​ພະນັກງານ​ຫຼັກ​ແຫຼ​ງ ສສກ ສໍາ​ເລັດ​ເຝິກອົບຮົມ​ທິດ​ສະ​ດີກາ​ນ​ເມືອງ-ການ​ປົກຄອງ ໄລຍະສັ້ນ ຊຸດ​ທີ 8

ສຶກສາ

Written by Super User

ພະນັກງານຫຼັກແຫຼ ສສກ ສໍາເລັດເຝິກອົບຮົມທິດສະດີກາເມືອງ-ການປົກຄອງ ໄລຍະສັ້ນ ຊຸດທີ 8

28696142 175240996430962 772021838 o   ພະນັກງາ​ນຫຼັກ​ແຫຼງ ກະຊວງ​ສຶກສາ​ທິການ ​ແລະ ກິລາ (ສສກ) ​ໄດ້​ສໍາ​ເລັດການ​ເຝິກອົບຮົມ​ທິດ​ສະ​ດີກາ​ນ​ເມືອງ-ການ​ປົກ​ຄອງ ​ໄລຍະ​ສັ້ນ (45 ວັນ) ຊຸດ​ທີ 8 ພ້ອມທັງມີພິທີປິດ ແລະ ມອບໃບຢັ້ງຢືນໃຫ້ສຳມະນາກອນຢ່າງເປັນທາງການ ໃນ​ວັນທີ 2 ມີນາ ຜ່ານມາ, ທີ່​ສະ​ໂມ​ສອນໃຫຍ່ ​ວິ​ທະຍາ​ໄລ​ຄູ​ດົງ​ຄໍາ​ຊ້າງ, ​ໂດຍ​​ເປັນ​ກຽດ​ເຂົ້າ​ຮ່ວມ​ຂອງສະຫາຍ ບົວ​ລານ ສິລິ​ປັນຍາ ຄະນະ​ປະ​ຈໍ​າພັກ ຮອງ​ລັດຖະມົນຕີ ​ກະຊວງ​ສຶກສາ​ທິການ ​ແລະ ກິລາ, ມີຫົວໜ້າ​-ຮອງ​ຫົວໜ້າຫ້ອງການ​ຄະນະ​ພັກ, ກົມ, ຕາງໜ້າ​ຈາກ​ສະຖາ​ບັນ​ທິດ​ສະ​ດີກາ​ນ​ເມືອງ ​ແລະ ການ​ປົກຄອງແຫ່ງຊາດ, ແຂກທີ່ຮັບເຊີນ ​ແລະ ສໍາມະ​ນາກ​ອນ​ເຂົ້າ​ຮ່ວມ​ຢ່າງ​ພ້ອມພຽງ.

 

 

