ຊີ​ຂ່າວສານ ​ແລະ ການ​ສື່ສານ ການ​ສຶກສາ ​ແລະ ກິລາ (​ໄອ​ຊີ​ທີ) ກະຊວງ​ສຶກສາ​ທິການ ​ແລະ ກິລາ ​ ສໍາ​ເລັດ​ໂຄງການ​ທົດ​ລອງ​ການສ້າງຂີດ​ຄວາມ​ສາມາ​ດ ກ່ຽວ​ກັບ​ການ​ສຶກສາ​ທາງ​ໄກ ໃນສປປ ລາວ ​ສຳລັບ 4 ​ໂຮງຮຽນ​ເປົ້າ​ໝາຍ​ຄື: ​ໂຮງຮຽນ​ ມສ ໜອງ​ບອນ, ມສ ສາລະ​ຄໍາ, ມສ ​ໂພນ​ໝີ ​ແລະ ມສ ​ໂພນ​ໂຮງໃນ​ວັນ​ທີ 28 ກຸມ​ພາ ຜ່ານ​ມາ ທີ່​ຫ້ອງ​ປະຊຸມ ​ໂຮງ​ແຮມ​ຄຣາ​ວພລາຊາ ນະຄອນຫຼວງວຽງຈັນ, ​ໄດ້​ຈັດ​ກອງ​ປະຊຸມ​ວິຊາ​ການ​ກ່ຽວ​ກັບ​ການ​ສຶກສາ​ທາງ​ໄກ​, ​ໂດຍ​ໃຫ້​ກຽດ​ເປັນ​ປະທານ​ຮ່ວມ​ຂອງ ​ທ່ານ ບົວ​ລານ ສິລິ​ປັນຍາ ຮອງ​ລັດຖະມົນຕີ​ ກະຊວງ​ສຶກສາ​ທິການ ​ແລະ ກິລາ ​ແລະ ທ່ານ ນາງ ຍໍ​ວອນ ຍັງ ຮອງ​ຫົວໜ້າ​ອົງການ​ກອຍ​ກາ ປະ​ຈໍາ ສປປ ລາວ, ມີ​ຫົວໜ້າ-​ຮອງ​ຫົວໜ້າ​ພະ​ແນ​ກ, ຜູ້​ອໍານວຍ​ການ-​ຮອງ​ຜູ້​ອໍາ​ນວນ​ການ​, ສະ​ຖາ​ບັນ, ​ໂຮງຮຽນ, ພະນັກ​ງານ, ວິຊາ​ການ ​ແລະ ຜູ້​ຮັບຜິດ​ຊອບ​ວຽກ​ງານ​ເຂົ້າ​ຮ່ວມ​ຢ່າງ​ພ້ອມພຽງ.

