ພະນັກງານ, ຄູ-ອາຈານ ວລ ປາກປ່າສັກ ​ຮັບຟັງການເຜີຍແຜ່ວຽກງານຕ້ານການສໍ້ລາດບັງຫຼວງ

ສຶກສາ

Written by Super User

ພະນັກງານ, ຄູ-ອາຈານ ວລ ປາກປ່າສັກ ​ຮັບຟັງການເຜີຍແຜ່ວຽກງານຕ້ານການສໍ້ລາດບັງຫຼວງ

28547748 356546488160369 1577991001 o    ​​ຄະນະພັກຮາກຖານ, ພະນັກງານ, ຄູ-ອາຈານ ທົ່ວວິທະຍາ​ໄລ ເຕັກນິກປາກປ່າສັກ ຮັບຟັງການເຜີຍແຜ່ວຽກງານຕ້ານການສໍ້​ລາດ​ບັງ​ຫຼວງ​​​ ເນື່ອງ​ໃນ​ໂອກາດ​ວັນ​ຕ້ານ​ການສໍ້​ລາດ​ບັງ​ຫຼວງສາກົນ ຄົບຮອບ 14 ປີ (9 ທັນວາ 2003-9 ທັນວາ 2017)​ ​ເພື່ອ​ຍົກສູງຄວາມສາມາດການນໍາພາ ແລະ ການເປັນແບບຢ່າງນໍາໜ້າຂອງພັກ-ລັດ ໃນການຈັດຕັ້ງປະຕິບັດວຽກງານຕ້ານການສໍ້ລາດບັງຫຼວງ ໃຫ້ປາກົດຜົນເປັນຈິງ.

   ​ໃນວັນ​ທີ 27 ກຸມພາ ຜ່ານ​ມາ ທີ່​ວິທະຍາ​ໄລ​ດັ່ງກ່າວ ໄດ້ພິທີ​ປາຖະກະຖາ​​ ເນື່ອງ​ໃນ​ໂອກາດ​ວັນ​ຕ້ານ​ການສໍ້​ລາດ​ບັງ​ຫຼວງສາກົນ ຄົບຮອບ 14 ປີ ແລະ ລະນຶກເຖິງວັນສ້າງຕັ້ງອົງການກວດກາພັກ-ລັດ ຄົບຮອບ 36 ປີ (16 ກຸມພາ 1982-16 ກຸມພາ 2018), ​​ໃຫ້​ກຽດ​ບັນຍາຍ​ເອກະສານ​ວຽກ​ງານ​ດັ່ງກ່າວ​​ໂດຍ ສະຫາຍ ສາຍຄຳ ພັນທະວົງ ຄະນະພັກກະຊວງສຶກສາທິການ ແລະ ກິລາ, ເລຂາຄະນະພັກຮາກຖານ, ຜູ້ອຳນວຍການວິທະຍາໄລເຕັກນິກປາກປ່າສັກ, ​​ມີຄະນະພັກຮາກຖານ, ຄະນະອຳນວຍການ, ຄະນະ​ບໍລິຫານ​ງານ 3 ອົງການ​ຈັດ​ຕັ້ງ​ມະຫາຊົນ ພ້ອມ​ດ້ວຍພະນັກງານ, ຄູ-ອາຈານ ທົ່ວວິທະຍາ​ໄລເຂົ້າ​ຮ່ວມ.

      ​ໂອກາດ​ດັ່ງກ່າວ, ສະຫາຍ ສາຍ​ຄໍາ ພັນທະ​ວົງ ໄດ້ຍົກໃຫ້ເຫັນເຖິງສະພາບລວມຂອງການສໍ້ລາດບັງຫຼວງ ແລະ ການກໍານົດວັນຕ້ານການສໍ້ລາດບັງຫຼວງສາກົນ ແມ່ນວັນທີ 14 ທັນວາ 2000, ອົງການສະຫະປະຊາຊາດ (UN) ​ໄດ້​ກໍານົດ​ຄວາມ​ຈໍາ​ເປັນ​ຕ້ອງ​ມີ​ກົດໝາຍ​ສາກົນ ທີ່​ມີ​ຜົນ​ສັກສິດ​ໃນ​ການ​ສະກັດ​ກັ້ນ ​ແລະ ຕ້ານ​ການ​ສໍ້​ລາດ​ບັງ​ຫຼວງ​ ຢູ່​ໃນ​ໂລກ, ​ເຊິ່ງສ້າງ​ຕັ້ງ​ຂຶ້ນ​ໂດຍ​ຄະນະ​ກໍາມະການ​ຮ່າງ​ກົດ​ບັດ​ສະຫະ​ປະຊາ​ຊາດ ກ່ຽວ​ກັບ​ການ​ຕ້ານ​ການ​ສໍ້​ລາດ​ບັງ​ຫຼວງ. ຫຼັງ​ຈາກ​ນັ້ນ, ​ໃນ​ວັນ​ທີ 18 ທັນວາ 2002 ​ໄດ້​ຮັບຮອງ​ສົນທິສັນຍາ​ສະຫະ​ປະຊາ​ຊາດ ວ່າ​ດ້ວຍ​ການ​ຕ້ານ​ການສໍ້​ລາດ​ບັງ​ຫຼວງ ທີ່ນະຄອນນິວຢອກ ສະຫະລັດ​ອາ​ເມຣິກາ ​ແລະ ​ໃນ​ວັນ​ທີ 9 ທັນວາ 2003 ​ໄດ້​ເປີດ​ໃຫ້​ບັນດາ​ລັດ​ພາຄີ ລົງ​ນາມ​ເຂົ້າ​ເປັນ​ສະມາຊິກ, ຈັດ​ຂຶ້ນ​ທີ່​ປະ​ເທດໂຄລອມເບຍ, ​ເຊິ່ງມາ​ຮອດປັດຈຸບັນ ມີ 183 ພາຄີ. ​ໃນ​ນັ້ນ, ​ເປັນ​ສະມາຊິກ 178 ປະ​ເທດ. ສ່ວນ ສປປ ລາວ ​ແມ່ນ​ໄດ້​ລົງ​ນາມ​ສົນທິສັນຍາ ວ່າ​ດ້ວຍ​ການ​ຕ້ານ​ການ​ສໍ້​ລາດ​ບັງ​ຫຼວງ ​ໃນ​ວັນ​ທີ 10 ທັນວາ 2003 ​ແລະ ວັນ​ທີ 25 ກັນຍາ ສປປ ລາວ  ​ໃຫ້​ສັດຕະຍາບັນ.

