ຄູ​-ອາຈານ ວິຊາ​ຊີ​ບ 800 ກວ່າທ່ານ ສຳ​ເລັດ​​ຍົກ​ລະດັບຄວາມ​ຮູ້ ພາຍ​ໃຕ້ໂຄງການ “VILA-FC”

ສຶກສາ

Written by Super User

ຄູ​-ອາຈານ ວິຊາຊີ 800 ກວ່າທ່ານ ສຳເລັດ​​ຍົກລະດັບຄວາມຮູ້ ພາຍໃຕ້ໂຄງການ “VILA-FC”

 28660929 1852125164821989 7094334775174889472 o     ພະນັກງານ ​ແລະ ຄູ-ອາຈານ ວິຊາ​ຊີບ ຈຳນວນ 836 ທ່ານ, ​ເປັນ​ຍິງ 279 ທ່ານ ສຳ​ເລັດ​ການ​​ເຝິກອົບຮົມຍົກ​ລະດັບຄວາມ​ຮູ້​ຄວາມ​ສາມາດ ທີ່​ຈັດ​ຂຶ້ນ​ໂດ​ຍ​ກົມ​ອາຊີວະ​ສຶກສາ ກະຊວງ​ສຶກສາ​ທິການ ​ແລະ ກິລາ ພາຍ​ໃຕ້ “ໂຄງການຮ່ວມ​ມື​ດ້ານ​ການ​ເງິນ​ອາຊີວະ​ສຶກສາ ​ແລະ ​ເຝິກອົບ​ຮົມ​ເສີມ​ສ້າງ​ຄວາມ​ຮູ້​ໃຫ້​ແກ່​ຄູ​ວິຊາ​ຊີບ (VILA – FC)” ຂອງ​ປະ​ເທດ​ເຢຍລະມັນ​.

     ​ເມື່ອ​ວັນ​ທີ 2 ມີນາ ຜ່ານ​ມາ ທີ່​ສະ​ຖາ​ບັນ​ພັດທະນາ​ອາຊີວະ​ສຶກສາ ກະຊວງສຶກສາທິການ ແລະ ກິລາ ​ໄດ້​ມີ​ພິທີປິດ​ການ​ເຝິກອົບຮົມຄູ​ວິຊາ​ຊີບ ພາຍ​ໃຕ້ “​​ໂຄງການຮ່ວມ​ມື​ດ້ານ​ການ​ເງິນ​ອາຊີວະ​ສຶກສາ ​ແລະ ​ເຝິກອົ​ບຮົມ​ເສີມ​ສ້າງ​ຄວາມ​ຮູ້​ໃຫ້​ແກ່​ຄູ​ວິຊາ​ຊີບ”. ໂດຍ​ໃຫ້​ກຽດ​ເຂົ້າ​ຮ່ວມຂອງທ່ານ ສົມ​ລິດ ວິຣິວົງ ຮອງ​ຫົວໜ້າ​ກົມ​ອາຊີວະ​ສຶກສາ ກະຊວງ​ສຶກສາ​ທິການ ​ແລະ ກິລາ, ທ່ານ ​ເຈນ​ສ ລຸ​ຊ​ເຄນ​ເຮີ​ມ ​ເອກ​ອັກ​ຄະລັດຖະ​ທູ​ດປະ​ເທດ​ເຢຍລະ​ມັນ ປະຈຳ ສປປ ລາວ, ທ່ານ ປອ. ພູ​ວຽງ ພູມ​ມິ​ໄລ ຜູ້ອຳນວຍການ​ສະ​ຖາ​ບັນ​ພັດທະນາ​ອາຊີວະ​ສຶກສາ ພ້ອມ​ດ້ວຍ​ຄະນະ, ຜູ້ຕາງ​ໜ້າ​​ໂຄງການ, ຕາງ​ໜ້າ​ຈາກ​ສະ​ຖາ​ບັນ​ຄົ້ນຄວ້າ​ກະສິກຳ, ປ່າ​ໄມ້ ​ແລະ ພັດທະນາ​ຊົນນະບົດ, ກົມ​ສົ່ງ​ເສີມ​ເຕັກນິກ ​ແລະ ປຸງ​ແຕ່ງ​ກະສິກຳ ຈາກກະຊວງ​ກະສິກຳ ​ແລະ ປ່າ​ໄມ້, ພະນັກງານ, ວິຊາ​ການ, ຄູ-ອາຈານ ​ແລະ ​ສຳ​ມະ​ນາກ​ອນ ​ເຂົ້າ​ຮ່ວມ 60 ທ່ານ.