       ​ໂອກາດ​ດັ່ງກ່າວ, ສະຫາຍ ສໍາລານ ພັນ​ຄະ​ວົງ ​ຄະນະ​ພັກ ຮອງ​ຫົວໜ້າ​ຫ້ອງການຄະນະ​ພັກກະຊວງ​ສຶກສາ​ທິການ ​ແລະ ກິລາ ​​ໄດ້ຜ່ານ​ບົດ​ສະຫຼຸບ​ຊຸດ​ເຝິກອົບຮົມ​ທິດ​ສະ​ດີກາ​ນ​ເມືອງ ​ແລະ ການ​ປົກຄອງ 45 ວັນ, ຊຸດທີ 8 ກະຊວງ​ສຶກສາ​ທິການ ​ແລະ ກິລາ, ​ເຊິ່ງ​ຜ່ານ​ການ​ດໍາ​ເນີນ​ຊຸດ​ເຝິກອົບຮົມ​ທິດ​ສະ​ດີ​ການ​ເມືອງ-​ການ​ປົກຄອງຄັ້ງ​ນີ້ ​ແຕ່​ວັນ​ທີ 25 ທັນວາ 2017 - ວັນ​ທີ 28 ກຸມພາ 2018 ຄະນະ​ພັກ, ຄະນະ​ນໍ​າ ກະຊວງ​ສຶກສາ​ທິການ ​ແລະ ກິລາ ກໍ່​ຄື ຄະ​ນະ​ຮັບຜິດຊອບ​ຊຸດ​ເຝິກອົບຮົມ​ຄັ້ງ​ນີ້, ​ໄດ້ໃຫ້​ທິດ​ຊີ້​ນໍາ​ໃນ​ການ​ກະກຽມ ​ແລະ ການ​ດໍາ​ເນີນ​ເຝິກອົບຮົມ​ເປັນ​ຢ່າງ​ດີ ​ໂດຍ​ສະ​ເພາະ​ກ່ອນ​ເປີດ​ການ​ເຝິກອົບຮົມ​​ເປັນ​ທາງ​ການ​ໄດ້​ມີ​ປະຖົມ​ນິ​ເທດ ​ເປັນ​ຕົ້ນ​ແມ່ນ ​ແນະ​ນໍາ​ວິ​ທີ​ການ, ເ​ຜີ​ຍ​ແຜ່​ກົດ​ລະບຽບ ​ແລະ ວາລະ​​ແຜນການ​ເຝິກອົບຮົມ; ຜູ້​ເຂົ້າ​ເຝິກອົບຮົມ​ສ່ວນ​ຫຼາຍ​ແມ່ນ​ສະມາຊິກ​ພັກ, ມີ​ຄຸນສົມບັດ​ດີ, ບຸກບືນ​ຫ້າວຫັນ​ໃນ​ການ​ຮໍ່າຮຽນ, ​ເຝິກຝົນ​ຫຼໍ່​ຫຼອມ​ ​ແລະ ພັດທະນາຕົນ​ເອງ; ສໍາ​ມະ​ນາກ​ອນ​ໄດ້​ມີ​ຄວາມ​ສາມັກຄີ​ເປັນ​ເອກະ​ພາບ​ພາຍ​ໃນ ​ແລະ ພາຍ​ນອກ​ໄດ້​ດີ; ​ໄດ້​ສ້າງບັນຍາກາ​ດກ່ອນ​ໂມງ​ເຂົ້າ​ຮຽນ ​ແລະ ​ແລກປ່ຽນ​ຄໍາ​ຄິດ​ຄໍາ​ເຫັນ​ຮ່ວມ​ກັນ​ໃນ​ແຕ່​ລະ​ມື; ຄະນະ​ພັກ ຄະນະ​ນໍາ​ວິທະຍາ​ໄລ​ຄູ​ດົງ​ຄໍາ​ຊ້າງ​ໃຫ້ການ​ຮ່ວມ​ມື ​ແລະ ອໍານວຍ​ຄວາມ​ສະດວ​ກດ້ານ​ສະຖານ​ທີ່​ເຝິກອົບຮົມ​ເປັນ​ຢ່າງ​ດີ; ​ສໍາມະ​ນາກອນ​ແຕ່​ລະສະ​ຫາຍ​ໄດ້​​ເປັນ​​ເຈົ້າ​ການ​ໃນ​ການ​ປະຕິບັດ​ຕາຕະລາງຮຽນ​ຂອງ​ສະ​ຖາ​ບັນ​ການ​ເມືອງ-​ການ​ປົກຄອງ​ແຫ່ງ​ຊາດ ​ແລະ ຂໍ້​ກໍານົດ​ກົດ​ລະບຽບ​ຂອງ​ການ​ເຝິກອົບຮົມ​ໄດ້​ດີ. ຜ່ານ​ບັ້ນ​ເຝິກອົບຮົມ​ທິດ​ສະ​ດີກາ​ນ​ເມື​ອງ-ການ​ປົກຄອງ​ໃນ​ຄັ້ງ​ນີ້, ​ສໍາ​ມະ​ນາກ​ອນ​ໄດ້​ຮັບ​ໃບ​ຢັ້ງຢືນ​ຈາກ​ສະ​ຖາ​ບັນ​ການ​ເມືອງ-​ການ​ປົກຄອງ​ແຫ່ງ​ຊາດ ​ທັງ​ໝົດ 56 ສະຫາຍ, ຍິງ 28 ສະຫາຍ ຄິດ​ໄລ່​ເປັນ​ເປີ​ເຊັນ 100 ​ເປີ​ເຊັນ.

