​​ນາວາ​ສັກສິດ 4 ​ຄອງ​ແຊ໋ມ ເຮືອກິລາ 12 ສີພາຍຊາຍ ທີ່ບຶງ​ທາດຫຼວງ 2018

ສຶກສາ

Written by Super User

ນາວາ​ສັກສິດ 4 ​ຄອງ​ແຊ໋ມ ເຮືອກິລາ 12 ສີພາຍຊາຍ ທີ່ບຶງ​ທາດຫຼວງ 2018  

28906781 1349402028495279 312906926 n   ເຮືອ​ນາວາ​ສັກສິດ 4 ຫຼື ເທບພິຊິດໄຊ ບ້ານນາລ້ອງ ເມືອງຫາດຊາຍຟອງ ຄວ້າ​ແຊ໋ມການ​ແຂ່ງຂັນຊ່ວງ​ເຮືອ​ກິລາ 12 ສີພາຍ ທີ່ບຶງທາດຫຼວງ ​ເມືອງ​ໄຊ​ເຊ​ດຖາ ນະຄອນຫຼວງ​ວຽງ​ຈັນ ປະຈຳ​ປີ 2018 ໄປຄອງໄດ້ສຳເລັດ. ​​ຂະນະ​ທີ່​ປະເພດເຮືອຍິງ ແຊ໋ມຕົກເປັນຂອງ ເຮືອບໍລິສັດ ພັນທະວົງ ຈັດສັນທີ່ດິນ ບ້ານແຈ້ງ ເມືອງທຸລະຄົມ ແຂວງວຽງຈັນ.ການ​ແຂ່ງຂັນ​ກິລາ​ເຮືອ 12 ສີ​ພາຍ ປະ​ເພດ​ຊາຍ ​ແລະ ຍິງ ຄັ້ງນີ້  ​ໄດ້ຈັດ​ຂຶ້ນ​​ໃນລະຫວ່າງ​ວັນ​ທີ 8-10 ມີນາ ຜ່ານ​ມາ ທີ່​​ເມືອງ​ທ່ອງ​ທ່ຽວ​ໜອງ​ນ້ຳ​ທຳ​ມະຊາດ ແລະ ວັດທະນະທຳ (ບຶງທາດຫຼວງ), ​ໂດ​ຍ​ໃຫ້​ກຽດ​ເຂົ້າ​ຮ່ວມ ​ແລະ ມອບ​ລາງວັນ​ຂອງ​ ທ່ານ ສີ​ຫຸນ ສິດທິ​ລື​ໄຊ ຮອງ​ເຈົ້າ​ຄອງ​ນະຄອນຫຼວງ​ວຽງ​ຈັນ ​ແລະ ທ່ານ ຖະໜອມ ທໍາ​ທອງ ​ເຈົ້າ​ເມືອງ​ໄຊ​ເຊ​ດຖາ ທັງ​ເປັນ​ປະທານ​ຈັດ​ງານ​, ມີ​ບັນດາ​ຫົວໜ້າ​ພະ​ແນ​ກ, ​ເຈົ້າ​ເມືອງ ​ແລະ ​ແຂກທີ່​ຖືກ​ເຊີນ ຕະຫຼອດ​ຮອດ​ຜູ້​ໃຫ້ການ​ສະໜັບສະໜູນ ​ແລະ ພໍ່-​ແມ່​ປະຊາຊົນ​ຊາວ​ນະຄອນຫຼວງ​ວຽງ​ຈັນ ກໍ່​ຄື​ເມືອງ​ໄຊ​ເຊ​ດຖາ ​ເຂົ້າ​ຮ່ວມ​ຊົມ ​ແລະ ​ເຊຍ​ຢ່າງ​ຫຼວງ​ຫຼາຍ..

