ກຽມຈັດແຂ່ງຂັນມວຍສາກົນ ທົ່ວປະເທດ ຄັ້ງທີ 12 ເລືອກເຟັ້ນນັກກິລາຕິດທີມຊາດ ຮ່ວມ ເອຊຽນເກມ

ສຶກສາ

Written by Super User

ກຽມຈັດແຂ່ງຂັນມວຍສາກົນ ທົ່ວປະເທດ ຄັ້ງທີ 12 ເລືອກເຟັ້ນນັກກິລາຕິດທີມຊາດ ຮ່ວມ ເອຊຽນເກມ

28537791 358614001286951 138217067 n    ສະຫະພັນມວຍສາກົນແຫ່ງຊາດລາວ ກຽມຈັດການແຂ່ງຂັນກິລາມວຍສາກົນ ທົ່ວປະເທດ ຄັ້ງທີ 12 ປະຈຳປີ 2018 ໃນລະຫວ່າງວັນທີ 8-10 ມີນານີ້ ທີ່ເວທີມວຍຊົ່ວຄາວ ສູນການຄ້າ ລາວ-ໄອເຕັກ ນະຄອນຫຼວງວຽງຈັນ ຊີງແຊ໋ມ 3 ລາຍການ ຈາກ 11 ຮຸ່ນ ເພື່ອເປັນການຄັດເລືອກນັກກິລາທີ່ມີພອນສະຫວັນດີເດັ່ນຂຶ້ນມາທົດແທນນັກ ກິລາທີມຊາດ ຊຸດປັດ ຈຸບັນ ສົ່ງເຂົ້າຮ່ວມງານມະຫາກຳກິລາເອຊຽນ ເກມ ຄັ້ງທີ 18 ທີ່ປະເທດອິນໂດເນເຊຍ ຮັບກຽດເປັນເຈົ້າພາບ ໃນທ້າຍປີນີ້.

    ຕາມການລາຍງານຂອງ ທ່ານ ສົມພອນ ມະນີຄຳ ເລຂາທິການສະຫະພັນມວຍສາກົນແຫ່ງຊາດລາວ ທັງເປັນຫົວໜ້າສູນເຝິກກິລາແຫ່ງຊາດ ໃນຕອນເຊົ້າວັນທີ 5 ມີນາ ຜ່ານມາ ໃຫ້ຊາບວ່າ: ໃນລະຫວ່າງວັນທີ 8-10 ມີນານີ້ ທີ່ເວທີມວຍຊົ່ວຄາວ ສູນການຄ້າ ລາວ-ໄອເຕັກ ເມືອງໄຊເຊດຖາ ນະຄອນຫຼວງວຽງຈັນ, ສະຫະພັນມວຍສາກົນແຫ່ງຊາດລາວ ກຽມຈັດການແຂ່ງຂັນກິລາມວຍສາກົນ ທົ່ວປະເທດ ຄັ້ງທີ 12 ປະຈຳປີ 2018 ເຊິ່ງຈະມີການຊີງໄຊກັນທັງໝົດ 3 ລາຍການ ຈາກ 11 ຮຸ່ນ ເພື່ອເປັນການຄັດເລືອກນັກກິລາທີ່ມີ ພອນສະຫວັນດີເດັ່ນຂຶ້ນມາທົດແທນນັກກິລາທີມຊາດ ຊຸດປັດຈຸບັນ ສົ່ງເຂົ້າຮ່ວມການແຂ່ງຂັນຊີງແຊ໋ມລະດັບພາກພື້ນ ແລະ ສາກົນ ໃນການແຂ່ງຂັນຂອງ ສະຫະພັນມວຍສາກົນໂລກ ຫຼື (AIBA) ເວົ້າລວມ, ເວົ້າສະເພາະເປັນການກຽມພ້ອມໃຫ້ນັກ ກິລາທີມຊາດ ສົ່ງເຂົ້າຮ່ວມການແຂ່ງຂັນມວຍສາກົນ ງານມະຫາກຳກິລາເອຊຽນ ເກມ ຄັ້ງທີ 18 ຈະຈັດຂຶ້ນລະຫວ່າງວັນທີ 18 ສິງຫາ ຫາ ວັນທີ 2 ກັນຍາ 2018 ທີ່ປະເທດອິນໂດເນເຊຍ ຮັບກຽດເປັນເຈົ້າພາບ. ດັ່ງນັ້ນ, ຈຶ່ງແຈ້ງມາຍັງບັນດາສະຫະພັນກິລາມວຍສາກົນແຂວງ, ນະຄອນຫຼວງວຽງ ຈັນ, ກະຊວງປ້ອງກັນຄວາມສະຫງົບ, ກະຊວງປ້ອງກັນປະເທດ, ໂຮງຮຽນ ແລະ ບັນດາສະໂມສອນຕ່າງໆອ້ອມຂ້າງນະຄອນຫຼວງວຽງຈັນ ສົ່ງນັກກິລາໃນສັງກັດຂອງຕົນເຂົ້າຮ່ວມການແຂ່ງຂັນໃນຄັ້ງນີ້ດ້ວຍ.

ທ່ານ ສົມພອນ ມະນີຄຳ ກ່າວຕື່ມອີກວ່າ: ໃນການແຂ່ງຂັນຈະມີການສັ່ງນໍ້າໜັກນັກກິລາ ໃນວັນທີ 8 ມີນາ 2018 ເລີ່ມເວລາ 7:30 ໂມງ ຫາ 10 ໂມງ ເປັນຕົ້ນໄປ ເພື່ອຈັບສະຫຼາກປະ ກົບຄູ່ແຂ່ງຂັນ, ໃນນັ້ນໃຫ້ນັກກິລາຖືບັດປະຈຳຕົວ ຫຼື ປື້ມສຳມະໂນຄົວມາແຈ້ງສະເໜີຕົວພ້ອມ ເຊິ່ງຈະມີການຊີງໄຊກັນທັງໝົດ 3 ລາຍການ ຈາກ 11 ຮຸ່ນ ຄື: ຮຸ່ນເຍົາວະຊົນ ອາຍຸ 15-20 ປີ ເພດຍິງ ແລະ 15-17 ປີ ເພດຊາຍ ມີ 5 ຮຸ່ນ ປະກອບມີ ຮຸ່ນນໍ້າໜັກ 44-46 ກິໂລກຣາມ, ຮຸ່ນນໍ້າໜັກ 48-50 ກິໂລກຣາມ, ຮຸ່ນນໍ້າໜັກ 50-52 ກິໂລກຣາມ, ຮຸ່ນນໍ້າໜັກ 54-56 ກິໂລກຣາມ ແລະ ຮຸ່ນນໍ້າໜັກ 56-60 ກິໂລກຣາມ ສ່ວນຮຸ່ນທົ່ວໄປມີ 6 ຮຸ່ນ ຄື: ຮຸ່ນນໍ້າໜັກ 49 ກິໂລກຣາມ, ຮຸ່ນນໍ້າໜັກ 52 ກິໂລກຣາມ, ຮຸ່ນນໍ້າໜັກ 56 ກິໂລກຣາມ, ຮຸ່ນນໍ້າໜັກ 60 ກິໂລກຣາມ, ຮຸ່ນນໍ້າໜັກ 64 ກິໂລກຣາມ ແລະ ຮຸ່ນນໍ້າໜັກ 69 ກິໂລກຣາມ.

ໂດຍ ສົງການ