      ​

       ໂອ​ກາດ​ນີ້​, ທ່ານ ພູ​ເຂົາ​ກ້າ ສັກ​ລໍ​ຄໍາ ຮັກສາ​ການ​ຜູ້​ອໍານວຍ​ການ​ສູນ​ເຕັກ​ໂນ​ໂລ​ຊີ​ຂ່າວສານ ​ແລະ ການ​ສື່ສານ ການ​ສຶກສາ ​ແລະ ກິລາ ກະຊວງ​ສຶກສາ​ທິການ ​ແລະ ກິລາ ​ໄດ້​ລາຍ​ງານ​ການຈັດ​ຕັ້ງ​ປະຕິບັດ​ໂຄງການ​ຮ່ວມ​ມື​ລະຫວ່າງ​ກະຊວງ​ສຶກສາ​ທິການ ​ແລະ ກິລາ ​ແລະ ອົງ​ການ​ກອຍ​ກາ ສ ​ເກົາຫຼີ ກ່ຽວ​ກັບ​ການສ້າງຂີດ​ຄວາມ​ສາມາດ​ການ​ສຶກສາ​ທາງ​​ໄກ ​ສໍາລັບ ສປປ ລາວ ​ໃນ​ປີ 2014 ຜູ້​ບໍ​ລິຫານ, ຄູ-​ອາຈານ ​ແລະ ພະນັກງານ​ເຕັກນິກ​ວິຊາ​ການ ຈໍານວນ 22 ທ່ານ ​ໄດ້​ໄປ​ຮ່ວມ​ກອງ​ປະຊຸມ ​ແລະ ​ເຝິກອົບຮົມ​ສະ​ເພາະ​ດ້ານ​ຢູ່​ທີ່​ມະຫາວິທະຍາ​ໄລ​​ໂຊ​ໄຊ​ເບີ ສ ​ເກົາຫຼີ; ປີ 2015 ຄູ-​ອາ​ຈານ ​ແລະ ພະນັກງານ​ເຕັກນິກ​ວິຊາ​ການ ຈໍານວນ 40 ທ່ານ ​ໄດ້​ຮັບ​ການ​ເຝິກອົບຮົມ​ການ​ອອກ​ແບບ, ການ​ພັດທະນາ ​ແລະ ຜະລິດ​ສື່​ກສານ​ຮຽນ-​ການ​ສອນ​ທີ່​ມີ​ຄວາມ​ຫຼາກ​ຫຼາຍ; ປີ 2016 ຄູ-​ອາຈານ ​ແລະ ພະນັກງານ​ເຕັກ​ນິກວິຊາ​ການ ​ຈໍານວນ 81 ທ່ານ ​ໄດ້​ຮັບ​ການ​ເຝິກອົບຮົມ​ທົດ​ລອງ​ການ​ປະຕິບັດ​ການ​ຕົວ​ຈິງ​ໃນ​ການ​ອ​ອກ​ແບບ, ການ​ພັດທະນາ ​ແລະ ຜະລິດ​ສື່​ການ​ຮຽນ-​ການ​ສອນ​ທີ່​ມີ​ຄວາມ​ຫຼາກ​ຫຼາ​ຍ; ປີ 2017 ພາຍຫຼັງ​ໄດ້​ຮັບ​ການ​ເຝິກອົບຮົມ​ໄດ້​​ແລ້ວ ອີງ​ຕາມ​ແຜນການ ​ແລະ ​ເປົ້າ​ໝາຍ​ຂອງ​ໂຄງການ ຄະນະ​ຮັບຜິ​ດຊອບ​ໂຄງການ​ກະຊວງ​ສຶກສາ​ທິກ​ານ ​ແລະ ກິລາ​, ມະຫາວິທະຍາ​ໄລ​ໂຊ​​ໄຊ​ເບີ ສ ​ເກົາຫຼີ ​ແລະ ທີ​ມ​ງານ​ຜູ້​ພັດທະນາ​ໄດ້​ຮ່ວມ​ກັນ​ກໍານົ​ດ​ເອົາບົດຮຽນ​ຊັ້ນ​ ​ມ7 ​ໃນ 6 ວິຊາ (ຄະນິດສາ​ດ, ຊີວະ​ສາດ, ຟີ​ຊິກ​ສາດ, ພາສາ​ອັງກິ​​ດ ​ແລະ ​ໄອ​ຊີ​ທີ) ລວມທັງ​ໝົດ 40 ບົດ ​ໃນ​ນັ້ນ, ວິ​ຊາ​ຄະນິດສາ​ດ 6 ບົດ, ຊີວະ​ສາດ 6 ບົດ, ​ເຄມີ​ສາດ 6 ບົດ, ຟີ​ຊິກສາດ 6 ບົດ, ພາສາ​ອັງກິດ 10 ບົດ ​ແລະ ວິຊາ​ໄອ​ຊີ​ທີ 6 ບົດ ​ເພື່ອ​ພັດທະນາ​ເປັນ​ບົດ​ສອນ ​ແບບ​ເອ​ເລັກ​ໂຕຣນິກ (E-Content) ​ເພື່ອ​ໄປ​ທົດ​ລອງ​ນໍາ​ໃຊ້​ໃນ​ຫ້ອງ​ຮຽນ​ຊັ້ນ ມ7 ຂອງ​ສູ​ນ​ໄອ​ຊີ​ທີ ​ໃນ​ທົ່ວ​ປະ​ເທດ ​ແລະ 4 ​ໂຮງຮຽນ​ເປົ້າ​ໝາຍ​ຄື: ​ໂຮງຮຽນ​ ມສ ໜອງ​ບອນ, ມສ ສາລະ​ຄໍາ, ມສ ​ໂພນ​ໝີ ​ແລະ ​ມສ ​ໂພນ​ໂຮງ. ມາ​ຮອດ​ປັດຈຸບັນ, ບົດຮຽນທັງ 40 ບົດ ຂອງ 6 ວິຊາ ​ແມ່ນ​ໄດ້​ສໍາ​ເລັດ​ໂດ​ຍພື້ນຖານ ​ໃນ​ວັນ​ທີ 26 ກຸມພາ 2018 ກໍ່​ໄດ້ມີ​ກອງ​ປະຊຸມ​ປະ​ເມີນ​ຄຸນະພາບ​ຂອງ​ເນື້ອ​ໃນ​ບົດຮຽນ​ດັ່ງ​ກ່າວ ​ແລະ ​ໃນ​ວັນ​ທີ 26 ກຸ​ມພາ 2018 ກໍ່​ໄດ້​ມີ​ກອງ​ປະຊຸມ​ແນະ​ນໍາ​ຂະ​ບວນການ, ວິ​ທີ​ການ​ຜະ​ລິດ​ບົດຮຽນ​ແບບ​ເອ​ເລັກ​ໂຕຣນິກ ​ແລະ ​ເຜີຍ​ແຜ່​ແນະ​ນໍາ​ວິທີ​ໃຊ້​ໃຫ້ 4 ​ໂຮງຮຽນ​ເປົ້າ​ໝາຍ.