        ​ການ​ແຂ່ງຂັນ​ຊ່ວງເຮືອ​ຄັ້ງ​ນີ້ ກໍ່ເພື່ອ​​ເປັນ​ການອະນຸ​ລັກ ​ຮັກສາ​ຮີດຄອງ​ປະເພນີ​ອັນ​ດີງາມ​ຂອງ​ຊາດ ​ໃຫ້​ຢູ່ຄຽງ​ຄູ່ສັງຄົມ ແລະ ວິຖີ​ຊີວິດ​ຂອງ​ປະຊາ​ຊົນ​ລາວ​ບັນດາເຜົ່າປະກອບສ່ວນ​ສ້າງ​ຂະບວນ​ຟົດຟື້ນ ສະຫຼອງ​​ປີ​ທ່ອງ​ທ່ຽວ​ລາວ 2018 ​​ໃຫ້​ມີ​ຄວາມ​ໝາຍ​ຢ່າງ​ເລິກເຊິ່ງ ​ໂດຍມີ​ເຮືອ​ເຂົ້າ​ຮ່ວມ​ແຂ່ງຂັນ​ທັງ​ໝົດ 26 ລໍາ, ​ໃນ​ນັ້ນ ສຳລັບ​​ປະ​ເພດ​ຍິງ ມີ 5 ລໍ​າ ​ແລະ ປະ​ເພດ​ຊາຍ ມີ 21 ລໍາ. ຜ່ານ​ການ​ແຂ່ງຂັນ​ຜົນ​ປາກົດ​ວ່າ: ​​ປະ​ເພດ​ຊາຍ ອັນ​ດັບ 1 ​ເຮືອ​ນາວາ​ສັກສິດ4 ຫຼື ເທບພິຊິດໄຊ ບ້ານນາລ້ອງ ເມືອງຫາດຊາຍຟອງ, ອັນ​ດັບ 2 ​ເຮືອເທບທິດາສ້ອຍຟ້າ ​ບ້ານ​ໄຮ​ຄໍາ ເມືອງໄຊເຊດຖາ, ອັນ​ດັບ 3 ນາວາ​ສັກສິດ3 ບ້ານໄຊສະຖານ ເມືອງສີສັດຕະນາກ ​ແລະ ອັນ​ດັບ 4 ​ເຮືອນາວາ​ສັກສິດ1 ບ້ານໄຊສະຖານ ເມືອງສີສັດຕະນາກ.

       ສ່ວນ​ປະ​ເພດ​ຍິງ ຊະນະ​ເລີດ​ໄດ້​ແກ່ ​ເຮືອບໍລິສັດ ພັນທະວົງ ຈັດສັນທີ່ດິນ ບ້ານແຈ້ງ ເມືອງທຸລະຄົມ ແຂວງວຽງຈັນ, ອັນ​ດັບ 2 ​ເຮືອ​ບ້ານ​ແສນ​ດິນ2 ເມືອງນາຊາຍທອງ,  ອັນ​ດັບ 3 ​ເຮືອ​ສະຫວັນ​ນະ​ເຂດ ​​ແລະ ອັນ​ດັບ 4 ​ເຮືອ​ບ້ານ​ແສນ​ດິນ1. ​ສຳລັບລາງວັນ​ທັງ​ 2 ປະ​ເພດ ​ແມ່ນ​ເທົ່າ​ກັນ ຄື: ລາງວັນຊະນະເລີດ ໄດ້​ຮັບ​ຂັນ 1 ໜ່ວຍ ພ້ອມເງິນສົດ 6 ລ້ານ​ກີບ, ອັນດັບ 2 ​ໄດ້​ຮັບ​ເງິນສົດ 4 ລ້ານ​ກີບ, ອັນດັບ 3 ​ໄດ້​ຮັບ​ເງິນສົດ 3 ລ້ານ​ກີບ ​ແລະ ອັນດັບ 4 ​ໄດ້​ຮັບ​ເງິນສົດ 2 ລ້ານ​ກີບນອກຈາກ​ນີ້ ພາຍໃນງານຍັງ​ມີ​ກິດຈະ​ກໍາ​ແຂ່ງຂັນເຮືອ​ເຈັສ​ກີ, ການສະແດງພາລາ​ມໍ​ເຕີ, ການ​ແຂ່ງຂັນ​ກິລາມວຍ​ສາກົນ ​ແລະ ການວາງສະແດງ​ສິນຄ້າ​ທັງ​ພາຍ​ໃນ-ຕ່າງປະເທດ ໂດຍ​ສະເພາະແມ່ນສິນຄ້າໂອ​ດ໊ອບ​ຂອງ​ເມືອງ ພ້ອມກັບ​ການສະແດງ​ສິລະ​ປະ​ດົນຕີ ແລະ ເຄື່ອງ​ຫຼິ້ນ​ຕ່າງໆ.

    ​ ​ໂດຍ ສົງການ