ໄດ້ແລ້ວ 18 ນັກເຕະ ຢູ-16 ທີມຊາດລາວ ກຽມຮ່ວມ ເຕະບານ ຍີ່ປຸ່ນ-ອາຊຽນ 2018

ສຶກສາ

Written by Super User

ໄດ້ແລ້ວ 18 ນັກເຕະ ຢູ-16 ທີມຊາດລາວ ກຽມຮ່ວມ ເຕະບານ ຍີ່ປຸ່ນ-ອາຊຽນ 2018

28534254 356600488154969 2086088210 n   ຄັດເລືອກໄດ້ເປັນທີ່ຮຽບຮ້ອຍແລ້ວ ສຳລັບ 18 ນັກເຕະເຍົາວະຊົນທີມຊາດລາວ ຮຸ່ນອາຍຸບໍ່ເກີນ 16 ປີ ຫຼື ຢ-16 ກຽມສົ່ງເຂົ້າຮ່ວມການແຂ່ງຂັນເຕະບານ ເຍົາວະຊົນ ຮຸ່ນອາຍຸບໍ່ເກີນ 16 ປີ ລາຍການ ພິເສດ ຍີ່ປຸ່ນ-ອາຊຽນ ປະຈຳປີ 2018 ຫຼື “JENESYS Japan-ASEAN U-16 Football Exchange Programme”  ຈະຈັດຂຶ້ນລະຫວ່າງວັນທີ 6-15 ມີນານີ້ ທີ່ເມືອງ ມິຢາຊາກິ ປະເທດຍີ່ປຸ່ນ.

   ອີງຕາມຂໍ້ມູນຈາກເວັບໄຊ໊ ຂອງສະຫະພັນບານເຕະແຫ່ງຊາດລາວ ຫຼື ສຕລ ແຈ້ງໃຫ້ຊາບວ່າ: ພາຍຫຼັງທີ່ໄດ້ມີການຄັດເລືອກນັກກິລາເຕະບານ ຮຸ່ນອາຍຸບໍ່ເກີນ 16 ປີ ທີມຊາດລາວ ມາແຕ່ກາງເດືອນມັງກອນ ເປັນຕົ້ນມາ ຮອດປັດຈຸບັນ, ສະຫະພັນບານເຕະແຫ່ງຊາດລາວ ກໍ່ໄດ້ມີການປະກາດລາຍຊື່ ຄະນະນຳ, ຄະນະຄູເຝິກ ແລະ ນັກກິລາ ທີມຊາດລາວ ຢ່າງເປັນທາງການ ເພື່ອກຽມຈະສົ່ງເຂົ້າຮ່ວມແຂ່ງຂັນບານເຕະເຍົາວະຊົນ ລາຍການ ພິເສດ ຍີ່ປຸ່ນ-ອາຊຽນ ປະຈຳປີ 2018 ໃນລະຫວ່າງວັນທີ 6-15 ມີນາ ຜ່ານ​ມາ ທີ່ເມືອງມິຢາຊາກິ ປະເທດຍີ່ປຸ່ນ, ​ເຊິ່ງມີ ທ່ານ ອຳມະລິດ ຈັນທະລັງສີ ຜູ້ຈັດການທີມ, ທ່ານ ກັນລະຍາ ສີສົມຫວັງ ຫົວໜ້າຄູ​ເຝິກ, ທ່ານ ອຸດຕະມະ ຂາງມະນີວົງ ຜູ້ຊ່ວຍຄູເຝິກ, ທ່ານ ຈັນທະຄາດ ສ່ຽນຜ່ອງໃສ ຄູເຝິກປະຕູ, ທ່ານ ສຸວັນນີ ພົມມະຈັນ ແພດປະຈໍາທີມ, ທ່ານ ວົງມີໄຊ ສຸບົວຄຳ ບໍລິຫານທີມ.

