ອັດຕະປື ເປີດງານແຂ່ງຂັນກິລາ ທົ່ວແຂວງ ຄັ້ງທີ 4 ປະຈຳປີ 2018 ທີ່ເມືອງຊານໄຊ ເປັນເຈົ້າພາບ

ສຶກສາ

Written by Super User

ອັດຕະປື ເປີດງານແຂ່ງຂັນກິລາ ທົ່ວແຂວງ ຄັ້ງທີ 4 ປະຈຳປີ 2018 ທີ່ເມືອງຊານໄຊ ເປັນເຈົ້າພາບ

28821786 358587421289609 761516982 o      ພິທີເປີດງານແຂ່ງຂັນກິລາ ທົ່ວແຂວງອັດຕະປື ຄັ້ງທີ 4 ປະຈຳປີ 2018 ທີ່ເມືອງຊານໄຊ ເປັນເຈົ້າພາບ ໄດ້ມີຂຶ້ນໃນຕອນແລງຂອງວັນທີ 1 ມີນາ 2018 ທີ່ສະໜາມກິລາໂຮງຮຽນມັດທະຍົມສົມບູນນ້ຳປາ ເມືອງຊານໄຊ, ໂດຍໃຫ້ກຽດເຂົ້າຮ່ວມ ແລະ ກ່າວເປີດງານຂອງ ທ່ານ ນາງ ມີນາພອນ ໄຊສົມພູ ຮອງເຈົ້າແຂວງອັດຕະປື, ມີ ທ່ານ ຄຳຫວັນ ຈັນທະໂຄດ ເຈົ້າເມືອງຊານໄຊ ແລະ ທ່ານ ບົວລາ ພັນມີໄຊ ຮອງເຈົ້າເມືອງຊານໄຊ ປະທານຈັດງານແຂ່ງຂັນ ພ້ອມດ້ວຍບັນດາການນຳພັກ-ລັດຂັ້ນແຂວງ, ຂັ້ນເມືອງ 5 ເມືອງພາຍໃນແຂວງ, ຄະນະຮັບຜິດຊອບຈັດງານ, ຄະນະນໍາ, ຄູເຝີກ, ນັກກິລາ ແລະ ບັນດາແຂກທີ່ຖືກເຊີນ ຕະຫຼອດຮອດພໍ່-ແມ່ປະຊາຊົນເກືອບ 2 ພັນຄົນເຂົ້າຮ່ວມ.

 

 

      ໃນພິທີ, ເມືອງຊານໄຊ ເຈົ້າພາບ ໄດ້ຈັດການສະແດງກ້ອນກຳລັງເປີດພິທີ, ກ້ອນກຳລັງນ້ອງນ້ອຍເຍົາວະຊົນ, ຄະນະນຳ, ຄູເຝິກ, ກຳມະການ ແລະ ນັກກິລາ ທຸກພາກສ່ວນທີ່ເຂົ້າຮ່ວມ ແລະ ຕໍ່ດ້ວຍສະແດງ ສິລະປະ-ວັດທະນະທຳພື້ນເມືອງ 3 ລາຍການ ແລະ ເຕັນແອໂຣບິກ ຈາກຈາກນ້ອງນັກຮຽນ ມສ ນ້ຳປາ ກ່ອນທີ່ ທ່ານ ຄຳຫວັນ ຈັນທະໂຄດ ເຈົ້າເມືອງຊານໄຊ ເຈົ້າພາບ ຈັດງານແຂ່ງຂັນຄັ້ງນີ້ ໄດ້ກ່າວຕ້ອນຮັບແຂກບ້ານແຂກເມືອງ ເຂົ້າສູ່ພິທີການແຂ່ງຂັນຢ່າງເປັນທາງການ.ຈາກນັ້ນ, ທ່ານ ບົວລາ ພັນມີໄຊ ໄດ້ລາຍງານການກະກຽມຈັດການແຂ່ງຂັນ ໂດຍໄດ້ກຳນົດເອົາ 4 ປະເພດກິລາ 12 ລາຍການແຂ່ງຂັນຄື: ກະຕໍ້ທີມຍິງ-ຊາຍ; ບານສົ່ງທີມຍິງ-ຊາຍ; ເປຕັງດ່ຽວຍິງ-ຊາຍ, ຄູ່ຍິງ-ຊາຍ, ທີມຍິງ-ຊາຍ ແລະ ຄູ່ປະສົມຊາຍ-ຍິງ; ເຕະບານທີມຊາຍ, ມີການຊີງທັງໝົດ 12. ງານແຂ່ງຂັນຄັ້ງນີ້ ມີຄະນັກກິລາ ຕົວແທນຈາກ 5 ເມືອງ, 3 ໂຮງຮຽນ ແລະ ພະແນກການອ້ອມຂ້າງແຂວງ ເຂົ້າຮ່ວມທັງໝົດ 15 ຄະນະ.

