ສົກໜ້າ ສສກ ກໍານົດ​ໃຫ້ 4 ມະຫາວິທະຍາ​ໄລ ອອກ​ຂໍ້​ສອບ​ເສັງ​ ​ແລະ ເວລາຕ່າງ​ກັນ​ໃນ​ການ​ສອບ​ເສັງ

ສຶກສາ

Written by Super User

 ສົກໜ້າ ສສກ ກໍານົດ​ໃຫ້ 4 ມະຫາວິທະຍາ​ໄລ ອອກ​ຂໍ້​ສອບ​ເສັງ​ ​ແລະ ເວລາຕ່າງ​ກັນ​ໃນ​ການ​ສອບ​ເສັງ

29003609 1349402438495238 143849189 n      ສົກຮຽນ 2018-2019 ກະຊວງ​ສຶກສາ​ທິການ ​ແລະ ກິລາ (ສສກ) ​ເຫັນ​ດີ​ໃຫ້ 4 ມະຫາວິທະຍາ​ໄລທີ່​ຂຶ້ນ​ກັບ ​ຄື: ມະຫາວິທະຍາ​ໄລ​ແຫ່ງ​ຊາດ, ສະຫວັນ​ນະ​ເຂດ, ຈໍາປາ​ສັກ ​ແລະ ມະຫາວິທະຍາ​ໄລ ສຸພາ​ນຸວົງ ອອກ​ຂໍ້​ສອບ​ເສັງ​ ​ແລະ ກໍານົດ​ວັນ​ເວລາ​ສອບ​ເສັງຕ່າງ​ກັນ​. ອີງ​ຕາມ​ການ​ລາຍ​ງານ​ຂອງ​ທ່ານ ​ເຊັງ ຊົງ​ຊືນູ ຮອງ​ຫົວໜ້າ​ກົມ​ການ​ສຶກສາ​ຊັ້ນ​ສູງ ກະຊວງ​ສຶກສາ​ທິການ ​ແລະ ກິລາ ທີ່​ໄດ້​ລາຍ​ງານ​ກ່ຽວກັບການ​ສອບ​ເສັງ​ເຂົ້າ​ຮຽນໃນ 4 ມະຫາວິທະຍາ​ໄລ ທີ່​ຂຶ້ນ​ກັບ​ກະຊວງ​ສຶກສາ​ທິການ ​ແລະ ກິລາ ປະ​ຈໍາ​ສົກຮຽນ 2018-2019 ໃນກອງ​ປະຊຸມ​ຜູ້​ບໍລິຫານ​ການ​ສຶກສາ​ຊັ້ນ​ສູງ​ທົ່ວ​ປະ​ເທດ ​ເມື່ອ​ບໍ່​ດົນ​ຜ່ານ​ມາ ທີ່​ມະຫາວິທະຍາ​ໄລ ຈໍາປາ​ສັກ ​ໃຫ້​ຮູ້​ວ່າ: ​ແຜນການ​ຈັດ​ຕັ້ງສອບ​ເສັງ ສົກຮຽນ 2018-2019 ​ແມ່ນ​ໃຫ້​ປະຕິບັດ​ຄື​ສົກຮຽນ 2017-2018 ​ແລະ ມີ​ບາງ​ຈຸດ​ທີ່​ມີ​ການ​ປ່ຽນ​ແປງ ​ຄື: ​ເຫັນ​ດີ​ໃຫ້​ 4 ມະຫາວິທະຍາ​ໄລ ຄື: ມະຫາວິທະຍາ​ໄລ​ແຫ່ງ​ຊາດ, ສະຫວັນ​ນະ​ເຂດ, ຈໍາປາ​ສັກ ​ແລະ ມະຫາວິທະຍາ​ໄລ ສຸພາ​ນຸວົງ ສືບ​ຕໍ່​ຈັດ​ຕັ້ງ​ການ​ສອບ​​ເສັງ​ເອົາ​ນັກຮຽນ​ ໂດ​ຍ ມອບ​ໃຫ້​ແຕ່​ລະ​ມະຫາວິທະຍາ​ໄລ ຈັດ​ຕັ້ງ​ການ​ສອບ​ເສັງ​ເອງ ​ແລະ ​ໃຫ້​ປະຕິບັດ​ຕາມ​ລະບຽບ​ການ ​ແລະ ຄໍາ​ສັ່ງ​ແນະ​ນໍາ ກະຊວງ​ສຶກສາ​ທິການ ​ແລະ ກິລາ ທີ່​ກໍານົດ​ອອກ ​ໂດຍ​ໃຫ້​ມີ​ການ​ແຕ່ງ​ຕັ້ງ​ຄະນະ​ກໍາມະການ ​ແລະ ອະນຸ​ກໍາມະການຕາມ​ຄວາມ​ເໝາະ​ສົມ ​ແລະ ​ເຫັນ​ດີໃຫ້​ມະຫາວິທະຍາ​ໄລ 4 ​ແຫ່ງ ຄື: ມະຫາວິທະຍາ​ໄລ​ແຫ່ງ​ຊາດ ສອບ​ເສັງ ວັນ​ທີ 25 ສິງຫາ, ສະຫວັນ​ນະ​ເຂດ ສອບ​ເສັງ ວັນ​ທີ 1 ສິງຫາ, ຈໍາປາ​ສັກ ສອບ​ເສັງ ວັນ​ທີ 8 ສິງຫາ ​ແລະ ມະຫາວິທະຍາ​ໄລ ສຸພາ​ນຸວົງ ສອບ​ເສັງ ວັນ​ທີ 15 ສິງຫາ 2018.

