ຊາວໜຸ່ມ ມຊ ສ່ອງແສງໄຕມາດທີ I ປະຈຳປີ 2018 ພ້ອມວາງແຜນວຽກໄຕມາດທີ II

ສຶກສາ

Written by Super User

ຊາວໜຸ່ມ ມຊ ສ່ອງແສງໄຕມາດທີ I ປະຈຳປີ 2018 ພ້ອມວາງແຜນວຽກໄຕມາດທີ II

29003640 1351312024970946 546581538 n          ​ຄະນະ​ຊາວ​ໜຸ່ມ​ປະຊາຊົນ​ປະຕິວັດ​ລາວ ມະຫາວິທະຍາ​ໄລ​ແຫ່ງ​ຊາດ (ມຊ) ຈັດ​ກອງ​ປະຊຸມ​ສ່ອງ​ແສງ​ໄຕ​ມາດ​ທີ I (​ເດືອນ 1, 2 ​ແລະ 3 ) ປະຈຳ​ປີ 2018 ​ແລະ ວາງ​ທິດ​ທາງ​ແຜນການ​ເຄື່ອ​ນ​ໄຫວ​ໃນ​ໄຕ​ມາດ​ທີ II (​ເດືອນ 4, 5 ​ແລະ 6) ປະຈຳ​ປີ 2018 ເມື່ອ​ວັນ​ທີ 14 ມີນາ ຜ່ານ​ມາ ທີ່​ຫ້ອງ​ປະຊຸມ​ຄະນະ​ວິທະຍາສາດ​ສັງຄົມ ມະຫາວິທະຍາ​ໄລ​ແຫ່ງ​ຊາດ, ໂດຍ​ໃຫ້​ກຽດ​ເປັນ​ປະທານ​ຂອງສະຫາຍ ປອ. ຕຸ​ດາ​ວັນ ໜໍ່​ເມືອງ​ເສດ ຮອງ​ເລຂາ​ຄະນະ​ບໍລິຫານ​ງານ​ຊາວ​ໜຸ່ມ​ ກະຊວງ​ສຶກສາ​ທິການ ​ແລະ ກິລາ ຜູ້​ຊີ້​ນຳຄະນະ​ຊາວ​ໜຸ່ມ​ປະຊາຊົນ​ປະຕິວັດ​ລາວ ມະຫາວິທະຍາ​ໄລ​ແຫ່ງ​ຊາດ, ສະຫາຍ ຮສ. ​ໂພ​ສີ ທິບ​ດາ​ວັນ ຄະນະ​ພັກ ມະຫາວິທະຍາ​ໄລ​ແຫ່ງ​ຊາດ ຜູ້​ຊີ້​ນຳ​ອົງການ​ຈັດ​ຕັ້ງຊາວ​ໜຸ່ມ​ປະຊາຊົນ​ປະຕິວັດ​ລາວ ມຊ, ສະຫາຍ ພຽງ​ສະໜິດ ຈັນທະ​ວີ​ໄຊ ​ເລຂາຄະນະ​ຊາວ​ໜຸ່ມ​ປະຊາຊົນ​ປະຕິວັດ​ລາວ ມຊ,  ມີ​ຄະນະບໍລິຫານຊາວ​ໜຸ່ມ ມຊ, ​​ເລຂາ-ຮອງ​ເລຂາ​ຄະນະບໍລິຫານ​ງານ​ຊາວ​ໜຸ່ມ 14 ຮາກ​ຖານ, ​ກອງ​ເລຂາ ​ແລະ ຜູ້​ປະສານ​ງານ​ຂອງ​ແຕ່ລະ​ຮາກ​ຖານ ພາຍ​ໃນ​ມະຫາວິທະຍາ​ໄລ​ແຫ່ງ​ຊາດ ​ເຂົ້າ​ຮ່ວມ 30 ສະຫາຍ.

