9 ເມືອງ​ ແຂວງ​ສະ​ຫວັນ​ນະ​ເຂດ ໄດ້​ຮັບການ​ປັບ​ປຸງ​ຄຸນະ​ພາບແລະ ຂະ​ຫຍາຍ​ໂອ​ກາດ​ເຂົ້າ​ຮຽນ

ສຶກສາ

Written by Super User

9 ເມືອງ​ ແຂວງ​ສະ​ຫວັນ​ນະ​ເຂດ ໄດ້​ຮັບການ​ປັບ​ປຸງ​ຄຸນະ​ພາບແລະ ຂະ​ຫຍາຍ​ໂອ​ກາດ​ເຂົ້າ​ຮຽນ

28548099 356549068160111 1279203276 o    ແຂວງ​ສະ​ຫວັນ​ນະ​ເຂດ ໄດ້​ຮັບ​ການ​ສະ​ໜັບ​ສະ​ໜູນ​ຈາກ​ລັດ​ຖະ​ບານ​ອອສເຕຣເລຍ ແລະ ສະ​ຫະພາບ​ຢູໂຣບ ໃນ​ການ​ປັບ​ປຸງ​​ຄຸ​ນະ​ພາບ ແລະ ການ​ຂະ​ຫຍາຍ​ໂອ​ກາດ​ການ​ເຂົ້າ​ຮຽນ ສຳ​ລັບ​ການ​ສຶກ​ສາ​ຂັ້ນ​ພື້ນ​ຖານ ໃນ 9 ເມືອງ ລວມມູນ​ຄ່າ 12 ຕື້ກວ່າ​ກີບ.ໃນ​ວັນ​ທີ 27 ກຸມ​ພາ ​ຜ່ານ​ມາ ທີ່​ບ້ານ​ເທີ້ມ​ນ້ອຍ ເມືອງ​ພະ​ລານ​ໄຊ ແຂວງ​ສະ​ຫວັນ​ນະ​ເຂດ ໄດ້ມີ​ພິ​ທີ​ຈັດ​ຕັ້ງ​ປະ​ຕິ​ບັດ​ໂຄງ​ການ​ແຜນ​ງານບີກວາ, ໂດຍ​ມີ ທ່ານ ຄຳ​ພູນ ຕຸ​ໄພ​ທູນ ຮອງ​ເຈົ້າ​ແຂວງ​ສະ​ຫວັນ​ນະ​ເຂດ, ທ່ານ ຊອນເບີ​ນາດ ຄາ​ລະ​ສະ​ໂກ ​ເອກ​ອັກ​ຄະ​ລັດ​ຖະ​ທູດ​ອອສເຕຣເລຍ ປະ​ຈຳ​ລາວ ແລະ ທ່ານ ນາງ ຫຼິງທອງ ແສງຕາວັນ ຫົວໜ້າພະແນກສຶກສາທິການ ແລະ ກິລາແຂວງ, ມີ​ບັນ​ດາ​ຄະ​ນະ​ພັດ​ທະ​ນາ​ການ​ສຶກ​ສາ​ທຸກ​ຂັ້ນ, ແຂກ​ທີ່ຖືກ​ເຊີນ ພ້ອມ​ດ້ວຍ​ນ້ອງ​ນັກ​ຮຽນ ແລະ ປະຊາຊົນຊາວ​ບ້ານ​ເທີ້ມ​ນ້ອຍ​ເຂົ້າ​ຮ່ວມ.

 