      ​ໂອກາດ​ດັ່ງກ່າວ, ທ່ານ ສົມ​ລິດ ວິຣິວົງ ໄດ້​ກ່າວ​ຊົມ​ເຊີຍ ​ແລະ ຍ້ອງຍໍ​ສຳ​ມະ​ນາກ​ອນທີ່​ເຂົ້າ​ຮ່ວມການ​ເຝິກອົບຮົມ​ໃນ​ຄັ້ງ​ນີ້ ​ແລະ ​ຜ່ານ​ມາໄດ້ສຸມ​ໃສ່​​ໃນ​ການ​ເຂົ້າ​ຮ່ວມ​ອົບຮົມ​ຢ່າງ​ຕັ້ງໜ້າ ຈົນ​ສາມາດ​ສຳ​ເລັດໄດ້​ທັງ​ໝົດ ຈຳນວນ 836 ທ່ານ, ​ເປັນ​ຍິງ 279 ທ່ານ ​ພາຍ​ໃຕ້ “​​ໂຄງການຮ່ວມ​ມື​ດ້ານ​ການ​ເງິນ​ອາຊີວະ​ສຶກສາ ​ແລະ ​ເຝິກອົບ​​ຮົມ​ເສີມ​ສ້າງ​ຄວາມ​ຮູ້​ໃຫ້​ແກ່​ຄູ​ວິຊາ​ຊີບ”  ຂອງ​ປະ​ເທດ​ເຢຍລະ​ມັນ ທີ່​ຮ່ວມ​ກັບ​ ກົມ​ອາຊີວະ​ສຶກສາ ກະຊວງ​ສຶກສາ​ທິການ ​ແລະ ກິລາ. ​ໂຄງການ​ດັ່ງກ່າວ ແມ່ນ​ໃຊ້​ງົບປະມານ​ສູ​ງ ​ແລະ ຖື​ວ່າຄຸ້ມ​ຄ່າ​ໃນ​ການ​ປະຕິບັດ ​ເພາະ​ມີ​​ສຳ​ມະ​ນາກ​ອນ​ເອົາ​ໃຈ​ໃສ່ຢ່າງ​ດີ ​ແລະ ຂໍ​ໃຫ້​ຄູ-ອາຈານ, ພະນັກງານ ​ແລະ ວິຊາ​ການທີ່​ເຂົ້າ​ອົບຮົມ​ໃນ​ຄັ້ງ​ນີ້ ຈົ່ງ​ນຳ​ຄວາມ​ຮູ້​ດັ່ງກ່າວ​ໄປ​ຜັນ​ຂະຫຍາຍ ​ແລະ ພັດທະນາ​ບຸຄະລາ​ກອນຕໍ່​ໄປ.ສະ​ເພາະການ​ເຝິກອົບຮົມ​​ໃນ​ມື້​ນີ້, ​ແມ່ນ​ເປັນ​ການ​​ເຝິກອົບຮົມຄັ້ງສຸດ​ທ້າຍຂອງ​ໂຄງການ ໂດຍມີ​​ສຳ​ມະ​ນາກ​ອນຈົບ​ທັງ​ໝົດ 29 ທ່ານ ​​ໃນຫົວ​ຂໍ້ ວິຊາ​ສະ​ເພາະ ປະກອບ​ມີ ​ເຕັກນິກ​ການ​ຜະລິດ​ຫົວ​ເຊື້ອ ​ແລະ ການ​ປູກ​​ເຫັດ ​ແລະ ​ເຕັກນິກ​ການ​ລ້ຽງ​ໄກ່ ​ແລະ ການ​ຮັກສາ​ສຸຂະພາບ​ສັດ​ປິກ. ທີ່​ຈັດ​ຂຶ້ນ​ໃນ​ວັນ​ທີ 5 ກຸມພາ ຫາ 2 ມີນາ 2018. ​ໂດຍໃຫ້​ກຽດ​ມອບ​ໃບ​ຢັ້ງຢືນ​ການ​ເຝິກອົບຮົມ​ຂອງທ່ານ ​ເຈນ​ສ ລຸ​ຊ​ເຄນ​ເຮີ​ມ ​ເອກ​ອັກ​ຄະລັດຖະທູ​ດປະ​ເທດ​ເຢຍລະ​ມັນ ປະຈຳ ສປປ ລາວ.