        ​ໂອກາດ​ດຽວ​ກັນ, ທ່ານ ບົວລານ ສິລິ​ປັນ​ຍາ ​ໄດ້​ກ່າວ​ສະ​ແດງ​ຄວາມ​ຍ້ອງຍໍ​ຊົມ​ເຊີຍ ຕໍ່​ກັບ​ຜົນ​ສໍາ​ເລັດ​ໃນ​ຄັ້ງ​ນີ້, ​ເຊິ່ງວຽກ​ງານ​ໄອ​ຊີ​ທີ​ແມ່ນ​ມີ​ບົດບາດ​ອັນ​ສໍາຄັນ ​ແລະ ບໍ່​ສາມາດ​ປະຕິ​ເສດ​ໄດ້ ​ໂດຍ​ສະ​ເພາະ​​ການ​ນໍາ​ໃຊ້​ເຂົ້າ​ໃນ​ການ​ສື່ສານ ​ແລະ ການ​ສຶກສາ​ຄົ້ນຄວ້າ​ຮໍ່າຮຽນ. ທັງ​ນີ້​ກໍ່​ເພື່ອ​ພັດ​ທະນາ​ນະ​ໂຍບາຍ ​ແລະ ​ແຜນ​ດໍາ​ເນີນ​ງານ​ກ່ຽວ​ກັບ​ການ​ສຶກສາ​ທາງ​ໄກ ​ໂດຍ​ນໍາ​ໃຊ້​ໄອ​ຊີ​ທີ​ເປັນ​ເຄື່ອງມື, ສ້າງ​ຂີດຄວາມ​ສາມາດ​ໃຫ້​ແກ່​ຄູ-​ອາຈານ ​ແລະ ພະນັກງານ​ເຕັກນິກ​ວິຊາ​ການ​ໂດຍ​ການ​ນໍາ​ໃຊ້​ໄອ​ຊີ​ທີ ​ແລະ ຊ໊ອຟແວ​ຕ່າງໆ​ເຂົ້າ​ໃນ​ການ​ຜະລິດ​ສື່​ການ​ຮຽນ-​ການ​ສອນ ​ແລະ ວິທີ​ການ​ສິດສອນ. ນອກຈາກ​ນີ້, ຍັງ​ເປັນ​ການ​ປັບປຸງ​ຄຸນະພາບ ​ແລະ ຂະຫຍາຍ​ໂອກາດ​ເຂົ້າ​ໃນ​ການ​ເຂົ້າ​ເຖິງ​ເນື້ອ​ໃນ​ການ​ສຶກສາ ທີ່​ມີ​ຄຸນະພາບ​ໃນ​ເຂດ​ຊົນນະບົດ ​ແລະ ຫ່າງ​ໄກ​ສອກຫຼີກ​ໂດຍ​ການ​ທົດ​ລອງ​​ແບບ​ລະບົບ​ອອບລາຍ.

        ໃນ​ການ​ພັດທະນາ​ໂຄງການ​ສ້າງ​ຂີດ​ຄວາມ​ສາມ​າດສໍາລັບ​ການ​ສຶກສາທາງ​ໄກ ​ສໍາ​ລັບ ສປປ ລາວ ​ແມ່ນສູນ​ເຕັກ​ໂນ​ໂລ​ຊີ​ຂ່າວສານ ​ແລະ ການ​ສື່ສານ​ການ​ສຶກສາ ​ແລະ ກິລາ ​ໄດ້​ເປັນ​ໃຈກາງ ​ແລະ ປະສານ​ສົມທົບ​ກັບ​ກົມ​ສາມັນສຶກສາ, ກົມ​ສຶກສານ​ອກ​ໂຮງຮຽນ, ສວສ, ​ແລະ ສູນ​ໂຄສະນາ​ຂ່າວສານ​ການ​ສຶກສາ ​ແລະ ກິລາ ​​ແມ່ນ​ໄດ້​ຮັບ​ການ​ຊ່ວຍ​ເຫຼືອ​ທາງ​ດ້ານ​ວິຊາ​ການ​ຈາກ​ອົງການ​ກອຍ​ກາ ສ ​ເກົາ​ຫຼີ ​ໃນ​ທ້າຍ​ປີ 2014. ນອກ​ຈາກ​ນີ້, ​ໃນ​ກອງ​ປະຊຸມ​ຍັງ​ໄດ້​ມອບ​ໃບ​ຍ້ອງ​ຍໍ​ໃຫ້​ແກ່​ຜູ້​ທີ່​ປະກອບສ່ວນ​ເຂົ້າ​ໃນ​ການຈັດ​ຕັ້ງ​ປະຕິບັດ​ໂຄງການ​ແຕ່​ປີ 2014 ຈໍານວນ 21 ຄົນ, ​ຍິງ 21 ຄົນ, ​ໃນ​ນັ້ນ, ມີ​ຄູ​ສອນ ​ຈໍານວນ 14 ທ່ານ; ຜູ້​ຮັບຜິດ​ຊອບ​ວຽກ​ງານ​ໄອ​ທີ ຈໍານວນ 4 ທ່ານ ​ແລະ ຜູ້​ຮັບ​ຜິດ​ຊອບ​ວຽກ​ງານ​ຖ່າຍ​ທໍາ-​ຕັດ​ຕໍ່ ຈໍານວນ 3 ທ່ານ.

(ບຸນທະວີ)