      ທ່ານ ນາງ ຫຼິງ​ທອງ ແສງ​ຕາ​ວັນ ລາຍ​ງານ​ສະ​ພາບ​ການ​ຈັດ​ຕັ້ງ​ປະ​ຕິ​ບັດ​ໂຄງ​ການ​ແຜນ​ງານບີກວາໃຫ້​ຮູ້​ວ່າ: ໂຄງ​ການ​ດັ່ງ​ກ່າວ ​ໄດ້​ຮັບ​ທຶນ​ສະ​ໜັບ​ສະ​ໜູນ​ຈາກ​ລັດ​ຖະ​ບານ​ອອສເຕຣເລຍ ແລະ ສະ​ຫະພາບ​ຢູໂຣບ ທີ່​ໃຫ້​ການ​ຊ່ວຍ​ເຫຼືອ​ແກ່​ລັດ​ຖະ​ບານ​ລາວ​ ໃນ​ແຜນ​ງານ​ປັບ​ປຸງ​ຄຸ​ນະ​ພາບ ແລະ ການ​ຂະ​ຫຍາຍ​ໂອ​ກາດ​ການ​ເຂົ້າ​ຮຽນ ​ສຳ​ລັບ​ການ​ສຶກ​ສາ​ຂັ້ນ​ພື້ນ​ຖານ ຢູ່ ສ​ປ​ປ​ລາວ ໃນ​ 5 ແຂວງ​ທົ່ວ​ປະ​ເທດ ມູນ​ຄ່າປະມານ 34 ຕື້ກວ່າກີບ (59 ລ້ານກວ່າ​ໂດ​ລາ​ອອສເຕຣເລຍ). ໃນ​ນັ້ນ, ແຂວງ​ສະ​ຫວັນ​ນະ​ເຂດ ກໍ່​ແມ່ນ​ໜຶ່ງ​ໃນ​ແຂວງ​ເປົ້າ​ໝາຍ​ຂອງ​ໂຄງ​ການ ແລະ ມີ 9 ເມືອງ​ເປົ້າ​ໝາຍ​ຄື: ອຸ​ທຸ​ມ​ພອນ, ອາດ​ສະ​ພອນ, ຊົນ​ນະ​ບູ​ລີ, ທ່າ​ປາງ​ທອງ, ພີນ, ເຊ​ໂປນ, ວິ​ລະ​ບູ​ລີ, ນອງ ແລະ ພະ​ລານ​ໄຊ ເຊິ່ງ​ໄດ້​ມີ​ການກໍ່​ສ້າງ​ຄູ​ຊົນ​ເຜົ່າແລະ ໃຫ້​ທຶນ​ໄດ້​ຮຽນ​ສ້າງ​ຄູ​ ຈຳ​ນວນ 123 ຄົນ, ເຝິກອົບ​ຮົມ​ສ້າງ​ຄວາມ​ເຂັ້ມ​ແຂງ​ທາງ​ການ​ຕິດ​ຕາມ​ປະ​ເມີນ​ຄູ​ນິ​ເທດ, ມີ​ການກໍ່​ສ້າງ​ໂຮງ​ຮຽນ 40 ແຫ່ງ, 86 ຫ້ອງ​ນ້ຳ, ກໍ່​ສ້າງ​ຫ້ອງ​ນ້ຳ​ໃຫ້ 27 ໂຮງ​ຮຽ​ນ 56 ຫ້ອງ ແລະ ສ້ອມ​ແປງ 2 ແຫ່ງ ພ້ອມ​ທັງ​ສະ​ໜອງ​ນ້ຳ​ສະ​ອາດ​ໃຫ້​ໂຮງ​ຮຽນ​ຈຳ​ນວນ​ໜຶ່ງ ລວມ​ມູນ​ຄ່າ​ທັງ​ໝົດ 12.443.666.158 ກີບ. ໃນນີ້ສະ​ເພາະ​ ເມືອງ​ພະ​ລານ​ໄຊ ມີ​ມູນ​ຄ່າ 2 ຕື້ກວ່າ​ກີບ ສຳ​ລັບ​ການກໍ່​ສ້າງ​ຫ້​ອງ​ຮຽນ​ຢູ່​ບ້ານ​ເທີ້ມ​ນ້ອຍ ມີ​ທັງ​ໝົດ 3 ຫ້ອງຂະ​ໜາດ 8x24,3 ແມັດ ມີ 2 ຫ້ອງ​ນ້ຳ ແລະ ຄາດ​ວ່າ​ຈະ​ໃຫ້​ສຳ​ເລັດ​ໃນ​ທ້າຍ​ເດືອ​ນພຶດ​ສະ​ພາ 2018.

      ໂອກາດ​ດຽວກັນ, ທ່ານຮອງ​ເຈົ້າ​ແຂວງ ​ກໍ່​ໄດ້​ກ່າວ​ຂອບ​ໃຈ​ຕໍ່​ທ່ານເອກ​ອັກ​ຄະ​ລັດ​ຖະ​ທູດອອສເຕຣເລຍ ປະ​ຈຳ​ລາວ​​ ສຳລັບ​​ໂຄງການ​ປັບ​ປຸງຄຸ​ນະ​ພາບ ແລະ ການ​ຂະ​ຫຍາຍ​ໂອ​ກາດ​ການ​ເຂົ້າ​ຮຽນ​ສຳ​ລັບ​ການ​ສຶກ​ສາ​ຂັ້ນ​ພື້ນ​ຖານຢູ່ແຂວງ​ສະ​ຫວັນ​ນະ​ເຂດ ກໍ່​ຄືສ​ປ​ປ ລາວ ເຊິ່ງສະ​ແດງ​ເຖິງ​ໄມຕີ​ຈິດ, ມິດຕະພາບ ​ແລະ ຄວາມ​ສາມັກຄີທີ່​ມີ​ມູນ​ເຊື້ອ​ອັນ​ດີງາມລະຫວ່າງ​​ 2 ​ປະ​ເທດ. ສະນັ້ນ, ພວກ​ເຮົາຈະ​ໃຫ້ການ​ສະໜັບສະໜູນ, ຮ່ວມ​ມື, ອຳນວຍ​ຄວາມ​ສະດວກ ​ແລະ ​ຊຸກຍູ້ ​ເພື່ອ​ເຮັດ​ໃຫ້ການ​ກໍ່ສ້າງ​​ໂຄງການ​ດັ່ງກ່າວສຳ​ເລັດ​ຕາມ​ແຜນ​ທີ່​ວາງ​ໄວ້​ທຸກ​ປະການ.

ໂດຍ: ພູ​ວອນ ດຳ​ລົງ​ບຸນ