       ​ໂອກາດ​ດຽວ​ກັນ, ສະຫາຍ ບົວ​ລານ​ ສິລິ​ປັນຍາ ​ໄດ້​ກ່າວ​ສ​ະ​ແດງ​ຄວາມ​ຍ້ອງຍໍ​ຊົມ​ເຊີຍ​ຄະນະ​ນໍາ​ຈາກ​ສະ​ຖາ​ບັນ​ການ​ເມືອງ ​ແລະ ການ​ປົກຄອງແຫ່ງຊາດ, ຄະນະ​ຮັບຜິດຊອບ, ຄະນະ​ອໍານວຍ​ການ ​ແລະ ບັນດາ​ສະຫາຍ​ສໍາ​ມະ​ນາກ​ອນຈາກ​ຫຼາຍ​ພາກສ່ວນ​ໃນ​ກະຊວງ​ສຶກສາ​ທິການ ​ແລະ ກິລາ ທີ່​ໄດ້​ເອົາ​ໃຈ​ໃສ່​ພາກ​ພຽນ​ຈົນ​ສໍາ​ເລັດ, ​ເຊິ່ງການ​ເຝິກອົບຮົມ​ຍົກ​ລະດັບ​ທາງ​ດ້ານ​ທິດສະ​ດີກາ​ນ​ເມືອງ-​ການ​ປົກຄອງ ​ແມ່ນ​ເປັນ​ການ​ສ້າງ ​ແລະ ພັດທະນາ​ໃຫ້​ສະມາຊິກ​ພັກ ພະນັກງານ​ໄດ້​ມີ​ຄວາມ​ຮູ້, ຄວາມ​ເຂົ້າ​ໃຈ​ຢ່າງ​ເລິກ​ເຊິ່ງກ່ຽວ​ກັບ​ບັນ​ດາ​ແນວ​ຄິດ​ທິດ​ສະ​ດີ​ມາກ-​ເລ​ນິນ ​ແລະ ບັນດາ​ແນວ​ທາງນະ​ໂຍບາຍ​ຂອງ​ພັກ ​ແລະ ລັດ, ​ແຜນ​ພັດທະນາ​ເສ​ດຖະກິດ-​ສັງຄົມ​ແຫ່ງ​ຊາດ ກໍ່​ຄື ​ແນວ​ທາງ​ກ້າວ​ຂຶ້ນ​ສັງຄົມ​ນິຍົມ​ເທື່ອ​ລະ​ກ້າວ. ພ້ອມ​ກັນ​ນັ້ນ, ກໍ່​ເຮັດ​ໃຫ້​ພະນັກງານ​ຫຼັກ​ແຫຼ່ງສາມາດ​ນໍາ​ເອົາ​ທິດ​ສະ​ດີ​ທີ່​ໄດ້​ຮຽນ​ມາ​ຈັດ​ຕັ້ງ​ປະຕິບັດ​ໃນ​ວຽກ​ງານທີ່​ຕົນຮັບ​ຜິດ​ຊອບ​ໄດ້​ຢ່າ​ງມີ​ປະສິດທິພາບ ​ແລະ ປະສິດທິ​ຜົນ​ສູງ​ຂຶ້ນ.

       ການ​ດໍາ​ເນີນ​ຊຸດ​ເຝິກອົບຮົມ​ທິດ​ສະ​ດີ​ການ​ເມືອງ-​ການ​ປົກຄອງຄັ້ງ​ນີ້, ​ແມ່ນ​ເລີ່​ມແຕ່​ວັນ​ທີ 25 ທັນວາ 2017 ຫາ ວັນ​ທີ 28 ກຸມພາ 2018 ​ໂດຍ​ແມ່ນ​ບັນ​ດາ​ສະຫາຍ​ສໍາ​ມະ​ນາກ​ອນທີ່​ເຂົ້າ​ຮ່ວມ​ການ​ເຝິກອົບຮົມ​ນັ້ນ ລ້ວນ​ແລ້ວ​ແຕ່​ແມ່ນ​ສະມາຊິກ​ພັກ, ພະນັກງານ​ຫຼັກ​ແຫຼ່ງ ​ແລະ ​ເປັນ​ພະນັກງານ​ເປົ້າ​ໝາຍ​ສືບ​ທອດ​ພາຍ​ໃນ​ສໍານັກ ​ແລະ ສະ​ຖາ​ບັນ​ການ​ສຶກສາ​ອ້ອ​ມຂ້າງ​ກະຊວງ​ສຶກສາ​ທິການ ​ແລະ ກິລາ ທີ່​ມາ​ຈາກ 46 ພາກສ່ວນ ມີ​ຈໍານວນ 56 ສະຫາຍ, ຍິງ 28 ສະຫາຍ​, ​ເຊິ່ງມີ​ເນື້ອ​ໃນ 5 ພາກ​ໃຫຍ່, 39 ບົດ.

(ບຸນທະວີ)