​ສສກ-ຟຣັງ​ໂກ​ໂຟນີ ຫາລື​ການ​ຮ່ວມ​ມື​ດ້ານ​ການ​ຮຽນ-​ການ​ສອນ​ພາສາ​ຝຣັ່ງ

ສຶກສາ

Written by Super User

ສສກ-ຟຣັງໂກໂຟນີ ຫາລືການຮ່ວມມືດ້ານການຮຽນ-​ການສອນພາສາຝຣັ່ງ

28944082 1351311598304322 1882132671 o 1   ກະຊວງ​ສຶກສາ​ທິການ ​ແລະ ກິລາ ​ແລະ ອົງການ ຟຣັງ​ໂກ​ໂຟນີ ສາກົນ ຫາລື​ການ​ຮ່ວມ​ມື​ທາງ​ດ້ານ​ການ​ສຶກສາ ​ໂດຍ​ສະ​ເພາະ​ແມ່ນ​ການ​ຮຽນ-ການ​ສອນ​ພາສາ​ຝຣັ່ງ ​ແລະ ການ​ນໍາ​ເອົາ​ພາສາ​ຝຣັ່ງ​ ເຂົ້າໃນ​ການ​ຮັບ​ໃຊ້​​ດ້ານ​ວິຊາ​ຊີບ.ໃນວັນ​ທີ 15 ມີນາ ຜ່ານ​ມາ ທີ່​ສໍານັກງານ​ ກະຊວງ​ສຶກສາທິການ ​ແລະ ກິລາ, ທ່ານ ນາງ ​ແສງ​ເດືອນ ຫຼ້າ​ຈັນທະ​ບູນ ລັດຖະມົນຕີ ​ກະຊວງສຶກສາ​ທິການ ​ແລະ ກິລາ ​ໄດ້​ໃຫ້​ກຽດ​ຕ້ອນຮັບການ​ເຂົ້າ​ຢ້ຽມ​ພົບ​ປະ​ຂອງ​ທ່ານ ອາ​ດາ​ມາ ອວນ ຜູ້​ບໍລິຫານ​ຂອງ​ອົງການ​ຟຣັງ​ໂກ​ໂຟນີ ສາກົນ ປະ​ຈໍາ ສປປ ລາວ, ພ້ອມ​ດ້ວຍ​ຄະນະ, ມີ​ຫົວໜ້າ​ຂະ​ແໜງ​ການ, ຜູ້​ຮັບ​ຜິດ​ຊອບ​ວຽກ​ງານ​ກ່ຽວຂ້ອງ​ທັງ 2 ຝ່າຍ​ເຂົ້າ​ຮ່ວມ​ຢ່າງ​ພ້ອມພຽງ.

