“ລົດແກ້ວ” ຕັ້ງເປົ້າ 1 ໃນ 3 ແລ່ນວຽງຈັນ ຮາບມາຣາທອນ ນາໆຊາດ 2018

ສຶກສາ

Written by Super User

“ລົດແກ້ວ” ຕັ້ງເປົ້າ 1 ໃນ 3 ແລ່ນວຽງຈັນ ຮາບມາຣາທອນ ນາໆຊາດ 2018

28535092 356587358156282 192084248 n    ​ນາງ ລົດແກ້ວ ອິນທະກຸມມານ ນັກແລ່ນດາວຮຸ່ງຂອງທີມຊາດລາວ ຕັ້ງ​ເປົ້າ​ໝາຍ ​ຫວັງຕິດ 1 ​ໃນ 3 ​ອັນ​ດັບ​ທຳ​ອິດໃນ​ປະ​ເພດ​ທົ່ວ​ໄປ​ຍິງ ຂອງການ​ແຂ່ງຂັນ​ແລ່ນ​ວຽງ​ຈັນ ຮາ​ບມາຣາທອນ ນາໆ​ຊາດ 2018 ຫຼື “Vientiane International Half Marathon 2018” ທີ່ຈະ​ເປີດ​ສາກ​ຂຶ້ນ​ໃນ​ຕົ້ນ​ເດືອນ​ມີນາ​​ນີ້. ພ້ອມ​​ເຊີນຊວນ​ນັກ​ແລ່ນ​ທົ່ວ​ປະ​ເທດ ​ແລະ ຕ່າງປະ​ເທດ ​ເຂົ້າ​ຮ່ວມ​ແຂ່ງຂັນ ເພື່ອໃຫ້ມີບັນຍາກາດຟົດຟື້ນຍິ່ງໆຂຶ້ນ.

    ອີງ​ຕາມ​ການ​ໃຫ້​ສຳພາດ​ຂອງ ນາງ ລົດແກ້ວ ອິນທະກຸມມານ ນັກແລ່ນດາວຮຸ່ງຂອງທີມຊາດລາວ ​ເຈົ້າ​ຂອງ​ຫຼຽນ​ທອງ ກິລາ​ແລ່ນ-ລານຄົນທຳອິດຂອງສປປ ລາວ ​ໃນ​ງານ​ມະຫາກຳ​ກິລາ​ ຊີເກມ ຄັ້ງທີ 29 ທີ່ປະເທດມາເລເຊຍ ເປັນເຈົ້າພາບ ໃນປີ 2017 ຜ່ານມາ ​ໃນ​ຕອນ​ເຊົ້າ​ວານ​ນີ້ (28 ກຸມພາ) ​ໃຫ້​ຊາບ​ວ່າ: ​ສຳລັບການ​ເຂົ້າ​ຮ່ວມແຂ່ງຂັນ​ແລ່ນ​ວຽງ​ຈັນ ຮາ​ບມາຣາທອນ ນາໆ​ຊາດ 2018 ປີ​ທີ 3 ທີ່ກຽມ​ເປີດ​ສາກ​ຂຶ້ນ​ໃນ​ວັນ​ທີ 4 ​ມີນາ​ນີ້ ນ້ອງຈະເຂົ້າ​ຮ່ວມ​ແນ່ນອນ ​ແລະ ຈະ​ລົງ​ແລ່ນ​ໃນ​ລາຍການ 21 ກິ​ໂລ​ແມັດ ​ພ້ອມ​ຕັ້ງ​ເປົ້າ​ໝາຍ​ຈະ​ໃຫ້​ຕິດ 1 ​ໃນ 3 ອັນ​ດັບ​ທຳ​ອິດ​ຂອງ​ປະ​ເພດ​ທົ່ວ​ໄປ​ຍິງ ​ແລະ ຂໍ​ເຊີນຊວນນັກ​ກິລາ​ລາວ​ທົ່ວ​ປະ​ເທດ ​ໂດຍ​ສະ​ເພາະ​ຊາວ​ນະຄອນຫຼວງ​ວຽງ​ຈັນ ​ແລະ ຕ່າງປະ​ເທດ ​ເຂົ້າ​ຮ່ວມ​ແຂ່ງຂັນ ຫຼື ມາອອກກຳລັງ​ກາຍ​ພ້ອມໆ​ກັນ ​ໃນ​ງານ​ນີ້​ກັນ​ຫຼາຍໆ.

