ສກມ ສີ​ສັດຕະ​ນາກ ປະກາດ ​​10 ໂຮງຮຽນ ​ປອດ​ຢາ​ດ​ເສບ​ຕິດ

ສຶກສາ

Written by Super User

ສກມ ສີສັດຕະນາກ ປະກາດ ​​10 ໂຮງຮຽນ ປອດຢາເສບຕິດ 

28928251 1349402561828559 1690926681 o   ຫ້ອງການ​ສຶກສາ​ທິການ ​ແລະ ກິລາ​ເມືອງ (ສກມ) ສີ​ສັດຕະ​ນາກ ນະຄອນຫຼວງວຽງຈັນ ໄດ້ຈັດ​ພິທີ​ປະກາດ​ 10 ໂຮງຮຽນ ​ເປັນ​ໂຮງຮຽນປອດ​ສິ່ງ​ເສບ​ຕິດ ​ໃນ​ວັນ​ທີ​ 13 ມີນາ ຜ່ານ​ມາ ທີ່​ໂຮງຮຽນ​ອະນຸບານ, ປະຖົມ ​ແລະ ມັດທະຍົມ​ສຶກສາ​ຕອນ​ຕົ້ນ​ຮາກ​ແກ້ວ, ​ໂດຍ​ເປັນ​ກຽດ​ເຂົ້າ​ຮ່ວມ​ຂອງ​ທ່ານ ຊົມ​ພູ ​ແກ້​ວປັນ​ຍາ ຫົວໜ້າ​ພະ​ແນ​ກສຶກສາ​ທິການ ​ແລະ ກິລາ ນະຄອນຫຼວງ​ວຽງ​ຈັນ, ທ່ານ ບຸນ​​ເມ​ກ ວິ​ໄລ​ແສງ ຮອງ​ເຈົ້າ​ເມືອງ​ສີ​ສັດຕະ​ນາກ, ທ່ານ ນາງ ປາ​ນີ ສຸກ​ສະຫວັດ ຫົວໜ້າ​ພະ​ແນ​ກກວດກາ ​ແລະ ຄວບ​ຄຸມ​ຢາ​ເສບ​ຕິດ ກະຊວງ​ປ້ອງ​ຄວາມ​ສະຫງົບ ແລະ ທ່ານ ຄໍາສິງດວງດາລາ ຫົວໜ້າຫ້ອງການ​​ເມືອງສີສັດຕະນາກ, ພ້ອມ​ດ້ວຍ​ຜູ້​ອໍານວຍ​ການ, ປກສ ​ເມືອງ, ກຸ່ມ​ບ້ານ, ນາຍ​ບ້ານ, ​ແນວ​ໂຮ​ມ, ພະນັກງານ​, ຄູ-​ອາຈານ ​ແລະ ນ້ອງ​ນັກຮຽນ​ເຂົ້າ​ຮວມ​ຢ່າງ​ພ້ອມພຽງ.

 

      ໂອກາດ​ດັ່ງກ່າ​ວ, ທ່ານ ນາງ ສຸພາ​ພອນ ຄາ​ວະ​ມູລະ​ວິຊາ​ປຣາ ຜູ້​ອໍານວຍ​ການ​ໂຮງຮຽນ​ອະນຸບາດ, ປະຖົມ​ ​ແລະ ມັດທະຍົມ​ຕອນ​ຕົ້ນຮາກ​ແກ້ວ ​ໄດ້​ລາຍງານ​ການ​ເຄື່ອນ​ໄຫວ​ວຽກງານ​ຕ້ານ​ສິ່ງ​ເສບ​ຕິດ​ໃນ​ໂຮງຮຽນ ​ແລະ ຊຸມ​ຊົນ​ໃນ​ໄລຍະ​ຜ່ານ​ມາ​​ເຖິງ​ປັດຈຸບັນ, ​ເຊິ່ງ​ໄດ້​ຈັດ​ຕັ້ງ​​ໃນ​ລະຫວ່າ​ງວັນ​ທີ 3-12 ທັນ​ວາ 2017 ​ໂດຍ​ຂະ​ແໜງ​ພະລະ-ສິລະ​ປະ ພະ​ແນ​ກສຶກສາ​ທິການ ​ແລະ ກິລາ ນະຄອນຫຼວງ​ວຽງ​ຈັນ ​ໄດ້​ສົມທົບ​ກັບ​ໜ່ວຍ​ງານ ພະລະ-​ສິລະ​ປະ ຫ້ອງການ​ສຶກສາ​ທິການ ​ແລະ ກິລາ​ເມືອງສີ​ສັດຕະ​ນາກ ​ລົງ​ເກັບ​ກໍາ​ ​ແລະ ປະ​ເມີນ​ກ່ຽວ​ກັບ​ການ​ທີ່ຈະ​ປະກາດ​ໂຮ​ງຮຽນ​ເປັນ​ໂຮງຮຽນ​ປອດ​ສິ່ງ​​ເສບ​ຕິດ ແລະ ​ຂຶ້ນ​ປ້າຍ​ຢ່າງ​ເປັນ​ທາງ​ການ​ຢູ່​ພາຍ​ໃນ​ເມືອງ​ມີ 10 ​ໂຮງຮຽນ ​ຄື: ໂຮງຮຽນ​ປະຖົມ​ທົ່ງ​ກາງ, ປະຖົມ​ຈອມ​ເພັດ, ປະຖົມ-​ມັດທະຍົມ​ຕອນ​ຕົ້ນ​ສຶກສາ​ຮາກ​ແກ້ວ, ປະຖົມ​ທາດ​ຂາວ, ປະຖົມ​ດົງ​ສະຫວາດ, ປະຖົມ​ກຸ​ນນະ​ວົງ, ປະຖົມ​ດອນ​ກອຍ, ປະຖົມ​ໂສກ​ປ່າ​ຫຼວງ, ປະຖົມ​ສີ​ປະ​ເສີດ ​ແລະ ປະຖົມ​ໄຊ​ພອນສົມບູນ.