      ​

       ການ​ພົບ​ປະ​ໃນ​ຄັ້ງ​ນີ້, ​ແມ່ນ​ເພື່ອປຶກສາ​ຫາລື​ກ່ຽວ​ກັບ​ການ​ຮ່ວມ​ມື ລະຫວ່າງ ກະຊວງ​ສຶກສາ​ທິການ ​ແລະ ກິລາ ​ແລະ ອົງການ​ຟຣັງ​ໂກ​ໂຟນີ ສາກົນ ​ໃຫ້​ມີຄວາມແໜ້ນແຟ້ນ​ຍິ່ງ​ຂຶ້ນ ເພື່ອພັດທະນາຄຸນະພາບ​ດ້ານ​ການສຶກສາ ​ເປັນ​ຕົ້ນ​ແມ່ນການ​ຮຽນ-​ການ​ສອນ​ພາສາ​ຝຣັ່ງ, ​ການ​ນໍາ​ໃຊ້ພາສາ​ຝຣັ່ງ​ ​ເຂົ້າ​ໃນ​ການ​ຮັບ​ໃຊ້​ທາງ​ດ້ານ​ວິຊາ​ຊີບ ທັງ​ເປັນ​ການ​ເສີມ​ຂະຫຍາຍ​ພາສາ​ຝຣັ່ງ​ໃນ ສປປ ລາວ ​ໂດຍ​ຈະ​ຕ້ອງ​ໄດ້​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ພະນັກງານ, ຄູ-​ອາຈານ ​ໃຫ້​ຮຽນ​ຮູ້​ພາສາ​ຝຣັ່ງ​ຂຶ້ນ​ຕື່ມ.ໂອກາດ​ດັ່ງ​ກ່າວ, ທ່ານ ນາງ ​ແສງ​ເດືອນ ຫຼ້າ​ຈັນທະ​ບູນ ກໍ່​ໄດ້​ກ່າວ​ສະ​ແດງ​ຄວາມ​ຕ້ອນຮັບ​ຢ່າງ​ອົບ​ອຸ່ນ ​ແລະ ການ​ຮຽນ-​ການ​ສອນ​ພາສາ​ຝຣັ່ງຕ້ອງ​ໄດ້​ສືບ​ຕໍ່​ໃນ​ ສປປ ລາວ ພ້ອມ​ທັງ​ສະ​ແດງ​ຄວາມ​ຂອບ​ໃຈ​ຕໍ່​ກັບ​ສະຖານທູດ ກາ​ນາ​ດາ,  ​​ເບ​ລຢ້ຽມ ​ແລະ ສະ​ຖານ​ທູດ​ຝຣັ່ງ ​ທີ່​ໃຫ້ການ​ຊ່ວຍ​ເຫຼືອ​ໃນ​ການ​ພິມ​ປຶ້ມ​ກ່ຽວ​ກັບ​ວິຊາຄະນິດສາດ, ຟີ​ຊິກ​ສາດ, ​ເຄມີ​ສາດ ​ແລະ ຊີວະ​ສາດຂອງ​ຊັ້ນ​ມັດທະຍົມ​ຕົ້ນ ​ແລະ ມັດທະຍົມ​ປາຍ ທີ່ແ​ປ​ຈາກ​ພາສາ​ລາວ ​ເປັນ​ພາສາ​ຝຣັ່ງ ​ໂດຍ​ແມ່ນຫຼັກສູດດຽວກັນ​ກັບ​ກະຊວງ​ສຶກສາ​ທິການ ​ແລະ ກິລາ​ວາງອອກ.

​      ສຳລັບໂຄງການ​ຫ້ອງ​ຮຽນ​ 2 ພາສາລາວ-​ຝຣັ່ງ ​ໄດ້​ຖືກ​ຈັດ​ຕັ້ງ ​ແລະ ດໍາ​ເນີນ​ມ​າ​ແຕ່​ສົກ​ຮຽນ 1995-1996 ທີ່​ນະຄ​ອນຫຼວງ​ວຽງ​ຈັນ ​ໂດຍ​ແມ່ນລັດຖະບານຝຣັ່ງ​ເປັນ​ຜູ້​ໃຫ້​ທຶນ​ໃນ​ນາມ​​ໂຄງການ​ກອງ​ທຶນ​ບຸລິ​ມະ​ສິດ ​ເພື່ອ​ຄວາມ​ສາມັກຄີ, ຄູ​ສອນ​ໄດ້​ຮັບ​ຄວາມ​ຮູ້ອັນ​ໃໝ່​ຈາກ​ການ​ເຝິກອົບຮົມ, ນັກຮຽນ​ມີ​ຄວາມ​ສົນ​ໃຈ ​ແລະ ມີ​ຄວາມ​ມັກ​ຮັກ​ການ​ຮຽນພາສາ​ຝຣັ່ງ, ​​ເຊິ່ງມັນສະ​ແດ​ງອອກ​ໃນ​ການ​ສອບ​ເສັງ​ຈົບ​ຊັ້ນ ​ແລະ ​ເລື່ອນຂັ້ນ​ໄດ້ຮັບ​ໝາກຜົນ​ທີ່​ດີງາມ ​ແລະ ​ໄດ້​ຮັບ​ຄວາມ​ສົນ​​ໃຈ​ຈາກ​ຜູ້​ປົກຄອງ​ເປັນ​ຢ່າງ​ດີ. ນອກຈາກ​ນີ້, ຫ້ອງ​ຮຽນ​ 2 ​ພາສາລາວ-​ຝຣັ່ງ ຍັງ​ເປັນ​ບ່ອນ​ຜະລິດ​ບຸຄະລາ​ກອນ​ທີ່​ມີ​ຄຸນະພາບ​ໃຫ້​ແກ່​ມະຫາ​ວິ​ທະຍາ​​ໄລ, ວິທະຍາ​ໄລ​ທັງ​ພາຍ​ໃນ ​ແລະ ຕ່າງ​ປະ​ເທດ.

(ບຸນ​ທະວີ)