       ລົດແກ້ວ ອິນທະກຸມມານ ກ່າວ​ຕື່ມ​ອີກ​ວ່າ: ຫຼັງຈາກສຳ​ເລັດການເຂົ້າຮ່ວມ ລາຍການ ວຽງຈັນ ຮາບມາຣາ​ທອນແລ້ວ ນ້ອງ​ກໍ່​ຈະ​ກະກຽມ​ຄວາມ​ພ້ອມ​ເຂົ້າ​ຮ່ວມ​ງານ​ແລ່ນ-ລານ ລາຍການ ສິງກະ​ໂປ ​ໂອ​ເພັນ 2018 ຫຼື “Singapore Open 2018” ທີ່ປະເທດສິງກະໂປ ​ເປັນ​ເຈົ້າພາບ ​ໃນ​ລະຫວ່າງວັນ​ທີ 10-13 ​ເມສາ 2018, ເຊິ່ງຈະລົງແຂ່ງຂັນ 2 ລາຍການຄື: 800 ​ແມັດຍິງ ​ແລະ 1.500 ແມັດຍິງ.ສຳລັບຜົນງານ​ຂອງ ນາງ ລົດແກ້ວ ອິນທະກຸມມານ ທີ່​ໂດດ​ເດັ່ນ​ທີ່​ສຸດ​ກໍ່​ແມ່ນ ການ​ຄວ້າ​ຫຼຽນ​ທອງ ກິລາ​ແລ່ນ-ລານ ເປັນຄົນທຳອິດ ຂອງ​ສປປ ລາວ ​ໃນ​ງານ​ມະຫາກຳ​ກິລາ​ ຊີເກມ ຄັ້ງທີ 29 ທີ່ປະເທດມາເລເຊຍ ເປັນເຈົ້າພາບ ໃນປີ 2017 ຜ່ານມາ ​ແລະ ລ່າ​ສຸດ ​ໃນ​ເດືອນ​ກຸມພາ​ຜ່ານ​ມາ ​ແມ່ນສາມາດ​ສ້າງ​ຊື່​ສຽງ​ຢູ່​ປະ​ເທດ​ໄທ​ໄດ້ ປະກອບ​ມີ ຄວ້າອັນດັບທີ 2 ລາຍການ ແລ່ນ Amazing Thailand Marathon Bangkok 2018 ທີ່ນະຄອນຫຼວງບາງກອກ ປະເທດໄທ ເປັນເຈົ້າພາບ ໃນວັນ​ທີ 4 ກຸມພາ ຜ່ານ​ມາ ໄລຍະທາງ 10 ກິໂລແມັດຍິງ ​ແລະ ຄວ້າ​ອັນ​ດັບ 1 ​ລາຍການ Buriram International Marathon 2018 ທີ່ແຂວງບູຣິຣຳ ປະເທດໄທ ເປັນເຈົ້າພາບ ໃນວັນທີ 11 ກຸມພາ ຜ່ານມາ ໄລຍະທາງ 10 ກິ​ໂລ​ແມັດ​ຍິງ. ນອກຈາກ​ນັ້ນ, ລົດແກ້ວ ອິນທະກຸມມານ ຍັງ​ໄດ້​ແບ່ງປັນ​ລາງວັນ​ທີ່​ໄດ້​ມາ​ຈາກ 2 ລາຍການ​ດັ່ງກ່າວ ຈຳນວນ 4 ລ້ານ​ກີບ ​ເຂົ້າ​ຊ່ວຍ​ເຫຼືອ​ສ້າງ​ໂຮງຮຽນ​ບ້ານກັດ ​ແຂວງ​ອຸດົມ​ໄຊ.