      ສ່ວນການ​ສະກັດກັ້ນ ແລະ ຕ້ານການສໍ້ລາດບັງຫຼວງ ຢູ່ ສປປ ລາວ ມີລັກສະນະ​ແພ່​ລາມ ​ໃນ​ຫຼາຍ​ຂົງ​ເຂດ ປະກອບ​ມີ ຄື: ການ​ຄຸ້ມ​ຄອງ​ບໍລິຫານ​ລັດ, ການ​ກໍ່ສ້າງ​ພື້ນຖານ​ໂຄງ​ລ່າງ, ການ​ນໍາ​ໃຊ້​ຊັບ​ສິນ​ຂອງ​ລັດ, ການ​ເກັບ​ລາຍ​ຮັບງົບປະມານ, ການ​ຄຸ້ມ​ຄອງ​ລາຍ​ຈ່າຍ​ງົບປະ​ມານ, ການ​ສວຍ​ໃຊ້​ອໍາ​ນາດ​ໜ້າ​ທີ່, ການ​ຕໍ່​ລອງ​ຜົນ​ປະ​ໂຫຍ​ດຈາກ​ຜູ້​​ໃຊ້​ບໍລິການ, ​ໃຊ້​ຊ່ອງ​ວ່າງ​ຂອງ​ລະບຽບ​ກົດໝາຍ, ສ້າງ​ລະບອບ​ນະ​ໂຍບາຍ​ສະ​ເພາະ ​ແລະ ອື່ນໆ.ສໍາລັບ​ພຶດຕິ​ກໍາ ທີ່​ເປັນ​ການ​ສໍ້​ລາດ​ບັງ​ຫຼວງ ປະກອບ​ມີຄື​: ການ​ຍັກ​ຍອກ​ຊັບ​ສິນ​ຂອງ​ລັດ ຫຼື​ລວມໝູ່; ການ​ສໍ້​ໂກງ​ຊັບ​ສິນ​ຂອງ​ລັດ ຫຼື ລວມໝູ່; ການ​ໃຫ້​ສິນ​ບົນ; ການ​ຮັບ​ສິນ​ບົນ; ການ​ສວຍ​ໃຊ້​ຖານະ​ຕໍາ​ແໜ່​ງ, ສິດ​, ໜ້າ​ທີ່ ​ເພື່ອ​ເອົາ​ຊັບ​ສິນ​ຂອງ​ລັດ, ລວມໝູ່ ຫຼື ບຸກຄົນ; ການ​ສວຍ​ໃຊ້ສັບ​ສິນ​ຂອງ​ລັດ ຫຼື ລວມໝູ່; ການ​ໃຊ້​ຖານະ​ຕໍາ​ແໜ່​ງ, ສິດ​ອໍານາດ, ໜ້າ​ທີ່​ເກີນ​ຂອບ​ເຂດ ​ເພື່ອ​ເອົາ​ຊັບ​ສິນ​ຂອງ​ລັດ, ລວມໝູ່ ຫຼື ບຸກຄົນ; ການ​ລັກ​ໂລບ, ປອມ​ແປງ​ມາດຕະຖານ​ເຕັກນິກ​ກໍ່ສ້າງ, ອອກ​ແບບ, ຄິດ​ໄລ່ ​ແລະ ອື່ນໆ; ການປະມູນ​ໂຄງ​ການ ຫຼື ການ​ສໍາປະທານ ​ແລະ ການ​ປອມ​ແປງ​ເອກະສານ ຫຼື ການ​ນໍາ​ໃຊ້​ເອກະສານ​ປອມ.

ຂ່າວ​ໂດຍ: ນາງ ຕຸ່ນ​ຄໍາ