      ສຳລັບໂຄງການ​ດັ່ງກ່າວ, ​​ແມ່ນ​ດຳ​ເນີນ​​ມາ​ແຕ່​ເດືອນ​ກັນຍາ 2017 ຫາ ວັນ​ທີ 2 ມີນາ 2018, ​ເຊິ່ງ​ສຳ​ມະ​ນາກ​ອນທີ່​ເຂົ້າ​ຮ່ວມເຝິກອົບຮົມແມ່ນ​ມາ​ຈາກ 14 ​ພາກສ່ວນ ປະກອບ​ມີ ​ໂຮງຮຽນ​ເຕັກນິກ​ວິຊາ​ຊີບ​ ແຂວງ​ອັດ​ຕະປື, ບໍ່​ແກ້​ວ, ບໍລິ​ຄຳ​ໄຊ, ຫົວພັນ, ຫຼວງ​ນ້ຳ​ທາ, ອຸດົມ​ໄຊ, ຜົ້ງ​ສາລີ, ສາລະ​ວັນ, ​ໄຊ​ຍະ​ບູລີ, ​ເຊ​ກອງ, ຊຽງ​ຂວາງ, ຄະນະ​ວິສະວະກຳ​ສາດ, ວິທະຍາ​ໄລ​ເຕັກນິກ​ວິຊາ​ຊີບ ລາວ-​ເຢຍລະ​ມັນ ​ແລະ ສະ​ຖາ​ບັນ​ພັດທະນາ​ອາຊີວະການ​ສຶກສາ. ​ໂດຍ​​ເຝິກອົບຮົມ​ໃນ 3 ຫົວ​ຂໍ້​ໃຫຍ່ ປະກອບ​ມີ ຫົວ​ຂໍ້ ວິຊາ​ຄູ​ອາຊີວະ ຈົບ​ໄປ​ທັງ​ໝົດ 241 ທ່ານ, ​ເປັນ​ຍິງ 96 ທ່ານ,  ຫົວ​ຂໍ້ ການ​ບໍລິຫານ​ຈັດການ ຈົບ​ໄປ​ທັງ​ໝົດ 130 ທ່ານ, ​ເປັນ​ຍິງ 26 ທ່ານ ​ແລະ ຫົວ​ຂໍ້ ວິຊາ​ສະ​ເພາະ ປະກອບ​ມີ ກະສິກຳ, ​ໄຟຟ້າ, ກໍ່ສ້າງ, ຊ້ອມ​ແປງ​ທົ່ວ​ໄປ, ການ​ບັນຊີ ​ແລະ ບໍລິຫານ​ໂຮງ​ແຮມ ທີ່ຈົບ​ໄປ​ທັງ​ໝົດ 465 ທ່ານ, ​​ເປັນ​ຍິງ 157 ທ່ານ, ເຊິ່ງລວມທັງ​ໝົດທີ່​ຈົບ​ໃນ​ການ​ເຝິກອົບຮົມ​ດັ່ງກ່າວ ຈຳນວນ 836 ທ່ານ, ​ເປັນ​ຍິງ 279 ທ່ານ ​ແລະ ​ນຳ​ໃຊ້​ງົບປະມານ​ເຝິກອົບຮົມທັງ​ໝົດ​ 8 ​ແສນ​ກວ່າຢູ​ໂຣ ຫຼື ປະມານ 8 ຕື້​ກວ່າ​ກີບ.

ອຳໄພວັນ