       ສະເພາະການຈັດ​ກຸ່ມ​ສອບ​ເສັງ​ໄດ້ກໍານົດອອກເປັນ 3 ກຸ່ມ ຄື: ກຸ່ມວິທະຍາສາດທໍາມະຊາດ, ກຸ່ມວິທະຍາສາດສັງຄົມ ແລະ ກຸ່ມວິທະຍາສາດທໍາມະຊາດ ແລະ ວິທະຍາສາດສັງຄົມ. ໃນນັ້ນ, ກຸ່ມວິທະຍາສາດທໍາມະຊາດ ປະກອບມີ ວິຊາຄະນິດສາດ ຈໍານວນ 40 ຂໍ້ ເວລາ 120 ນາທີ, ວິຊາຟິຊິກສາດ+ເຄມີສາດ+ຊີວະສາດ ຈໍານວນ 40 ຂໍ້ ເວລາ 90 ນາທີ, ກຸ່ມວິທະຍາສາດສັງຄົມ ປະກອບມີ ວິຊາຄະນິດສາດ+ພາສາລາວ-ວັນນະຄະດີ ຈໍານວນ 40 ຂໍ້ ເວລາ 120 ນາທີ, ວິຊາພູມສາດ+ປະຫວັດສາດ ຈໍານວນ 40 ຂໍ້ ເວລາ 90 ນາທີ ແລະ ກຸ່ມວິທະຍາສາດທໍາມະຊາດ ແລະ ວິທະຍາສາດສັງຄົມ ປະກອບມີ ວິຊາຄະນິດສາດ+ເຄມີສາດ+ຊີວະສາດ ຈໍານວນ 40 ຂໍ້ ເວລາ 120 ນາທີ, ວິຊາພູມສາດ+ປະຫວັດສາດ ຈໍານວນ 40 ຂໍ້ ເວລາ 90 ນາທີ.

       ສ່ວນການຈັດການສອບເສັງ ແມ່ນເຫັນດີໃຫ້ມະຫາວິທະຍາໄລ 4 ແຫ່ງ ທີ່ຂຶ້ນກັບກະຊວງສຶກສາທິການ ແລະ ກິລາ ເປັນຜູ້ຈັດວິຊາສອບເສັງເຂົ້າໃນແຕ່ລະກຸ່ມ. ພາຍຫຼັງຈັດວິຊາເຂົ້າແຕ່ລະກຸ່ມແລ້ວ ໃຫ້ສົ່ງມາຍັງກົມການສຶກສາຊັ້ນສູງ ກະຊວງສຶກສາທິການ ແລະ ກິລາ ແລະ ບໍ່ເຫັນດີເອົາພາສາອັງກິດເຂົ້າໃນວິຊາສອບເສັງເຂົ້າຮຽນມະຫາວິທະຍາໄລ 4 ແຫ່ງ ທີ່ຂຶ້ນກັບກະຊວງສຶກສາທິການ ແລະ ກິລາ ປະຈໍາສົກຮຽນ 2018-2019.ສໍາລັບ ສົກຮຽນ 2017-2018 ແມ່ນມີຜົນສໍາເລັດ ເນື່ອງຈາກໄດ້ຮັບການຊີ້ນໍາຂອງຂັ້ນເທິງແຕ່ລະດັບສູນກາງຮອດທ້ອງຖິ່ນ ຈຶ່ງສາມາດເຮັດໃຫ້ການຈັດຕັ້ງການສອບເສັງມີຜົນສໍາເລັດຕາມຄາດໝາຍທຸກປະການ, ໄດ້ມີການລົງເຜີຍແຜ່ຂໍ້ມູນຂ່າວສານກ່ຽວກັບການສອບເສັງຄັດເລືອກນັກສຶກສາ ຕາມຫຼັກສູດທີ່ມີຢູ່ໃນມະຫາວິທະຍາໄລ ແລະ ດ້ານນະໂຍບາຍໃນການສອບເສັງ ປະກອບມີ ສອບເສັງເຂົ້າໄດ້ຈ່າຍຄ່າຮຽນ, ເສັງເຂົ້າໄດ້ແຕ່ຍົດເວັນຄ່າຮຽນ (ຜູ້ດ້ອຍໂອກາດ, ຜູ້ທຸກຍາກ, ແມ່ຍິງ ແລະ ຜູ້ຮຽນເກັ່ງ), ເສັງເຂົ້າໄດ້ຄະແນນດີ ສະເໜີເອົາເບ້ຍລ້ຽງ, ເສັງເຂົ້າໄດ້ ມີຄະແນນ ມ7 ດີ ໄດ້ເບ້ຍລ້ຽງລັດຖະບານ, ເສັງເຂົ້າໄດ້ແຕ່ທ້ອງຖິ່ນຮັບຜິດຊອບຄ່າໃຊ້ຈ່າຍຕ່າງໆ ແລະ ພະນັກງານມາຮຽນຕໍ່. ສໍາລັບເງື່ອນໄຂໃນການເຂົ້າຮຽນ ແມ່ນມອບໃຫ້ມະຫາວິທະຍາໄລ ເປັນເຈົ້າການເອງ.

ໂດຍ: ນາງ ຕຸ່ນຄໍາ