ບັນດາພະແນກການ ແຂວງຊຽງຂວາງ ມອບເຄື່ອງໃຫ້ບ້ານແຮກສ່ຽວ ໂອກາດວັນແມ່ຍິງສາກົນ

ສຶກສາ

Written by Super User

ບັນດາພະແນກການ ແຂວງຊຽງຂວາງ ມອບເຄື່ອງໃຫ້ບ້ານແຮກສ່ຽວ ໂອກາດວັນແມ່ຍິງສາກົນ

28943769 1349402298495252 56738847 o    ບັນດາພະແນກການຂອງແຂວງຊຽງຂວາງ ໄດ້ລົງມອບເຄື່ອງນຸ່ງຫົ່ມໃຫ້ບັນດາບ້ານແຮກສ່ຽວ ຢູ່ຈຸດສຸມນ້ຳສຽມ ກຸ່ມສົມບຸນ ເມືອງຜາໄຊ ແຂວງຊຽງຂວາງ ໃນວັນທີ 7 ມີນາ ຜ່ານມາ, ໂດຍໃຫ້ກຽດນຳພາຂອງທ່ານ ຄຳແສນ ມະນີວົງ ຮອງເຈົ້າແຂວງຊຽງຂວາງ, ມີບັນດາຫົວໜ້າ-ຮອງຫົວໜ້າພະແນກການຕ່າງໆອ້ອມຂ້າງແຂວງ ແລະ ການນຳຂອງເມືອງຜາໄຊເຂົ້າຮ່ວມຕິດຕາມ.ການນໍາເຄື່ອງໄປມອບໃນຄັ້ງນີ້, ປະກອບມີເຄື່ອງນຸ່ງຫົ່ມ ຈຳນວນ 1 ເປົາໃຫຍ່ ໜັກ 80 ກິໂລກຼາມ ແລະ ເຄື່ອງໃຊ້ອີກຈຳນວນໜຶ່ງ. ທັງນີ້, ກໍ່ເພື່ອເປັນການອວຍພອນໃຫ້ບັນດາບ້ານ ເປັນຕົ້ນແມ່ນ ເອື້ອຍນ້ອງແມ່ຍິງ ເນື່ອງໃນໂອກາດວັນແມ່ຍິງສາກົນ (8 ມີນາ) ຄົບຮອບ 108 ປີ ແລະ ເປັນການເພີ່ມທະວີການຮ່ວມມືລະຫວ່າງພະແນກການກັບບ້ານແຮກສ່ຽວໃຫ້ຫຼາຍຂຶ້ນ, ໃຫ້ການຊ່ວຍເຫຼືອດ້ານທິດທາງ ແລະ ແລກປ່ຽນບົດຮຽນຕ່າງໆ ເພື່ອເສີມສ້າງຄວາມເຂັ້ມແຂງໃຫ້ແກ່ບ້ານ, ໃຫ້ບັນດາພະແນກການໄດ້ຮູ້ເຫັນການດຳລົງຊີວິດຂອງພໍ່-ແມ່ປະຊາຊົນ ເພື່ອຫາຊ່ອງທາງຊ່ວຍເຫຼືອໃຫ້ຄວາມຮູ້ ພັດທະນາບ້ານແບບຍືນຍົງ. ການແຮກສ່ຽວດັ່ງກ່າວ, ແມ່ນມີມາໄດ້ຫຼາຍປີແລ້ວ ແລະ ໄດ້ມີການຮ່ວມມືຊ່ວຍເຫຼືອເຊິ່ງກັນ ແລະ ກັນ ຈົນໄດ້ຮັບຜົນສຳເລັດໃນວຽກງານຫຼາຍດ້ານ.

        ສຳລັບພະແນກສຶກສາທິການ ແລະ ກິລາແຂວງ ແຮກສ່ຽວກັບບ້ານນາໄຊ, ຄະນະໂຄສະນາອົບຮົມແຂວງຊຽງຂວາງ ແມ່ນແຮກສ່ຽວກັບບ້ານຫໍສິມ-ຖ້ຳພຸກ, ສະຫະພັນແມ່ຍິງແຂວງ ແຮກສ່ຽວກັບບ້ານໜອງ, ຄະນະຈັດຕັ້ງແຂວງ ແຮກສ່ຽວກັບບ້ານສ່ອມ, ສະຫະພັນກຳມະບານແຂວງ ແຮກສ່ຽວກັບບ້ານນາຂື່, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ແຮກສ່ຽວກັບບ້ານປຸ່ງ, ຄະນະຊາວໜຸ່ມແຂວງ ແຮກສ່ຽວກັບບ້ານທຸ່ມນາຕຽງ, ຄະນະກວດກາພັກ-ລັດ ແຮກສ່ຽວກັບບ້ານພາເໜືອ, ແນວລາວສ້າງຊາດແຂວງ ແຮກສ່ຽວກັບບ້ານພາໄຕ້, ພະແນກໂຍທາທິການແຂວງ ແຮກສ່ຽວກັບບ້ານຈ່ານ້ຳ ແລະ ພະແນກສາທາລະນາສຸກ ແຮກສ່ຽວກັບບ້ານນາປັນ.

                                          ຂ່າວ: ບຸນມີ ແສງທຸມມີ