        ການແຂ່ງຂັນແລ່ນວຽງຈັນ ຮາບມາຣາທອນ ນາໆຊາດ ປີທີ 3 ທີ່​ຈະ​ມີ​ຂຶ້ນ​ໃນວັນທີ 4 ມີນາ ນີ້​ ມີທັງ​ໝົດ 3 ລາຍການຄື: ຮາບມາຣາທອນ 21 ກິໂລແມັດ, ມິນິມາຣາທອນ 10,5 ກິໂລແມັດ ແລະ ແລ່ນ-ຍ່າງ ເພື່ອສຸຂະພາບ 5 ກິໂລແມັດ ປະເພດຍິງ-ຊາຍທົ່ວໄປ ບໍ່ຈຳກັດອາຍຸ. ສຳລັບເສັ້ນທາງການແລ່ນ ແມ່ນເລີ່ມຈາກປະຕູໂຂງເດີ່ນພະທາດຫຼວງ-ຜ່ານປະຕູໄຊ-ໄປສູ່ຈຸດໂຄ້ງກ່ອນໜ້າສະໜາມບິນສາກົນວັດໄຕ-ມຸ່ງໜ້າສູ່ເສັ້ນທາງແຄມຂອງ ວິທະຍາໄລເຕັນນິກ ປາກປ່າສັກ ແລະ ໄປໂຄ້ງທີ່ໂຮງແຮມແລນມາກ-ກັບສູ່ວົງວຽນໂຮງຮຽນເຕັກນິກປາກປ່າສັກ-ຜ່ານເສັ້ນທາງນໍ້າຜຸ-ຫໍຄຳ ແລະ ກັບຄືນສູ່ປະຕູໂຂງເດີ່ນພະທາດຫຼວງ ຈະເລີ່ມແຂ່ງຂັນຕັ້ງແຕ່ເວລາ 5:00 ໂມງເປັນຕົ້ນໄປ.ສ່ວນຄ່າສະໝັກ ແລ່ນຮາຟມາຣາທອນ 21 ກິໂລແມັດ ສຳລັບຄົນລາວ 160.000 ກີບ, ຄົນຕ່າງປະເທດ 50 ໂດລາສະຫະລັດ; ແລ່ນມິນິມາຣາທອນ 10,5 ກິໂລແມັດ ຄ່າສະໝັກ ສຳລັບຄົນລາວ 120.000 ກີບ, ຄົນຕ່າງປະເທດ 40 ໂດລາ ແລະ ປະເພດແລ່ນ-ຍ່າງ ເພື່ອສຸຂະພາບ 5 ກິໂລແມັດ ຄ່າສະໝັກ ສຳລັບຄົນລາວ 80.000 ກີບ, ຄົນຕ່າງປະເທດ 15 ໂດລາ. ນັກແລ່ນທີ່ຮ່ວມລົງທະບຽນທັງ 3 ປະເພດ ຈະໄດ້ຮັບເສື້ອແລ່ນ ແລະ ຖ້າຕິດອັນດັບ 1-5 ໃນປະເພດຮາບມາຣາທອນ 21 ກິໂລແມັດ ແລະ ມິນິມາຣາທອນ 10,5 ກິໂລແມັດ ຈະໄດ້ຮັບເງິນລາງວັນ ພ້ອມຂັນລາງວັນຈາກຄະນະຈັດການແຂ່ງຂັນ.

       ໂດຍລາງວັນທີ 1 ປະເພດແລ່ນຮາບມາຣາທອນ 21 ກິໂລແມັດ ຍິງ-ຊາຍ ຈະໄດ້ຮັບເງິນລາງວັນ 5 ລ້ານກີບ, ອັນດັບ 2 ຈຳນວນ 2,5 ລ້ານກີບ, ອັນດັບ 3 ຈຳນວນ 1 ລ້ານກີບ, ອັນດັບ 4 ຈຳນວນ 7 ແສນກີບ ແລະ ອັນດັບ 5 ຈຳນວນ 5 ແສນກີບ; ລາງວັນທີ 1 ປະເພດແລ່ນມິນິມາຣາທອນ 10,5 ກິໂລແມັດ ຍິງ-ຊາຍ ຈະໄດ້ຮັບເງິນລາງວັນ 2 ລ້ານກີບ, ອັນດັບ 2 ຈຳນວນ 1 ລ້ານກີບ, ອັນດັບ 3 ຈຳນວນ 8 ແສນກີບ, ອັນດັບ 4 ຈຳນວນ 6 ແສນກີບ ແລະ ອັນດັບ 5 ຈຳນວນ 4 ແສນກີບ. ເຊິ່ງຄາດວ່າຈະມີນັກກິລາເຂົ້າຮ່ວມ 2.500-3.000 ຄົນທີ່ມາຈາກຫຼາຍປະເທດທົ່ວໂລກ. ຂະນະທີ່ປັດຈຸບັນ ມີນັກແລ່ນລົງທະບຽນເຂົ້າຮ່ວມແຂ່ງຂັນແລ້ວເຖິງ 1.000 ກວ່າຄົນ. ຢ່າງໃດກໍ່ຕາມ, ສຳລັບໃນປີຜ່ານມາ  ມີນັກກິລາເຂົ້າຮ່ວມ 2.200 ກວ່າຄົນ ຈາກ 50 ປະເທດ.

ໂດຍ: ອຳໄພວັນ