       ໃນໂອກາດນີ້, ທ່ານ ນາງ ມີນາພອນ ໄຊສົມພູ ໄດ້ສະແດງຄວາມຊົມເຊີຍການນຳພະແນກສຶກສາທິການ ແລະ ກິລາແຂວງ ພ້ອມຄະນະນຳຂອງເມືອງ ເຈົ້າພາບທຸກຂັ້ນ, ທຸກພາກສ່ວນ ທີ່ໄດ້ມີຄວາມບຸກບືນ, ຜ່ານຜ່າຄວາມຫຍຸ່ງຍາກ, ສຸມສະຕິປັນຍາເຫື່ອແຮງ ແລະ ກະກຽມທຸກເງື່ອນໄຂທາງດ້ານວັດຖຸ ແລະ ຈິດໃຈ ຈົນເຮັດໃຫ້ງານແຂ່ງຂັນໄດ້ໄຂຂຶ້ນຢ່າງສະຫງ່າຜ່າເຜີຍ ແລະ ຄຶກຄືນມ່ວນຊື່ນ ໃນທ່າມກາງທີ່ທົ່ວພັກ, ທົ່ວກອງທັບ ແລະ ປວງຊົນລາວທັງຊາດພວມເບີກບານມວນຊື່ນ ຈັດຕັ້ງຜັນຂະຫຍາຍຜົນສຳເລັດກອງປະຊຸມໃຫຍ່ ຄັ້ງທີ 10 ຂອງພັກປະຊາຊົນປະຕິວັດລາວ. ນອກຈາກນັ້ນ, ຍັງເຮັດໃຫ້ຄົນຮຸ່ນໃໝ່ມີການພັດທະນາທາງດ້ານຮ່າງກາຍ ແລະ ສະຕິປັນຍາ, ເຝິກໃຫ້ນັກຮຽນມີສະຕິຕໍ່ການຈັດຕັ້ງ, ມີລະບຽບວິໄນ, ມີຄວາມສາມັກຄີ-ມິດຕະພາບ ແລະ ມີສຸຂະພາບແຂງແຮງ, ນຳໃຊ້ເວລາວ່າງໃຫ້ມີປະໂຫຍດ ຫ່າງໄກຈາກສິ່ງເສບຕິດ-ອະບາຍຍະມຸກຕ່າງໆ ແລະ ທີ່ສຳຄັນແມ່ນການສ້າງພື້ນຖານໃຫ້ແກ່ນັກກິລາວເຕີບໃຫຍ່ເຂັ້ມແຂງຂຶ້ນໄປເລື້ອຍໆ.

       ຫຼັງຈາກນັ້ນ, ທ່ານ ນາງ ມີນາພອນ ໄຊສົມພູ ພ້ອມດ້ວຍຄະນະນຳເມືອງຊານໄຊ ກໍ່ໄດ້ຮ່ວມຕັດແຖບຜ້າ ແລະ ລັ່ນຄອງ 9 ບາດ ເປີດງານຢ່າງເປັນທາງການ. ສຳລັບງານແຂ່ງຂັນກິລາທົ່ວແຂວງອັດຕະປື ຄັ້ງທີ 4 ປະຈຳປີປີ 2018 ຈະທຳການແຂ່ງຂັນກັນ ແຕ່ວັນທີ 1 -10 ມີນາ 2018 ຈຶ່ງຈະສຳເລັດ.

ຂ່າວໂດຍ: ພົມວິຫານ ຂ.ອັດຕະປື