​       ຂະນະ​ດຽວກັນ, ທ່ານ ຫົງ​ແກ້ວ ທໍາ​ມະ​ວົງ ຫົວໜ້າ​ຂະ​ແໜງ​ພະລະ-​ສິລະ​ປະ​ສຶກສາ ພະ​​ແນ​ກສຶກສາ​ທິການ ​ແລະ ກິລາ ນະຄອນຫຼວງວຽງຈັນ ຜ່ານ​ຂໍ້​ຕົກລົງ​ວ່າ​ດ້ວຍ​ກາ​ນປະກາດ​ໂຮງຮຽນ​ເປັນ​ໂຮງຮຽນ​ປອດ​ຢາ​ເສບ​ຕິດ ​ໂດຍ​ຫົວໜ້າ​ພະ​ແນ​ກສຶກສາ​ທິການ ​ແລະ ກິລາ ນະຄອນຫຼວງ​ວຽງ​ຈັນ ​ເຫັນ​ດີ​ຕົກລົງ​ໃຫ້​ຈັດ​ຕັ້ງ​ນໍາພາ​ປະກາດ​ໂຮງຮຽນ 10 ​ແຫ່ງຢູ່​ເມືອງສີ​ສັດຕະ​ນາກ ເປັນ​​ໂຮງຮຽນ​ປອດ​ຢາ​ເສບ​ຕິດ ​ແລະ ຂຶ້ນ​ປ້າຍ​ຄັກ​ແນ່, ​ເຊິ່ງປະກອບ​ມີ ​ໂຮງຮຽນ​ປະຖົມ​ທົ່ງ​ກາງ, ປະຖົມ​ຈອມ​ເພັດ, ປະຖົມ-​ມັດທະຍົມ​ຕອນ​ຕົ້ນ​ສຶກສາ​ຮາກ​ແກ້ວ, ປະຖົມ​ທາດ​ຂາວ, ປະຖົມ​ດົງ​ສະຫວາດ, ປະຖົມ​ກຸ​ນນະ​ວົງ, ປະຖົມ​ດອນ​ກອຍ, ປະຖົມ​ໂສກ​ປ່າ​ຫຼວງ, ປະຖົມ​ສີ​ປະ​ເສີດ ​ແລະ ປະຖົມ​ໄຊ​ພອນສົມບູນ ​ໂດຍ​ໃຫ້​ສົມທົບ​ກັບ​ອົງການ​ຈັດ​ຕັ້ງ​ທີ່​ກ່ຽວຂ້ອງ​ທຸກ​ພາກສ່ວນ ຕາມ​ສາຍ​ຕັ້ງ-​ສາຍ​ຂວາງ, ຂັ້ນ​ບ້ານ, ຂັ້ນໂຮງຮຽນ, ຂັ້ນ​ເມືອງ, ກົມ​ພະລະສຶກສາ ​ແລະ ຂັ້ນ​ນະຄອນຫຼວງ​ວຽງ​ຈັນ ​​ພ້ອມ​ກັນ​ປະຕິບັດ​ໃຫ້​​ເປັນ​ຂະ​ບວນການ​ຟົດ​ຟື້ນ ​ແລະ ຮັບປະກັນ​ຄຸນະພາບ. ຫຼັງ​ຈາກ​ນັ້ນ, ກໍ່​ມອບ​ປ້າຍ​ປອດ​ສິ່ງ​ເສບ​ຕິດ ​ແລະ ​ໃບຍ້ອງຍໍ​ໃຫ້ 10 ​ໂຮງຮຽນ​ທີ່​ປະກາດ​ເປັນ​ໂຮງຮຽນ​ປອດ​ສິ່ງ​ເສບ​ຕິດ.

(ບຸນທະວີ)