       ສ່ວນນັກກິລາ ປະກອບມີ ຜູ້ຮັກສາປະຕູ ທ້າວ ດິມ ພຸດທະວົງ ຈາກ ສະໂມສອນ ຊ້າງນ້ອຍ, ທ້າວ ສໍລະສັກ ທິລະວົງ ຈາກແຂວງສະຫວັນນະເຂດ; ທ້າວ ອານັນຕະຊາ ສີພົງພັນ ແຂວງສະຫວັນນະເຂດ, ທ້າວ ເພັດທະນົງສັກ ໄຊຍະລາດ ແຂວງສະຫວັນນະເຂດ, ທ້າວ ພຸດທະວົງ ສັງວິໄລ ແຂວງຈຳປາສັກ, ທ້າວ ສົງການ ສີຈັນທະວົງ ຈາກສະໂມສອນ ພີວີ ເອັຟຊີ, ທ້າວ ບິກ ສີຫາລາດ ຈາກສະໂມສອນ ລາວໂຕໂຢຕ້າ, ທ້າວ ອານຸລັກ ວັນນະລາດ ຈາກສະໂມສອນ ລາວ ໂຕໂຢຕ້າ, ທ້າວ ຟຸດບອນ ກຸນນະເສນ ຈາກ ສະໂມສອນ ເອສຣາ, ທ້າວ ອາຄົມ ທໍລະນິນ ຈາກ ສະໂມສອນ ປກສ, ທ້າວ ອານັນທະນາ ຈັນທະມາລີ ຈາກສະໂມສອນ ລາວ ໂຕໂຢຕ້າ, ທ້າວ ອາລຸນໄນ ລຸນລາລີ ຈາກ ສະໂມສອນ ລາວໂຕໂຢຕ້າ, ທ້າວ ຄອນສະຫວັນ ແກ້ວໜູຈັນ ຈາກ ສະໂມສອນ ຊ້າງນ້ອຍ, ທ້າວ ສິດປະເສີດ ສີອິນທະວົງ ຈາກ ສະໂມສອນ ຊ້າງນ້ອຍ, ທ້າວ ອຸດົມສັກ ສີປະເສີດ ຈາກ ນະຄອນຫຼວງວຽງຈັນ, ທ້າວ ໂຈນີ້ ແຫວນປະເສີດ ຈາກສະໂມສອນ ເອສຣາ, ທ້າວ ສຸກສາຄອນ ບົວໄພວັນ ຈາກ ສະໂມສອນ ລາວໂຕໂຢຕ້າ ​ແລະ ທ້າວ ທຽນເທວາ ສີປະຈຳ ຈາກສະໂມສອນ ຊ້າງນ້ອຍ

      ການແຂ່ງຂັນເຕະບານລາຍ​ການ​ດັ່ງກ່າວ ມີທີມເຂົ້າຮ່ວມທັງ 12 ທີມແບ່ງອອກເປັນ 4 ກຸ່ມ ຄື: ກຸ່ມ ເອ ປະກອບ​ມີ ທີມຊາດຍີ່ປຸ່ນ ຮຸ່ນອາຍຸບໍ່ເກີນ 15 ປີ, ຕີມໍ ເລສເຕ ແລະ ມາເລເຊຍ; ກຸ່ມ ບີ ມີ ອິນໂດເນເຊຍ, ຟີລິບປິນ ແລະ ກຳປູເຈຍ; ກຸ່ມ ຊີ ມີ ໄທ, ສິງກະໂປ ແລະ ບຣູໄນ; ກຸ່ມ ດີ ຫວຽດນາມ, ລາວ ແລະ ມິຢາຊາກິ ປະເທດຍີ່ປຸ່ນ.ສ່ວນ​ໂປຣ​ແກຣມການແຂ່ງຂັນຂອງ ທີມຊາດລາວ ຈະລົງ​ສະໜາມ​ນັດ​ທຳ​ອິດ​ໃນ​ວັນ​ທີ 8 ມີນາ 2018 ເວລາ 14:00 ​ໂມງ​ ພົບ​ກັບ ສສ ຫວຽດນາມ ​ແລະ ນັດ​ທີ 2 ລາວ ພົບ ມິຢາຊາກິ ເວລາ 14:00 ​ໂມງ ​​ໃນວັນ​ທີ 10 ມີນາ 2018​ ເຊິ່ງຄາດ​ວ່າ​ທີ​ມຊາດ​ລາວ ຈະໄດ້ອອກເດີນທາງໄປປະເທດຍີ່ປຸ່ນ ໃນວັນທີ 5 ມີນາ 2018​.

​ໂດຍ ສົງ​ການ