      ​ ໂອກາດ​ດັ່ງກ່າວ, ສະຫາຍ ຮສ. ພົມ​ບຸດ ສະ​ດາ​ຈິດ ຄະນະ​ພັກ​ຮາກ​ຖານ ຜູ້​ຊີ້​ນຳ 3 ອົງການ​ຈັດ​ຕັ້ງ​ມະຫາຊົນ ຄະນະ​ວິທະຍາສາດ​ສັງຄົມ ​ໄດ້​ກ່າວ​ສະຫຼຸບຜົນງານ​ການເຄື່ອນ​ໄຫວ​ທີ່​ພົ້ນ​ເດັ່ນ​ໃນ​ໄຕ​ມາດ​ທີ I (​ເດືອນ 1, 2 ​ແລະ 3 ) ປະຈຳ​ປີ 2018 ຂອງຄະນະ​ຊາວ​ໜຸ່ມ​ປະຊາຊົນ​ປະຕິວັດ​ລາວ ມະຫາວິທະຍາ​ໄລ​ແຫ່ງ​ຊາດ ໂດຍສະເພາະໄດ້ສຳ​ເລັດ​ໃນ​ການຈັດ​ພິທີ​ປາຖະ​ກະ​ຖາ​ຫວນ​ຄືນ​ມູນ​ເຊື້ອ​ຂອງ​ກອງທັບ​ປະຊາຊົນ​ລາວ ​ເນື່ອງ​ໃນ​ໂອກາດ​ວັນ​ສ້າງ​ຕັ້ງ​ກອງທັບ ຄົບຮອບ 69 ປີ, ​ໄດ້​ນຳພາ​ສະມາຊິກ​ເຂົ້າ​ຮ່ວມ​ແລກປ່ຽນ​ວັດທະນາ​ທຳ​ໃນ​ງານ​ສະ​ແດງ​ຄອນ​ເສີດ​ຂອງ​ຊາວ​ໜຸ່ມ-​ເຍົາວະ​ຊົນ​ຣັດ​ເຊຍ, ຈັດ​ຕັ້ງ​ອອກ​ແຮງ​ງານ​ລວມ (ວັນ​ເສົາ​ແດງ) ທົ່ວ ມຊ ​ໄດ້​ຈຳນວນ 3 ຄັ້ງ, ລົງ​ກວດກາ​ການ​ປະຕິບັດ​ລະບຽບ​ຂອງ​ນັກ​ສຶກສາ ຈຳນວນ 3 ຄັ້ງ, ຄະນະ​ຊາວ​ໜຸ່ມ​ຮາກ​ຖານ ຄະນະ​ສຶກສາ​ສາດ ​ໄດ້​ຈັດ​ຕັ້ງ​ພົບ​ປະ​ໂອ້​ລົມ​ສະມາຊິກ ​ໄດ້​ຈຳນວນ 12 ຄັ້ງ, ​ໄດ້​ຈັດ​ພິທີ​ຮັບອະນຸຊົນ​ຜູ້​ກ້າວໜ້າ​ເຂົ້າ​ເປັນ​ສະມາຊິກ​ເຍົາວະ​ຊົນ ຈຳນວນ 88 ນ້ອງ ​ເປັນ​ຍິງ 56 ນ້ອງ, ຊາວ​ໜຸ່ມຄູ​-ອາສາ​ສະໝັກ ​ຄະນະ​ສຶກສາ​ສາດ ​ໄດ້​ຈັດ​ພິທີ​ຮັບ​ເອົາ​ສະມາຊິກ​ໃໝ່ ຈຳນວນ 61 ສະຫາຍ ​ເປັນ​ຍິງ 35 ສະຫາຍ ​ແລະ ໄດ້ປະກອບສ່ວນເຂົ້າວຽກງານຊ່ວຍເຫຼືອສັງຄົມອື່ນໆ​ອີກຫຼາຍຢ່າງ ເປັນຕົ້ນແມ່ນການບໍລິຈາກເລືອດ, ເຂົ້າຮ່ວມກິດຈະກຳແລກປ່ຽນນັກສຶກສາ ແລະ ທຸກວຽກງານທີ່ໄດ້ຮັບມອບໝາຍຈາກຂັ້ນເທິງ, ໄດ້ນຳສົ່ງບົດຄົ້ນຄວ້າເພື່ອນຳສະເໜີ ການທົດລອງງົວທອມ ທີ່ປະເທດຍີ່ປຸ່ນ ຈຳນວນ 1 ຫົວບົດ. ນອກຈາກນັ້ນ, ສະມາຊິກຊາວໜຸ່ມນັກສຶກສາທົ່ວ ມຊ  ຍັງໄດ້ຮັບທຶນການສຶກສາຈາກມູນິທິທຶນການສຶກສາ ມະຫາວິທະຍາໄລແຫ່ງຊາດ ຈຳນວນ 853 ສະຫາຍ, ຍິງ 401 ສະຫາຍ.

       ພ້ອມ​ກັນ​ນີ້,​ ທ່ານ​ຍັງ​ໄດ້​ກ່າວ​ລາຍ​ງານທິດທາງແຜນການໄຕມາດທີ 2 ໂດຍຈະສືບຕໍ່ກະກຽມຊຸກຍູ້ການຈັດຕັ້ງເປີດກອງປະຊຸມ 3 ຂັ້ນຂອງຄະນະບໍລິຫານງານຊາວໜຸ່ມທົ່ວມະຫາວິທະຍາໄລແຫ່ງຊາດ, ຈັດຕັ້ງເຜີຍແຜ່ລະບຽບ ແລະ ສຶກສາອົບຮົມແນວຄິດໃຫ້ສະມາຊິກຊາວໜຸ່ມ, ສືບຕໍ່ເອົາໃຈໃສ່ການປະກອບສ່ວນເຂົ້າໃນຂະບວນການຮຽນ-ການສອນ ຕາມຄຳຂວັນ “ສອນດີ-ຮຽນເກັ່ງ” ທີ່ກະຊວງສຶກສາທິການ ແລະ ກິລາວາງອອກ ໂດຍເນັ້ນໃສ່ 5 ຫຼັກມູນການສຶກສາ ແລະ ກະກຽມສ້າງຂະບວນການຄໍານັບຮັບຕ້ອນວັນສຳຄັນຂອງຊາດ ແລະ ວັນບຸນຕ່າງໆ ທີ່ຈະມາເຖິງ.ໂອກາດດຽວກັນ, ສະຫາຍ ປອ. ຕຸດາວັນ ໜໍ່ເມືອງເສດ ກໍ່ໄດ້ມີຄຳເຫັນເນັ້ນໜັກໃຫ້ບັນດາສະຫາຍປະຕິບັດວຽກງານໂດຍມີຈຸດສຸມ ເປັນຕົ້ນແມ່ນການສຶກສາອົບຮົມແນວຄິດຂອງນັກຮຽນ-ນັກສຶກສາ, ເອົາໃຈໃສ່ວຽກງານກໍ່ສ້າງພະນັກງານຮຸ່ນສືບທອດ ແລະ ເຮັດໄດ້ຕາມແບບແຜນ 4 ບຸກທະລຸ, ສົ່ງເສີມໃຫ້ຊາວໜຸ່ມມີຄວາມຮູ້ຄວາມສາມາດທຽບເທົ່າສາກົນ.

      ສຳລັບກອງປະຊຸມ​ໃນ​ຄັ້ງ​ນີ້, ຍັງມີການສະເໜີ ແລະ ແລກປ່ຽນຄວາມຄິດເຫັນຮ່ວມກັນ, ພ້ອມກັນນັ້ນ ສະຫາຍ ພຽງສະໜິດ ຈັນທະວີໄຊ ກໍ່ໄດ້ມອບໃບຍ້ອງຍໍໃຫ້ແກ່ຄະນະບໍລິຫານງານຊາວໜຸ່ມຮາກຖານ ຄະນະສຶກສາສາດ, ອັກສອນສາດ ແລະ ວິສະວະກຳສາດ ທີ່ເຂົ້າຮ່ວມໂຄງການ ອ້າຍເອື້ອຍ ສອນພາສາອັງກິດໃຫ້ນ້ອງ ທີ່ແຂວງບໍລິຄຳໄຊ ໃນປີທີ່ຜ່ານມາອີກ​ດ້ວຍ.

ອຳ​ໄພ​ວັນ